یوحنا 4

عیسی ئو ژَن سامری

1وخدی عیسی خداون فیَمی گه شیخَل فرقَه فَریسی شنَفتونَ عیسی ویشتِر اژ یحیی شاگرد دیری ئو خُسِل تیَمیدونَ مِ، 2-وَه‌یاآگه شاگردَل عیسی تیَمیدونَ ما نه ووژ- 3هیال یهودیَه وِل کِردی ئو اِدوارَه گِلاهُاردی اَرِه هیال جلیل. 4ئو باس اژ هیال سامرَه رد بوئیا. 5اَسَه رَسی اَر شیَری اژ سامرَه گه نُم سوخار بیتی، نزیک گُلَه زمینی گه یعقوب دائیتیَ یوسف کُر ووژ. 6چا یعقوب اَر اورَه بیَ ئو عیسی اژ شَکَتی رئی نیشت اَر کَش چا. نزیک سات دوازَه نیمَرو بی.

7اَسَه، ژَنی اژ مردِم سامرَه هات تاگَه آو بِکیشی. عیسی وِتَ بی: «خُرّی آومَ بی دَ،» 8اَرِیَگه شاگردَلی چوئین اَرِه شیَر تاگَه خوراک بِخِرِن. 9ژَن سامری وِتیَ عیسی: «چطورَ، تو گه یهودی‌ای کین، اژ مِنی گه ژَن سامری کِم آوتَ مِ؟» اَرِیَگه یهودیَل وَه‌گَرد سامریَل اصِلا هاتِن‌چیئینو ناآشد. 10عیسی جوواو داتی: «اَرّ اژ چیئی گه خدا بی تِلافَتی پیشکَشیَ مِ، خَوَرِت داشد، ئو مَذِناسدِت کیَ گه اژ تو آوَ مِیتی، تو ووژِت اژ اوتَ مِهِست، تاگَه آو زِنیَ مَوئَشخیاتیَ بینِت.» 11ژِنَهَه وِتَ بی: «آقا، دَلم نِرین ئو چائیش قویلَ، اِسَه آو زِنی اژ کوءَ مارین؟ 12مَر تو اژ باوَه‌جد ایمَه یعقوب کَلِنگتِرین گه ایی چاءَ داءَ ایمَه، ئو ووژ ئو کُرَلی ئو ریَئنَلی آوُن اَژینَ مَهُارد؟» 13عیسی وِتَ بی: «هر کی اژ ایی آوَ خُرَّ مِ، اِدوارَه تینیَ ماوتی. 14مِنتائای هر کی اژ اَ آوَ گه مِنَ میَمیَ بی خُرّ دِ، هرگِس اِدوارَه تینی نِماوتی، بلکِم آوی گه مِنَ میَمیَ بی، اِ دَرین او ماوَ کیَنی‌ای گه تا ژییاین ابدی قُلَ میری.» 15ژِنَهَه وِتَ بی: «آقا، اژ ایی آوَ بیَ بینِم، تاگَه دیَر تینیم ناو ئو نام اَرِه ایرَه آو بِکیشِم.» 16عیسی وِتَ بی: «بِچُ، میردَه‌ت هِنا کَ ئو گِلار.» 17ژِنَهَه جوواو داتی: «میردَه نِرِم.» عیسی وِتَ بی: «یَگه موشین، ”میردَه نِرِم“ راسَ مِین، 18اَرِیَگه پنج میردَه‌ت داشد ئو اویشَ گه اِسگَه دیرین، میردَه‌ت نیَ. اَ چیئَه گه وِتِت راسَ!» 19ژِنَهَه وِتی: «آقا، مَذانِم گه پِخَمَری کین. 20اَژداد ایمَه اَر سر ایی کویَ عَبادتونَ مَهَرد، مِنتائای هُمَه یهودیِلَ موشینو جای گه مردِم باس اِنومی خدا بِپِرَسِن شیَر اورشلیمَ.» 21عیسی وِتَ بی: «اِ ژَن، باوار کَ، زمونی مای گه باوَه آسمونی نه اَر سر ایی کویَ مَپِرَسینو، نه اِنوم اورشلیم. 22هُمَه اَ چیئَه گه نِمَشتاسینو مَپِرَسینو، مِنتائای ایمَه اَ چیئَه گه مَشتاسیمو مَپِرَسیم، اَرِیَگه نجاد وَه‌سونگَ یهودیِلَ مای. 23مِنتائای زمونی مای، ئو هَراِسگِه‌یشَ هاتیَ، گه خداپِرَسَل حخیخی، باوَه اِنوم روح ئو حخیختَ مَپِرَسِن، اَرِیَگه باوَه هُنَ کسَلی مِیتی گه بِپِرَسِنی. 24خدا روحَ ئو کسَلی گه مَپِرَسِنی باس اِنوم روح ئو حخیخت بِپِرَسِنی.» 25ژِنَهَه وِتَ بی: «مَذانِم گه ماشیَح هَراَ مسیحی گه باس بای، مای؛ وخدی او بای، کُل چی اَرِنمو آشگارَ مِهِه.» 26عیسی وِتیَ ژِنَهَه: «مِه گه دیرِم وَه‌گَردِت قصَه مَهَم، هَر اَوِمَ.»

27اَسَه، شاگردَل عیسی گلوناهُاردَ دُما ئو بِلُجوئیو هات گه دیری وَه‌گَرد ژَنی قصَه مِهِه. مِنتائای هُیچ‌کُم نَپِرسیو «چَتَ مِ؟» یاگَه «اَرِه‌چَه وَه‌گَرد او قصَه مِهِین؟» 28اَسَه ژِنَهَه کویزَه ووژ هُیشتی اَر جا ئو چی اَرِه نوم شیَر ئو وِتیَ مردِم: 29«بورِن کسی بوئینِن گه هر چَمی تا اِسگَه کِردوئی، وِتیَ بینِم. یانی ماو او هَراَ مسیحَ بوءَ گه باس بای؟» 30اونَل اژ شیَر هاتِنَ دِریر، کَتِنِ رئی چِن اَرِه تک عیسی.

31اِ ایی بِنَ، شاگردَل لالکینیَ بی، وِتو: «استاد، چیئی بیر.» 32مِنتائای عیسی وِتیَ بینو: «مِه خوراکی اَرِه هُاردِن دیرِم گه هُمَه اژ اَوَه چیئی نِمَذانینو.» 33وَه ایی خاطرَ شاگردَل وِتونَ یَکتِری: «مَر کسی خوراک اَرِه آوِردیَ؟» 34عیسی وِتیَ بینو: «خوراک مِه یَسَ گه خواس اَوَه گه مِه کِل‌کِردیَسی، اَنجوم دَم، ئو کار او وَه سرانجوم برَسِنِم. 35مَر هُمَه ایی قصَه‌تونَ نَشتَفتیَ گه ”چوار مُنگ ویشتِر تا مُسِم درو نَمَنیَ“؟ مِنتائای موشِمَ بینتو، چیَمَلتو واز بِیلِن ئو بوئینِن گه هَراِسگَه کِشتَل اَرِه درو حاضرِن. 36اِسگَه، کسی گه دروءَ مِهِه مِز ووژَ مَسینی ئو اَرِه ژییاین ابدی ثمری جیَمَ مِهِه، تا کسی گه کشتَ مِهِه ئو کسی گه دروءَ مِهِه وَه‌گَرد یَک خَوشی بِهَن. 37اَر ایرَه ایی قصَه راسَ گه ”یَکی کشتَ مِهِه ئو یَکی‌تِر دروءَ مِهِه“. 38مِه هُمَه‌م کِل‌کِرد تاگَه ثمری درو کِینو گه اژ جُور کیشین ووژتو نیَ. کسَلی‌تِر جُورو کیشیَ ئو هُمَه اژ جُور کیشین اونَ بیَرَ میَرینو.»

39اَسَه فِرَه کسَل اژ سامریَلی گه اِنوم اَ شیَرَ بینَ ایمونو آوِرد اَر عیسی وَه خاطر شاتی اَ ژِنَ گه وِتوئیتی «هر چَمی گه تا اِسگَه کِردوئی، وِتیَ بینِم،». 40وخدی اَ سامریِلَ هاتن اَرِه تک عیسی، اژ اوُ هِست تا بِمینی اَر تَکو. اَسَه دو روژ مَن اَر اورَه. 41ئو آمَل فِرَه‌تِریشی وَه خاطر شِنَفتِن قصَه‌ل عیسی ایمونو آوِرد. 42اونَل موئِتونَ اَ ژِنَ: «اِسگَه دیَر فَخَد وَه خاطر قصَه تو ایمو نِماریم، اَرِیَگه ووژمو قصَه‌ل اومو شنَفتیَ ئو مَذانیم گه ایی پیا حخیختاً نجاددهندَه دنیاءَ.»

عیسی اِنوم جلیل

43دُما اَ دو روژَ، عیسی اژ اورَه چی اَرِه جلیل، 44اَرِیَگه ووژ وِتوئیتی گه «پِخَمَر اِنوم شیَر ووژ قُرپی نِری.» 45وخدی رَسی اَر جلیل، جلیلیَل هاتِنیِ نوا، اَرِیَگه اون‌یش اَرِه عِد چوئین اَرِه شیَر اورشلیم ئو اَ چیئَه گه عیسی اَر اورَه کِردوئیتی، دوئیو.

شِفا کُر یِه درباری

46اَسَه، عیسی یِگِلی‌تِر چی اَرِه آبادی قانا اِ جلیل، هَراَ جاءَ گه آو کِردوئیتیَ شِراو. اَر اورَه یَکی اژ درباریَل بی گه کُر مریضی اِنوم شیَر کَفَرناحوم داشدی. 47وخدی گه شنَفتی عیسی اژ یهودیَه هاتیَس اَرِه جلیل، چی اَرِه تک عیسی ئو لالکیتیَ بی گه بای ویرِ هُار تاگَه کُری شِفا بِ، اَرِیَگه کُری اَرسَکَرات بی. 48عیسی وِتَ بی: «تاگَه نشونَه‌ل ئو مُجِزَه‌ل بِلُجوئی نوئینینو، ایمو نِمارینو.» 49اَ پیاءَ وِتی: «آقا، وِر اژ یَگه آویلِم بِمِری، بوری.» 50عیسی وِتَ بی: «بِچُ؛ کُرِت زِنیَ مَمینی.» اَ پیا کلوم عیسی باوار کِردی ئو کَتِ رئی. 51هَنی اِنوم رئی بی گه خِلمتکارَلی هاتِنیِ نوا، وِتو: «حال کُرِت دیری خوآ ماو.» 52اژ اونَل پِرسیتی: «اژ چه ساتی ویرِ خوئی چی؟» وِتو: «دُنَ، سات یَک نیمَرو تُو قط بیتی.» 53اِسگَه باوَه فیَمی گه یَه هَراَ ساتَ بیَسَ گه عیسی وِتوئیَ بی: «کُرِت زِنیَ مَمینی.» اَسَه ووژ ئو کُل عتِ‌عیالی ایمونو آوِرد. 54یَه دوئِمین نشونَه ئو مُجِزِه‌ی بی گه عیسی وخدی گه اژ یهودیَه هات اَرِه جلیل، اَنجوم داتی.

Currently Selected:

یوحنا 4: LBT

Highlight

Copy