کارَل رسولَل 6

هفت نفر اَرِه خِلمت اِنتخاوَ موئن

1اِ، اَ روژِلَ گه شاگردَل ویشتِرا موئیان، یهودیَل یونانی‌زوئو گِلِیون اژ یهودیَل عبرانی‌زوئو کِرد گه بیوَه‌‌ژِنَلو اژ ژیرَه هر روژ خوراک بی‌بیَرَ مَمینِن. 2اَسَه اَ دوازَه رسولَ، کُل شاگردَلو هِنا کِرد ئو وِتو: «خو نیَ گه ایمَه وَه خاطر بیَرا کِردِن خوراک، موعظَه کلوم خدا بنیمِ لا. 3اِسَه اِاِ بِرال، اژ نوم ووژتو هفت پیا نُم‌نیک گه پِر اژ روح‌القدس ئو حکمتِن جیاآ کَن تاگَه بِنیمِنون اَرسر ایی کارَ، 4ئو ایمَه کُل وَخدمو بِنیم اَرِه دوعا ئو خِلمت کلوم خدا.»

5کُل اژ ایی قصَه خَوشو هات. اَسَه استیفانو گه پیای پِر اژ ایمون ئو روح‌القدس بی، وَه‌گَرد فیلیپُس، پْروخُروس، نیکانور، تیمون، پَرمیناس ئو نیکولائوس، گه اژ مردِم اَنطاکیَه بی ئو یهودیا بوئی، اِنتخاو کِرد. 6ایی پیالونَ آوِرد اِرَه تک رسولَل ئو رسولَل دوعائو کِرد، ئو اَرِه ایی خِلمتَ دَسو نا اَرنوم سرو.

7ئو هَرهُنَ، کلوم خدا پَشخا موئیا ئو اِنوم شیَر اورشلیم شاگردَل ویشتِرا موئیان ئو بِری اژ کاهنَل‌یش ایمونو آوِرد.

استیفانَ مَگِرِن

8استیفان پِر اژ فیض ئو قدِرت بی ئو مُجِزَه‌ل ئو نشونَه‌ل کَلِنگی اِنوم مردِم اَنجومَ ماتی. 9مِنتائای بِری اژ عضا عَبادتگا یهود گه وَه عَبادتگا ’آزادبیَل‘ مَشور بی، ئو اژ یهودیَل قیرَوان ئو اسکندریَه ئو هَمیش بِری اژ مردِم کیلیکیَه ئو هیال آسیا بین، بینَ دَمَرَگَ گَرد او. 10مِنتائای اونَل نِمَتونستو اِبِرُوَر حکمت ئو روح‌القدسی گه استیفان وَه اَوَه قصَه مَهَردی، طاخَت بارِن. 11اِسَه وَه بی‌کِشکیا بِرونی آنتریک کِرد تاگَه بوشِن: «ایمَه شنَفتِمونَ گه استیفان کِفِر موسی ئو خدا مَهَردی.»

12اونَل مردِم ئو شیخَل دین ئو مَلِمَل توراتو آنتریک کِرد ئو رِشیان اَرسر استیفان‌اِرا، اوُ گِرت ئو بِردون اِرَه تک شورا یهود. 13چَن شات دِروزِنِ‌یشو آوِرد گه موئِتو: «ایی پیا گِری اژ قصَه کِردِن اَرضد ایی جا مقدّسَ ئو شریعت یهود نِمَکُمی. 14اَرِیَگه ووژمو شنَفتِمونَ گه موئِتی: ایی عیسیِ ناصریَ ایی جا اِرَمَرِمِنی‌ ئو رسمِ‌رِسیمی گه موسی سپارتی‌ئونمو، عوضَ مِهِه.» 15هَراَ حِنَ، کُل کسَلی گه اِنوم شورا بین، گِزو کِرد اَر استیفان ئو دییو نوم‌رُی بیَسیَ چُی نوم‌رُی فریشدَه‌ل.

Currently Selected:

کارَل رسولَل 6: LBT

Highlight

Copy