کارَل رسولَل 5

حَنانیا ئو سَفیرَه

1مِنتائای پیای گه نُم حَنانیا بیتی وَه‌گَرد ژِنِهِه سَفیرَه یِه مِلکی فِروتی، 2قِیلی اژ پیلِهَه گه ژِنِهِه‌یشی اَژی خَوَر داشد، گِلاداتی ئو فَخَد یِه بیَر اَژی آوِرد نا اَر وَر پال رسولَل. 3پطرس وِتون: «حَنانیا، اَرّا هُیشتِت شِطو دلِت پِرا کِ، گه دِرو بوشینَ روح‌القدس ئو قِیلی اژ پیل زمینِهَه اَرِه ووژِت هیزدِین؟ 4مَر وِر اژ فِروتِن، هِن ووژِت نوئی؟ ئو دُما فِروتِن‌یش صِلا پیلِهِه مَرَ دس ووژِت نوئی؟ چه زورتی اَرسر بی گه هُنَ بِهِین؟ تو نه وَه اِنسو، بلکِم دِروتَ خدا وِت!»

5هَریَگه حَنانیا ایی قصه‌لَ شنَفتی، کَت اَر دل زمین ئو گیو ناتی! کُل کسَلی گه یِئونَ شنَفت ترس اِراگِرتِنی. 6اَسَه جِهالَل هیزو گِرت ئو، اوُ لو اِردا اِ کفن ئو بِردونَ دِریر، نائونِ قور.

7نزیک اَر سه ساتَ بی چِتی، ژَن حَنانیا بی‌خَوَر اژ ایی اتفاقَ هات اِنوم. 8پطرس پِرسی اَژی: «بوش‌ئونِم بوئینِم یانی ایی زمینتونَ هَر وَه ایی نَسَخَ فِروتیَ؟»

سَفیرَه جوواوا داتی: «اَاَ، هَر وَه ایی نَسَخَ.»

9پطرس وِتون: «اَرّا وَه‌گَرد یَک هُم‌دَس بینونَ تاگَه روحِ خداون اِنتحو کِینو؟ یَه بِذان، اونَلی گه میردَه تونو ناسِ قور هَراِسگَه پائلو هار دِراخِل، ئو تونیشَ میَرِنَ دِریر.»

10جاوارجا، سَفیرِه‌یش اِ وَر پال پطرس کَت اَر دل زمین ئو گیو ناتی. وخدی جِهالَل هاتِن اِنوم، دییو گه اویش مِردیَ، ئو بِردونَ دِریر، اَر لِف میردِه‌ی نائونِ قور. 11اَسَه کُل کلیسا ئو کُل کسَلی گه ایی گَپونَ شنَفت ترس فِرِه اِراگِرتِنی.

نشونَه‌ل ئو مُجِزَه‌ل رسولَل

12نشونَه‌ل ئو مُجِزَه‌ل فِرِه اِنوم قوم وَه دس رسولَل اَنجومَ موئیا ئو ایمودارَل کُل یِه‌دل جیَمَ موئیان اِنوم طارِمی سلیمان. 13مِنتائای هُیچ کُم اژ کسَلی‌تِر جورَتو نِمَهَرد نزیک اَر اونِلا بوئن، وَه‌یاآگه کُل مردِم فِرَه عزّتونَ مَنیا اَرینو. 14ئو بِری اژ پیال ئو ژِنَل ایمونونَ ماوِرد اَر خداون ئو اضافَه‌آ موئیان اَر جَرخَه اونَل، 15تاگَه جای گه جُ‌جُ مریضَلونَ ماوِرد اِنوم مِدونَل شیَر ئو اونَلونَ مَحیوَسو‌ن اَررُی رَختاوَل ئو نالیَل تاگَه وخدی پطرس اژ اورَه کِلَ ماو، دسِ‌کم سا بِکُوئیتی اَررُی بِری اَژینو. 16ئو هَمیش مردِم بِربِر اژ شیَرَل هِناس اورشلیمَ ماهاتِن ئو مریضَل ئو کسَلی گه کَتوئینَ گیر روحَل گَنونَ ماوِرد، ئو کُل شِفائونَ مَگِرت.

رسولَلَ مَگِرِن

17مِنتائای کاهن اعظم ئو کُل هُمکارَلی گه اژ فرقَه صَدّوقی بین، اژ زور حَسوئی دَسَ‌کارا بین 18ئو رسولَلو گِرت، اونَلو آوشد اِنوم زندو شیَر. 19مِنتائای هَراَ شوءَ، فریشدَه خداون دِرَل زندو واز کِردی ئو آوِردِنیَ دِریر 20ئو وِتی: «بِچِن ئو بوسِن اِنوم معبد ئو تموم پِغوم ایی ژییاینَ بوشِنَ مردِم.»

21اَسَه گه یِئونَ شنَفت شوصو چِن اِرَه نوم معبد ئو بِنیائو نا اَر تیَلیم دائِن.

وخدی کاهن اعظم ئو هُمکارَلی هاتِن، هِنائو کِردِ کُل شیخَل اسرائیل ئو عضا شورا، ئو کسَلونی کِل‌کِرد تاگَه رسولَل اژ زندو بارِن. 22مِنتائای وخدی مأمورَل چِن اِنوم زندو، رسولَلو نِئیا. اِسَه گِلوناهُارد، خَوَرو دا گه 23«دِرَل زندو سِفد بوئنیائین ئو قِلااورَل‌یش هوسیائینِ نوا دِرَل. مِنتائای وخدی دِرَلمو واز کِرد، کَسمونی اِنوم زندو نِئیا.» 24وخدی، فرموندَه قِلااورَل معبد ئو رِیئسَل کاهنَل یِئونَ شنَفت تَپون اَری شویا، چِنَ فگِراِرا گه «عاقویَت ایی کارَ چَه ماو؟»

25هَراَ وخدَ، یَکی هات ئو خَوَر دائونو، وِتی: «اونَلی گه هُمَه آوشدِنتونِ زندو، اِسگَه هوسیانَس اِنوم معبد ئو تیَلیم مردِمَ میَن.» 26اَسَه فرموندَه قِلااورَل معبد وَه‌گَرد مأمورَل چِن ئو رسولَلو آوِرد، مِنتائای نه وَه زور، اَرِیَگه زِلَئونَ مَچیا مردِم سنگسارو کَن.

27وخدی رسولَلو آوِرد، اونَلو نا اَر بِرُوَر شورا. اَسَه کاهن اعظم پِرسیتی اَژینو: 28«مَر ایمَه، هُمَلمو سفدِسخد قِدَخَن نَهَرد گه دیَر وَه ایی نُمَ تیَلیم نِینو؟ مِنتائای هُمَه شیَر اورشلیمتو وَه تیَلیمَلتو پِرا کِردیَ ئو میا خوین ایی پیاءَ باوژینون‌ِ مِل ایمَه.»

29پطرس ئو رسولَلی‌تِر جوواوُ دا: «ایمَه باس خدا ویشتِر اژ اِنسو اطاعت کِیم. 30خداءِ باوَه‌لمو، هَراَ عیسی‌ی گه هُمَه کیشیتون اَر صلیب ئو کُشتِتو، اژ مِردیَل زِنیا کِردی 31ئو او بِردیِ بِلِنگ اَر دس راس ووژا، کِردیَ آقا ئو نجاددهندَه تاگَه مِجال توئَه ئو بشخِش گنائَل بیَ قوم اسرائیل. 32ئو ایمَه شاتَل ایی چیئَلیمَ، هَرهُنَ گه روح‌القدس‌یش هَس گه خدا اَوَه داسیَ کسَلی گه اَژی اطاعتَ مَهَنی.»

33اونَل وخدی گه ایی قصَه‌لونَ شنَفت هُنَ آگِرون اژ سر چی گه مِهِستو اونَل بِکُشِن. 34مِنتائای پیای اژ شیخَل فرقَه فَریسی، گه نُم گامالائیل بیتی، ئو یَکی اژ مَلِمَل تورات بی ئو کُل عزّتونَ مَنیا اَری، اِنوم مِجِلیس هیزگِرتی ئو فِربو داتی گِری رسولَل بیَرنَ دِریر. 35اَسَه وِتیَ اونَل: «اِاِ پیال اسرائیلی، حُواستو بو گه میا چِئِه پیالَ بِهِینو. 36اَرِیَگه وِر اژ ایی روژِلَ، پیای گه نُم تِئوداس بیتی هیزگِرتی گه ادعا مَهَردی اَرِه ووژ کسی کَ، ئو نزیک اَر چوارصد نفریش مِرید بینی. مِنتائای او کُشیا ئو مِریدَلی‌شی کُل پَشخِ‌پِلاآ بین. 37دُما او، یهوداءِ جلیلی اِ زَمو سرشِماری، کِردیَ گالِ‌راو ئو بِری اژ مردِم کیشیتیَ دُم ووژا. مِنتائای اویش هِلاک بی ئو مِریدَلی‌شی پَشخِ‌پِلاآ بین. 38اِسگِه‌یشَ موشِم‌ئونتو گه کارتونِ یوئنَ ناو ئو وِلو کَن تاگَه بِچِن. اَرِیَگه اَرّ نشقَه ئو رفدارو اژ اِنسو بو، چِرچی نیَ کارونی اژ دس اِرنِمای. 39مِنتائای اَرّ اژ خدا بو، نِمَتونینو شِکِسو دِینو، ناخواد گه ووژتون اِنوم جنگَ گَرد خدا بوئینینو!»

40اِسَه پَنو گوش دا، ئو رسولَلو هِنا کِرد، شلاخو دان ئو قِدَخَنو کِردِن گه اونَل دیَر وَه نُم عیسی قصه‌ی نوشِن، اَسَه صِلائو دان‌ئون گه بِچِن.

41اَسَه رسولَل وَه خَوشالیا اژ تک عضا شورا کِردونَ دِریر، اَرِیَگه لائقَ حساو هاتوئین تا وَه خاطر نُم عیسی خوارا بوئن، 42ئو هُیچ روژی، چه اِنوم معبد ئو چه اِنوم مالَل، اژ تیَلیم ئو خَوَر خَوش دائِن اِبارَه یَگه عیسی هَراَ مسیحَسَ گه باس بای، دَسو نکیشی.

Currently Selected:

کارَل رسولَل 5: LBT

Highlight

Copy