مَرقُس 3

مِرُوَگ گو دَسته وی هِشک بِبو

1عیسی جارَگه دی چو ناو دیرا یهودیادا. مِرُوَگ وِدَره بو گو دَستَگه وی هِشک بِبو. 2اَونه وِدَره چاوه وان عیسی بو گو بِبینِن اَو رُژا شَنبیا مُقدس دا دیه شفایه بِدَتَ وی مِرُوی آن نه، چون دوو هِنجَتَگه بون گو تُهمَتا وی بِدَن. 3عیسی گُتَ وی مِرُوه گو دَسته وی هِشک بِبو: «وَرَ اِرَ.» 4ایجا گُتَ وان: «کیشگ رُژا شَنبیا مُقدس دا دِبی بِتَ گِرِن: باشیتی آن خِرابی؟ نجاتا جانه مِرُوَگه آن گُشتِنا وی؟» بله اَو کُش مان. 5عیسی، بِ کَرب بَرخودا یگ بَ یگه وان، و بَر خاطره دله وان یه بینا بَری شُر بو، و گُتَ وی مِرُوی: «دَسته خو دِرِژ گَ.» اَوی مِرُوی دَسته خو دِرِژ گِر و دَسته وی ساخ بو. 6فَریسی چُنَ دَروَ و جیدا گَل اَونه گو طایه هیرودیس بون له ضِدّ عیسی نَقشَ کِشان گو چاون وی بَین بِبَن.

جَماعَتَگه عَظیم دوو عیسی دا چُن

7عیسی گَل شاگِردِت خو چو بَ لِوا گُله. جَماعَتَگه عَظیم ژه حَریما جلیله و ژه یهودیه، 8ژه اورشلیمه و ژه وَلاته اَدومیه و ژه حَریمِت آلیه دیَ چَمه اردنه و ژه دُر تا دُرا صور و صیدونه دوو ویدا چُن. وقته وه جَماعَتا عَظیم دَنگه تواوی شُله وی بیهیستِن، هاتنَ لاره وی. 9بَر خاطره زِدَ بونا جَماعَته، عیسی گُتَ شاگِردِت خو قَییقَگه بُ وی حاضِر گَن، گو خلق هجومه نَینِنَ سَر وی. 10چون گو اَوی شفا دابونَ گَلَک مِرُوا، بَهنده تواوی مِرُوِت گو نَساخی هَبون هجوم تینانَ دُرا وی گو دَسته خو لِدَن. 11و وقته رِحِت پیس اَو دِدیتِن، بَر وی دِکَتنَ سَر آخه و دِگِرنَ هَوار: «تِ گوره خدایی!» 12و عیسی اَو مِجِد قدغن دِگِرِن گو لاره خلقه باس نَگَن گو اَو کِیَ.

دانزدَه رسول

13عیسی چییایَگه دا ژِلَل چو و گاز گِرَ اَونه گو دِخاست و اَو هاتنَ لاره وی. 14اَوی دانزدَه مِرُو بِژارتِن و ناوه وان دانا رسول، گو گَل ویدا بِن و اَوان رِگَتَ وَعظ گِرِنه، 15و اَو اقتدارَ هَبِن گو اَجنا دَرخینِنَ دَروَ. 16اَو دانزدَه مِرُوه گو بِژارته بون اَونَ بون: شَمعون گو ناوه وی دانا پِطرُس؛ 17یعقوب گوره زِبِدی و بِرایه وی یوحنا گو ناوه وان دانا بوآنِرجِس، آنی گورِت بروسگه؛ 18آندریاس، فیلیپُس، بَرتولْما، مَتّی، توما، یعقوب گوره حَلْفای، تَدّای، شَمعونه وَلاتپارِز، 19و یهودایه اَسخَریوطی گو خیانت عیسی گِر.

عیسی و بِعِلزِبول

20پاشه عیسی چو مال و دیسا گَلَک مِرُو خِر بون، وِسا گو اَوی و شاگِردِت وی نَگارین حتا رِسقی بُخُن. 21وقته خانوادا عیسی اَوَ بیهیستِن، کَتنَ ره گو اَوی راگَن و گَل خودا بِبَن، چون گو دِگُتن: «اَوی هاژَ خو نینَ.» 22ماموستایِت تَوراته ژی گو ژه اورشلیمه هاته بون دِگُتن: «بِعِلزِبول چویَ ناو جِلده ویدا و اَو اَجنا بِ آریکاریا سَرُکه اَجنا دِدَرخینیت.» 23ایجا عیسی اَو گاز گِرِنَ لاره خو و بِ مَثَلا گَل وان قِسَ گِر و گُت: «چاون دِبیت شیطان، شیطانی دَرخینیت؟ 24هَگو مملکتَگ رابیتَ له ضِدّ خو، اَو مملکت نِگاریت بَردَوام بِمینیت. 25و هَگو مالَگ رابیتَ له ضِدّ خو، اَو مال نِگاریت بَردَوام بِمینیت. 26هَگو شیطان ژی رابیتَ له ضِدّ خو، رابویَ له ضِدّ خو، نِگاریت بَردَوام بِمینیت، بَلگو دوماییگا وی وِیَ دِگَهَشیت. 27هَراستی چه کَس نِگاریت بِچیتَ ناو مالا مِرُوَگه قاوَت و ماله وی تالان گَت، مَگَر اَوِلی وی مِرُوه قاوَت گِر دَت. پاشه ایدی دِگاریت مالا وی تالان گَت.

28«بَراستی، اَز بُ وَ دِبِژِم گو تواوی گُنَهِت بَشَری و هر جورَ کُفرَگه گو بِژیت دیه بِتَ بَخشین؛ 29بله هَچی کَسه بُ رِحا مُقدسا خدا کُفره بِژیت، چه جارا نایِتَ بَخشین، بَلگو اَو حَتا اَبَده دیه گُنَهکار بِمینیت.» 30عیسی بَهنده اَو قِسَیَ گُت چون گو اَوان دِگُتن «اَوی رِحا پیس هَیَ.»

داییگ و بِرایِت عیسی

31هِنگه داییگ و بِرایِت عیسی هاتِن. اَو دَروَ راوَستا بون و مِرُوَگ رِگِرِن گو گاز وی بِگَت. 32جَماعَتا گو دُرا عیسی رونِشته بون، گُتنَ وی: «داییگ و بِرایِت تَ دَروَنَ و دوو تَ دِگَرِن.» 33عیسی جیواب دا: «داییگ و بِرایِت مِن کِنَ؟» 34پاشه بَرخودا اَونه گو دُرا وی رونِشته بون و گُت: «اَونَنَ داییگ و بِرایِت مِن! 35چون گو هَچی کَسه داخازیا خدا بینیتَ جی، بِرا و خوشگ و داییگا مِنَ.»

Currently Selected:

مَرقُس 3: SKB

Highlight

Copy