مَتّی 14

گُشتِنا یحیایه گو غُسلا تعمیده دِدا

1وه وقتیدا ناودَنگ بونا عیسی گَهَشتَ گوهه هیرودیسه حاکِم، 2و اَوی گُتَ خِذمَتکارِت خو: «اَو مِرُوَ یحیایه گو غُسلا تعمیده دِدایَ. اَو ژه ناو مِریادا رابویَ و ژه وه سَبَبِیَ گو قُدرَتا وان مُعجِزانَ ویدا دووهار دِگَن.»

3و بله هیرودیسه حاکِم بَر خاطره هیرودیا گو ژِنا بِرایه وی فیلیپُس بو، یحیا گِرته بو و اَو زنجیر گِره بو و هاوِته بو زیندانه دا. 4چون گو یحیا دِگُتَ وی: «حلال نینَ گو تِ گَل وه ژِنگه دا بی.» 5دوزَ گو هیرودیس دِخاست یحیا بِگُژیت، بله ژه خلقه دِتِرسیا، چون گو اَوان یحیا پِیغَمبَرَگ دِزانین.

6بله رُژا جَشنا دُنیا هاتنا هیرودیس، گِجا هیرودیا ناو مجلِسه دا رَقِصی و وِسا دله هیرودیس کَیف خوش گِر 7گو هیرودیس سوند خار هَچی دِشدا اَو بِخازیت بِدَته دا. 8گِجِگه ژی بِ قِسا داییگا خو گِر و گُت: «سَره یحیایه گو غُسلا تعمیده دِدَت ناو مَژمَگَگه دا بِدَ مِن.» 9هیرودیس شُر بو، بله بَر خاطره سوندا خو و بَر حُرمَتا مِوانِت خو اَمِر گِر گو داخازیا وی بِتَ جی. 10ایجا بِ اَمره وی سَره یحیا زیندانه دا ژه بَدَنا وی لِوَ گِرِن 11و اَو ناو مَژمَگَگه دا اینان و دانَ گِجِگه و اَوی ژی اَو بِرَ لاره داییگا خو. 12شاگِردِت یحیا هاتِن و مَییته وی بِرِن، تسلیمی آخه گِرِن و پاشه چُن و گُتنَ عیسی.

رِسق دایین بُ پِنج هزار مِرُوا

13وقته عیسی اَوَ بیهیست، سیواری قَییقه بو، ژه وِدَره چو جیَگه دورکَتی گو چه کَس وِدَره نَبو. بله وقته جَماعَته اَو دِشدَ بیهیستِن، ژه شَهرِت خو پَیاتی دوو ویدا چُن. 14وقته عیسی ژه قَییقه هاتَ خاره، جَماعَتَگه عَظیم دیت و دله وی بُ حاله وان شَوِتی و شفا دا نَساخِت وان.

15نِیزوکی رُژآوابونه، شاگِرد هاتنَ لاره وی و گُتن: «اِرَ جیَگه دورکَتیَ و دِرَنگَ ژی. خلقه رِگَ گو بِچِنَ ناو گُندِت دُر و بَر و بوخو رِسقی بِکِرِن.» 16عیسی گُتَ وان: «لازِم نینَ اَو بِچِن. اون بوخو رِسقی بِدَنَ وان.» 17شاگِردا گُتن: «مَ اِرَ تِنه پِنج گِردَ و دو ماسی هَنَ.» 18عیسی گُت: «اَوان بیننَ لاره مِن.» 19پاشه بُ خلقه اَمِر گِر گو سَر چیمَنه رونِن. ایجا اَو پِنج گِردَ و دو ماسی راگِرِن و بَرخودا اَسمانی و بَرکت دا وان. هِنگه اَو پِنج گِردَ گَر گِرِن و دا شاگِردا و اَوان ژی دانَ خلقه. 20ایجا همویا خارِن و تِر بون و ژه گَرِت بَجی مایی، دانزدَه سَلِگه تِژی خِر گِرِن. 21اَونه گو رِسق خارِن، خِنجی ژِنگا و بِچوگا، پِنج هزار مِر بون.

ره چُیینا عیسی سَر رویه آوه

22عیسی هَ وه دَمه بُ شاگِردا اَمِر گِر گو وه حالیدا گو اَوی خلق ره دِخِست، سیواری قَییقه بِن و پِش ویدا بِچِنَ آلیه دیَ آوه. 23پاشه ره اِخِستِنا خلقه، بوخو چو سَر چییا گو تِنِتیه دا دعایا بِگَت. بو شَو و اَو وِدَره تِنه بو. 24وه ناوه دا، قَییق ژه لِوا آوه گَلَک دور بو و توشی شیپَلا بو، چون گو با آلیه پِشیه دا دِهات. 25نِیزوکی شَفَقه، عیسی وه حالیدا گو سَر رویه آوه ره دِچو هاتَ لاره وان. 26بله وقته شاگِردا اَو دیتِن گو سَر رویه آوه ره دِچیت، بِزدیان و گُتن: «اَو رِحَگَ»، و تِرسادا گِرِنَ هَوار. 27بله عیسی جیدا گُتَ وان: «دله وَ قُرص بیت. اَزِم، نَتِرسِن!»

28پِطرُس جیواب دا: «آغایه مِن، هَگو تِیی، بُ مِن اَمِر گَ گو سَر رویه آوه بِمَ لاره تَ.» 29عیسی گُت: «وَرَ!» ایجا پِطرُس ژه قَییقه هاتَ دَروَ و سَر رویه آوه چو بُ آلیه عیسی. 30بله وقته با دیت، تِرسیا و وه حالیدا گو ژُردا دِچو ناو آوه دا، گِرَ هَوار: «آغایه مِن، مِن نجات بِدَ!» 31عیسی هَ وه دَمه دَسته خو دِرِژ گِر و اَو گِرت و گُت: «اَی مِرُوه گِم ایمان، تَ بُچی شِگ گِر؟» 32وقته هاتنَ ناو قَییقه دا، با رازا. 33پاشه اَونه ناو قَییقه دا عیسی پَرستِش گِرِن، گُتن: «بَراستی گو تِ گوره خدایی!»

شفا گِرتِنا نَساخا جِنیسارِته دا

34وقته دَرباز بونَ آلیه دیَ آوه، مَنطَقا جِنیسارِته دا هاتنَ خاره. 35و وقته اَهله وِدَره عیسی ناس گِرِن، مِرُو رِگِرِنَ دُر تا دُرا وه مَنطَقه و نَساخ همو اینانَ لاره وی. 36اَوان لاواهی عیسی دِگِرِن گو بِهلیت تِنه دَسته خو لِوا عبایه وی بِدَن. و هَچی کَسه دَسته خو له دِدا، شفا دِگِرت.

Currently Selected:

مَتّی 14: SKB

Highlight

Copy