Juan 19

1Nadid, pinaalap ni Pilato ti Jesus sakay pinabálbág na. 2Sakay u sundalo hide ay naggimet hide ti kurona a saet sakay inkurona de tu ulo ni Jesus. Sakay sinulutan de siya ti badu a kulay ni ubi dipo sa itod u kurol nu badu nu hare. 3Essa-essa hide a immadene nikuna sakay ininsulto de siya sakay kinagi de, “Mabiyag u Hare nu Judio hide hanggan-hanggan!” sakay dinapang de siya.

4Kanya limmuwas a huway ti Pilato sakay kinagi na tu tolay hide, “Mágsaneg kam! Ta iyatubang ko siya nikam. Gusto ko a matukuyan moy a awanák ti netan a kasalanan na!” 5Nikuna a limmuwas ti Jesus a naka kurona ti saet sakay nakasulot ti kurol ubi a damit ay kinagi ni Pilato, “Ilingán moy siya!” 6Nikuna a ketan siya nu pupuno hide a Saserdote sakay tu guwardiya hide ay pimmákhaw hide, “Ipako siya tu kudus! Ipako siya tu kudus!”

Pero timmábbeg ti Pilato, “Hikam dálla u mangalap nikuna a mángpako tu kudus, dipo ni hikán la ay awanák ti ketan a kasalanan na.” 7Pero impilit nu Judio hide, “Tehhod kame a Kautusan. Sakay ayun ti iye ay dapat siya a matay dipo magkukunware siya a Anak nu Diyos.”

8Nikuna a masaneg iye ni Pilato ay lalu siya a nanteng. 9Kanya huway na a inyangay ti Jesus tu disalad nu palasyo na sakay tinanung na, “Taga-hádya ka?” Pero awan timmábbeg ti Jesus. 10Kanya kinagi ni Pilato, “Bakin a umáddák mo a tábbegán? Awan mu beman tukoy a te kapangyariyanák a mangpalaya niko oni ipako ka tu kudus?” 11Timmábbeg ti Jesus, “Awan ka ti kapangyariyan nikan ni awan inyatád niko nu Diyos. Kanya mas dakál u kasalanan nu tolay a náng-angay he nikán.” 12Nikuna a masaneg iye ni Pilato ay lalo siya a nasoh a palayaán ti Jesus. Pero nagpákhawan u Judio hide, “Ni palayaán mo i tolayan ina ay kontara ka tu hare tam ti Roma! Dipo u deyaman a mángkagi a hare siya ay kadima nu Hare.” 13Nikuna a masaneg iye ni Pilato ay inluwas na ti Jesus tu palasyo na. Káttapos, immetnod siya tu áetnuden nu tagahatul, tu lugar a ni dulawán ay plasa a samento (tu upos a Hebreo ay “Gabata.”)

14Nadid ay dispiras dán nu kasayaan a Pággala-ala nu Pagtaleb nu Anghel, tamo dán a tanghale. Kinagi ni Pilato tu Judio hide, “Sa iye u hare moy!” 15Pero nagpákhawan u Judio hide, “Bunuwán siya! Ipako siya tu kudus!” Kinagi ni Pilato nide, “Ipako ko beman tu kudus u hare moy?” Timmábbeg u puno nu Saserdote hide, “Awan kame ti iba a hare nan u hare tam ti Roma!” 16Kanya inyatád ni Pilato ti Jesus nide para ipako tu kudus.

Impako ti Jesus tu Kudus

(Mateo 27:32-44; Markos 15:21-32; Lukas 23:26-43)

17Sakay limmuwas hide tu banuwan. Impabáklay de ni Jesus u kudus na a paangay tu lugar a dáddulawán a “Bungo” (a tu upos ni Hebreo ay Golgota). 18Impako di hod ti Jesus tu kudus kaguman na u duwwa a lállake, essa tu kawanan sakay essa tu kawihe, hod ti bállog ti Jesus. 19Nagsulat be ti Pilato sakay impekáppát na tu kudus. U nedátton tu nepákkát ay, “Ti Jesus a taga-Nazaret u Hare nu Judio hide.” 20Nakasulat iye tu upos ni Hebreo, Romano, sakay Griego. Makpal a Judio u nakabasa ti iye, dipo adene tu banuwan u lugar ni hádya de a impako ti Jesus tu kudus. 21Kinagi nu pupuno hide nu Saserdote ni Pilato a, “Dapat dyan mo insulat a Hare nu Judio hide nan, ‘Kinagi ni tolayan iye a siya kan u hare nu Judio hide.’” 22Pero tinábbeg hide ni Pilato, “Ni ánya nesulat kuwáy ay awan dán ti makapangbagu.” 23Nikuna a mepako dán nu sundalo hide ti Jesus, ay inalap de u damit na sakay hinati-hate de ti áppat, tággessa a parte u balang sundalo. Inalap di be u damit na a pangdisalad, a nadihop a buo awan iye nahate oni te nagtongkuwan sapul ti ontok hanggan ti sidung. 24Kinagi nu essa a sundalo, “Diyan tamon iye pamághatiyán. Mamágbunutan kitam dálla ni ti deya keangayanay ni iye.” Nangyare iye para matupad u kinagi tu Kasulatan a, “Pinamághate-hati de u damit ko, sakay namágbunutan hide tu damit ko a pangdisalad.” Sakay iye ngane u ginimet nu sundalo hide.

25Nadid, mágtaknág u ina ni Jesus tu sadát nu kudus na sakay u wadi na a bábbey a ti Maria a kabanga ni Cleofas, sakay katoy bi hod ti Maria a Magdalena. 26Nikuna a ketan ni Jesus a mágtaknág hod tena na sakay kasadát na u pinakamamahal na a disepulus ay kinagi na nena na, “Ináng, ináng ibilang mo siya a kumán a sadile mo a anak!” 27Sakay kinagi na be tu disepulus na, “Ibilang mo siya a kumán a sadile mo a ina.” Sapul ti itod ay nágyan dán u ina ni Jesus tu páppágyanan ni disepulusan itod.

U Kákkatay ni Jesus

(Mateo 27:45-56; Markos 15:33-41; Lukas 23:44-49)

28Tukoy ni Jesus a natapos na dán u atanan a tarabaho na, sakay tán matupad u katoy tu Kasulatan ay kinagi na, “Mauwawák.” 29Tehhod hod a essa a malukung a putat ti alak. Imbisa hod nu sundalo hide u damit, sakay insálpet de tu pinget nu kayo a isopo sakay inyadene de tu labi ni Jesus. 30Nikuna a masápsáp dán ni Jesus u alak ay kinagi na, “Natapos dán.” Indukog na u ulo na sakay nabágsutan siya ti angás.

Pinika nu Sundalo u Wahes ni Jesus

31Ti itod ay Aldew nu Paghanda, sakay tu kadimadimangan ay mahalaga dán a Aldew nu Káimang. Dipo umád nu Judio hide a mewahak tu kudus u bangkay hide tu Aldew nu Káimang, ay inaged de ni Pilato a pusingán u tikád nu nepako hide para alisto hide a matay, sakay ibutan a agad u bangkay hide. 32Kanya iye ngane u ginimet nu sundalo hide. Pinuseng de u tikád nu duwwa a kaguman ni Jesus a nepako. 33Pero tu káadene de ni Jesus ay netan de a patay dán siya, kanya awan di dán pinuseng u tulang na hide. 34Pero u essa a sundalo ay pinika na u hawes ni Jesus tu gayang, sakay bigla a nagbulos u dige ay tu dinom. 35Hikán a nagsulat ti iye ay netan ko u nangyare. Kanya tukoy moy a tatahoden u patunay ko a iye nikam. Tukoy ko atatahoden u kagiyan ko sakay ikagi ko iye nikam para maniwala kam. 36Nangyare i bagayan iye hide para matupad u kinagi na tu Kasulatan, “Awan ti mapuseng maski ni essa tu tulang na hide.” 37Kinagi be tu essa pa a bahagi nu Kasulatan, “Áelingán de u tolay a ginayang de.”

U Pánglábbáng de ni Jesus

(Mateo 27:57-61; Markos 15:42-47; Lukas 23:50-56)

38Káttapos ni iye, ti Jose a taga-Arimatea ay immangay tu kán Pilato para mák-aged ti permiso a mangalap tu bangkay ni Jesus. (Ti Jose ay essa a disepulus ni Jesus, pero lihim la dipo manteng siya tu pinuno nu Judio hide.) Sakay pinakultaden siya ni Pilato; kanya inalap na u bangkay ni Jesus. 39Inaguman siya ni Nicodemo, u lállake a bimmisita tu itod ni Jesus tu essa a gibi. Tettawed ti Necodemo a mga tallo pulo a kilo a pasáppot a halo-halo a gábwat ti kayo. 40Inalap de u bangkay ni Jesus, pinasáppotan de u damit, a inyagum di bi hod u masáppot, ta sa itod u ugale nu Judio hide ni maglábbáng. 41Tu adene nu nángpakuwan de ni Jesus ay te mammulaan hod, te essa hod a bigu a páglábbángngan a kuweba a awan palla nagamit. 42Inlábbáng di hod ti Jesus dipo adene, sakay aldiwan itod ay aldew nu paghanda para tu Aldew nu Kaimang.

Currently Selected:

Juan 19: MBJC

Highlight

Copy