Gimet 2

U Káddemát nu Banal a Ispirito

1Nikuna dumemát u aldew nu Penticostes#2:1 Pentecostes: Iye ay essa tu kasayaan a ipagsaya nu Judio hide. ay nagipun-ipun tu essa a lugar u atanan nu mánnampalataya hide. 2Sakay te bigla dálla hide a nasaneg a galungogung a gábwat ti langet, a konna tu mabegsák a pahás. I galungogungan itod u masaneg tu hádya man a suluk nu bilay a pamággipun-ipunan de. 3Káttapos ay tehhod hide a netan a nagbuu-buo a apoy a kumán a dila a kimmalat tu balang essa nide. 4Sakay minágkaputat hide ti Banal a Ispirito. Kanya nakapagupos hide ti iba-iba a upos, sigun tu kaluub nu Banal a Ispirito tu balang essa.

5Nadid, makpal a Judio a makidiyos, u mágyan ti Jerusalem a gábwat tu iba-iba a bansa ti munduway. 6Pákkasaneg nu tolay hide tu galungogung a itod ay nagalalisto hide a immangay tu pamággipun-ipunan nu mánnampalataya hide. Nagtaka hide dipo nasaneg de a makapagupos dán u mánnampalataya hide tu upu-upos de. 7Dipo tu págtaka de ay nakagi de, “Awan beman taga-Galilea hide a atanan? 8Bakin tukoy di dán a magupos tu kada upos tam? 9Tehhod nikitam a taga-Partia, te taga-Media, taga-Elam, te gábwat be ti Mesopotamia, ti Judea, Capadocia, ti Ponto sakay ti Asia. 10Tehhod pa nikitam a taga-Frigia sakay Panfilla, Egipto sakay u lugar hide a sakup ni Libia a adene ti Cirene. Katoy bihod u taga-Roma hide u Judio sakay u naakit hide tu rilihiyon de. 11Sakay u agum ay gábwat ti Creta sakay ti Arabia. Pero masássaneg tam hide a magupos tu upos tam tungkul tu makataka-taka hide a ginimet nu Diyos!” 12Awan de maabut a maisip u nangyare kanya awan matapos-tapos u pamágtanungan de ni ánya u gusto a kagiyán ni itod. 13Pero u agum hide ay sineste de hide, kinagi de, “Lasing la itona hide!”

U Pángngaral ni Pedro

14Nadid, dipo tu kinagi de ay timmáknág ti Pedro kaguman u sapulo ay ti essa a apostol sakay nagupos siya ti mabegsák. Kinagi na, “Hikam a kasa Judio ko hide, sakay hikam a taga-Jerusalem, mágsaneg kam nikán, dipo kagiyán ko ni ánya i gustuway a kagiyán ni iye hide a bagay. 15Awan lasing iye hide a tolay a konna tu pangisip moy. Dipo alas nuwebe palla nadid ti dimadimang. 16Iye a pangyayare ay u katupaden dán nu hula ni prupeta Joel tu itod:

17Kinagi nu Diyos, ‘Tu dimodyan a aldew, ay iyatád ko u Banal a Ispirito ko tu atanan a klase ni tolay.

Ibaheta nu anak moy hide a lállake sakay bábbey u upos ko;

sakay maketa ti pangitain u anak moy hide a ulito;

sakay u mágkatanda hide a lállake ay magkahod hide ti tagináp.

18Ti itod a aldew ay iyatád ko u Ispirito ko tu tagapagserbi ko hide a lállake sakay bábbey,

sakay ipahayag de u Upos ko hide.#2:17-18 Basaán tu 1 Corinto 14:26-33.

19Mángpetaák ti himala ti langet

sakay ti lutaáy;

mangpetaák ti dige, apoy sakay ti mabagál a asok.

20Magdiklám u aldew sakay magdideg u bulan a kumán a dige. Mangyare iye bagu a dumemát u makataka-taka a aldew nu pághatul nu Panginoon.

21Pero ni ti deyaman u dumulaw tu ngahan nu Panginoon ay maligtas.’”

22“Hikam a taga-Israel hide ay mágsaneg kam nikán! Ti Jesus a taga-Nazaret ay pinaangay nu Diyos nikam, sakay pinatunayan iye nu Diyos tu pamamag-itan nu himala hide sakay tu makataka-taka hide a ginimet na tu pamamag-itan ni Jesus. Mismo hikam u nakatukoy ti pangyayariyan iye dipo nangyare iye he nikam. 23Sapul pa tu sapul ay tukoy dán nu Diyos a ti Jesus ay iyatád na nikam, kanya ayun tu karunungan na ay pinayagen na a impepako moy sakay pinabuno tu makasalanan hide a tolay. 24Pero nadid ay biniyag siya a huway nu Diyos sakay inibutan na u kapangyariyan nu kamatayan nikuna dipo awan maare a maghare nikuna u kamatayan.#2:24 Basaán tu Colosas 2:15. 25Konna tu kinagi ni David tu itod tungkul nikuna,

‘Tukoy ko a lagi ko a kaguman u Panginoon sakay awanák na pabayan, kanya awanák mabali-balisa.

26Kanya tunay kasayaan kuwáy,

sakay awan mapugád u papuri ko tu Diyos.

Sakay maskin matayák, ay tehhodák a pag-asa a mabiyag.

27Dipo tukoy ko a awan mo pabayan u kaliduwwa ko tu lugar nu kaliduwwa nu nágkatay dán hide.

Awan mo be pabayan a mahunot u banal mo a tagapagserbi.

28Intoldu mo nikán u tama a dilan a patamo tu biyag,

sakay dipo hiko u palagi ko a kaguman ay masayaák a tahod.’#2:28 Basaán tu Colosas 2:15.

29Kákkapatkákka ko hide, maliwanag a bakán a ti David u kákkagiyán ko he, dipo u nuno tam a ti David ay natay dán sakay nelábbáng dán, sakay hanggan nadid ay tukoy tam ni hádya siya a nelábbáng. 30Ti David ay essa a prupeta kanya natukuyan na u inpananto nu Diyos nikuna, a essa tu sumunud a lahe na ay magin hare la be a konna nikuna sakay siya u magmana tu kahariyan na.#2:30 Basaán tu Colosas 2:15. 31Sakay netan na dán ni ánya mangyariyay tu lahe na. Kanya u kákkabiyag a huway ni Cristo u binanggit na nikuna kinagi na a,

‘Awan siya pinabayan tu páglábbángngan

sakay awan nahunot u bággi de.’#2:29-31 Basaán tu Lukas 1:32, Roma 1:3. 32Iye ay ti Jesus a biniyag nu Diyos a huway, napatunayan me a nabiyag siya a huway dipo netan me.#2:32 Basaán tu Gimet 1:8, Gimet 3:15. 33Pinággetnod siya tu kawanan nu Diyos sakay natanggap na u nepananto a Banal a Ispirito tu Ama. Iye u inyatád na nikame konna tu áelingán sakay masássaneg moy nadid.#2:33 Basaán tu Lukas 24:49, Juan 20:21; Gimet 1:45. 34-35Bakán a ti David u immangay ti langet, pero kinagi na,

‘Kinagi nu Panginoon tu Panginoon ko:

Mággetnod ka he ti kawanan kuwáy

hanggan mapasuko ko u kadima mo hide niko.’#2:34-35 Basaán tu Awit 110:1.

36Kanya dapat talaga a matukuyan nu atanan a Israelita a ti Jesus a impako moy tu kudus ay siya u pinile nu Diyos a magin Panginoon sakay Cristo.”#2:36 U gusto a kagiyán nu Cristo ay Tagapagligtas. Basaán tu Mateo 16:15-16, Juan 20:27-29, Roma 10:9-10.

37Nabalisa hide tu nasaneg de kanya kinagi de ni Pedro sakay tu agum hide a apostol a, “Kákkapatkákka me hide, ánya i dapat miyay a gimitán?” 38Timmábbeg ti Pedro, “Kákkapatkákka ko hide, pagsisiyan moy dán sakay adeyuwan u kasalanan moy hide, sakay magpabawtismo kam tu ngahan ni Jesu-Cristo tánni mapatawad kam tu kasalanan moy hide, sakay pagkaluuben nakam tu Banal a Ispirito.#2:37-38 Basaán tu Gimet 2:1-4, Gimet 8:12-17, Gimet 1:5. 39Dipo iye a pananto nu Diyos ay para nikam sakay tu kaapu-apuwan moy hide, sakay para tu atanan a tolay a katoy ti adeyo, tu balang essa a dulawán nu Panginoon a Diyos.”#2:39 Basaán tu Isaias 57:19, Joel 2:32.

40Makpal pa a kinagi ti Pedro pero essa la u pákkekakagbi na tu tolay hide itod ay, “Pabayan moy a maligtas kam tánni awan kam mesale tu parusa a dumemát ti madukássan iye a lahe.”

41Makpal u naniwala tu mensahe na sakay nagpabawtismo hide a agad. Ti itod a aldew ay mga tállo a libu a tolay u nedagdag tu mánnampalataya hide.#2:41 Basaán tu Mateo 28:19, Gimet 8:12-13. 42Nagin masipag hide tu págsaneg sakay pággadal tu itáttoldu nu apostol hide. Lagi hide a mamaggipun-ipun bilang mátkaka. Sakay hide ay pisan-pisan a kuman sakay magdasal.#2:42 Basaán tu Mateo 26:26-29, Gimet 2:46-47, 1 Corinto 11:20.

U Kákkabiyag nu Mánnampalataya hide

43Makpal a himala sakay makataka-taka a bagay u ginimet nu Diyos tu pamamag-itan nu apostol hide. Kanya nabiyag hide a tehhod a pággalang sakay ánteng tu Diyos. 44Sakay pirmi a mapisan-pisan u atanan nu mánnampalataya hide sakay awan hide nagkemot tu ányaman a kabiyagen de ni awan imbahagi de tu balang essa nide. 45Inlako de u atanan nu kabiyagen de hide sakay u naglakuwan de ay impagatád de tu kakaguman de hide sigun tu pangangailangan nu balang essa.#2:44-45 Basaán tu Gimet 4:34-37. 46Mamágpisan hide tu templo kada aldew, sakay mamágkaguman hide tu bila-bilay de a magpira-piraso tu tinapay, masaya hide a mamággatubang a kuman a maluwag tu isip de, 47sakay pirme hide a magpure tu Diyos sakay igalang hide nu tolay hide. Kada aldew ay tehhod a iligtas u Diyos sakay idagdag na hide tu grupo nu manampalataya hide.#2:46-47 Basaán tu Mateo 26:26-29, Gimet 2:42, Gimet 20:7-11.

Currently Selected:

Gimet 2: MBJC

Highlight

Copy