Gimet 1

1Mahal ko a Teofilo:

Tu purumero ko a libro ay insulat ko u atanan a ginimet sakay intoldu ni Jesus magsapul tu kadipalonguwan na a ginimet 2-3hanggan tu aldew a simmole siya ti langet. Bagu siya a simmole ti langet ay binilinan na u pinile na hide bilang apostol tu pamamag-itan nu Banal a Ispirito. Káttapos nu pághirap na ay pimmeta siya nide ti sangan a beses, tánni patunayan na a biyag siya. Pimmeta siya nide tu alay nu kuwarenta a aldew sakay nagtoldu tungkul tu pághare nu Diyos. 4Essa aldew mentaras kuman hide a kaguman ni Jesus ay kinagi na, “Dyan kam pa lumakad ti Jerusalem. Uhayán moy u Banal a Ispirito a inpananto nu Diyos Ama. Kinagi ko dán iye nikam tu itod.#1:4 Basaán tu 24:49. 5Nagbawtismo ngane ti Juan tu dinom, pero awan magmalay ay mabawtismuwan kam be tu Banal a Ispirito.”#1:4-5 Basaán tu Juan 1:32-34.

U Káangay ni Jesus ti Langet

6Nikuna mamágkaguman a huway di Jesus sakay tu disepulus na hide ay tinanung de siya, “Panginoon, itatag mo dán beman a huway u pághare nu lahe hide ni Israel?” 7Timmábbeg ti Jesus, “Awan moy kailangan a matukuyan u panahun oni odas a intakda nu Diyos Ama ni nikán a mangyare u bagay hide a itod.#1:7 Basaán tu Markos 13:32. 8Pero ni kátna dán nikam u Banal a Ispirito ay magkahod kam ti kapangyariyan a mangpatunay tungkul nikán ti Jerusalem, tu buo a Judea, ti Samaria, sakay hanggan tu kasuluk-sulukan ni munduway.”#1:8 Basaán tu Lukas 24:48, Lukas 4:14.

9Pákkakagi na ti iye, ay mágga-oontok dán siya a patamo ti langet. Mentaras umáeleng hide nikuna a paontok, ay tinakáppan siya nu diklám sakay agad siya a nawan tu pangileng de.#1:9 Basaán tu Markos 16:19, Juan 20:17, Efeso 4:8-10.

10Mentaras a umáeleng hide ti langet ay tehhod a duwwa a lállake a nakamapudew ti badu u bigla dálla a timmaknág tu háhhawisan de. 11Kinagi de, “Hikam a taga-Galilea hide, bakin katoy kam pa he a umáeleng ti langet? Ti Jesus a netan moy a immangay ti langet ay sole siya a konna tu netan moy a káangay na ti langet.”#1:11 Basaán tu Mateo 24:30, Lukas 12:14, 1 Corinto 15:51-52.

Nangpile u Apostol hide ti Kapalit ni Judas

12Nagsole u disepulus hide ti Jerusalem a gábwat tu Buked nu Olibo, a halus essa a kilometro u kadeyo na ti Jerusalem. 13Káddemát de ti Jerusalem, ay simmangkay hide ti ontok a kuwarto tu bilay a táttulusan de. Iye hide ay di Pedro, Juan, Santiagu, Andres, Felipe, Tomas, Bartolome, Mateo, Santiagu a anak ni Alfeo, Simon a makabayan, sakay ti Judas a anak ni Santiago. 14Lagi hide a mamággipun-ipun para magdasal kaguman u bábbey hide sakay ti Maria a ina ni Jesus, konna bihod u kákkapatkákka ni Jesus a lállake. 15Kállipas nu sangan a aldew, ay namággipun-ipun u essa a datos ay ti bayinte a mánnampalataya. Timmaknág ti Pedro tu atubang de sakay nagupos, 16“Kákkapatkákka ko hide, u nakasulat tu Banal a Kautusan nikuna a pinagupos nu Banal a Ispirito ti David tungkul ni Judas a nánggiya tu nangdakáp hide ni Jesus ay natupad dán. 17Ti Judas ay date me a kaguman bilang essa a apostol, sakay kaguman me siya tu págserbi.”

18(U pilak a inbayad de ni Judas ay inbale na ti luta. Sakay hed he siya a natákneg a pausok, nabutyakan u tiyan na sakay limmuwas u bituka na. 19Natukuyan iye nu atanan a mámmágyan ti Jerusalem, kanya nginahanan de itod a lugar a Akeldama, u gusto na a kagiyán ay “Uma nu Dige.”)

20Kinagi pa ni Pedro, “Nakasulat tu Libro nu Kansiyon hide,

‘U nágyanan na ay diyan moy dán adeniyan,

sakay diyan dán págyanan nu maskin ti deya.’

Sumássulat be a,

‘Iyatád tu agum u tungkulin na.’#1:20 Basaán tu Awit 69:25, 109:8.

21-22Kanya dapat kitam a mangpile ti essa a makaguman tam bilang kapalit ni Judas. Dapat essa siya tu nakaguman tam hide a nagserbi tu Panginoon Jesus nikuna katoy padla siya ti munduwáy, sapul nikuna binawtismuwan siya ni Juan hanggan tu káangay na ti langet.”

23Kanya nangpile hide ti duwwa a lállake a pagpiliyan de: ti Matias sakay ti Jose a ngángngahanan de a Barsabas sakay Justo. 24Sakay bagu hide a nangpile ay nagdasal hide, “Panginoon, hiko u nakatukoy tu puso nu atanan a tolay. Kanya ipeta mo ped nikame ni ti deya u dapat me a piliyán ti duwwaan iye, 25a magin apostol mo bilang kapalit ni Judas tu katungkulan na a awan na hinawe. Nadid ay he dán siya tu lugar a nelaan nikuna.”

26Káttapos de a nagdasal ay nagbunutan hide. Sakay u napile de ay ti Matias. Kanya ti Matias u indagdag de tu sapulo ay ti essa a apostol.#1:26 Basaán tu Mateo 14:20, Pahayag 12:1.

Currently Selected:

Gimet 1: MBJC

Highlight

Copy