Gimet 17

Ti Tesalonica

1Nadid himmoyot di Pablo sakay ti Silas ti Amfipolis sakay ti Apolonia, sakay nagtulos hide ti Tesalonica. Ti itod a lugar ay te sinagoga u Judio hide. 2Ugale dán ni Pablo a umangay tu sinagoga. Tu luub nu tállo a simba kada Aldew nu Káimang ay mákpagpaliwanagan siya tungkul tu Kasulatan, 3impaliwanag na sakay pinatunayan na a dapat pa a magdanas ti hirap u Cristo sakay mabiyag a huway. Kinagi na a, “Ti Jesus a ibábbaheta ko nikam ay siya u Cristo!”#17:3 Basaán tu Gimet 10:38. 4Naniwala sakay nákkuyog di Pablo ay ti Silas u sangan nide, konna be tu tányag hide a bábbey sakay u Griego hide a makadiyos. 5Pero nagsállap u Judio hide kanya inipun de u abusador hide sakay inutusan di hide a manggulo tu banuwan. Sináddáp de u bilay ni Jason, sakay pilit de a inehyok di Pablo sakay ti Silas tánni iyatubang tu tolay hide. 6Nikuna awan di netan u duwwa ay binehbeh de ti Jason sakay u agum a mánnampalataya sakay inyangay de hide tu puno nu banuwan. Konna he u ipáppákhaw de, “Iye hide a tolay ay manggagolo maskin hádya hide angayan sakay nadid ay atoy dán he hide ti banuwan tamáy! 7Kanya pinatulos hide ni Jason tu bilay na. Sinuway de a atanan u utus nu Emperador. Kinagi di pa a tehhod a iba a hare a ngahan naay ay ti Jesus.” 8Kanya nagulo u tolay hide sakay tu pupuno hide dipo ti nasaneg diyan iye. 9Bagu a pinaluwas nu puno hide ti Jason sakay tu agum na hide ay pinagbayad di hide ti piyansa.#17:5-9 Basaán tu Juan 5:16, Gimet 14:19, Gimet 21:27-36.

Ti Berea

10Ti itod labe a gibi ay pinaangay nu mánnampalataya hide ti Pablo sakay ti Silas tu banuwan a Berea. Káddemát di hod ay simmáddáp hide tu sinagoga nu Judio hide. 11Mas maganda a kauhon u Judio hide a taga-hod nan u Judio hide a taga-Tesalonica; dipo gugusto de a mágsaneg tu ipáppaliwanag ni Pablo. Pagadalan de ti aldew-aldew u Kasulatan para mapatunayan de ni tatahoden u kákkagiyán na. 12Makpal u summampalataya hod a Judio konna be tu Griego hide, puro a kalállakeyan sakay kabábbiyan a tanyag ti itod a lugar.

13Pero nikuna mabaheta nu Judio hide a taga-Tesalonica a impangaral be ni Pablo ti Berea u Upos nu Diyos ay immangay be hide hod tánni sulsulan de u tolay hide a manggulo tu banuwan. 14Pagdaka a inyangay nu mánnampalataya hide ti Pablo tu bihebi nu diget, pero nagwahak di Silas ay ti Timoteo ti Berea. 15U nagtugán hide ni Pablo ay nákkuyog nikuna hanggan ti Atenas. Káttapos ay nagsole hide ti Berea, a tawed u bilin ni Pablo para di Silas sakay ti Timoteo a tumagubet hide a pagdaka.#17:10-15 Basaán tu Mateo 10:6-23, Gimet 14:20-21, Gimet 16:12.

16Mentaras a maguhay ti Pablo tu duwwa ti Atenas ay netan na a makpal a diyos-diyosan tu siyudad. Kanya nalungkot siya ti husto. 17Kanya nákpagpaliwanagan siya tu sinagoga hide hod, tu Judio hide sakay tu maka-diyos hide a tolay, sakay maskin deya u matagbu na tu matolay a lugar aldew-aldew. 18Nákpagtábbegan be siya tu sangan a pinakamaisto a kasale tu gurupo nu Epicureo sakay Estoico. Tehhod be a sangan a nagkagi a, “Ánya wád i kákkagi-kagiyán ne ni mumaru-marunungay a tolay?” Kinagi be nu agum, “Mangaral wád tungkul tu agum a diyos nu taga iba a banuwan.” Konna hina u kagi de dipo nangaral ti Pablo tungkul ni Jesus sakay tu kákkabiyag a huway. 19Kanya kinuyog di siya sakay inyatubang tu pággipun-ipunan tu Areopago sakay tinanung a, “Maare mi beman a matukuyan ni ánya i bigu muwe a itáttoldu? 20Iba ina a toldu dipo pákkasaneg mi palla kanya gusto me a matukuyan ni ánya i gustu naay a kagiyán.” 21Dipo awan dán ti agum a gággimitán u taga-Atenas hide sakay u dayo hide a mámmágyan hod nan mamágguhon sakay mágsaneg tungkul tu bigu hide a toldu.

22Kanya timmaknág ti Pablo tu atubang nu pamágguhunan tu Areopago sakay kinagi na, “Hikam a taga-Atenas, netan ko a tunay kam a relihiyoso. 23Dipo tu páglalebut ko ti banuwan moyáy ay neilingan ko tu lugar hide a págdasalan moy u essa a altar a nakasulat u konna he, ‘Tu Diyos a awan matengge.’ U Diyos a awan moy matengge a páppuriyán moy ay siya u ipáppangaral ko nikam. 24U Diyos a nanglalang ti munduway sakay tu atanan a mágyan hod ay siya u Panginoon ti langet sakay ti lutaáy. Awan siya mágyan tu templo a ginimet nu tolay. 25Awan siya mangailangan ti ánya man a tulung nu tolay, nan siya u nangatád ti biyag, angás sakay atanan a bagay tu atanan a tolay.#17:24-25 Basaán tu Isaias 42:5. 26Nilalang na u atanan a lahe ti munduway a gábwat tu essa a tolay sakay pinágyan na hide ti buuwáy a mundu. Intakda na u panahun nu kákkabiyag di he ti munduwáy sakay u kahád nu páppágyanan nu balang essa.#17:24-26 Basaán tu Roma 8:28. 27Ginimet iye nu Diyos tánni ehyukán siya nu tolay. Sakay tu pággehyok tam ay makay sakale a maehyok tam siya. Pero i tatahodinay u Diyos ay awan adeyo tu balang essa nikitam.

28Dipo táttawed na u angás tam, pággahikad sakay pagkatolay tam.

Konna tu kinagi nu sangan tu mágtula moy hide,

‘Anak na kitam ngani.’

29Nadid, dipo anak kitam nu Diyos ay diyan tam ipalagay a konna la siya tu letrato a ginto, pilak, oni bito a ginimet la nu tolay. 30Nalay a panahun a pinabayan nu Diyos u tolay hide tu awan de pángtengge nikuna. Pero nadid ay inyutus na tu atanan a tolay tu bawat lugar a magsise sakay adeyuwan di dán u madukás de a kákkabiyag.#17:30 Basaán tu Gimet 3:19, 2 Pedro 3:9. 31Dipo intakda na dán u aldew nu paghatul ti munduway sakay gimitán na iye a tehhod a katarungan tu pamamag-itan nu essa a tolay a pinile na. Pinatunayan na itod nikuna biyagán na a huway i tolayan itod!”#17:31 Basaán tu Mateo 24:30-42; Roma 2:5-10.

32Pákkasaneg de tu kinagi ni Pablo tungkul tu kákkabiyag a huway ay pinagtawaan siya nu agum. Kinagi be nu agum, “Gusto me a masaneg a huway i kinákkagi muwe.” 33Pákkakagi di hod ay linakaden ni Pablo u katolayan. 34Te sangan a nákkuyog nikuna sakay summampalataya tu Diyos. Kaguman he di Dionisio a kaguman tu grupo nu mamággipun-ipun tu kákkagiyán de a Areopago, sakay essa a bábbey a ngángngahanan de a Damaris, sakay tu agum pa.

Currently Selected:

Gimet 17: MBJC

Highlight

Copy