YASFADOCI LOKU 6

1Huwa ini biamikvtwi tv hvlwrkvhsiwigi, yasi via srpwi hrci nili wiahsi-kvwvsqi gtigrnv; macimi u kvgahgimrfhi via pginv-mahi nili gikvhqimi, macimi mecilici, pami nanakunv-mahi nili u laciwrgi. 2Pvyaqv nr-nakuti nihki Palaseki uci, Gociwa ki tasi Ivwe-pwv ini buryr mvyrugi kutaladewa-nagi wvhsi Ivwegi ini tv hvlwrkvhsi gesagigi? iwvki. 3Macimi u pami rpvftv-wvhi Jesise, Hv mvtv ki mah’ Irbrtudr-nrwv datapilvhi yomv, yasi Ivweci Dapide, ia sqrlvwaci, welv, macimi nihki wa-wedfa-mrcki nili; 4yasi inv becfrci ini wegiwv ya-drci Mvnatu, chena mvmagi macimi mecici ini ufapi tvkuwhv ba-bono-dagi, macimi nahfrpi melrci nihi wawedfa-makuci; babur ini mvyrugi kutaladewa-nagi wvhsi mecigi waciwaphi nihki mkvtaukulvyaki pahi? 5Chena, Nili u Qihfvli ilani inv dabalatvkv ini vlwrkvhsewa, u talvhi.

6Chena ini biamikvtwi nuhgi kutvg tv hvlwrkvhsiwigi, yasi becfrci ini msi-kvmiqi macimi kvgahgimi-waci : chena ’n’tvsi vpiwv ilani, macimi u mvyrwen-gigi u laci vhkvpvtwili. 7Macimi nihki yr-ivwigacki chena nihki Palaseki u gcitv-wrpvmr-wrli nili, qahqi tuga inv wih gegahiwa ini tv hvlwrkvsiwigi; wvhsi manvwvhga mkvmu-wrci wvhsi masdrwimr-wrci nili. 8Pvyaqv inv u wrku-tvmv-wvhi u mamagini-tahawa-nilici; macimi, Pvfaqelu, chena ini alaghi si nepvwilu, u talrli nili ilaneli ba-bonv-malici vhkvpwi-lajawa. Macimi inv pvfaqi chena pami nepvwi. 9Chena Jesise, Gi nvtuhdo-lapwv, Hv mvyrwvtwi ini kutaladewa-nagi wvhsi wa uwasrgi si lvwegi ini tv hvlwrkvhsiwigi, walr wvhsi myrsi lv-wegi? wvhsi wrpvnasdo-dagi lanvwawewa, walr wvhsi mvci-ludo-dagi ini? u talvhi nihi. 10Chena u tah wrpvmvhi gryrukv jrivhki nihi, macimi, Mrsi jegi-lajalalu, u talrli nili. Macimi yone si lvwi inv : macimi patagi-sdodali u laci. 11Pvyaqv nihki uqihfa-nili wivkuwawa; macimi ge-kvlo-ladeki manvwvhi wv ipanvlr-wrci Jesiseli.

12Chena ini biamikvtwi yoloni grsagiki, yasi inv ini ma-qvhgigi si luhf rci wvhsi mvmrtumaci; macimi ivskv inv u mvm-rtu-mrli Mvnadoli nahkvtapqa. 13Chena ini iah whr-pvgi grsa-gigi, utvhpi-mvhi u kvgahgimrfhi; macimi nihi uci magi-nvhi matvhfwi-gita-neswi, niheni nahfrpi apvstvleki u tasi wenvhi : 14Svimvneli, nileni nahfrpi Betv u tasi wenrli, chena Andloli u janinrli, chena Jamseli macimi Jrneli, chena Filvbeli macimi Pvfvlvmiuli, 15chena Mafiyoli macimi Drmuseli, chena Jamseli nili u qihfvli Vlfivs’, chena Svimvneli inv Selvt yr-latv, 16chena Jotvseli nili u qihfvli Jamse, chena Jotvs’ Isgaladeli, inv mv-iasdruhiwa-witv; 17chena u weci biaci brlvcsino-mvhi nihi, maci-mi Ir tapgigi nepvwi, chena maci mahsa-lalici u kvgahgimrfhi, chena maci tfweki nihki jrivhgi Cudia uci lanvwaki macimi Culo-salame, chena ini msi-napi sqrbia Dryr macimi Srtvne, nihgeni biaki wvhsi notvwr-wrci nili, macimi wvhsi gegahofu-wrci u tasi lugawa-nwv; 18macimi nihki ba-tfvgha-kucki wivgi-lahfihi gega-hofoki. 19Chena jrivhgi nili mahsa-lalici nvtunahi-gali wvhsi pahsana-kuci; xvga welv umoiv wrsikvgi, macimi u gegahvhi jr-ivhki.

20Chena u tah wrpv-mvhi u kvgahgimrfhi, macimi, iwv, Ki gisrda-lamaku-fipwv cahi gelvwv gitamr-fvki : xvga gelvwv ini u-gimrwi-drm-kumi Mvnatu. 21Ki gisrda-lamaku-fipwv cahi gelvwv sa-sqrlvwacki inugi : xvga gah dabho-lupwv gelvwv. Ki gisrda-lamaku-fipwv cahi gelvwv wa-wihfvqacki inugi : xvga ga hryrya-lipwv gelvwv. 22Ki gisrda-lamaku-fipwv cahi gelvwv, ina ilaneki gah sega-lamaku-wrki, macimi nihki u wihgrn-wvhi ga huci nuh-bianaku-wrki, macimi lsgimal-wrqa, chena luhfa-pvgitv-mol-wrqa ki wefowa-nwv brsi ma-jrfigi, xvga nili u Qihfvli ilani uci. 23Husvsilabwrku ina ini grsagigi, macimi Ivla-mvcfrku usvsi-labwrwa uci : xvga wrpvtv-muku, msrwi ki taphufewa-nwv betiga wafapvh-kvmigigi; xvga u fwvhi ini-ivskv yasi lvwihtvwr-wrci nihki nihi mrmosigesqa-lici. 24Pvyaqv mvci-labwrwa cahi gelvwv ba-pvwrcki ! xvga naiahkv ki mahci utfaku-nrwv ki wegahofowa-nwv gelvwv. 25Mvci-labwrwa cahi gelvwv, gelvwv da-dabho-lucki inugi ! xvga ga sqrlvwa-pwv gelvwv. Mvci-labwr-wa cahi gelvwv, gelvwv ya-yryalicki inugi ! xvga gah mvwa-pwv macimi gah wihfvqa-pwv gelvwv. 26Mvci-labwrwa cahi gelvwv, ina jrivhki ilaneki ga huwalrcimaku-wrki gelvwv ! xvga u fwvhi ini-ivskv yasi lvwihtvwr-wrci nihki nihi myrsi mrmosigesqalici.

27Pvyaqv gi talapwv nelv gelvwv na-nodrga-yaqa, Hvhqa-lamahku ki mvdaladewa-nwrki, huwas-panv-lahku nihki sa-sega-lamal-wrqa, 28gisrda-lamahku nihki ma-mvci-kvlolal-wrqa, mvm-rtumv-wahku nihki ma-muivlawi ludol-wrqa. 29Hinv wiyafv ba-pgitahuhkv ini gi mvyrwi nuwrgi nahfrpi meli ini vsuwa kutvgi; chena inv ma-mvmvwahkv gi pihtvwi-betanikv tagi inv vhqalatv-mvwi ini gi godemi nahfrpi. 30Meli jrgi wiyafv na-tutvmv-wahkv; macimi inv ma-mvmv-wahkv gi wiahemi tagi nili nvtutv-mvwi nuhgi. 31Chena yasi taha-yaqa wi ipanvlal-wrqa ilaneki, nahfrpi gelvwv ivskv-ini ipanvlahku nihki. 32Chena qahqi vhqala-maqa nihki ya-vqalamal-wrqa, nahiwasi niyrwa ki bonr-nrwv? xvga datapilvhi ma-jelficki ut vhqalamr-wvhi iuhumv ya-vqalamaku-wrci. 33Chena qahqi uwas-panv-laqa nihki wa-uwas-panvlal-wrqa, nahiwasi niyrwa ki bonr-nrwv? xvga data-pilvhi ma-jelaficki ivskv-ini si lvweki. 34Chena qahqi gelvwv vuhaqa nihki nihgeni galv ya-lala-maqa wv hutvtaniga-yaqa, na-hiwasi niyrwa ki bonr-nrwv? datapilvhi ma-jelaficki ut vuhr-wvhi ma-jelafilici, wvhsi nuhgi utafi-wrci ini-laghi. 35Pvyaqv vhqala-mahku ki mvda-ladewa-nwrki, macimi uwas-panv-lahku, chena vuhiwaku, tagi lrqv pami qelvh’ si tahaku; macimi wa-msrwi ki taphufewa-nwv, chena ga hu qihfina-kuwv inv Gci Mospi : xvga uwasi-taha inv nihi wvyaci buryr niyrwa ilafilici macimi ma-jelafilici. 36Uqrwafiku gitaminrqa-ladewa, datapilvhi yasi k’ Uhfw uqrwafici gitaminrqa-ladewa. 37Chena tagi wiahi-lalamiwaku, macimi mvtv wiahi ga hilalama-gopwv : chena tagi mvtvh-kuwr-siwaku, macimi mvtv gah mvtvh-kuwrla-gopwv : pvgfani-waku, macimi gah pvgfana-gopwv : 38meli-waku, maci-mi gah melagopwv ini; uwasi tapvcikv, fvfvgiginota, mrwvtwi nrnomanota, rmrmfanwi, gah si melaku-wrki nihki ki pvla-wrgi. Xvga goqa-nahi si tapvcikv gah tapvci-gapwv ini nuhgi gah tapvci-grla-gopwv.

39Chena pamrtuwawa nahfrpi u kvlolvhi, Hv inv ga-gabe-qatv wih kvtvwi negrni-walrli nili ga-gabeqalici? hv mvtv nihki nayeswi wrsrlvkugi wah si pansinoki? 40Hinv kvgahgimrfv mvtv vliwi lspi makufi ga-gahgi-makuci : wakv jrgi wiyafv iah mahci ludofuci brsi ga-gahgimakuci wa hilafi. 41Chena gociwa gi nama ini pafanowa gi janinv u sgesakugi ya-’dagi, pvyaqv mvtv gi tah mamaginalatv ini bamitvkufagi nahvlwrkv gi sgesakugi ya-’dagi? 42Walr nahiwa gah si kvtvwi ilv gi janinv, Ujaninrnv, welrni nih luhfa-pvgitv ini pafanowa gi sgesakugi ya-’dagi, ina gelv mvtv gi talrpvtv ini bamitvkufagi nahvlwrkv gi sgesakugi ya-’dagi? Gelv naluhci-lvwi-wahfi, nhihtv nahvlwrkv gi sgesa-kugi uci luhfa-pvgitvnu ini bamitvkufagi, macimi ina uwa ga tapinrqi nama wvhsi luhfa-pvgitv-mvni ini pafanowa gi janinv u sgesakugi ya-’dagi. 43Xvga mvtv-lrqv uwasi mtaqi waci negigi wivgrci mvwifowa; walr nuhgi wivgrci mtaqi waci negigi uwasi mvwifowa. 44Xvga jrgi mtaqi nahvlwrkv u mvwifowa uci wrkudota. Xvga ilaneki mvtv gr-wihi si mvwifoki gicimi, walr mvtv pasipahdami meni-grwisahi si mvwifoki nihki. 45Hinv uwasi ilani ini u tahi uci uwasi pvwawa uci biatu ini wa-uwasrgi; macimi inv mvjelanih-fafv ini mvci pvwawa uci biatu ma-jrfigi : xvga ini yrmfagi ini u tahi uci kvlvweiv u doni.

46Chena gociwa, Dabalamiwatv, Dabalamiwatv, ki tasi-pwv, chena mvtv ki tasi lvwe-pwv nili wiahi nelv ya-iuiv? 47Jrgi wiyafv ba-bialutv-witv, chena u nodrnv ni kvlvwewanv, macimi u tasi Ivwih-drnv nili, gah wrpvtala-lapwv nili ya-lvwrci inv : 48brsi ilani inv ilafi bami upvtanvgi, wegiwv, wrlga inv macimi sbr-lvqi hawv, chena usgici nili sekunvli u ta lvhgah-fatu lrmvtvh-gahfacikv : macimi ina yrmikvmigi pvfaqeiv, ini bamtvgi pgitah-fanwi ini wegiwr-pagi, macimi rlwi nomaskv ini : xvga ini mahci ryecdota. 49Wakv inv na-nodrgatv, macimi mvtv-wiahi si lvwi, brsi ilani ilafi inv wa-upvtanvkv wegiwv ini usgi-drmqa mvtv-lrqv lrmvtvh-gahfacikv; ya-pgitah-fagi ini bamtvgi, macimi walanv ini rgicfa-iv; macimi msrwi ini u lekvtafewa inv wegiwv.

Currently Selected:

YASFADOCI LOKU 6: SJW

Highlight

Copy