YASFADOCI LOKU 5

1Huwa ini biamikvtwi, iahaiahi inv mahsa-lakv fvgigaskv-wrci nili macimi notvgi ini u kvlvwewa Mvnatu, bami nepvwici inv pvkvci ini Ginasuladewi msgaqi; 2chena neswi ulvgalvli u namanv inv bami nepvwe-yrki pvkvci ini msgaqi : pvyaqv nihki nvmahfi-la-neki naiahkv nili uci luhfaki, macimi bami gifinvmu-wrci ud rqvsqhrwa-nwv. 3Chena inv ini nakuti nili ulvgalvli Ikvmwv, ini Svimvne welv, macimi u kuci-mrli nili wvhsi ini vsisgi uci mrlhu-qilici takvwihi. Chena lamvtvpiwv macimi u kvgahgi-mvhi nihi mahsa-lalici ini ulvga-lagi uci. 4Chena iah mahci tfwi kvlvwici, Hvlikv Ihuqilu ini tvh-tvmvkvgi, macimi svhgigi lvtanvnu gid rqvsqhrwanv wvhsi rqvsqhr-ivni, u talrli Svimvneli. 5Macimi rpvfsa Svimvne, Mastala, nahkvtapqa ni pakvtafipa, macimi mvtv-wiahi ni pathvdopa : pvyaqv gi kvlvwewa-nagi na huci svhgigi Ivtanrnv nili rqvsqhrwanv, isiwa. 6Chena iah mahci yomv si Ivwewrci, u pathvnr-wvhi nihki maci mahsa-lalici nv-mafhi; macimi nili ud rqvs-qhrwa-nwv bami pgah-grlici; 7chena birku u ta lvtanvmvwr-wvhi wihgrn-wvhi ini kutvgi ulvga-lagi, wvhsi bir-wrci nihki macimi nrtvmvwr-wrci nihi. Macimi nihki biaki, chena uqihfado-nrwv na-yeswi nili ulvgalvli, waciganvhi nili vlami goghvnu. 8Pvyaqv Svimvn’ Betv, iah namagi ini, svhgigi sfa pvkvci u jeqvnewvli Jesise, O, Dabalamiwatv; nelv uci srwalu, xvga ma-jelafitv ilani nelv, isiwa. 9Xvga qvqahdrni-taha, macimi jrivhki wa-weje-makuci ini tv hrqvsqvho-fulici nihi nvmafhi mviahci nihki pathvnr-wrci; 10macimi yone ya-iafi-wrci nahfrpi Jamse chena Jrne, u qifhi Sapade, wa-wihgrni-nrcki Svimvneli. Macimi Jesise, Tagi grwilvwaku; yoci inugi ilaneki gah pathvnrki, u talrli Svimvneli. 11Chena iah mahci nihki vsisgi si vqvhfado-wrci ulvgala-mwv, u nvkvdr-nrwv jrivhki, macimi u nakvlr-wrli nili.

12Chena ini biamikvtwi, iahaiahi vpici nakuti nili udawa-nv, wrpvmahku, ilani uqrwafi usgilhvga-magewa : chena inv iah na-wrci Jesiseli, ulamqi pvxinwv, macimi u nvnvhbrci-mrli, Dabalamiwatv, qahqi si taha-ivna gih kvtvwi fvfvyrghi, isiwa. 13Macimi mrsi jegi-lacaskv, chena u tah pahsa-nrli nili, macimi Hene yasi tahaiv; fvfvyrgho-fulu, u talrli. Macimi walanv ini usgilhvga-magewa inv uci srwayrli. 14Macimi u tapi-mrli nili wvhsi bur inv wetvmv-wrci ilaneli : wakv nhrla wv hrivni, macimi wrpvtasi geiv inv mkvtaukulvia, chena gi fvfvyrgho-fowa uci pvgfanigalu, ya-sfagi yasi tapigamuci Mosise, wv hu dabwawani-wrci nihki, u talrli. 15Pvyaqv brmaci ini vlikv si wapfaiv ini lrcimowa inv si : macimi maci mahsa-lagiki biaci mrwvsgrki wvhsi nodrga-wrci, macimi wvhsi gegahofu-wrci u ta silugawa-nwv. 16Pvyaqv inv ini lr pvpsqvhki u tasi wado-weiv macimi mvmrtuma.

17Chena ini biamikvtwi nakuti tvh nala gesagiki, yasi pami kvgahgimiwaci; chena ’n’tvsi vbeki Palaseki chena kutaladewi drgtaleki bami pvkvci lamvtvpi-wrci, jrgi udawa-nahi Galalegi uci chena Cudiagi macimi Culosamegi waci biaci luhfrcki : macimi ini u wesikvtuwewa inv Dabalamiwatv u wejemaku inv wvhsi gegahi-waci. 18Chena wrpvmahku, ilaneki u bialr-wrli tfvnagi ilaneli na-nagifilici : chena nihki u nvtunahr-nrwv wvhsi becfvhr-wrci nili, macimi sagfadr-kuci nili ya-lvhfv-meci. 19Macimi nihki u pami qelr-nrwv ini wvyaci wv huci manvwvhi becfvhr-wrci nili xvga inv mahsa-lakv uci, nihki spamagi ini vkuci-kvmi wegiwv haki, macimi ini alaghi u tah Irsiwanr-wrli nili srpwi nihi vpvh-qahfi-wvkkuhi gilagi u tfvni betiga ya-lvhfv-melici Jesiseli. 20Macimi inv pami namv-wvhi u dapwahsawa-nwv nihki, Ilani, gi mvjelafewanv gi pvgfa-latvmr-gopi, u talrli. 21Macimi nihki yr-ivwi-gacki chena nihki Palaseki vlami mamagini-tahaki, Nafvwa yrmv ga-kvlvwitv pvhdrmowa? Nafvwa kvtvwi pvgfa-latvmv-wiwa mvjelafewanv, Mvnatu pvyaqv nrnsihkv? iwvki. 22Pvyaqv Jesise u pami mola-latvmv-wvhi yasi tahawa-nilici, rpvfsa, Goeiwa ki mamagini-taha-pwv ki tahi-wrgi? u talvhi. 23Drniwa vlikv wacihi, wvhsi iugi, Gi mvjela-fewanv gi pvgfa-latvmr-gopi; walr tuga, Unsgrlu macimi pamfalu? wvhsi iugi. 24Wakv wvhsi gelvwv manvwvhi wrkutv-maqa yasi inv u Qihfvli ilani bonvgi simakufewa usgi-drmqa wvhsi pvgfa-latvmv-wiwaci mvjelafewa-nv (u tah kvlo-lrli nili na-nagifilici), Gi tala nelv, Unsgrlu, chena mvmalu gi tfvni, macimi nhrla wegiwv ya-drivni, u talrli nili. 25Macimi walanv inv unskv ya-lvhfv-melici nihi, chena u tah mvma ini tvh saxigi, macimi nhawv wegiwv yadrci, u pami wvhfrci-makuwhrli Mvnadoli. 26Chena qvqahdrni-tahawa u masanaku-nrwv jrivhki, macimi u wvhfrci-makuwhr-wrli nihki Mvnadoli; chena uqihfan-wili grwilvwawa, Ki mahci namapa mvivci wiahi inugi grsagigi, iwvki.

27Chena vhkuwihi ina yolumv wiahi via wapfa, macimi vlikv u nawrli daxewi-mrwvtunigah-feli, Lefri sifoli, bami lamvtv-pilici ini yr-tvh daxhiwagi, chena, Nakvsilu, u talrli. 28Macimi inv u nvkvtv jrivhki, chena pvfaqi macimi u nakvlrli nili.

29Chena Lefri u mactv-wrli nili msi wihfacigawa betiga ya-drci wegiwv : macimi ’n’tvsi maci mahsa-lagiki daxewi-mrwvtu-nigah-feki chena kutvkhi bami wetvbe-maku-wrci tvh wihfanigi. 30Chena nihki Palaseki macimi ud awigam-wvhi u pagihkvwr-wvhi u kvgahgimrfhi, Goeiwa gelvwv ki wihpumr-wrki macimi ki wedrpuwamr-wrki nihki daxewi-mrwvtunigah-feki macimi ma-jelaficki? isiwaki. 31Macimi pami rpvfsa Jesise, Nihki, wa-uwasi-lrsvmv-mucki mvtv skvtv si tahaki nr-nvtvuci-galici; nihki wakv ya-vqilugacki. 32Mvtv nelv wvhsi utvhpi-mvki nihki ma-yrwelaficki ni uci bir ma-jelaficki wakv wvhsi mvtvini si tahawani-wrci, u talvhi.

33Chena u talr-wrli nihki, Nihi u kvgahgimrfhi Jrne gtv-wilvhi ucigaki, macimi usdo-nrwv nvnvhbrci-mowanv; nahfrpi ini ivskv nihi u kvgahgimrf-wvhi nihki Palaseki; wakv gelv wihfaneki macimi manoki, u takuhi. 34Macimi Jesise, Hv kih kvtvwi uciga-hr-wrki nihi u qifhi inv mvivgi-nhrkvnah-qawikv, iahaiahi nili mvivgi-nhrkvnvli weci gamaku-wrci? 35Wakv wah biaiv grsa-gigi; macimi ina nili mvivgi-nhrkvnvli wah mvmrqeki nihki, ina uwa wa hucigaki, u talvhi. 36Chena pamrtuwawa nahfrpi u kvlolvhi nihi : Mvtv ilani wasgigi betanikv uci lalginv mrlaghi macimi gahtv betanikv-nagi u tah bonv ini; belaba wah lalginv ini wasgigi, macimi ini mrlaghi ini wasgigi uci nahfrpi mvtv wa hu-was-fanwi ini gahtv. 37Chena mvtv ilani u tvh si bonv wasgigi wveni gahtv bodrlr-wvhi; belaba ini wasgigi wah puhgicas-grku-nrwv nihki bodrlr-wrki, macimi ini wah fegfa-nwi, macimi nihki bodrlr-wrki wah myrlafeki. 38Wakv wasgigi wveni qelvhi mvivgi wvenewi bodrlr-wrki si bonota. 39Chena mvtv ilani pami mahci manwv gahtv wveni skvtv si taha wasgigi; xvga Ini gahtv uwasv, hiwv inv.

Currently Selected:

YASFADOCI LOKU 5: SJW

Highlight

Copy