Mark 11
11
1Þa he genehlahte ierusalem ⁊bethania to oliuete dune. he sende his twegen leorningcnihtes. 2⁊quoth. to heom. Fareð to þam castele þe ongean inc ys ⁊gyt þær sone gemeteð assen fole geteidne; ofer þane nan man geot ne sæt. unteigeð hine ⁊to me gelædeð. 3And gyf hwa to ginc aht cweð; seggeð þt drihten hæfd his neode ⁊hyo hine sona hider læt. 4⁊þa hyo ut ferden hyo gemetten þanne fole ut on twicinan beforan dure geteigdne. þa unteigden hyo hine. 5⁊sume þe þær stoden þus saigden heom. Hwat do gyt þan folen unteygende. 6þa cwæðen hyo swa se hælend unc bead ⁊hyo leten hyo þa. 7Ða lædden hyo þanne folan to þam hælende ⁊hyo heora reaf on aleigden ⁊he on sæt. 8Manega heore reaf on þane weig strehten. sume þa boges of þam trewen heowan ⁊streoweden on þanne weig. 9⁊þa þe beforen eoden ⁊þa þe æfter folgeden cwæðen þus. osanna; syo gebletsed se þe com on drihtenes name. 10sy bletsed þæt rice þe com ures fæder dauiðes osanna on hehnyssen. 11⁊he eode þa on ierosolima temple ⁊ealle þing he besceawede. Ða afen time wæs he ferde to bethania mid his twelf leorningcnihten. 12And oþren daige þa hyo ferden fram bethanie him hingrede. 13Ða he ferren geseah an fictreow þe leaf hæfde. he com ⁊sohte hwæðer he þær on aht funde. þa he him to com; ne funde he þær buton leaf ane. Sodlice hit wæs þas fictreowes time. 14Ða cwæð he. heonen forð on ecnysse ne æte anig man wæstme of þe ⁊his leorningcnihtes þt gehyrden. 15Ða comen hyo eft to ierusalem ⁊þa he on þt tempel eode. he gan drifen of þam tempel syllende ⁊byggende ⁊munetera þrocu ⁊heahsetle. þe þa culfran cheptan he tobræc. 16⁊he ne geþafode þt anig man anig fet þurh þa tempel bære 17⁊he þa lærende þus cwæð to heom. Nis his awriten þt min hus fram eallen þeoden beoð genemned bed hus. soðlice ge dyden þt to scaþene scerefe. 18Ða þare sacerde ealdres ⁊þa boceres þis gehyrden. hyo þohten hu hyo hine forspilden. þeah hyo heom ondrædden hine. for þan eall syo manigeo wundrede be his lære. 19⁊þa hit æfen wæs he eode of þare ceastre. 20On morgen þa hyo ferden. hyo geseagen þt fictreow forscruncen of þam wertrumen. 21Ða quoth. petrus. Lareow. loca hu forscranc þt fictreo þe þu wergedest. 22þa cwæð se hælend him andsweriende. hæbbed godes truwan 23ic segge eow to soðe. swa hwilc swa cwæð to þise munte. syo þu aferred ⁊on sæ aworpen ⁊on his heorte ne tweoneð ac gelyfð swa hwæt swa he cweð gewurðe þis. hit gewurð. 24for þan ic eow segge swa hwæt swa ge gyrnende bydðed gelyfað þt ge hit onfoð ⁊hit eow becymð. 25And þanne ge standed eow to gebyddenne. forgyfeð gyf ge hwæt agen anigene hæbbeð. þæt eow eower senne forgieue. eower hefenlice fæder se þe on heofene ys. 26Gyf ge þanne ne forgyfeð. ne eow eower senne ne forgyfð ower heofenlice fæder. 27Þa com he eft to Ierusalem ⁊þa he on þam temple eode him to geneahlacten þa heahsacerdes ⁊boceres ⁊ealdres. 28⁊þus cwæðen. On hwilcen anwealde dest þu þas þing ⁊hwa sealde þe þisne anweald þt þu þis do. 29Þa cwæð se hælend ⁊ic axie eow anre spræce andsweriað me ⁊ic segge eow þanne on hwilcen anwealde ic þis do. 30Hwæðer wæs iohannes fulluht þe of heofene þe of mannen andsweried me. 31Ða þohten hyo ⁊cwæðen betweoxe heom. gyf we seggeð of heofene. he segð us hwi ne gelyfde ge hym. 32gyf we seggeð of mannen. we ondrædeð þis folc. ealle hyo hafden Iohannem þt he wære soðlice witege. 33Ða andswereden hyo þam hælende ⁊cwæðen. we nyten. Þa cwæð se hælend ne ic eow ne segge on hwilcen anwealde ic þas þing do.
Currently Selected:
Mark 11: ASxG
Highlight
Share
Copy
Want to have your highlights saved across all your devices? Sign up or sign in
The Four Gospels in AngloSaxon (Old English) were translated from Latin by Abbot Ælfric of Eynsham, probably some time within the period 990 – 1010.
