Luka 24

Ukuvuka kukaJesu

(Mat 28:1–10; Mark 16:1–8; Joha 20:1–10)

1Kodwa ngosuku lokuqala lweviki, emadabukakusa, bafika elibeni bephethe amakha ababewalungisile. 2Bafumana ilitshe ligiqiwe elibeni. 3Kuthe bengena, kabasifumananga isidumbu seNkosi uJesu. 4Kwathi besadidekile ngalokhu, amadoda amabili ema labo, embethe ingubo ezicwazimulayo. 5Besaba, bakhangela phansi; amadoda athi kubo: Lifunelani ophilayo kwabafileyo na? 6Khumbulani ukukhuluma kwakhe kini eseseGalili,#Mat 16:21; 17:22–23; 20:18–19; Mark 8:31; 9:31; 10:33–34; Luka 9:22; 18:31–33 7esithi: INdodana yomuntu imele ukunikelwa ezandleni zabantu abayizoni, ibethelwe, ivuke ngosuku lwesithathu. 8Basebewakhumbula amazwi akhe. 9Sebebuyile bevela elibeni, babika konke lokhu kwabalitshumi lanye lakubo bonke abanye. 10KwakunguMariya Magadalena, loJowana, loMariya unina kaJakobe; labanye ababekanye labo babatshela abaphostoli lokhu. 11Kodwa lawomazwi aba njengokukhuluma okuyize kibo, kabaze bawakholwa.[12Kodwa uPetro wasuka, wagijimela elibeni, wakhothama, wakhangela phakathi, wabona amalembu ewodwa; wabuyela ekhaya emangele ngokwenzekileyo.]

Abafundi abaya eEmawusi

(Mark 16:12–13)

13Ngalona lolosuku ababili babo babehamba, besiya emzini othiwa yiEmawusi, ongaba ngamakhilomitha alitshumi kusukela eJerusalema. 14Babekhulumisana ngazo zonke lezizinto ezenzekileyo. 15Besakhulumisana bebuzana, uJesu uqobo wasondela kibo, wahamba kanye labo; 16kodwa amehlo abo ayebambekile ukuba bangamazi. 17Wasesithi kubo: Yizindaba bani elikhulumisana ngazo lihamba na? Basebesima bedanile. 18Omunye wabo, othiwa nguKleyopha, wamphendula wathi: Wena nguwe wedwa isihambi eJerusalema ongazaziyo izinto ezenzekileyo kulezinsuku na? 19Wathi kubo: Yizinto bani na? Bathi kuye: NgoJesu waseNazaretha obengumprofethi olamandla ngemisebenzi langelizwi phambi kukaNkulunkulu lasebantwini bonke, 20ukuthi abapristi abakhulu lababusi bethu bamnikela ukuba agwetshelwe ukufa, abethelwe. 21Kodwa thina besithemba ukuthi nguye obezakukhulula uIsrayeli; kodwa phezu kwakho konke lokhu sekulusuku lwesithathu lezozinto zenzakele. 22Njalo abesifazana abathile basimangalisile, bebeyile elibeni ekuseni, 23kuthe bengasifumani isidumbu sakhe, babuya besithi babonile lombono wezithunywa ezithe uyaphila. 24Labathile bakithi baya elibeni, bafumana kunjalo njengokutsho kwabesifazana, kodwa yena uqobo kabambonanga. 25Wasesithi kibo: O lina elingelakuqedisisa elilenhliziyo ezivilaphela ukukholwa konke lokho okwatshiwo ngabaprofethi! 26UKristu ubengamele yini ukuba ahlupheke ngalezizinto, anduba angene ebukhosini bakhe na? 27Esusela kuMose lakubo bonke abaprofethi, wabachasisela emibhalweni yonke izinto eziqondene laye.

28Basebesondela emzini ababesiya kuwo; yena watshaya kungathi udlulela phambili. 29Kodwa bamncenga kakhulu, besithi: Hlala lathi, ngoba sekuzakuhlwa, lemini isiyedlule. Wangenake, wahlala labo. 30Kwathi esehlezi ekudleni, wathatha isinkwa, wabonga, wasihlephuna, wabanika. 31Amehlo abo avuleka, basebemazi; wanyamalala kibo. 32Bakhulumisana besithi: Inhliziyo zethu bezingavuthi yini phakathi kwethu, lapho ekhuluma lathi endleleni, lalapho esivulela imibhalo na? 33Basebesuka ngasona lesosikhathi, babuyela eJerusalema; bafumana abalitshumi lanye lababelabo bebuthene ndawonye, 34besithi: Impela iNkosi ivukile, ibonakele kuSimoni. 35Basebelandisa labo okwenzekileyo endleleni, lokuthi bayazi kanjani ekuhlephuneni isinkwa.

Ukuzibonakalisa kukaJesu kubafundi bakhe

(Mat 28:16–20; Mark 16:14–18; Joha 20:19–23)

36Besakhuluma lokho, uJesu uqobo wema phakathi kwabo. 37Kodwa batshaywa luvalo, besaba besithi babona isipuku. 38Wasesithi kubo: Likhathazekelani, kuveleleni imibuzo enhliziyweni zenu na? 39Khangelani izandla zami lenyawo zami, lazi ukuthi yimi uqobo; lingibambe, libone, ngoba isipuku kasilanyama lamathambo njengoba lingibona ngilakho. [40Esekutshilo lokho wabatshengisa izandla zakhe lenyawo zakhe.] 41Kodwa bengakholwa ngenxa yentokozo, bemangala, wathi kibo: Lilakho ukudla lapha na? 42Bamnika iqatha lenhlanzi ephekiweyo. 43Walithatha, walidla phambi kwabo.

44Wasesithi kibo: Yila amazwi ami engawakhuluma kini ngiseselani okuthi: Kumele ukuba kugcwaliseke konke okwalotshwa ngami emlayweni kaMose, lakubaprofethi, lakumahubo. 45Wasevula ingqondo zabo, ukuze baqedisise imibhalo. 46Wathi kibo: Kulotshiwe ngokunje ukuthi uKristu uzakuhlupheka, avuke kwabafileyo ngosuku lwesithathu, 47kutshunyayelwe ebizweni lakhe ukuphenduka, lokuthethelelwa kwezono ezizweni zonke, kuqalwe eJerusalema. 48Linake lingofakazi balezizinto. 49Khangelani, ngiyathumela kini isithembiso sikaBaba; kodwa hlalani emzini, lize lambathiswe amandla avela phezulu.#Seb 1:4

Ukwenyuka kukaJesu

(Mark 16:19–20)

50Wasebathatha ephuma labo, baze bafika ngaseBethani, ephakamisa izandla zakhe, wababusisa.#Seb 1:9–11 51Kwathi esababusisa, wehlukana labo, wenyuselwa ezulwini. 52Babuyela eJerusalema, belokuthokoza okukhulu. 53Babekhona ethempelini njalo bemdumisa uNkulunkulu.

Currently Selected:

Luka 24: BE1978

Highlight

Copy