Luka 23

UJesu uphambi kukaPilatu

(Mat 27:1–2, 11–14; Mark 15:1–5; Joha 18:28–38)

1Kwasekusuka ixuku lonke, lamusa kuPilatu. 2Baqala ukummangalela, besithi: Simfumene lumuntu eduhisa isizwe sakithi, esalela ukuthela kuKesari, esithi nguye onguKristu inkosi. 3UPilatu wambuza wathi: Wena uyiNkosi yabaJuda na? Wamphendula wathi: Kutsho wena. 4Wasesithi uPilatu kubapristi abakhulu lemaxukwini: Kangifumani cala kulumuntu. 5Kodwa baqinisa, besithi: Uvusa abantu efundisa kulo lonke elaseJudiya, waqala kwelaseGalili, waze wafika lapha.

UJesu uphambi kukaHerodi

6UPilatu ekuzwa lokhu wabuza ukuba lumuntu ungowaseGalili yini. 7Kwathi esezwile ukuthi ungowombuso kaHerodi, wamthumela kuHerodi owayekhona laye eJerusalema ngalesosikhathi. 8Kwathi uHerodi embona uJesu, wathokoza kakhulu, ngoba kwasekukade efisa ukumbona, ebezwile ngaye; wayethemba ukuthi uzakubona isibonakaliso sisenziwa nguye. 9Wambuza amazwi amanengi, kodwa yena kaphendulanga lutho. 10Abapristi abakhulu lababhali babemi bemmangalela ngamandla. 11UHerodi lamabutho akhe bamyangisa, bamenza inhlekisa, basebemambathisa ingubo enhle, bambuyisela kuPilatu. 12Ngalolosuku uHerodi loPilatu bathandana; ngoba ngaphambi kwalokhu kwakukhona ukungezwani phakathi kwabo.

Ukulahlwa kukaJesu lokukhululwa kukaBarabasi

13UPilatu wasebabizela ndawonye abapristi abakhulu lababusi babantu, 14wathi kibo: Limlethile kimi lumuntu ngokungathi ungoduhisa abantu. Khangelani, ngimhlolile phambi kwenu, kodwa kangifumananga cala ngalezozinto elimmangalela ngazo; 15kunjalo loHerodi laye ngoba umbuyisile kithi. Impela kenzanga lutho afanele ukufa ngalo. 16Ngakhoke ngizakumtshaya, ngimkhulule. [17Kwakufanele ukuba abakhululele abe munye ngesikhathi somkhosi.]

18Bamemeza bonke kanyekanye, besithi: Msuse lumuntu, usikhululele uBarabasi. 19Yena wayefakwe entolongweni ngenxa yesiphithiphithi sokuvukela umbuso esenzeka phakathi komuzi, langenxa yokubulala. 20UPilatu wabuye wakhuluma labo efuna ukumkhulula uJesu; 21kodwa bamemeza besithi: Mbethele, mbethele! 22Wasesithi kibo ngokwesithathu: Ngani, wenze ububi bani na? Kangifumananga kuye icala afanele ukufa ngalo; ngakhoke ngizakumtshaya, ngimkhulule. 23Kodwa bamcindezela ngokumemeza befuna ukuba abethelwe. Ukumemeza kwabo kwaphumelela. 24UPilatu wasequma ukuba kwenziwe abakufunayo. 25Wasemkhulula lowo ababemcelile owayefakwe entolongweni ngenxa yesiphithiphithi sokuvukela umbuso lokubulala; kodwa uJesu wamnikela kibo njengokuthanda kwabo.

UJesu esiphambanweni

(Mat 27:33–44; Mark 15:21–32; Joha 19:17–27)

26Kwathi behamba laye, babamba uSimoni waseKurene owayevela emaphandleni, bamethwesa isiphambano ukuba asithwale emva kukaJesu. 27Kwamlandela ixuku elikhulu labantu; kwakukhona labesifazana ababemkhalela, bemlilela. 28Kodwa uJesu ephendukela kubo wathi: Madodakazi aseJerusalema, lingangikhaleli mina, kodwa zikhaleleni lina labantwana benu. 29Ngoba khangelani, ziyeza insuku abazakutsho ngazo ukuthi: Zibusisiwe inyumba lezizalo ezingazalanga lamabele angamunyisanga. 30Bazakuqalisa ukuthi ezintabeni: Welani phezu kwethu; lemaqaqeni ukuthi: Sisibekeleni.#Hos 10:8; Isam 6:16 31Ngoba uba besenza lokhu esihlahleni esimanzi, bazakwenza njani kwesomileyo na?

32Kwakukhona labanye, abaphangi ababili, abesiwa ukuba babulawe kanye laye. 33Sebefikile endaweni ethiwa uKhakhayi bambethela khona kanye labaphangi, omunye ngakwesokunene lomunye ngakwesokhohlo. 34UJesu wasesithi: Baba, bathethelele, ngoba kabakwazi abakwenzayo. Babelana ingubo zakhe, benza inkatho ngazo.#Hubo 22:18 35Abantu bema, bembukela; kodwa ababusi bamklolodela besithi: Wasilisa abanye; kazisilise yena, uba enguKristu okhethiweyo kaNkulunkulu. 36Labebutho bamenza inhlekisa, beza kuye, bamnika iwayini elimunyu 37besithi: Uba uyiNkosi yabaJuda, zisilise wena. 38Kwakukhona lombhalo ngaphezu kwakhe wokuthi: LO YINKOSI YABAJUDA.

39Njalo lomunye wabaphangi ababephanyekwe kanye laye wamthuka esithi: Wena kawusuye uKristu na? Zisilise kanye lathi. 40Kodwa omunye wamkhuza, esithi: Wena kawumesabi uNkulunkulu, lokhu lawe ukulokhukulahlwa na? 41Thina kambe kusifanele, ngoba samukela umvuzo olingene ukwenza kwethu; kodwa lumuntu kenzanga lutho olubi. 42Wasesithi: Jesu, ungikhumbule, nxa usubuya ngobukhosi bakho. 43Wathi kuye: Ngiqinisile ngithi kuwe: Lamhlanje uzakuba lami eParadise.

Ukufa kukaJesu

(Mat 27:45–46; Mark 15:33–41; Joha 19:28–30)

44Kwakusemini, kwaba mnyama elizweni lonke, kwaze kwaba yiawa yesithathu ntambama; 45kwafiphala ilanga, leveli lethempeli ladabuka phakathi.#Eks 26:31–33 46UJesu wasememeza ngelizwi elikhulu, esithi: Baba, ezandleni zakho ngibeka umoya wami. Esetshilo lokhu wafa.#Hubo 31:5 47Induna yekhulu isibonile lokho okwenzekileyo yamdumisa uNkulunkulu, isithi: Impela lumuntu ubengelacala. 48Amaxuku wonke ayebuthene ukubukela lokho sebebonile okwenzekileyo, babuyela emakhaya, betshaya izifuba zabo. 49Bonke abazana laye labesifazana ababemlandela bevela eGalili bema khatshana, bebona lezizinto.#Luka 8:2–3

Ukumbelwa kukaJesu

(Mat 27:57–61; Mark 15:42–47; Joha 19:38–42)

50Kwakukhona umuntu othiwa nguJosefa, owayelilungu lomphakathi, eyindoda elungileyo. 51Yena wayengavumelananga lecebo kanye lesenzo sabo. Wayengowomuzi wabaJuda othiwa yiArimathiya, elindele umbuso kaNkulunkulu; 52wasuka waya kuPilatu, wacela isidumbu sikaJesu. 53Wasethula, wasigoqela ngamalembu, wasibeka elibeni elaligujwe edwaleni, okungazanga kubekwe kulo umuntu. 54Kwakulusuku lokulungiselela; leSabatha laselizakuqala. 55Abesifazana ababeze laye bevela eGalili balandela, balibona iliba lokubekwa kwesidumbu sakhe. 56Basebebuyela emuva, balungisa amakha lamagcobo. NgeSabatha baphumula njengomlayo.#Eks 20:10; Dute 5:14

Currently Selected:

Luka 23: BE1978

Highlight

Copy