Gen 43

Abafowabo bakaJosefa babuyela eGibithe kanye loBenjamini

1Indlala yayinkulu elizweni. 2Kwathi sebewaqedile amabele ababewathengile eGibithe, uyise wathi kubo: Buyelani, liyesithengela okunye ukudla. 3UJuda wathi kuye: Lowomuntu wasiqonqosela wathi: Kalisoze libubone ubuso bami uba umnawenu lingelaye. 4Uba umthuma lathi umnawethu sizahamba siyethenga ukudla, 5kodwa uba ungamthumi, lathi kasiyikuhamba, ngoba lowomuntu wathi kithi: Kalisoze libubone ubuso bami uba umnawenu lingafikanga laye. 6UIsrayeli wathi: Lenzelani okubi kangaka kimi ngokumtshela lowomuntu ukuthi lilomunye umnawenu na? 7Bathi: Lowomuntu wabuza imibuzo eminengi mayelana lathi langezihlobo zethu, wathi: Usekhona uyihlo na? Lilomunye umnawenu na? Samphendula ngalawomazwi; sasingakwazi kanjani ukuba uzakuthi: Mletheni lapha umnawenu. 8UJuda wathi kuIsrayeli uyise: Thuma umfana lami; sizasuka sihambe, ukuba sisile singafi thina, lawe labantwana bethu. 9Mina ngizakuba yisibambiso sakhe; uzakumbiza esandleni sami; uba ngingambuyisi kuwe ngimbeke phambi kwakho, ngizakuba lecala kuze kube nini lanini. 10Impela uba besingalibalanga, ngabe sesibuyele okwesibili.

11Uyise uIsrayeli wathi kubo: Uba kunjalo, yenzani lokhu; fakani emasakeni enu izithelo ezikhethiweyo zelizwe, limphathele lowomuntu isipho, amakha ayingcosana lenyosi eziyingcosana, inhlaka lemure, lezinye izithelo ezimnandi; 12liphathe imali iphindwe kabili; futhi imali leyo eyabuyiselwayo emasakeni enu libuyele layo, ngoba mhlawumbe kwaba yisiphosiso ukufakwa kwayo. 13Lithathe futhi lomfowenu, lisuke, libuyele kulowomuntu. 14UNkulunkulu uSomandla kalenzele isihawu lowomuntu ukuze alikhululele umfowenu lowo omunye kanye loBenjamini. Uba ngamukwa abantwana bami, ngiyamukwa. 15Amadoda asethatha lesosipho lemali ephindwe kabili ezandleni zabo kanye loBenjamini; asuka ehlela eGibithe, ema phambi kukaJosefa.

16UJosefa embona uBenjamini elabo, wathi kumphathi wendlu yakhe: Ngenisa lamadoda endlini, uwahlabele, ulungise ukudla, ngoba lamadoda azakudla lami emini. 17Umphathi wenza njengokutsho kukaJosefa, wawangenisa amadoda endlini kaJosefa. 18Amadoda lawo ethuka, ngoba engeniswa endlini kaJosefa; athi: Singenisiwe lapha ngenxa yemali eyabuyiselwa emasakeni ethu kuqala, ukuba asethwese icala, asisukele, asithumbe kanye lobabhemi bethu. 19Asondela kumphathi wendlu kaJosefa, akhuluma laye ngasemnyango wendlu athi: 20O nkosi! safika kuqala sizethenga ukudla. 21Kwathi sesifikile endlini yezihambi, savula amasaka ethu, safumana ukuba imali yalowo lalowo yayisemlonyeni wesaka lakhe, yonke imali yethu ngokulinganiswa kwayo; sibuye layo. 22Futhi size lenye imali ukuba sithenge ngayo ukudla. Kasazi ukuba imali yethu yafakwa ngubani emasakeni ethu. 23Wasesithi: Ukuthula kakube kini, lingesabi. UNkulunkulu wenu loNkulunkulu kayihlo ulinikile inotho emasakeni enu. Imali yenu ngayamukela. Wasemkhupha uSimeyoni, wamletha kubo. 24Umphathi wasewangenisa amadoda endlini kaJosefa, wawanika amanzi; ageza inyawo zawo; wanika obabhemi bawo ukudla. 25Amlungisela uJosefa isipho engakafiki emini, ngoba ayezwile ukuthi uzakudlela lapho.

26Kwathi uJosefa esefikile ekhaya, aletha kuye endlini isipho ayelaso, athi mbo ngobuso phansi. 27Wabuza impilo yawo wathi: Uyaphila uyihlo yini, ixhegu elalikhuluma ngalo na? Lisekhona na? 28Athi: Inceku yakho ubaba uyaphila, usekhona. Asekhothamela phansi kuye. 29UJosefa wasekhangela, wabona uBenjamini umfowabo, indodana kanina, wathi: Nguye lo umnawenu omncinyane elakhuluma ngaye kimi na? Wathi futhi: UNkulunkulu kabe lomusa kuwe, mfana wami. 30Inhliziyo kaJosefa yavutha ngokukhanuka umfowabo; waphangisa wadinga indawo lapho ayengakhalela khona; wangena endlini yakhe, wakhala khona. 31Esegezile ubuso bakhe, waphuma; esezibambile wathi: Lethani ukudla. 32Bamnika ukudla yedwa, labo babanika bodwa, lamaGibithe ayesidla laye bawanika wodwa, lokhu amaGibithe ayengedle lamaHeberu, ngoba kuyinto eyisinengiso kumaGibithe. 33Bahlala phambi kwakhe ngokwelamana kwabo, kusukela kolizibulo njengobuzibulo bakhe, kwaze kwafika komncinyane njengobuncinyane bakhe; abantu bakhangelana bemangala. 34UJosefa wababela ekudleni okwakuphambi kwakhe; kodwa isabelo sikaBenjamini saphindwa kahlanu silinganiswa lesabelo sabanye. Banatha bajabula laye.

Currently Selected:

Gen 43: BE1978

Highlight

Copy