Gen 44

UJosefa uyabalinga abafowabo

1Waselaye umphathi wendlu yakhe esithi: Gcwalisa amasaka alamadoda ngokudla okulingene amandla awo okuthwala, ufake imali yaleyo laleyondoda emlonyeni wesaka layo. 2Ufake inkezo yami, inkezo yesiliva, emlonyeni wesaka lencinyane kanye lemali yayo. Wenzake njengelizwi likaJosefa. 3Kwathi sekusile, amadoda avunyelwa ukuhamba kanye lobabhemi bawo. 4Esephumile emzini, engakabi khatshana, uJosefa wathi kumphathi wendlu yakhe: Suka ulandele lawomadoda; lapho usuwaficile uthi kuwo: Liphindiseleni okuhle ngokubi na? 5Inkezo le kayisiyo enatha ngenkosi yami, levumisa ngayo na? Lenze okubi ngokwenza njalo.

6Wawafica, wakhuluma lawo amazwi la. 7Athi kuye: Inkosi yethu ikhulumelani amazwi anje na? Kakube khatshana lezinceku zakho ukwenza okunje. 8Khangela, imali esayifumana emilonyeni yamasaka ethu sayibuyisa sivela elizweni laseKanani, sayiletha kuwe. Pho, besingeba kanjani isiliva loba igolide endlini yenkosi yakho na? 9Uba ufumana inkezo komunye wezinceku, zakho, kabulawe, lathi sibe yizigqili zenkosi yethu. 10Wathi: Kakube njengamazwi enu; lowo ezakufunyanwa kuye inkezo kabe yisigqili sami, lina abanye lingabi lacala. 11Ileyo laleyondoda yaphangisa ukwethula isaka layo, yalivula. 12Wawaphenya eqala kwenkulu wacina kwencinyane; inkezo yafunyaniswa esakeni likaBenjamini. 13Asedabula ingubo zawo; ileyo laleyo yethwesa ubabhemi wayo, yabuyela emzini.

14UJuda labafowabo bafika endlini kaJosefa; wayesesekhona, bakhothamela phansi phambi kwakhe. 15UJosefa wasesithi kubo: Kuyini lokhu elikwenzileyo na? Belingazi ukuthi umuntu onjengami anganuka njengesanuse na? 16UJuda wathi kuye: Sizakuthini enkosini yethu na? Singakhulumani? Sizakuzilandulela sithini? UNkulunkulu ubufumene ububi bezinceku zakho; khangela, siyizigqili zenkosi yethu kanye laye okufunyenwe kuye inkezo. 17Wasesithi: Kakube khatshana lami ukwenza njalo. Lowo efunyenwe kuye inkezo nguye ozakuba yisigqili sami; kodwa lina hambani kuhle liye kuyihlo.

18UJuda wasesondela kuye wathi: O nkosi yami! vumela inceku yakho ike ikhulume ilizwi enkosini yami, ungayithukutheleli inceku yakho, ngoba ungangoFaro wena. 19Inkosi yami yabuza inceku zayo yathi: Liloyihlo ingabe lomfowenu na? 20Sathi enkosini yami: Silobaba oselixhegu, lomntwana wobuxhegu bakhe omncinyane umnewabo sewafa, nguye yedwa osesele kwabakanina, uyise uyamthanda. 21Wena wathi encekwini zakho: Mletheni kimi ukuba ngimbone ngamehlo ami. 22Sathi enkosini yethu: Umfana angetshiye uyise; ngoba uba emtshiya uyise, uyise uzakufa. 23Wena wathi encekwini zakho: Uba umnawenu engafiki lani, kalisoze libone ubuso bami futhi. 24Kwathi sesibuyele kubaba inceku yakho, samtshela amazwi enkosi yethu. 25Ubaba wathi: Buyelani, lisithengele okunye ukudla. 26Sathi thina: Singeke siye, kodwa uba umnawethu omncinyane elathi singaya, ngoba singebone ubuso balowomuntu uba umnawethu omncinyane singelaye. 27Inceku yakho ubaba yathi kithi: Liyazi ukuthi umkami wangizalela amadodana amabili; 28enye yasuka kimi, ngakho ngathi: Impela idatshuliwe; selokhu kwaba yilesosikhathi kangiyibonanga. 29Uba lithatha le, yehlelwe ngokubi, lizakwehlisela izimvi zami endaweni yabafileyo ngosizi. 30Ngakhoke lapho ngibuyela kubaba inceku yakho, umfana singelaye, njengoba ukusila kwakhe kuhlangene lokusila komfana, 31nxa ebona ukuthi umfana kasilaye, uzakufa; inceku zakho zizakwehlisela izimvi zenceku yakho ubaba endaweni yabafileyo ngosizi. 32Ngoba inceku yakho yaba yisibambiso somfana kubaba yathi: Uba ngingambuyiseli kuwe, ngizakuba lecala kubaba kuze kube nini lanini. 33Ngakhoke, inceku yakho kayisale esikhundleni somfana, ibe yisigqili senkosi yami, umfana akhuphuke kanye labafowabo. 34Ngoba ngingakhuphukela kubaba kanjani umfana ngingelaye, ngibone okubi okuzakumehlela ubaba na?

Currently Selected:

Gen 44: BE1978

Highlight

Copy