Gen 11

Umphotshonga waseBabeli

1Umhlaba wonke wawulolimi lunye lokukhuluma kunye. 2Kwathi ekusukeni kwabo empumalanga abantu bafumana igceke elizweni laseShinari, bahlala khona. 3Basebekhulumisana besithi: Wozani, asenzeni izitina sizitshise kuhle. Izitina zaba ngamatshe abo, lengcino yaba ludaka lwabo. 4Bathi: Wozani, asakheni umuzi lomphotshonga osihloko sawo sifinyelela ezulwini, sizenzele ibizo elikhulu singahlakazeki emhlabeni wonke. 5INkosi yehla ukubona umuzi lomphotshonga okwakhiwa ngabantu. 6INkosi yasisithi: Khangela, bayisizwe sinye, balolimi lunye, yikho abaqala ngakho; khathesi kabasayikwahlulwa lutho abafuna ukulwenza. 7Wozani, sehle, siphambanise ulimi lwabo bangezwani ekukhulumeni kwabo. 8Ngakhoke iNkosi yabahlakazela emhlabeni wonke besuka lapho; ngakho kwema ukwakhiwa komuzi. 9Ngalokho wabizwa ngokuthi liBabeli, ngoba lapho iNkosi yaphambanisa ulimi lwabantu bonke; yabahlakazela emhlabeni wonke besuka lapho.

Inzalo kaShemu

10Lezi yizizukulwana zikaShemu. UShemu wayeleminyaka elikhulu, wazala uArpakishadi iminyaka emibili emva kukazamcolo. 11Emva kokuzalwa kukaArpakishadi uShemu wahlala iminyaka engamakhulu amahlanu; wazala amadodana lamadodakazi.

12UArpakishadi wahlala iminyaka engamatshumi amathathu lanhlanu, wazala uShela. 13Emva kokuzalwa kukaShela uArpakishadi wahlala iminyaka engamakhulu amane lantathu; wazala amadodana lamadodakazi.

14UShela wahlala iminyaka engamatshumi amathathu, wazala uEberi. 15Emva kokuzalwa kukaEberi uShela wahlala iminyaka engamakhulu amane lantathu; wazala amadodana lamadodakazi.

16UEberi wahlala iminyaka engamatshumi amathathu lane, wazala uPelegi. 17Emva kokuzalwa kukaPelegi uEberi wahlala iminyaka engamakhulu amane lamatshumi amathathu; wazala amadodana lamadodakazi.

18UPelegi wahlala iminyaka engamatshumi amathathu, wazala uRewu. 19Emva kokuzalwa kukaRewu uPelegi wahlala iminyaka engamakhulu amabili lesificamunwemunye; wazala amadodana lamadodakazi.

20URewu wahlala iminyaka engamatshumi amathathu lambili, wazala uSerugi. 21Emva kokuzalwa kukaSerugi uRewu wahlala iminyaka engamakhulu amabili lesikhombisa; wazala amadodana lamadodakazi.

22USerugi wahlala iminyaka engamatshumi amathathu, wazala uNahori. 23Emva kokuzalwa kukaNahori uSerugi wahlala iminyaka engamakhulu amabili; wazala amadodana lamadodakazi.

24UNahori wahlala iminyaka engamatshumi amabili lesificamunwemunye, wazala uTera. 25Emva kokuzalwa kukaTera uNahori wahlala iminyaka elikhulu lamatshumi aficamunwemunye; wazala amadodana lamadodakazi.

26UTera wahlala iminyaka engamatshumi ayisikhombisa, wazala uAbrama loNahori loHarani.

Inzalo kaTera

27Lezi yizizukulwana zikaTera. UTera wazala uAbrama loNahori loHarani; uHarani wazala uLoti. 28UHarani wafa phambi kukayise uTera elizweni lokuzalwa kwakhe, iUri lamaKaladiya. 29UAbrama loNahori bathatha abafazi; ibizo lomkaAbrama lalinguSarayi, ibizo lomkaNahori linguMilka indodakazi kaHarani, uyise kaMilka loIska. 30USarayi wayeyinyumba engelamntwana. 31UTera wathatha uAbrama indodana yakhe, loLoti indodana kaHarani, indodana yendodana yakhe, loSarayi umalokozana wakhe umkaAbrama indodana yakhe; basuka eUri lamaKaladiya ukuya elizweni laseKanani; bafika eHarani, bahlala khona. 32UTera wahlala iminyaka engamakhulu amabili lanhlanu; uTera wafela eHarani.

Currently Selected:

Gen 11: BE1978

Highlight

Copy