Bisalu 3
3
Pyele na Yowane belusaka muntu mosi ya binama ya kufwa
1Kilumbu mosi, Pyele na Yowane kwendaka na Yinzo ya Nzambi* samu na lusambulu ya ngunga ya kumi na tanu. 2Kuna, bantu vwandaka nata bakala mosi yina butukaka na makulu ya kufwa. Bilumbu nyonso, bawu vwandaka tula yandi pene-pene na mwelo ya Yinzo ya Nzambi* yina ba ke bokilaka «Mwelo ya Kitoko», samu ti yandi lomba mbongo na bayina vwandaka kota. 3Ntangu yandi talaka Pyele mpe Yowane yina vwandaka kota na Yinzo ya Nzambi*, yandi lombaka bawu mbongo. 4Pyele na Yowane sikikaka meso ya bawu na yandi, mpe Pyele tubaka: «Tala beto!»
5Muntu yina sikikaka meso ya yandi na bawu na mbote nyonso na dibanza ya kuzwa kima. 6Kasi Pyele zabisaka yandi: «Mu kele ve na mbongo to na wolo. Kasi kima yina ke na munu, mu ke pesa nge yawu: Na Nkumbu ya Yesu-Klisto* ya Nazaleti, telama mpe tambula!»
7Na manima, Pyele simbaka yandi na diboko ya lubakala, mpe telemisaka yandi. Kaka na ntangu yina, makulu ya muntu yina kumaka ngolo. 8Na mbala mosi, yandi telamaka mpe bandaka na kutambula. Yandi kotaka kintwadi na bawu na Yinzo ya Nzambi*. Yandi vwandaka tambula, dumuka, mpe kembila Nzambi. 9Bantu nyonso talaka yandi na kutambula mpe kukembila Nzambi. 10Ntangu bawu zabaka ti ni yandi vwandaka na makulu ya kufwa, mpe vwandaka lomba bantu mbongo pene-pene na Mwelo ya Kitoko ya Yinzo ya Nzambi*, bawu nyonso fulukaka na boma, mpe yitukaka mingi samu na mambu yina kuminaka yandi.
Kinzonzi ya Pyele na Yinzo ya Nzambi
11Muntu yina vwandaka kaka kintwadi na Pyele mpe Yowane. Nkonga nyonso yitukaka mingi mpe kwendaka mbangu na kati ya musampa* na nkumbu «Musampa ya Salomoni, kisika bawu vwandaka.» 12Na kutala mutindu yina, Pyele zabisaka bawu: «Bantu ya Isayeli, samu na yinki beno ke na kuyituka na kutala muntu yayi me beluka? Samu na yinki beno ke na kutala beto mutindu ti ni beto me belusa yandi na lulendo ya beto mosi to na kukwikama ya beto na Nzambi? 13Nzambi ya Abalayami, ya Isaaki, ya Yakobi, mpe Nzambi ya bankooko ya beto me lakisa nkembo ya kisadi ya yandi Yesu. Beno yekulaka yandi mpe mangaka yandi na ntwala ya Pilate yina bakaka lukanu ya kupesa yandi kimpwanza. 14Beno mangaka muntu ya longo* mpe ya kudedama*, mpe beno lombaka ti Pilate pesa kimpwanza na muntu yina ke kufwaka bantu. 15Na yina, beno salaka ti ba kufwa Mfumu* yina ke pesaka luzingu. Kasi Nzambi vumbulaka yandi na lufwa, mpe beto kele bambangi. 16Ni kusala kiminu na Nkumbu ya Yesu me pesa ngolo na muntu yayi yina beno ke na kutala mpe beno zaba. Ni kusala kiminu na Yesu me belusa yandi na ntwala ya beno.»
17«Bampangi, mu zaba ti beno mpe bamfumu ya beno zabaka ve butsyelika ntangu beno kufwaka Yesu. 18Kasi ni na mutindu yina, Nzambi nungisaka mambu yina yandi tubaka na ntama na yinwa ya mimbikudi* nyonso. Yandi tubaka ti Masiya* fwana kutala mpasi. 19Beno soba nkadulu mpe beno vutuka na sika ya Nzambi, samu ti yandi lemvokila masumu ya beno. 20Na yina, Mfumu Nzambi ke pesa beno bantangu ya mvundulu, mpe ke fidisa beno Yesu, Masiya yina yandi soolaka samu na beno. 21Kasi ntangu yayi, Yesu fwana kuvwanda na mazulu tii ntangu bima nyonso ke kuma ya malu-malu, mutindu Nzambi tubaka yawu katuka ntama, na yinwa ya mimbikudi ya yandi ya longo*. 22Ya tsyelika, Moyize tubaka:
«“Mfumu Nzambi ya beno ke fidisa beno mumbikudi mutindu munu.
Yandi ke vwanda muntu ya dikanda ya beno,
mpe beno fwana kuwa yandi na nyonso yina yandi ke zabisa beno.
23Kasi muntu yina ke tumama ve na mumbikudi yina,
ke vwanda dyaka ve muntu ya dikanda ya Nzambi,
mpe ba ke kufwa yandi#2Mu 18.15,18,19.”
24Mimbikudi nyonso yina landasanaka katuka Samwele, zonzilaka mambu yina ke na kusalama bilumbu yayi. 25Ni beno kele bana ya mimbikudi mpe ya ngwisani yina Nzambi salaka na bankooko ya beno ntangu yandi tubaka na Abalayami:
“Na bana yina bana ya nge ke buta,
mu ke sakumuna makanda nyonso yina kele na ntoto#Mba 22.18; 26.4.”
26Ni samu na beno Nzambi fidisaka ntete kisadi ya yandi samu na kusakumuna beno, mpe na kukatula beno na mavanga ya beno ya yimbi.»
Currently Selected:
Bisalu 3: BNT
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
