Bisalu 2

Nzambi fidisaka Mpeve ya Longo

1Ntangu kilumbu ya mukembo ya Pantekote* kumaka, bandimi nyonso vukanaka kisika mosi. 2Na mpamukunu, makelele mutindu kitembo ya ngolo katukaka na zulu, mpe fulukaka na yinzo nyonso kisika bawu vwandaka. 3Na yina, bawu talaka bima mutindu milaka ya tiya. Yawu kabukaka mpe tentamaka na zulu ya yintu ya muntu ni muntu yina vwandaka kuna. 4Bawu nyonso fulukaka na Mpeve ya Longo, mpe bawu bandaka na kuzonza na bandinga ya nkaka mutindu Mpeve vwandaka twadisa bawu na kuzonza.

5Na Yelusalemi vwandaka na ba-Zwife ya kukwikama na Nzambi, yina katukaka na bayinsi nyonso ya yinza. 6Ntangu makelele yina wakanaka, bawu kwizaka fuluka na kisika yina. Bawu yitukaka, samu ti konso muntu vwandaka kuwa bawu na ndinga ya yandi ya bwala. 7Bawu yitukaka mingi mpe tubaka: «Bantu yayi ke na kuzonza, kele ve bawu nyonso bantu ya kizunga ya Ngalili? 8Wapi mutindu konso muntu na kati ya beto ke na kuwa bawu na ndinga ya yandi ya bwala? 9Na kati ya beto kele na bayina me katuka na bayinsi ya Pate, ya Mede, mpe ya Elame. Ya kele mpe na bayina me katuka na Mezopotami, na Zude, na Kapadose, na Ponte, na Aziya, 10na Filizi, na Pamfili, na Ngipiti, mpe na bizunga ya yinsi ya Libi yina kele pene-pene na mbanza Silene. Ya kele dyaka mpe na bayina me katuka na mbanza Loma, 11na kisanga ya Kelete, mpe na yinsi ya Alabi. Ba ya nkaka kele ba-Zwife, mpe ba ya nkaka dyaka kele bayina kumaka ba-Zwife. Kasi beto ke na kuwa bawu na bandinga ya beto ya bwala mambu ya ngitukulu ya Nzambi yina bawu ke na kuzonza!»

12Bawu nyonso pamukaka mingi mpe vwandaka bakula ve. Bawu vwandaka tuba bawu na bawu: «Yinki mambu yayi ke na zola kutuba?» 13Kasi bantu ya nkaka vwandaka seka bawu, mpe vwandaka tuba: «Bawu me kola malafu.»

Kinzonzi ya Pyele

14Na yina, Pyele telamaka na bantumwa* kumi na mosi. Yandi zangulaka ndinga, mpe tubaka: «Beno ba-Zwife mpe beno nyonso yina ke vwandaka na mbanza Yelusalemi! Beno kuwa mbote mambu yina mu ke na kuzonza, mpe beno bakula mbote mambu yina ke na kusalama. 15Bantu yayi me kola ve malafu mutindu beno ke na kubanza, samu ti ya kele ntete ngunga ya yivwa ya suka. 16Kasi ntangu yayi, mambu yina mumbikudi* Yowele tubaka, me salama:

17«Nzambi tubaka: Na bilumbu ya nsuka, mu ke mwangisa Mpeve ya munu na bantu nyonso.

Bana ya beno ya babakala

mpe ya bakento ke bikula.

Binunu ya beno ke kuzwa bandosi,

mpe bantwenya ya beno

ke kuzwa balumoni.

18Ee, na bilumbu yina, mu ke tula Mpeve ya munu

na babakala mpe bakento yina kele bisadi ya munu,

mpe bawu ke bikula.

19Mu ke sala bimangu kuna na zulu,

mpe bidimbu awa na ntoto.

Ya ke vwanda: menga, tiya, mpe mulinga mingi.

20Ntangu ke kuma ndombe,

mpe ngonda ke kuma mbwaki mutindu menga.

Mambu nyonso yayi ke salama

ntete Kilumbu ya Mfumu* kuma,

kilumbu yina ke vwanda ya nene mpe ya nkembo.

21Na yina, muntu ni muntu yina ke bokila

Mfumu ke kuzwa mpulusu#Yow 3.1-5.»

22«Bantu ya Isayeli, beno kuwa mambu yayi mu ke na kuzabisa beno: Yesu ya Nazaleti vwandaka muntu yina Nzambi lakisaka beno bumfumu ya yandi na kusala bimangu mpe bidimbu na kati-kati ya beno mutindu beno mosi zaba yawu. 23Ba yekulaka beno Yesu, mpe beno kufwaka yandi na kukoma yandi na kulunsi na lusalusu ya bayina zaba ve Nzambi mutindu Nzambi bakaka lukanu, mpe zabaka yawu katuka ntama.

24«Kasi Nzambi katulaka yandi na mpasi ya lufwa, mpe vumbulaka yandi, samu ti lufwa vwandaka ve na ngolo ya kukanga yandi. 25Ya tsyelika, na yina me tadila yandi, Davidi tubaka mutindu yayi:

«Ntangu nyonso, mu vwandaka tala Mfumu na mantwala ya munu.

Yandi kele na lweka ya munu, samu ti mu tekita ve na boma.

26Ni yawu yina, ntima ya munu ke na kuyangalala mingi,

mpe mu ke na kuyimba na kilengi nyonso.

Nzutu ya munu ke zinga na kati ya kivuvu,

27samu ti nge ke bika ve mwela ya munu na yinza ya bantu ya kufwa,

mpe nge ke bika ve kisadi ya nge ya longo* bola na kati ya ndyamu.

28Nge me lakisa munu nzila yina ke pesaka luzingu.

Nge ke fulusa munu na kilengi na kuvwanda na lweka ya munu#Mga 16.8-11.»

29«Bampangi, mu kele na muswa ya kutubila beno na pwelele nyonso mambu yina me tadila nkooko ya beto Davidi: Yandi kufwaka, ba zikaka yandi, mpe tii bubu yayi, ndyamu ya yandi kele ntete, mpe yawu kele ntama ve na kisika yayi. 30Kasi yandi vwandaka mumbikudi, mpe yandi zabaka ti Nzambi pesaka nsilulu na kudya ndefi ti yandi ke byadisa mosi na kati ya bana ya yandi na kiti ya yandi ya kimfumu#Mga 132.11.»

31Davidi talaka ntete mambu yina ya mvumbukulu ya Klisto* na lufwa ntangu yandi tubaka:

«Nzambi bikaka yandi ve na lufwa,

mpe yandi bikaka ve ti nzutu ya kisadi ya yandi

bola na kati ya ndyamu#Mga 16.10.»

32Nzambi vumbulaka na lufwa Yesu yina mu ke na kuzonzila, mpe beto nyonso kele bambangi. 33Nzambi zangulaka yandi na kuvwanda na lubakala ya yandi, mpe pesaka yandi Mpeve ya Longo yina yandi pesaka nsilulu. Yandi me mwangisa yawu na beto mutindu beno ke na kutala mpe beno ke na kuwa ntangu yayi. 34Ya tsyelika, Davidi kwendaka ve na mazulu, kasi yandi tubaka:

«“Mfumu#2.34 Mfumu: Ya kele Nzambi. me tuba na Mfumu ya munu#2.34 Mfumu ya munu: Ya kele Yesu.:

Vwanda na lubakala ya munu

35tii ntangu mu ke kumisa bambeni ya nge

kisika ya kutula makulu ya nge#Mga 110.1.”»

36Na yina, bantu nyonso ya Isayeli fwana kuzaba na butsyelika nyonso ti Yesu yina beno komaka na kulunsi, ni yandi Nzambi me kumisa Mfumu mpe Masiya*.

Bantu mafunda tatu kumaka bandimi

37Bayina vwandaka kuna yitukaka mingi na kuwa mambu yina. Bawu yufulaka Pyele mpe bantumwa* ya nkaka: «Bampangi, yinki beto fwana kusala?» 38Pyele vutulaka: «Beno soba nkadulu, mpe konso muntu na kati ya beno kubotama na Nkumbu ya Yesu-Klisto*, samu ti Nzambi lemvokila masumu ya beno. Na yina, beno ke kuzwa dikabu ya Mpeve ya Longo. 39Ya tsyelika, Nzambi pesaka nsilulu yayi na beno mpe na bana ya beno, mutindu mosi mpe na bayina nyonso kele ntama: Bayina nyonso Mfumu* Nzambi ya beto ke bokila.»

40Pyele vwandaka zabisa bawu mambu mingi ya nkaka samu na kundimisa mpe kukindisa bawu. Yandi zabisaka bawu: «Beno ndima mpulusu samu na kuzwa ve kitumbu yina ke kuzwa bantu yina ke salaka mambu ya yimbi.»

41Bayina ndimaka mambu yina Pyele vwandaka zonza, bawu botamaka. Na kilumbu yina, keba ve bantu mafunda tatu (3 000) bwelamaka na nkonga ya bandimi.

Luzingu na kati ya bandimi

42Bawu vwandaka ya kukwikama na kuwa ntangu nyonso ndongosolo ya bantumwa, na kuzinga kintwadi na bampangi, na kudya, mpe kusambila kisika mosi. 43Bantu nyonso vwandaka tala boma, samu ti bantumwa vwandaka sala bimangu mpe bidimbu mingi.

44Bandimi nyonso vwandaka ya kukangama na kintwadi, mpe vwandaka vukisa bima nyonso yina vwandaka na bawu. 45Bawu vwandaka tekisa balupangu mpe bimvwama ya bawu. Bawu vwandaka kabula bawu nyonso mbongo yina mutindu vwandaka bansatu ya muntu ni muntu. 46Bilumbu nyonso, bawu vwandaka vukana na Yinzo ya Nzambi*. Bawu vwandaka kabula kintwadi madya na bayinzo ya bawu, mpe bawu vwandaka kudya madya ya bawu na kyese nyonso mpe na ntima ya kukuluka. 47Bawu vwandaka kembila Nzambi, mpe bantu nyonso vwandaka zola bawu. Kilumbu ni kilumbu, Mfumu vwandaka bwela na nkonga ya bandimi, bayina vwandaka kuzwa mpulusu.

Currently Selected:

Bisalu 2: BNT

Highlight

Copy