MARKUS 8
8
Tuhan Yesus makan pat libu' kelunan
Mat 15:32-39
1Tegu anan kelalau kahum nah kelunan nei pepeng ngelua', dahin ji nun pah em té' té' daha' ket en daha' kani. En Yesus duan nah dalo' anak sekulah Na', ken Na' men dalo', 2“Kenep Kui kelalau masi té' daha' anih, lavin telo' dau dara uh daha' melo' Dahik, nusi' té' nun-nun en daha' kani. 3Awi Akui nyihu daha' tei uli ha' uma daha' alem daha' pelien, payah tua daha' té' alan, avin té' aleng nei men su.” 4Nyu'ei nah anak sekulah Na' Iha', “Seng nuno' tuk daha' lim anih seng besoh té' luti ha' tana ngahit anih?” ken dalo'. 5Iha' Yesus meteng dalo' atih, “Kuri li'ap luti aleng té' té' kelo' du?” Dalo' pah nyu'ei, “Tusu li'ap kah.” 6Lun en Na' nyihu nah kelunan kahum atih melo' té' tana. Pelalau en Na' ala nah luti tusu li'ap atih, uh Ha' bara sayu kenep té' Allah, en Na' mi'ang-mi'ang nah, en Na' uk nah men dalo' anak sekulah Na', ja dalo' tei matah na' men daha'. Dalo' atih pah maten na' men daha' kahum atih. 7Nurei pah té' uk-iduk masik da'uk lahuh. Tegu Iha' uh bara sayu kenep, iha' nah Iha' nyihu dalo' matah masik atih lahuh té' béh daha'. 8#Kel d M 28:5 Kuman nah daha' lim ateng besoh. En dalo' peng nah la'an daha', tusu belatek penu. 9Té' pah kelunan aleng kuman atih, kio'-kio' pat libu' kahum daha'. Uh anan Yesus nyihu daha' tei uli. 10Pelalau Iha' tei hujung haruk dahin dalo' anak sekulah Na', pelalau tei ha' daléh Dalmanuta.
Daha' Farisi akei tada'
Mat 16:1-4
11 #
Mat 12:38-39; Lk 11:16,29; Yoh 6:30 Nei nah daha' Farisi, nei meteng-meteng Yesus dahin akei ji tada' men langit, ja pesek Iha'. 12En Na' jat nah hengan Na' ajen-ajen alem Beluan na', ken Na' “Nun tavit na' kelo' tebin kelunan anih ilau tada' lo? Dahuk lan men ikam, nusi' ha' seng té' tada' men ikam,” ken Na'. 13Pelalau Iha' leka' melek daha', tei hujung haruk, tei lawat dipah.
Tavah daha' Farisi dahin Herudis
Mat 16:5-12
14Alem nunan dih hadau nah dalo' anak sekulah atih geri luti. Ketu na' nah ji li'ap tua luti aleng té' té' dalo'. 15#Mk 3:6; Lk 12:1 Ken Yesus, petangen dalo' atih, “Hituk nah kelo' sayu-sayu, mengan nah batung kam men tavah daha' Farisi dahin tavah Herodes lahuh.” 16Tengaran nah dalo' pedeng dalo' dep, ken dalo', “Avin nusi' telo' geri luti, iha' ha' kuma' nunan men telo'.” 17#Mk 6:52 Bi kitan Yesus pah kenep dalo', pelalau Ha' kuma' men dalo', “Na' nun kelo' petengaran avin iha' em té' luti té' kelo'? Nusi' payan kelo' jam iah, dahin nei ateng té' halem na'? Mahing loh kah kenep kelo' iah? 18#Yer 5:21; Yehez 12:2; Mk 4:12 Té' matan kelo', nusi' kelo' jam iah? Té' iling kelo', nusi' kelo' kelenghi ia? Nusi' kelo' hituk du? 19#Mk 6:41-44 Tegu Akui mi'ang luti lima' li'ap men daha' lima' libu' kelunan arei di, kuri dayah la'an en kam ala?” ken Na'. Ken dalo', “Pulu-dua' dayah.” 20#Mk 8:6-9 Ken Yesus, “Té' pah la'an, tegu tusu li'ap men pat libu' kelunan, kuri belatek la'an en kelo' ala?” Nyu'ei nah dalo', “Tusu belatek.” 21Ken Yesus men dalo', “Nusi' payan kelo' nei ateng té' alem na' iah?”
Iha' petagéh ji laké' buta'
22 #
Mk 6:56
Ateng nah Yesus dahin dalo' anak sekulah Na' ha' daléh Betsaida. En daha' geri nah ji kelunan buta' pala Yesus, dalo' akei Iha' ivit iha'. 23#Mk 7:32-33; Yoh 9:6 Pelalau Iha' gem usu kelunan buta' atih, geri iha' musang men uma. En Na' lemura nah matan na', en Na' tei nah usu Na' té' iha', dahin meteng iha', “Té' kah ika' jam nun-nun iah?” 24Nyineng nah iha', pelalau kuma', “Jam kah akui kelunan panau-panau, bi daha' awi jam pa'un kayo' dih,” ken na'. 25Uh anan, Yesus metei usu Na' ngelua' té' matan na', laké' atih pah ngehaneng, pelalau hirik nah iha' nyineng, tula lim nah ket kitan na' teneng-teneng. 26#Mat 16:13-28; Mk 7:36; 8:27—9:1; Lk 9:18-27 En Yesus nyihu nah iha' tei uli ha' uma na', ken Na', “Alem uma-uma anih meng im tei.”
Petrus menglan Tuhan Yesus Iha' nah Kristus
Mat 16:13-20; Lk 9:18-21
27Musang nah Yesus dahin dalo' anak sekulah Na' tei ha' uma-uma alem daléh Kaisarea Filipi. Alem iha' panau, en Na' teng nah dalo' anak sekulah Na', ken Na' men dalo', “Akui nih, hi Kui kurin daha'?” 28#Mk 6:14-15; Lk 9:7-8 Nyu'ei nah dalo' Iha', ken dalo', “Té' aleng kuma', Yohanes aleng Meduh. Té' pah aleng kuma', Elia. Té' pah lahuh aleng kuma', Ji la'ung men daha' aleng nabi.” 29#Yoh 6:67-69 En Yesus teng nah dalo' atih, “Bi kurin kelo' ké', hi nah aleng Akui kurin kelo' sika?” Nyu'ei nah Petrus dahin kuma' men Iha', “Ika' anih nah aleng Kristus,” ken na'. 30#Mk 9:9 En Na' nangen nah dalo', em mun bara ji la'ung pah marung Iha'.
Aring Yesus bara marung patei Na'
Mat 16:21-28; Lk 9:22-27
31En Yesus atoh nah katuk Na' men dalo' marung Anak-kelunan adang seng ga' kahum na'an katé'. Té' pah Iha' seng en daha' aleng dekaya' harang, dahin daha' imam aya' dahin daha' aleng puboh surat Tuhan lahuh, ateng daha' lematei Iha', bi té' dau aleng ketlo' Iha' seng nei murip ngelua'. 32Daho' anih en Na' bara tula tua. Pelalau Petrus geri Yesus ha' béh, mano' Iha. 33Nyili nah Yesus nyineng dalo' anak sekulah Na', pelalau Iha' mano' Petrus, ken Na', “Tei nah im ha' la'ung Kui, Setan, nusi' nah ika' pelemana' tuk Allah, bi ika' pelemana' tuk kelunan tua anan.”
34 #
Mat 10:38; Lk 14:27 En Na' uvui nah kelunan aleng kahum atih, dahin dalo' anak sekulah Na', pelalau Iha' kuma' men daha', “Awi hi aleng ngenep ngioh Akui sayu nah iha' muau batung na' dep, dahin nyi'un salip na', pelalau ngioh Akui. 35#Mat 10:39; Lk 17:33; Yoh 12:25 Avin hi aleng ngenep puboh hengan na', iha' seng madé' na'. Bi hi aleng madé' hengan na' avin Akui dahin avin dengah sayu lahuh, iha' nah aleng seng puboh na'. 36Avin nun kah bang na' men kelunan awi iha', ala lim usun tana anih, bi hengan na' seng tasa'? 37Ket nun aleng seng en daha' ih kalui hengan na'? 38#Mat 10:33 Avin hi-hi aleng seng ha'éh Akui dahin ha'éh Dahuk lahuh té' hang daha' bengsa' aleng petuyang dahin daha' sala anih, Anak-kelunan pah ha'éh seng meng'i iha', tegu Iha' nei alem aren Taman Na' dahin daha' meliket aleng ma'ang.”
Currently Selected:
MARKUS 8: TDK1990
Highlight
Share
Copy

Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.