MARKUS 9
9
1Ken Na' men dalo' la'an, “Dahuk lan men kelo', té' balei men kelo' aleng nekring hinih aleng em havah matei men em payan dalo' jam keligem Allah nei dahin tingan na',” ken Na'.
Tuhan Yesus tula maren hujung ngalang
Mat 17:1-13; Lk 9:28-36
2 #
2 Pet 2:17-18
Nem dau men'uh anan Yesus mavéh Petrus dalo' Yohanes dalo' Yohanes pelalau geri dalo' atih mukéh men daha' aleng bangu tei hujung ji ngalang aleng bau. Pelalau pebalui nah jam Na' ha' unan dalo'. 3Kanan Na' pah ngetalah tua, kelalau lalau puti na', ji kelunan aleng ngeputi keluma' maring pah té' usun tana anih em deng ngeputi kanan na' men'uh puti na' atih. 4Té' pah tula té' dalo' Elia dahin Musa tengaran dahin Yesus. 5Ken Petrus pah men Yesus, “U Guru, sayu lan nah telo' té' tinih. Sayu kalo' na telo' lepau, ji Anum, ji anun Musa, ji anun Elia,” ken na', 6avin nusi' ha' jam nun-nun aleng seng dahun na', avin dalo' kelalau takut. 7#Kel d M 18:15; Mat 3:17; Mk 1:11; Lk 3:22; HST 3:22; 2 Pet 1:17 Té pah ji avun nei ngelibun dalo', kelenghen dalo' nah ji daho' men alem avun atih, ken Na', “Anih nah Anak Kui aleng Ek nyalam. Kelenghi nah dahun Na'.” 8Tekjet dalo' nyineng teliling dalo', ji kelunan pah dalo' em jam la'an, bi ji Yesus dep kah dahin dalo'.
9Alem dalo' ngiléh men ujung ngalang atih en Yesus nangen nah dalo', em mun bara men ji la'ung pah ket aleng uh kitan dalo', alem Anak-kelunan em payan nei murip men hang kelunan matei. 10En dalo' lo' nah tuk anan alem kenep dalo', pepteng nah dalo' pedeng dalo', nun aleng aran dahun Na' nei murip men hang kelunan matei anan. 11#Mal 4:5; Mat 11:14 Iha' nah dalo' meteng Iha', ken dalo', “Daha' aleng puboh surat Tuhan kuma', ‘Adang Elia seng nei una', ken daha'.” 12#Yes 53:3; Mal 4:5 Nyu'ei nah Iha, “Lan Elia nei una', dahin petmei ket lim-lim. Bi nuno' tuk kalung marung tuk Anak-kelunan, marung Iha' seng ga' katé' kahum na'an, Iha' pah seng ga' uau kelunan? 13#1 Laj 19:2,10; Mat 11:14 Akui kuma' men kelo', Elia atih té' iha' uh ateng, uh en daha' na nah ket aleng seng kenep daha', awi aleng uh kalung marung iha',” ken Na'.
Iha' petagéh anak aleng mameng
Mat 17:14-21; Lk 9:37-43
14 #
Mat 17:14-21; Lk 9:37-42 Tegu Yesus, Petrus, Yakobus dahin Yohanes dalo' atih ateng ha' dalo' anak sekulah aleng ha' béh, en dalo' nyineng nah kelalau kahum kelunan teliling dalo' atih, daha' aleng puboh surat Tuhan pah té' meteng-meteng dalo' lahuh. 15Tegu daha' nyineng Iha', pelalau daha' melak tua, tepurung pah daha' tei pejamat Iha'. 16Pelalau Iha' meteng daha', “Ket nun aleng en kelo' teng té' dalo' anih?” ken Na'. 17Ji men hang daha' atih nyu'ei Iha'. “U Guru, akui nei geri anak-aké' kui pala Ika' anih, avin té' to' mameng nei té' iha'. 18Hino'-hino' to' atih nei nesun té' iha', en na' kelepéng nah iha' ha' tana, ateng ba na' ngelurek, pekasin tua nah ipen na', tei kelupit tua nah iha'. Uh ek bara kah men anak sekulah ka', ja dalo' atih mesau to' atih, bi nusi' dalo' deng.” 19Iha' nah Yesus nyu'ei daha', ken Na', “U ikam aleng em nginah, seng kuri dara la'an Akui seng té' dahin kam? Seng kuri dara Akui seng aru kenep dahin kam? Geri nah iha' pala Akui,” ken Na'. 20En daha' geri nah anak atih pala Iha'. Tegu to' atih nyineng Yesus, pelalau iha' mayah anak atih té' tana, pelalau pubé'-pubé' tua nah iha' kenan to' atih, ngepu'an ngelurek tua ba na' lahuh. 21Pelalau Yesus meteng té' taman anak atih, “Kuri dara iha' uh na nunih?” Ken na', “Men iha' da'uk. 22Kuri-kuri hangun to' anan geri iha' alem apui, dahin metei iha' alem hungei lahuh, seng lematei iha'. Avin iha' nutih, iha' Ika' deng masi, kuri-kuri pah Ika' em masi kelo',” ken taman na' atih. 23#Mk 11:23 En Yesus nyu'ei nah iha', “ ‘Iha' Ika' deng,’ kum. Ket lim-lim adang iha' jadi' men daha' aleng nginah,” ken Na'. 24#Lk 17:5 Pelalau medéng nah taman anak atih, dahin nangih, ken na', “U Tuhan, nginah kah akui. Im masi nah kenep kui aleng em nginah,” ken na'. 25En Yesus nyineng nah daha' sa'-sa' kahum nei pepeng, en Na' mano' nah to' atih, kuma' men iha', “U, to' aleng mameng dahin madeng anih, Akui nyihu ika' musang men iha', meng im tei la'an té' iha',” ken Na'. 26#Mk 1:26 Medéng nah to' atih, pelalau nekjen nah anak atih kenan na', men'uh anan musang nah iha', anak atih pah awi kelunan aleng uh matei tua, ateng kahum men daha' kuma', “Iha' uh matei.” 27Bi Yesus gem usu na', miti iha', pelalau ma'un nah iha'.
28Uh Yesus tei alem uma, dalo' anak sekulah meteng Iha' selem-selem, “Na' nun kalo' anih em deng mesau to' atih?” 29Ken Na' men dalo', “Bengsa' atih nusi' ha' deng lap kenan nun-nun, bi kenan sebayang dahin pelien tua,’. Ken Na'.
Kedua' hangun Tuhan Yesus bara katé' Na'
Mat 17:22-23; Lk 9:43-45
30 #
Mat 17:22-23; Lk 9:43-45 #Yoh 7:1 Leka' nah dalo' men itih, tei lalau daléh Galilea. Bi Yesus em kaséh ji kelunan seng jam Iha'. 31#Mk 8:31; 10:32-34 avin Iha' pekatuk dalo' anak sekulah Na', ken Na' men dalo', “Anak-kelunan seng en daha' uk alem usu kelunan, daha' atih pah seng lematei Iha'. Uh nah Iha' matei kenan daha', té' dau aleng ketlo' Iha' seng nei murip ngelua',” ken Na'. 32#Lk 9:45; 18:34 Bi dalo' atih em tei ateng té' alem dahun Na' atih, ha'éh pah dalo' meteng té' Iha'.
Dalo' anak sekulah pepteng, “Hi aleng seng dekaya'?”
Mat 18:1-5; Lk 9:46-48
33 #
Mat 17:24
Ateng nah dalo' ha' Kapernaum. Alem Yesus té' alem uma, en Na' teng nah dalo' anak sekulah Na', “Ket nun dahun kelo' petengaran té' iung alan anan di?” 34#Lk 22:24 Bi dalo' tepaka' tua, lavin men'a dalo' uh pahengeng tua té' alan, hi aleng dekaya'. 35#Mat 20:26-27; 23:11; Mk 10:43-44; Lk 22:26 Melo' nah Yesus, pelalau muvui dalo' anak sekulah dahin kuma' men dalo', “Iha' ji la'ung ngenep seng jadi' dekaya', bei nah iha' em da'uk men kelunan lim, dahin panyin men kelunan lim,” ken Na'. 36#Mk 10:16 Pelalau Iha' ala ji nyam uk nekring iha' té' hang dalo'. En Na' kelameng nah iha', ken Na' men dalo' atih, 37#Mat 10:40; Lk 10:16; Yoh 13:20 “Hi-hi aleng ala ji men daha' nyam uk aleng nunih alem aran Kui, iha' nah ala Akui lahuh. Hi aleng ala Akui, nusi' iha' ala Akui, bi iha' ala Iha' aleng nyihu Akui anih kah anan.”
Hi aleng em lawan, iha' nah aleng bakéh
Lk 9:49-50; Mat 10:42
38 #
Kah d Is 11:27-28
Ken Yohanes men Iha', “U Guru, kalo' nyineng ji la'ung mesau to' té' alem aran Ka'. Kalo' em mun iha' avin iha' em ngioh telo'.” 39#1 Kor 12:3 Ken Yesus, “Meng em mun iha', avin nusi' té' ji la'ung seng na hadui ningan nunan alem aran Kui, pelalau peji'ek Akui. 40#Mat 12:30; Lk 11:23 Avin hi aleng em lawan telo', iha' nah aleng bakéh telo'. 41#Mat 10:42 Hi aleng ma'uk kelo' ata' ji tebuk en kelo' du'i avin kelo' anih anun Kristus, Dahuk lan men kelo', nusi' peletu tibah kelunan anan tei padé'.
En uéh ket ngavan ta' petutut
Mat 18:6-9; Lk 17:1-2
42“Hi aleng geri ji men daha' nyam aleng nginah té' Akui petutut, pulang sayu mitung ji bato' té' keran na', pelalau mesau iha' alem banget. 43#Mat 5:30 Iha' usu ka' geri ika' na sala, en munang nah. Kelalau sayu ika' tei halem urip aleng pa'en dahin usu aleng paving men'uh ika' tei alem apui neraka aleng em mun parem dahin usu ka' pelengep, 44avin hinan, ulen na' pah em matei dahin apui na' pah em tei parem. 45Iha' kudek ka' geri ika' na sala, en munang nah; kelalau sayu ika' tei kepé' halem urip aleng pa'en men'uh ika' en sau alem apui neraka dahin kudek ka' pelengep, 46avin hinan, ulen na' pah em matei dahin apui na' pah em tei parem. 47#Mat 5:29 Iha' matam geri ika' na sala, ngikei na', en sau. Kelalau sayu ika' tei alem keligem Allah dahin mata' pedah ji tua men'uh ika' tei alem apui neraka dahin matam dua', 48#Yes 66:24 iha' atih ngavan ulen na' em matei, apui na' pah em parem.
49 #
Lewi 2:13
Awi jam tuk hia' en tei té' ket en tam tei laluh, nunan kah ha'ut-ha'ut la'ung tam seng en pesek té' apui lahuh.
50 #
Mat 5:13; Lk 14:34-35; Kol 4:6 “Hia' atih sayu, bi iha' hia' anan jadi' beléh, men ino' kah ikam seng na na' mih?
“Sayu ikam melo' hia' alem kenep kam dep, sayu nah ikam piah kenep pedeng kam.”
Currently Selected:
MARKUS 9: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
