MARKUS 4

Ivun laké' aleng murah beni

Mat 13:1-23; Lk 8:4-15

1Ji hangun la'an Iha' matoh katuk Na' té' lirin bawang, kelalau kahum pah kelunan pepeng pala Iha'. Avin anan Iha' tei hujung ji haruk, pelalau melo' ujung haruk aleng ngelating té' bawang anan. Lim kelunan ngahum atih pah melo' hujung tana té' lirin bawang atih.

2Iha' nah Iha' pekatuk daha' kuri-kuri tuk men alem ivun. Ken Na' men daha' alem katuk Na' atih:

3“Kelenghi nah ikam. Té' ji kelunan tei musang ngenep murah beni na'. 4Alem iha' murah atih balei beni legak béh alan, nei nah manuk kuman na' ateng pah. 5Balei legak té' avan bato', iha' nah avan aleng em té' kahum tana. Pelalau beni anan salet murip avin tana na' nyipih. 6Tegu matan dau hanit pelalau kelubei nah urip na' avin ha' em té' pakat na'. 7Té' pah balei legak té' hang uket uleng, murip nah uleng atih dahin ngeliten té' urip na' atih, nusi' té' ha' ngebua. 8Balei legak té' tana aleng sayu, pelalau murip dahin ngehulé' dahin ngebua, iha' tih té' aleng telo'-pulu, té' aleng nem-pulu, té' pah aleng matuh beluha' kahum na' alem ha'ut ji uang beni atih.” 9Ken Na' men daha', “Hi-hi aleng hipun iling ngavan kelenghi, kelenghi nah.”

10Tegu Iha' melo' dep, dalo' aleng té' jeleng Iha' dahin dalo' anak sekulah Na' pah meteng ivun atih dih té' Iha'. 11#1 Kor 5:12 Ken Na' men daha', “Kelo' uh ala ket aleng sihuk marung keligem Allah, bi daha' aleng hawang kelenghi ivun na' tua, 12#Yes 6:9-10; Yoh 12:40; HST 28:26 ja alem daha' nyineng na' en daha' ineng kah tua nutih, bi nusi' daha' nelana' na', té' pah alem daha' kelenghi na' en daha' kelenghi kah tua, bi nusi' pah daha' ateng té' alem na', bahi daha' nepulet, dahin sala daha' pah pebet,” ken Na'.

13Lun ken Na' nah men daha' atih, “Nusi' kah ikam jam alem ivun anih iah? Tana' ha' nunan ké' em té' loh nah ikam seng jam alem ivun aleng ha' béh tih lahuh. 14Té' pah kelunan aleng murah atih, iha' nah aleng mutat daho'. 15Aleng béh alan, ngavan na' mutat daho', iha' tih tegu daha' kelenghi atih pelalau ateng nah Setan ala daho' atih aleng en na' urah alem kenep daha'. 16Nurei pah aleng en na' urah té' ngavan bato', iha' atih tegu daha' kelenghi daho' pelalau daha' ala na' dahin sayu kenep daha', 17bi nusi' daha' ngepakat alem kenep daha', iha' nah daha' murip jaki tua. Tegu tusah nei ateng, mina katé' aleng tavit daho' atih kah, pelalau petutut nah kelunan atih. 18Té' aleng ha' béh aleng en na' urah té' hang uleng, atih nah kelunan aleng kelenghi daho' atih, 19#Mk 10:23-24 bi nei nah daha' kawah marung ket usun tana anih, té' pah ligit aleng peluvat daha', daha' pah ngivah té' ket aleng ha' béh, ket atih nah aleng ngeliten daho' atih, iha' nah iha' em ngebua. 20Anih nah aleng en na' urah té' tana aleng sayu, iha' nah kelunan aleng kelenghi daho' dahin ala na', ngebua nah daha', té' aleng telo'-pulu beluha', té' pah aleng nem-pulu, té' pah aleng matuh beluha' na'.”

Katah lirui hida gatang

Lk 8:16-18

21 # Mat 5:15; Lk 11:33 Lun ken Yesus men daha', “Daha' nyavet lirui, té' daha' metei na' hida gatang, dahin hida pagen iah? Adang daha' metei na' hujung kudek lirui keta'? 22#Mat 10:26; Lk 12:2 Avin ji-ji pah em té' aleng sihuk, bi ja ha' nei tula, ji-ji pah em té' aleng melo' nyilem, bi ja ha' nei tula loh kah. 23Hi-hi aleng hipun iling ngavan kelenghi, kelenghi nah.”

24 # Mat 7:2; Lk 6:38 Ken Na' men daha', “Peknep nah té' ket kam kelenghi. Tebeng aleng ngavam ma'uk, atih pah ngavan Allah seng ma'uk na' lahuh, dahin i'at na' pah seng té' men ika' lahuh. 25#Mat 13:12; 25:29; Lk 19:26 Avin kelunan aleng hipun ket nun-nun, iha' seng ala i'at na' la'an. Kelunan aleng em té' nun-nun, ket aleng en na' té' atih pah seng padé' té' iha'.”

Ivun beni aleng murip dep ngedau dahin malem

26Ken Na' la'an, “Keligem Allah awi jam tuk kelunan aleng murah beni té' tana. 27#Yak 5:7 Iha' tudu malem, jihima ké' ma'un nah iha', beni anan pah ngelesing nei murip, bi nusi' ha' jam men ino' urip na' atih. 28Tana dep aleng musang bua, aring-aring na' té' kelesing na', uh anan usit na', uh anan la'ung na' penu-penu alem ali na' 29#Yoel 3:13 Tegu bua na' sak, pelalau kelunan atih geri iuh kelunau, avin jaka' ngelunau.”

Ivun ji la'ung uang sebéh

Lk 13:18-19

30Ken Na', “Nuno' tuk telo' ngatah keligem Allah, té' ivun nun telo' seng petula na' lo? 31Iha' awi ji uang beni sebéh, tegu daha' murah na' té' tana, lan pah iha' kelalau da'uk men'uh beni lim-lim té' usun tana anih, 3211 #Yehez 17:23; 31:6; Dan 4:12,21 bi tegu daha' murah na', murip nah iha', nei-nei dekaya' men'uh lim uro' aleng ha' béh, dahin musang hangat-hangat aleng dekaya', manuk hida kelekawah pah deng murip hida hingau da'un na',” ken Na'.

33Kahum lan ivun aleng nunan en Na' na aleng tekep kitan dalo' alem na'. 34Menangen daho' pivun tua en Na' bara men daha', bi tegu Iha' melo' dep dahin dalo' anak sekulah Na' iha' nah Iha' petula lim alem daho' atih men dalo'.

Tuhan nyihu bahui aya' ngeta' té' bawang

Lk 8:22-25

35Dau atih tegu dau uh levi, ken Na' men dalo' atih, “Nei nah kelo', tei nah telo' lawat dipah.” 36Dalo' leka' men béh daha' kelunan aleng kahum atih, pelalau en dalo' geri nah Iha' alem haruk dahin dalo', té' pah kuri-kuri haruk aleng da'uk lahuh dahin dalo'. 37Nei nah bahui aya', ngelupak nah bawang anan, lupak atih pah mepuk haruk dalo', pelalau seng penu kenan ata'. 38Bi Yesus tebei tudu ha' duré' té' ji helen. Pelalau dalo' atih megoh Iha', ken dalo', “Guru, nusi' Ka' putau kalo' anih seng tasa' iah?” ken dalo'. 39Ma'un nah Iha', pelalau Iha' mano' bahui anan, dahin kuma' men bawang anan, “Tepaka' nah im. Sayu nah im.” Lun ngeta' nah bahui atih, pelalau ngeleneng nah ata' bawang anan. 40Ken Na' men dalo', “Avin nun kelo' takut? Nusi' payan kelo' nginah iah?” 41Kelalau takut nah dalo', pepteng pedeng dalo', “Hi kelunan anih pa, nun ja bawang anih dahin bahui pah kelenghi dahun Na',” ken dalo'.

Currently Selected:

MARKUS 4: TDK1990

Highlight

Copy