YouVersion Logo
Search Icon

MARKUS 5

5
Iha' petagéh laké' aleng ngavan to' nilung ha' Gerasa
Mat 8:28-34; Lk 8:26-39
1Dapit nah dalo' pedah ji bawang ha' daléh kelunan Gerasa.
2Tegu Yesus napah men ujung haruk, tegu anan pah ji la'ung pesuk dahin Na', ji kelunan aleng ngavan to' nilung, aleng nei men liang. 3Kelunan atih murip ha' tana liang pa'en. Ji kelunan pah em deng ngaput iha' la'an, té' avit pah nusi' deng. 4Tutek daha' uh ngaput iha' té' avit, kudek na' en daha' mesung, pakau avit pah hi'an tua kenan na', pesung kudek na' atih pah bi'ang, ji kelunan pah em té' aleng tu'a seng na iha' malei. 5#Mk 1:24 Pahdau adeng dahin pemalem hadeng iha' medéng ha' liang, nurei pah ha' ngalang lahuh, dahin nyarit batung na' té' i'ang bato'. 6Tegu iha' nyineng Yesus men su, tepurung nah iha' tei nga'um sebayang ha' unan Na'. 7Medéng aya' nah iha', ken na', “Nuno' tuk akui seng tei piah kenep Ka', Yesus Anak Allah aleng Kelalau Bau? Akui tevah dahin Allah, meng Im pekaté' akui,” ken na'. 8Avin men em payan Yesus kuma' men iha', “U ika' to', musang nah im men laké' anih.” 9En Na' teng nah iha', “Ket nun aran ka'?” “Leksa' aran kui, avin kamé' ngahum,” ken na'. 10Tangen lelan nah iha' akei asi té' Yesus ja Iha' em nyihu daha' lap men daléh atih.
11Ha' behilak ngalang atih té' ji peng aya' uting ilau ket daha' kani. 12Lim to' atih akei té' Yesus, ken daha', “Nyihu nah kamé' tei ha' uting anan, tei halem daha',” ken daha'. 13Iha' pah mekoh daha' tei. Musang nah lim to' atih tei halem peng uting anan. Ketu-ketu uting atih nepujo' nah daha' té' behilak anan, pelalau nesau halem bawang, kio'-kio' dua' libu' kahum daha', pehalau matei lenyen nah daha' alem bawang atih.
14Kelunan aleng pian uting atih pah pelalau lap lahuh, pelalau petira marung tuk anan men daha' alem daléh dahin ha' uma-uma lahuh. Musang nah daha' kahum seng ngenep jam ket aleng uh jadi' atih. 15Nei nah daha' pala Yesus, en daha' nyineng nah kelunan atih aleng uh ngavan to' nilung, kerei inih iha' melo' paget keluma', teneng nah alem utek na', iha' atih aleng uh ngavan Leksa' atih dih, takut nah daha' atih. 16Daha' aleng nyineng na' atih pedengah men daha' lim-lim tuk marung kelunan ngavan to' nilung atih dahin marung uting atih lahuh. 17Pelalau daha' ngepden Yesus nyihu Iha' tei leka' uli men daléh daha'.
18Tegu Iha' tei alem haruk, kelunan aleng ngavan to' nilung atih akei seng ngenep peji dahin Yesus. 19Bi nusi' Ha' mun iha'. Ken Na', “Tei im uli ha' uma ka', pala daha' bakéh ka', tei nira men daha' atih nuno' ayan hadui Tuhan men ika', nuno' pah tuk Iha' masi ika',” ken Na'. 20#Mat 4:25; Mk 7:31 Tei nah iha' pedengah na' men daha' alem daléh Dekapolis dahin bara nuno' tuk ayan ket aleng en Yesus na té' iha'. Lim-lim kelunan pah melak.
21Tegu Yesus uh lawat ngelua' tei ha' dipah, ngepu'an pelebayak tua pah kelunan tei pepeng pala Iha', té' bahé' bawang atih Iha' té'.
Marung anak-doh Yarius dahin perah ji doh ha' béh
Mat 9:18-26; Lk 8:40-56
22Té' pah ji pengulu' umu sebayang, aran na' Yairus iha' tei pala Yesus. Tegu iha' nyineng Iha', pelalau iha' nyepukun té' béh kudek Na', 23#Mk 7:32 kahi asi lelan té' Iha', ken na', “Anak-doh kui aleng da'uk, ji'ek lelan ha', nusi' kui jam iha' seng sayu. Im masi nah akui, nei nah Im metei usu Ka' té' iha' ja iha' tengau nei murip,” ken Yairus. 24Tei nah Yesus dahin na', kahum pah kelunan ngioh Iha', dahin mamen Iha' tua.
25Bi té' pah ji doh aleng perah lingo' aleng nei té' iha' pulu-dua' duman dara na', 26kahum lelan duktun ngavan na' ji'ek tei naban, pah loh nah ketanun na' en na' tei té' perah na', bi nusi' pah iha' tei sayu, sa' iha' pah iha' tei ji'ek perah na'. 27Kitan na' nah dengah marung Yesus, tei nah iha' halem men la'ung Na' pelalau gem basung Na', 28avin kurin na', “Iha' akui ji'ek gem basung Na' tua pah, adang kui seng sayu,” ken na'. 29Tegu anan pah pelalau ngeta' nah perah na', pelalau sayu nah henoh alem la'ung na', pelalau kitan na' nah iha' uh magéh. 30Tegu anan pah pelalau Yesus jam henoh alem batung Na' tingan Na' uh musang men alem Na'. Pelalau nyili nah Iha' nyineng daha' kahum atih dahin kuma', “Hi aleng gem kanan Kui di?” 31Ken dalo' anak sekulah men Iha', “Ika' pah jam kelunan kahum tinih mamen Ika' keta'? Beka' Ika' kuma', ‘Hi aleng gem kanan Kui di,’ beka' Kum.” 32Yesus pah ngering ngenep nyineng hi aleng gem Iha' dih. 33Doh anan pah takut, ngetiwet tua nah iha', avin kitan na' ket aleng uh na' ala. Nei nah iha' nyepukun ha' unan Yesus bara marung lim tuk na'. 34Lun ken Yesus men iha', “U anak, kinah ka' uh petagéh ika'. Tei nah lim dahin dena' kenep ka'. Uh pebet nah ika' men perah ka' anan.”
35Alem Iha' tengaran nunan loh kah, nei nah kuri-kuri kelunan men uma pengulu' atih, ken dalo', “Anak-doh ka' dih uh em té' nah iha', meng nah im peku'in Guru la'an,” ken dalo'. 36Nusi' nah Yesus meté' daho' en dalo' bara atih, bi Iha' kuma' men pengulu' atih, “Meng kawah. Nginah nah tua,” ken Na'. 37Ji la'ung pah Iha' em mun tei ngioh Iha' bi Petrus dahin Yakobus dahin Yohanes harin Yakobus atih, dalo' anan tua aleng tei. 38Ateng nah dalo' ha' uma penghulu' uma sebayang atih, en Yesus nyineng nah daha' hawen tua, kahum daha' nangih dahin nirau lelan. 39Tegu Iha' uh tei halem, Iha' kuma' men daha', “Na' nun kam hawen dahin nirau. Anak anih, nusi' ha' matei, iha' tudu tua anih,” ken Na'. 40Pelalau pah daha' nuten Iha'. En Na' nyihu nah daha' lim musang, en Na' geri nah taman anak atih dahin hinan na' dahin dalo' aleng dahin Na' atih, tei nah Iha' halem té' béh anak atih, 41#Lk 7:14 en Na' gem nah usu na', dahin kuma' men iha', “Talita kumi,” aleng aran daho' atih, “U anak-doh, Dahuk men ika', ma'un nah im. 42Pelalau anak atih nei peju, pelalau panau, avin pulu-dua' duman urip na'. Pelalau ngeniheng tua nah daha'. 43#Mk 1:44 En Na' nangen lelan nah em mun ji la'ung pah seng jam daho' atih, pelalau Iha' nyihu daha' makan anak-doh atih.

Currently Selected:

MARKUS 5: TDK1990

Highlight

Share

Copy

None

Want to have your highlights saved across all your devices? Sign up or sign in