MARKUS 2

Iha' petagéh ji laké' aleng perah matei uhat na'

Mat 9:1-8; Lk 5:17-26

1Kuri-kuri dau men'uh atih, tegu Yesus tei ngelua' ha' Kapernaum tula nah dengah Yesus té' ha' uma. 2Kahum lelan nah kelunan tei pepeng, ateng ha' em té' ngavan daha' la'an, nurei pah té' awang ba ketamen lahuh. En Na' pekatuk nah daha' atih té' dahun Allah. 3Nei nah kelunan geri ji laké' pala Iha', aleng perah matei uhat na', aleng en pat la'ung pektang. 4Tegu dalo' em deng tei jeleng Yesus avin kelunan kelalau kahum nutih, en dalo' merah nah kepang aleng nyibau ngavan Na'. Uh dalo' merah na', en dalo' uloh nah iha' hida paget ngavan na' miri. 5Lun en Yesus nyineng nah kinah dalo' atih, ken Na' men kelunan aleng matei uhat atih, “U, anak Kui, sala ka' uh pebet.”

6Té' pah kuri-kuri kelunan aleng puboh surat Tuhan melo' tinan aleng pelemana' alem kenep daha', 7#Yes 43:25 “Nun kah tavit na' kelunan anih kuma' nunih? Iha' peji'ek Allah anih. Hi aleng seng deng mebet sala, bi ji tua kah, Iha' tih Allah,” ken daha'. 8Pelalau kitan Yesus alem beluan Na' daha' atih pelemana'-pelemana' nunan alem kenep daha', ken Na' men daha', “Nun kah tavit na' kenep kam pelemana' nutih? 9Aleng ano' aleng melei Ta' kuma' men kelunan aleng matei uhat na' anih, ‘Sala ka' uh pebet,’ Kek ia? ‘Biti nah im, ala avam tudu ka' anan, panau nah im,’ Kek ia? 10Bi ja ikam jam Anak-kelunan té' tingan ha' usun tana anih mebet sala,” (ken Na' men laké' aleng matei uhat atih,) 11“Akui kuma' men ika', peju nah im, ala nah avam tudu anan, uli ha' uma ka'.” 12Pelalau peju nah iha', en na' ala nah avan na' tudu atih, musang ha' unan kelunan lim atih. Lim-lim daha' atih pah ngeniheng tua, dahin meju aran Allah, ken daha', “Peletu itam em payan jam ket aleng nunih uh men'a,” ken daha'.

Tuhan Yesus mili Lewi

Mat 9:9-13; Lk 5:27-32

13Musang nah Yesus la'an tei pala bahé' bawang. Lim kelunan kahum atih pah tei pala Iha, en Na' pekatuk nah daha'. 14#Yoh 1:43 Alem Ha' lalau tinan, en Na' nyineng nah Lewi anak Alfeus melo' ha' ngavan daha' mepeng sukei. Ken Yesus men iha', “Nei nah ngioh Akui.” Pelalau peju nah iha', tei ngioh Iha'.

15Men'uh anan Yesus pah tei melo' pahlung té' alem uma laké' atih, kahum kelunan aleng mepeng sukei dahin kelunan aleng sala pah melo' dahin Na' dahin anak sekulah Na', avin té' kahum kelunan aleng ngioh Iha'. 16Bi tegu daha' aleng puboh surat Tuhan men daha' Farisi nyineng Yesus kuman dahin kelunan aleng mepeng sukei dahin kelunan aleng sala, daha' kuma' men anak sekulah Na', “Na nun Iha' kuman du'i peji dahin kelunan aleng mepeng sukei dahin daha' aleng sala?” ken daha'. 17Tegu Yesus kelenghi daho' nutih, Iha' kuma' men daha', “Kelunan aleng magéh atih, nusi' té' bang duktun men daha', bi kelunan aleng perah tua. Nusi' pah Akui nei muvui kelunan aleng teneng, bi Akui nei muvui kelunan aleng sala.” ken Na'.

Marung adet pelien

Mat 9:14-17; Lk 5:33-39

18Té' pah anak sekulah Yohanes dahin kelunan Farisi pah lahuh ngioh adet pelien. Nei nah daha' meteng Iha', “Avin nun anak sekulah Yohanes dahin anak sekulah daha' Farisi pelien, bi anak sekulah Ka' em pelien?” 19Ken Yesus men daha' atih, “Deng kah bakéh laké' aleng ngehawa' atih pelien alem laké' aleng ngehawa' atih té' dahin daha' du? Alem laké' aleng ngehawa' anan té', nusi' daha' deng pelien. 20Té' kah dau baya laké' aleng ngehawa' atih seng tei men hang daha', uréh daha' pelien tegu dau atih.

21“Ji la'ung pah em té' aleng napen irak aleng maring té' basung aleng lumei, avin seng birak loh kah basung anan kenan tapen atih, iha' tih balun aleng maring mirak basung aleng lumei atih, ateng ha' dekaya' irak na' la'an. 22Nurei pah lahuh ji la'ung pah em té' melo' ata' agun aleng maring té' sut anit aleng lumei, avin ata' agun aleng maring atih seng meso' sut anit aleng lumei atih, ata' agun atih pah muak, sut atih pah buret lahuh. Bi ata' agun aleng maring, en daha' lo' alem sut anit aleng maring.”

Daha' mua bua jelei pasé' té' Dau Kelarah

Mat 12:1-8; Lk 6:1-5

23Tegu ji Dau Kelarah panau nah Yesus alem luma'. Alem daha' panau en dalo' anak sekulah Na' ngu'en nah beluha' jelei pasé'. 24Ken daha' Farisi men Yesus, “Nyineng nah, nun kah tavit na' dalo' na ket aleng em tekep té' Dau Kelarah?” 25Kuma' nah Iha' men daha', “Nusi' kah payan kelo' basa' marung ket aleng en Daud na tegu iha' pelien, iha' dahin daha' aleng dahin na'? 26#Lewi 24:5-9; 1 Sam 21:1-6 Iha' tei alem Uma Allah, alem urip Abyatar aleng imam aya', pelalau dalo' kuman luti aleng en daha' atah atih. Bi luti atih em tekep en daha' ha' béh kani bi daha' imam dep kah aleng tekep kani na'. Bi en na' kani nah, en na' uk pah lahuh men daha' aleng dahin na'.”

27 # Kel d M 5:14 Ken Na' pah la'an men dalo', “Dau Kelarah en Allah na masi' kelunan, nusi' ha' avin kelunan té' Dau Kelarah té'. 28Avin atih, Anak-kelunan Iha' nah Tuhan hujung Dau Kelarah lahuh.”

Currently Selected:

MARKUS 2: TDK1990

Highlight

Copy