MARKUS 1

Hadui Yohanes aleng Meduh

Mat 3:1-12; Lk 3:1-18; Yoh 1:19-28

1Anih nah aring-aring dengah sayu marung Yesus Kristus, Anak Allah.

2 # Mal 3:1; Mat 11:10; Yoh 3:28 Alem surat nabi Yesaya té' kalung aleng nunih dahun na',

“Nyineng, Akui nyihu sihu Kui tei una' té' Ika',

aleng seng petmei alan Ka',

3 # Yes 40:3 iha' tih dahun kelunan aleng medéng-medéng ha' tana ngahit,

Nemei nah alan Tuhan,

dahin nutau nah avan Na' panau” ken na'.

4Yohanes aleng Meduh kelunan atih nei nyemau ha' tana ngahit atih, dahin pedengah marung duh aleng bara ngelisah kenep aleng avan sala pebet. 5Lun musang nah lim-lim huang daléh Yudea tei pala iha', dahin lim-lim huang daléh Yerusalem pah lahuh, en na' duh nah daha' alem hungei Yordan, alem daha' akun sala daha'.

6 # 2 Laj 1:8; Zak 13:4 Kanan Yohanes tih en daha' na men bulun hulung unta, jet na' anit, ket en na' kani, paho' dahin nyihun hinget. 7#HST 13:25 En na' katuk nah kelunan, ken na', “Té' ji aleng seng nei ngebaya akui, aleng lalau dekaya' men'uh akui. Nudok muvan talé' kasut Na' pah akui em tekep. 8Té' pah akui anih meduh ikam té' ata', bi Iha' atih seng meduh ikam té' Belua' Ma'ang,” ken na'.

Yesus en Yahya duh

Mat 3:13-17; Lk 3:21-22; Yoh 1:31-34

9 # Lk 2:51 Tegu atih Yesus nei men Nazaret aleng alem daléh Galilea, en Yohanes duh nah Iha' alem hungei Yordan. 10Tegu Iha' peju men alem ata' atih, en na' nyineng nah langit neng'ap, Beluan Allah pah nei ngiléh té' Iha' awi jam tuk ji manuk sepukun. 11#Ar Kel 22:2; NDI 2:7; Yes 42:1; Mat 3:17; 12:18; Mk 9:7; Lk 3:22 Nei nah ji daho' men langit, aleng kuma', “Ika' anih nah Anak Kui aleng Ek nyalam, aleng ngavan kenep Kui melu,” ken daho' atih.

Setan pesek Tuhan Yesus

Mat 4:1-11; Lk 4:1-13

12Tegu atih pah en Belua' geri nah Yesus ha' tana ngahit. 13#NDI 91:13; Yoh 1:51 Té' nah Iha' tinan ha' tana ngahit tih pat-pulu dau dara na', hinan nah Setan pesek Iha'. Iha' murip té' hang tulan-tulan aleng hatan, meliket pah masi Iha'.

Hadui Yesus ha' tana Galilea

Mat 4:12-17; Lk 4:14-15

14Tegu Yohanes uh en daha' apuh, nei nah Yesus ha' daléh Galilea, pedengah dengah sayu Allah. 15#Mat 3:2; Gal 4:4 Ken Na', “Jaka' na' uh ateng, keligem Allah pah hu'uh jeleng. Ngelisah nah ikam, nginah té' dengah sayu anih,” ken Na'.

Yesus muvui pat la'ung

Mat 4:18-22; Lk 5:1-11

16Alem Iha' panau-panau té' béh bawang Galilea, en Na' nyineng nah Simon dahin Andreas harin Siomon tih alem dawa' biving jala té' bawang, avin dawa' atih kelunan aleng ngejala'. 17#Mat 13:47 Ken Yesus men dawa', “Nei nah kua', ngioh Akui. Akui seng na kua' ngejala' kelunan.” 18Pelalau dawa' melek jala' dawa', pelalau ngioh Iha'.

19Alem Iha' panau men inan, nusi' payan Iha' nuno' su la'an, en Na' nyineng nah Yakobus dawa' Yohanes harin na' tih, aleng anak Zebedeus, alem dalo' atih melo' alem haruk manyut jala' dalo'. 20Pelalau en Na' uvui nah dawa', dawa' atih pah melek Zebedeus taman dawa' alem haruk dahin kelunan aleng nyuwa atih lahuh, pelalau dawa' tei ngioh Yesus.

Yesus muga to'

Lk 4:31-37

21 # Mat 4:13 Tei nah dalo' ha' daléh Kapernaum. Tegu Dau Kelarah, pelalau tei nah Yesus alem uma sebayang, dahin katuk daha'. 22#Mat 7:28-29 Ngeniheng nah daha' té' katuk Na' atih, avin Iha' pekatuk daha' awi kelunan aleng nyemugen, dep lelan katuk Na' men'uh daha' aleng puboh surat Tuhan. 23Tegu anan té' nah ji la'ung alem uma sebayang atih aleng té' to' nilung halem na' aleng meté' medéng, 24#NDI 16:10; Mk 5:7 ken na', “U Yesus, kelunan Nazaret, nuno' kah tuk kamé' seng piah kenep Ka'? Ika' nei seng nasa' kamé' anih iah? Akui jam Ika' anih. Ika' anih nah Aleng Ma'ang, aleng nei men Allah,” ken na'. 25En Yesus mano' nah iha', ken Na', ‘Tepaka' nah im. Musang nah im men kelunan anih,” ken Na'. 26#Mk 9:26 Ngepu'an nekjen tua nah kelunan anan kenan to' atih pelalau medéng aya', pelalau musang nah iha'. 27Ngeniheng tua nah daha' lim, ateng daha' pepteng pedeng daha' dahin kuma', “Ket nun anih pa? Katuk maring anih iah? Alem tingan Iha' duan to', daha' pah ngioh dahun Na'.” 28Salet nah dengah marung tuk Yesus anan putat hino'-hino' tei alem lim-lim daléh Galilea.

Yesus petagéh daha' kahum

Mat 8:14-17; Lk 4:38-41

29Tegu dalo' musang men alem uma sebayang, pelalau dalo' tei halam uma Simon dahin Andreas, Yohanes dawa' Yakobus pah tugung. 30Té' hinan-divan Simon ngeluvan avin iha' larem, pelalau dalo' bara Yesus. 31Tei nah Iha' gem usu na', meju iha', pelalau tengau nah iha' men larem na' atih, pelalau nyamah té' dalo'.

32Uh levi nah dau, tegu matan dau ngesem, en daha' geri nah lim kelunan aleng perah pala Iha', dahin kelunan aleng ngavan to' nilung. 33Lim huang daléh atih pah pepeng té' ba ketamen. 34Pelalau en Na' petagéh nah daha' kahum aleng perah kelesé'-kelesé', to' pah kahum en Na' sau, nusi' Ha' mun to' atih duan, avin jam to' atih nelana' Iha'.

Yesus sebayang ha' ngavan aleng henung

Lk 4:42-44

35Tegu jihima pesun-pesun alem ha' lidem loh kah, ma'un nah Yesus, pelalau musang tei ha' ji ngavan aleng henung, hinan nah Iha' sebayang. 36Simon dahin dalo' aleng dahin na' pah behi'a Iha'. 37Tegu dalo' pesuk Iha', dalo' kuma' men Iha', “Lim kelunan ilau Ika'.” 38Ken Yesus men dalo', “Tei nah itam ha' béh ha' uma aleng jeleng anih, ja Akui deng katuk hinan lahuh, avin anan nah tavit na' Akui nei ateng nih,” ken Na'. 39Pelalau tei nah Iha' halem lim uma sebayang ha' lim tana Galilea, dahin katuk dahin mesau to' lahuh.

Yesus petagéh kelunan aleng perah malin

Mat 8:1-4; Lk 5:12-16

40Nei nah ji la'ung kelunan aleng perah malin pala Iha' akei asi lelan té' Iha' dahin nyepukun ha' unan Na', ken na' “Awi ha' kenep Ka', adang Ika' haman na akui ma'ang.” 41Pelalau perah hengan Na' masi iha', pelalau en Na' jei nah usu Na', Na' gem iha', ken Na' men iha', “Ngenep kah Akui. Ma'ang nah im.” 42Tegu atih pebet nah perah malin atih, pelalau ma'ang nah iha'. 43En Na' bara nah iha' petajen, dahin pelalau nyihu iha' tei, 44ken Na' men iha', “Hituk nah im lelan, men ji kelunan pah meng im bara nun-nun. Bi tei nah im bara batung ka' men laké' imam dahin ma'uk bun usu ka' aleng hu'en Musa, ja ika' ma'ang, iha' atih tada' men daha',” ken Na'. 45Bi musang nah laké' atih, pelalau bara dengah hiréh-hitih ateng ino'-ino' tih, dahin mutat daho' atih, ateng Yesus em deng tei tula la'an tei alem daléh aya', bi Iha' té' ha' tana aleng henung tua, kahum loh kah kelunan men ino'-ino' tei pala Iha'.

Currently Selected:

MARKUS 1: TDK1990

Highlight

Copy