MATIUS 28

Tuhan Yesus peju men patei. Dahun Na' aleng baya loh

1Lepek nah Dau Kelarah daha'#28:1 Dau Kelarah daha', iha' tih dau nem, dahin dau aleng una' alem hang migu daha', atih nah aleng en tam na Dau Migu. atih, tegu dau uh pebekat jihima té' dau aleng una'(*) alem hang migu anan, te nah Maria Magdalena dahin Maria aleng ha' béh atih, ngenep nyineng tanem atih. 2Beka' nyeman tua tana megilik aya'-aya', avin ji meliket Tuhan nei ngiléh men Surga, pelalau nei muvin bato' atih, dahin melo' hujung na'. 3#Mat 17:2; HST 1:10 Jam na' awi bekilet, dahin kanan na' puti piah usan leju#28:3 usan leju Alem Bahasa Kebangsaan “thalju”. Anih puti, nyingem, seng awi usan bato' bi ha' lema, ngenek tua. Tegu ha' té' kahum nei legak té' tana iha' pah jadi' mahing. Tegu ha' ga' lasu balui ata' nah la'an.. 4Kelunan aelng menga atih pah ngetiwet tua takut, dahin balui awi kelunan matei tua.

5Bi meliket atih kuma' men dawa' doh atih, “Meng kua' takut. Kitak kah kua' ilau Yesus aleng uh daha' selepang arei dih. 6#Mat 12:40; 16:21; 17:23; 20:19; HST 2:36 Nusi' té' Iha' tinih la'an, avin Iha' uh nei murip, awi aleng uh dahun Na' arei di. Nei nah kua' nyineng ngavan Na' uh miri. 7#Mat 26:32 Uh anan tei nah kua' salet bara men dalo' anak sekulah Na' dih, bara', ‘Iha' uh nei peju murip. Iha' seng tei una' té' kelo' tei ha' Galilea; hinan nah kelo' seng jam Iha',’ ken kua'. Nunan nah Dahuk men kua'.”

8Pelalau timah lelan nah dawa' tei uli men tanem atih dahin takut dahin sayu lan kenep dawa' lahuh, pelalau tepurung nah dawa' salet-salet tei bara men dalo' anak sekulah. 9Alem nunan dih, beka' nyeman-nyeman pah Yesus pepsuk dahin dawa', dahin kuma', “Sayu kah men kua'.” Pelalau tei nah dawa' gem kudek Na' dahin nyepukun sebayang ha' unan Na'. 10#Ar Kel 45:5; 50:19; Ib 2:11 Pelalau ken Yesus men dawa', “Meng kua' takut, tei nah kua' bara men dalo' Harik, nyihu nah dalo' tei ha' Galilea. Hitih nah dalo' seng nyineng Akui.”

11Alem dawa' atih tei, lun tei pah kuri-kuri la'ung dalo' aleng menga tanem atih tei ha' daléh bara men dalo' imam aya' lim-lim ket aleng uh jadi' atih. 12Lun pepeng nah dalo' imam aya' dahin lim kelunan aya' na ji pakat, uh anan en daha' uk nah ligit pirek kahum men daha' seladu atih, 13#Mat 27:64 dahin kuma', “Sayu kelo' bara, ‘Daha' anak sekulah Na' aleng nei ala Iha' tegu malem dahin nakau Iha' alem kalo' tudu,’ ken kelo'. 14Tana' daho' anih tula té' gabnur adang tei kah kamé' nyeluk iha', dahin mahuk kelo'.” 15Pelalau en dalo ala nah ligit atih dahin bara awi aleng putat té' hang daha' Yahudi ateng dau anih.

Dahun Yesus aleng baya loh

Mk 16:14-18; Lk 24:36-49; Yoh 20:19-23; HST 1:6-8

16 # Mat 26:32; 28:7; Mk 14:28 Té' pah dalo' pulu-ji' anak sekulah Na' atih, te dalo' lim ha' Galilea ha' ji ngalang aleng en Tuhan petneng men dalo'. 17Kitan dalo' nah Iha', pelalau dalo' ngelu'ep sebayang ha' unan Na', bi té' pah balei aleng kawah. 18#Dan 7:14; Mat 11:27; Ef 1:20-22 Nei nah Yesus pala dalo', pelalau tengaran dahin dalo', ken Na', “Lim-lim tingan ha' Surga dahin ha' usun tana uh en Allah uk men Akui. 19Avin anan, tei nah kelo', na lim-lim na'an kelunan jadi' anak sekulah Kui, dahin meduh daha' halem Aran Taman tam, dahin Anak, dahin Belua' Ma'ang, 20#Mat 18:20; Yoh 14:23; HST 1:8 dahin katuk daha' ngioh lim-lim ket nun-nun aleng uh Ek nyihu kelo'. Hituk nah lahuh, Akui anih nah aleng lengep kelo' pa'en-pa'en ateng ka'uh lim ket nun-nun.”

Currently Selected:

MATIUS 28: TDK1990

Highlight

Copy