ARING KELESING 41

Yusuf bara alem nyupin laja'

1Dua' duman men'uh anan, ngenyupé' nah Firaun, iha' té' nekring té' benghé' hungei Nil. 2Beka', men alem hungei anan nei nah tusu sapi' aleng kajau jam batung daha', nurei pah daha' madung lan-lan lahuh, pelalau kani uro' aleng té' benghé' hungei anan. 3Men'uh anan beka' nei pah tusu sapi' aleng nyuwang la'an, nei nyemau men alem hungei Nil anan lahuh, ji'ek lelan jam batung daha', nyuwang tua daha', nekring nah daha' té' béh sapi' aleng una' anan dih té' benghé' hungei anan. 4Beka' sapi' aleng ji'ek dahin aleng nyuwang anan, téi kuman tusu sapi' aleng madung dahin kajau jam batung daha' anan dih. Men'uh anan ma'un nah Firaun. 5Men'uh anan tudu pah iha' la'an, iha' pah ngenyupé' nekulah, aleng kedua' hangun na'. Iha' jam té'nyupin na' anan té' ji iung parei aleng langan dahin kajau jam na', té' tusu beluha' na'. 6Beka' men'uh anan la'an, nei pah tusu beluha' parei aleng ngupéh dahin ngeluhem tua lahuh, nurei pah iha' jangau tua kenan dih aleng men matan dau pa'un tih. 7Beluha' aleng ngupéh anan dih tei kani tusu beluha' aleng kudan dahin aleng langan anan dih. Uh anan ma'un nah Firaun men udu na' beka' nyupin na' sikah! 8Jihima, dau uh malah, tusah nah kenep na', pelalau ha' nyihu muvui daha' aleng tugé'-tugé' aleng haman nesen, dahin daha' kelunan aleng haman marung lim-lim adet alem daléh Mesir nan. Iha' nah Firaun na'lung tuk-tuk nyupin na' anan dih men daha', bi ji-ji la'ung pah em té' jam bara alem nyupin na' men iha'.

9Pelalau laké' kepala' aleng ma'uk du'i men Firaun anan dih kuma' men laja' na', “Dau anih akui hituk té' sala kui. 10Tegu laja' kui Firaun bunget na kawa' aleng nyadui men ika' arei dih dahin metei akui alem uma jin, kawa' laké' kepala' aleng na luti arei dih, 11té' ji malem kawa' ngenyupé', akui pah ngenyupé', laké' kepala' na luti arei dih pah ngenyupé', nyipin awa té' lim alem na'. 12Té' ji nyam kelunan Ibrani dahin awa' hinan, iha' aleng nyam alem amin laké' kepala' aleng jaga-jaga laja' dih. Tegu kawa' bara nyupin awa' men iha', pelalau ha' bara lim alem nyupin awa' nan dih men kawa'. 13Awi jam tuk alem nyupin awa' aleng en na' bara anan, nunan lan kah aleng jadi' té' kawa' anih dih, akui nei uli alem hadui la'an, laké' kepala' na luti anih dih en tekayung nah iha' ji'ek.”

14Men'uh anan iha' nah Firaun nyihu muvui Yusuf. Pelalau daha' musang iha' men uma jin atih, iha' pah nyepiting buk na', dahin ngalui kanan na', pelalau tei pala Firaun. 15Firaun pah kuma' men Yusuf, “Té' nyupik uh ek bara men daha', nyihu daha' ilau alem na', bi ji la'ung pah em té' aleng jam alem na' men akui, bi té' nah akui kelenghi dengah marung ika', daha' bara ika' aleng haman petula alem nyupé' kurin daha'.”

16Yusuf pah nyu'ei Firaun, “Nusi' ha' akui amei, bi Tuhan Allah aleng seng bara daho' aleng sayu men ika', aleng ngavan Tamak Firaun seng melu.”

17Pelalau nah Firaun nira men Yusuf nyupin na' anan, “Alem kui ngenyupé' akui jam akui té' nekring té' benghé' hungei Nil. 18Ek ineng men alem hungei Nil nan, beka' té' tusu sapi' aleng madung nei nyemau, kajau lelan batung dalo', dalo' pah pelalau kuman uro' té' benghé' hungei anan. 19Beka' men'uh anan la'an nyemau pah tusu aleng ji'ek lan-lan jam dalo', dahin nyuwang tua lahuh. Nusi' payan kui té' pesuk ket aleng nuréh té' daléh Mesir anih uh men'a. 20Dalo' aleng nyuwang anan dih tei kuman tusu sapi' aleng madung anan dih. 21Lim sapi' anih tei alem butit dalo', beka' em té' loh henoh na' té' dalo', jam batung dalo' pa'en ji'ek awi men'a dih loh kah dalo'. Uh anan, hingat nah akui. 22Men'uh anan la'an, alem kui ngenyupé' anan dih beka' nyemau nah tusu beluha' parei té' ji iung tua, aleng langan lelan, nurei pah iha' sayu lelan beluha' na' lahuh. 23Ngebaya anan la'an nyemau pah tusu beluha' aleng tegang, nurei pah iha' ngupéh lelan dahin uh jangau tua kenan dih aleng men matan dau pa'un. 24Beka' beluha' aleng ngupéh ana dih, tei kuman tusu beluha' aleng langan arei dih. Té' lim-lim anih uh ek teng nah lim-lim daha' aleng tugé'-tugé' aleng haman nesen lahuh, ji-ji la'ung pah em jam bara alem na' men akui.”

25Iha' nah Yusuf kuma' men Firaun, “Dua' nyupé' ka' anan, amei, piah tua alem na'. Allah aleng uh bara men ika' anan, amei, ket aleng seng kenep Na' na. 26Tusu sapi' aleng sayu anan, iha' nah tusu duman, nurei pah tusu beluha' parei aleng sayu anan, iha' nah tusu duman lahuh. Dua' nyupé' anan piah tua. 27Té' pah tusu sapi' aleng nyuwang dahin aleng ji'ek lan-lan jam dalo' anan, aleng nei baya anan dih, iha' nah alem na' tusu duman lahuh, nunan loh kah tusu beluha' parei aleng ngupéh dahin tei kelupit, jangau tua kenan dih men matan dau pa'un anan, iha' nah alem na' tusu duman té' li'en. 28Iha' kah dahuk di men laja' kui Firaun. Allah aleng uh petula men laja' kui Firaun ket aleng seng en Na' na. 29Alem tusu duman aleng ateng anih na'a iha' seng té' besoh aya'-aya' té' alem daléh Mesir anih. 30Men'uh anan la'an seng té' pah li'en aya' lelan, alem tusu duman lahuh, nusi' nah té' besoh la'an nunan té' daléh Mesir nih avin lien anan nah seng pekpah kanen té' ji daléh Mesir nih. 31Em té' nah henoh-henoh besoh anan dih la'an té' alem daléh anih kenan lien anan, avin lien aya' lelan aleng anan. 32Ateng dua' hangun laja' kui ngenyupé' ket aleng nunan bi piah kah alem na', té' pah iha' nunan avin Allah uh petneng na', Iha' pah seng na lien anan lalau-lalau.

33“Avin ha' nunan, sayu nah tamak Firaun ilau ji kelunan aleng tugé' dahin haman pelemana', ja puboh daléh Mesir anih. 34Sayu nah tamak Firaun ilau kuri kelunan lahuh aleng deng duan, ja alem tusu duman aleng besoh anan, sayu daha' ala ji tulan men ha'ut lima' peng, té' lim-lim ket aleng kelan daha' alem daléh Mesir anih. 35Daha' anan nah aleng tei mepeng lim-lim ket aleng kelan daha' té' alem duman aleng sayu aleng seng nei ateng atih, lim atih pah té' ida usu ka' lim kah, en peng nah nutih en lo' nah lim-lim parei atih alem daléh aya' anih, 36ja melo' aleng en tam peng atih mengan té' alem tusu duman aleng seng lien anan, ja daléh Mesir anih em tei katé' lalé' kenan lien atih si'.”

Yusuf jadi' gabnur ha' Mesir

37Teneng lan nah dahun Yusuf atih kurin Firaun nurei pah kurin lim daha' aleng nyadui men iha' atih lahuh. 38Iha' nah Firaun kuma' men daha' aleng nyadui men iha', “Nusi' peletu itam deng ilau kelunan aleng awi nunih, ji kelunan aleng ngavan Beluan Allah té' nunih.” 39Ken Firaun nah men Yusuf, “Avin Allah uh petula lim na' men ika', nusi' nah té' ji kelunan aleng seng tugé' dahin haman pelemana' awi ika' nih la'an. 40#HST 7:10 Sayu nah ika' tua aleng dekaya' gem lim ket aleng alem uma kui nih. Ket nun-nun aleng dahum, lim-lim daha' nyam kui tekep daha' ngioh na' tua, avin ika' aleng dekaya' té' ujung daha' aleng té' hida kui.” 41Ji dahun Firaun men Yusuf lahuh, “Dau anih pah akui uh meju ika' gem lim-lim daléh Mesir anih.” 42Uh ha' kuma' nunan, pelalau Firaun mebet selegem aran na' té' jahangau na' anan, metei na' té' jahangau Yusuf, en na' tei nah balun aleng lanih kanan Yusuf lahuh, dahin metei teba'eng met té' keran na'. 43Pelalau Firaun nyihu metei Yusuf alem kelita' aleng ngavan daha' aleng té' hida laja' atih, daha' pah medéng ha' unan Yusuf, “Ju nah iha'!” ken daha'. Nunan nah tuk na' Yusuf en Firaun ju gem lim-lim alem daléh Mesir. 44Ken Firaun men Yusuf, “Akui nah Firaun, bi awi ika' em mun, ji la'ung pah em deng na nun-nun alem daléh Mesir anih.” 45Pelalau Firaun na aran Yusuf Zafnat-Paaneah, pelalau ma'uk Asnat anak Potifera aleng imam ha' On men iha' hawan na'. Nunan nah Yusuf tula dekaya' alem lim-lim daléh Mesir nan. 46Urip Yusuf telo'-pulu duman tegu ha' matoh hadui na' men Firaun laja' Mesir anan. Yusuf pah leka' men béh Firaun tei panau-panau alem lim daléh Mesir anan. 47Daha' alem daléh Mesir anan pah besoh lan-lan alem tusu duman jaka' besoh anan. 48Yusuf pah mepeng lim ket en daha' kani, té' alem tusu duman tegu daléh Mesir besoh anan. En na' lo' nah peng-peng uli-uli hadui daha' atih ha' ha'ut-ha'ut tulan alem daléh daha' tih. 49Nunan nah hadui Yusuf, tei-tei mepeng parei daha' atih awi hit ha' banget dih tua, té' loh nah daha' deng mujap na' la'an, avin ha' kelalau kahum.

50Em payan duman lien anan ateng, uh dua' nah anak Yusuf dawa' Asnat hawan na', aleng anak Potifera imam ha' daléh On atih. 51Yusuf na aran anak una' na' Manasye, avin ken na', “Allah uh na akui tei hadau té' katé' kui ji'ek, nurei pah té' uma tamak.” 52Té' anak na' aleng kedua' en na' na nah aran na' Efaim, avin ken na', “Allah uh na akui awi kelunan aleng bangu réh nah anih ja' té' daléh anih, nusi' pah beloh katé' kui dih.”

53Lepek nah tusu duman besoh té' alem daléh Mesir anan dih, 54#HST 7:11 ateng nah tusu duman aleng lien anan, awi aleng kurin Yusuf anan dih. Ha'ut-ha'ut daléh lien pekto' nah daha', bi alem daléh Mesir té' kah ket daha' kani. 55#Yoh 2:5 Tegu alem daléh Mesir nei lien nunan, daha' kelunan alem daléh anan pah medéng akei kanen té' Firaun. Iha' nah Firaun kuma' men daha', “Tei nah ikam ha' Yusuf, ngioh nah ikam nun-nun aleng dahun na' men ikam.” 56Ji-ji usun tana lien anan, iha' nah Yusuf neng-eng ba lim-lim lepau, pelalau mebet parei anan té' daha' Mesir, avin atek teliling lelan lien jaka' anan té' daha' Mesir. 57Té' pah daha' ha'-ut-ha'ut daléh nei ateng ha' Mesir, nei melé' parei té' Yusuf, avin petingan lien pah daha' ji-ji usun tana anih jaka' anan.

Currently Selected:

ARING KELESING 41: TDK1990

Highlight

Copy