ARING KELESING 37

Yusuf dahin dalo' harin na'

1Yakub murip ha' daléh ngavan taman na' tei nyakei menuna' kah iha', iha' tih ha' tana Kanaan.

2Anih lung marung pahu-pahu Yakub. Alem urip Yusuf pulu-tusu duman, iha' aleng mengalei puboh hulung duba dahin harin-harin na' aleng anak Bilha, dahin anak Zilpa, Zilpa daha' Bilha atih aleng hawa' apit taman na'. Yusuf tei nengaran ji'ek dalo' harin-harin na' men taman na'.

3Israel nyalam lelan té' Yusuf men'uh ha' nyalam té' dalo' anak na' aleng ha' béh, avin Yusuf aleng anak uku na'. Iha' pah na basung aleng aru kiput men Yusuf. 4Tegu dalo' harin na' jam kenep taman na' lalé' nyalam té' Yusuf men'uh lim dalo' aleng harin na' aleng ha' béh, heléh nah kenep dalo' té' iha', nusi' nah dalo' na daho' aleng sayu men iha' ji'ek.

5Malem ji hangun ngenyupé' nah Yusuf, pelalau en na' tira nah nyupin na' anan men dalo' harin-harin na', té' anan pah dalo' harin na' nan sa'-sa' heléh té' iha' ji'ek. 6Ken Yusuf men dalo' harin na' atih, “Sayu kelo' kelenghi akui nira nyipik nih. 7Tegu kui ngenyupé' akui jam telo' peharin té' ha' luma' mepeng parei meté' ngepah-ngepah na', beka' aleng ek ngepah nei nekring, men'uh anan nei nah kepah aleng anun kelo' teliling aleng kepah kui, pelalau nukem nyepida té' aleng kepah kui anan dih.”

8Pelalau dalo' harin na' kuma' men iha', “Nuno' du, ika' ngivah seng jadi' laja' amé' anan iah? Nuno', ika' ngenep seng duan-duan kamé' anan iah?” Sa'-sa' heléh pah dalo' té' iha' la'an tavit nyupin na' dahin tavit dahun na' nunan dih.

9Men'uh anan la'an ngenyupé' pah iha' ji na'an nyupé', en na' petira pah men dalo' harin na' anan la'an, ken na' nira na', “Té' pah nyupik la'an, akui nyineng matan dau dahin bulan, té' pah pulu-ji kelawing, lim daha' nei nyepukun ha' unan kui.”

10Uh ha' nira lim tuk nyupé' anih men taman na' dahin dalo' harin na' lim, iha' nah taman na' bunget iha', “Nun kah aleng nyupim anan? Bareng si' kawa' hinam dahin dalo' harim lim seng nei nyepukun ateng ha' tana ja nyepida té' ika' iah?” 11#HST 7:9 Mi'en lan-lan nah dalo' harin na' anan té' iha', bi taman na', en na' lo' alem kenep na' tua daho' atih.

Yusuf en dalo' harin na' bet dahin en daha' geri ha' Mesir

12Té' nah ji hangun dalo' harin na' tei puboh hulung kading dahin duba taman dalo' jeleng Sikhem atih. 13Lun kuma' nah Israel men Yusuf, “Dalo' harim dih uh tei puboh hulung ha' Sikhem dih nah anih kurik? Akui nyihu ika' ji'ek tei ha' dalo' anih puyo'.” Nyu'ei nah Yusuf, “No' pah kurim pa amei.”

14Ken Israel men iha', “Tei nah im nyineng dalo' harim ji'ek dih, sayu kah dalo' lo? Im nyineng hulung dih lahuh bahi daha' em sayu, ja si' ika' geri dengah men akui.” Nunan nah Yakub nyihu iha' tei men datah Hebron, Yusuf pah tei ateng ha' Sikhem. 15Alem Yusuf pivek-pivek ilau dalo' harin na' anan, avin ha' lingo', pepsuk nah iha' dahin ji laké', iha' laké' anan meteng Yusuf, “Ket nun aleng im ilau du?”

16Iha' ha' nyu'ei, “Akui meté' pivek-pivek ilau dalo' harik anih ni, im masi nah akui, im bara men akui, hino' dalo' té' bopoh hulung kading dahin duba amé' di ré?”

17Iha' laké' anan kuma' men iha', “Uh leka' nah dalo' men inih kurik, avin té' kui kelenghi dahun dalo' men'a dih, ‘Tei nah telo' ha' Dotan tih,’ ken dalo' dih.” Iha' nah Yusuf tei ngioh dalo' harin na' nan dih, pesuk na' nah dalo' ha' Dotan.

18Alem iha' su loh kah tula nah iha' kitan dalo'.Em payan ha' ateng ha' dalo', pakat nah dalo' una', ilau alan ngenep lematei iha'. 19Ken ji la'ung men ji la'ung, “Nyineng kelo', laké' nyupé' arei dih nei nah. 20Sayu nah telo' lematei iha' tua mesau iha' alem ji lesung anih. Tana' telo' bara daha' na'a, uh en tulan hatan ala nah iha', ken telo' si', ja telo' nyineng nuno' si' tuk tei nyupin na' anan dih!”

21Tegu Ruben kelenghi dahun dalo' nutih, iha' pah ngenep seng muéh iha' men alem usu dalo', avin anan iha' kuma' men dalo', “Meng nah telo' lematei iha' ji'ek.” 22Té' pah ji dahun Ruben men dalo', “Meng telo' seng lematei iha' ké, sayu telo' metei iha' alem lesung aleng té' ha' tana ngahit anih, bi meng telo' na ket nun-nun té' iha' ji'ek,” avin alem kenep na' atih ngenep seng makau Yusuf men alem usu dalo' harin na', ja geri iha' uli pala taman na'. 23Tegu Yusuf ateng ha' dalo' harin na', dalo' pah mebet basung na', basung aleng aru kiput na' anan dih, aleng en na' té' atih. 24Dalo' harin na' apuh na iha' ji'ek, dalo' tei nah iha' alem lesung.

25Nusi' té' ata' alem lesung atih. Men'uh anan melo' nah dalo' seng kuman. En dalo' nyineng ké', beka' té' ji peng kelunan kitan dalo' nei panau-panau, daha' men bengsa' Ismael. Daha' nei men Gilead, té' hulung unta daha' aleng geri lutung aleng bu sayu, dahin meket kayo' avung, dahin pulut mur, tei geri na' ha' Mesir. 26Lun kuma' nah Yehuda men dalo' harin na', “Seng nun aleng utung telo' iha' telo' lematei harin telo' nih, dahin nyavun daha na'? 27Pulang sayu telo' belé' iha' té' kelunan Ismael anan, meng usu telo' meté' iha', avin iha' nih harin telo' lan, telo' ji sin ji daha tua telo' nih dahin na'.” Dalo' harin na' pah ngioh dahun na' atih. 28#HST 7:9 Tegu daha' aleng kaya' men Midian lalau tinan, en dalo' ala nah Yusuf men alem lesung anan, pelalau belé' iha' té' daha' kelunan Ismael, legah na' dua'-pulu li'ap pirek tua. Yusuf pah pelalau en daha' geri ha' daléh Mesir.

29Tegu Ruben nei nepulet nyineng iha' alem lesung anan, beka' nusi' nah té' ha' halem la'an. 30Pelalau ha' mirak basung na', pelalau tei pala dalo' harin na', kuma' men dalo', “Anak aréh dih nusi' nah té' iha' la'an, seng hino' nah akui seng tei lahuh nih lo?”

31Men'uh anan en dalo' ala nah basung aru Yusuf aleng kajau anan dih, dahin nevek ji kading, pelalau mesup basung anan té' alem daha na'. 32Basung anan pah en dalo' nyihu aten ha' taman dalo', dahin kato' daho' nyihu bara iha', ken dalo', “Anih nah ket kelan amé', sek im nyineng na' amei, kelung si' iha' basung Yusuf amé' dih.”

33Tegu Yakub nyineng basung anan, iha' ha' kuma', “Basung anih basung anak kui ji'ek lan kah anih. Tulan aleng hatan tei kuman iha' ji'ek anih kurik, adang Yusuf kui matei lan nah anih, en tulan sekaruk muret iha'.” 34Yakub pah pelalau mirak basung na', pelalau en na' sebelun nah balun lumuh té' iha' ji'ek, dahin nangih ilau anak na' kuri-kuri dau dara na'. 35Lim dalo' anak aké' dahin anak doh na' meté' pehalau iha' ji'ek, bi nusi' ha' mun tei halau, iha' pah kuma', “Nusi' kui mun tei halau. Tuken akui tei pala iha' kah, ateng alem tana tih dahin daha' aleng uh matei dih!” Nunan nah tuk taman na' ji'ek meté' nirau iha'.

36Té' pah Yusuf anan dih, en daha' Midian bet pah iha' té' daha' Mesir, en Potifar ala pah iha' la'an, iha' tih ji laké' aleng nyadui alem uma laja', iha' aleng kepala' menga uma laja' Firaun.

Currently Selected:

ARING KELESING 37: TDK1990

Highlight

Copy