زکریأ ۷
۷
دعوت عیدألت و رحمتٚ رِه
1 پأدیشأ داریوشٚ پأدیشأیی چأرومی سألٚ میأن، جٚه نوهومی مأه چأرومی روج ینی کیسلو مأه دورون، خوداوند ایتأ دِه پیغأم فأدأ مٚرَه.
2 بیت‌ئیلٚ شهرٚ یوهودیأن، ایتأ عیده جٚه خوشأنٚ مردأکأنَ شراصر و رجم ملکٚ مسئولیتٚ اَمرأ، اوسه کودٚد خودا خأنه کی خوداوندٚ جَا خأهیش بوکونٚد 3 و یهوه صبایوت خأنه کأهینأن و پیغمبرأنٚ جَا وأوٚرسٚد کی آیا تأ پنجومی مأهٚ میأن خوشأنٚ روزه و عزأدأری‌یَ، هوطؤ کی اَ سألأنٚ میأن اَ کأرَ بوکودٚد ایدأمه بٚدد، یا کی نه.
4 یهوه صبایوت مٚرَه بٚفرمأسته کی اَ جوأبَ فأدٚم اَشأنَ: 5 «قومأن و کأهینأنَ بیگید، می وأسی نوبو کی او پنجومی و هفتومی مأه اَ هفتأد سألٚ میأن روزه گیفتیدی و عزأدأری کودیدی. 6 اَسه موقدسٚ عَیدأنٚ انجأم دئنٚ زمأتٚم، می فیکر نییٚد، بلکی فقد خوشأنٚ بوخور وأخور و دیل موشغولی فیکر ایسٚد. 7 هه هوشدأرَ من پیشتر سألأنٚ رِه، پیغمبرأنٚ اَمرأ اَشأنٚ گوش فأرٚسأنِئم، او زمأت کی اورشلیم هنو آبأد بو و امنیت میأن دوبو و اونٚ ورجأ و جونوبٚ شهرأنم آدمأن ایسأبود.»
8 بأزون یهوه صبایوت زکریأ‌یَ بٚفرمأسته کی اَ پیغأمَ فأدٚه اَشأنَ: 9 «کس‌کسٚ اَمرأ دیلسوج و مهرٚوأن بیبید و اینصأف و خورومی اَمرأ کردٚکأر بوکونید. 10 وِیوه زنأکأن و یتیمأن و غریبه و فِقِرٚ آدمأنٚ ظولم کودنٚ جَا دٚس اوسأنید و کس‌کسٚ رِه جوفتٚ کلک دینچینید. 11 ولی شیمی پیله‌بابایأن اَ پیغأمَ نشتأوٚستٚده. اوشأن ایطأعت نوکودٚد و خوشأنٚ گوشأنَ بیگیفتٚد کی می صدایَ نشتأوٚد. 12 سنگٚ مأنستَن خوشأنٚ دیلأنَ سختَ کودٚد و نخأستٚد او دستورأنَ کی یهوه صبایوت خو روحٚ اَمرأ کی او پیشترٚ پیغمبرأنٚ اَمرأ اَشأنَ فأدأ بویَ، بٚشتأوٚد. هنٚ وأسی بو کی یهوه صبایوتٚ پیله غیظ بأمؤ اَشأنٚ رو.»
13 یهوه صبایوت اَطؤچی فرمأیه: «من دأد بٚزِم ولی اوشأن می صدایَ نشتأوسته بیگیفتٚد. منم او زمأت کی اوشأن می ور فریأد بٚزِده اَشأنَ دوعأیَ نشتأوسته بنأم. 14 هچین گردٚبأدٚ مأنستَن اوشأنَ او دورٚ قومأنٚ میأن پخشٚ پلأ بوکودم. دوشمن اوشأنٚ سرزیمینَ کی آبأد بو ایجور فوگوردأنِه کی حتّا اینفرم اویَه نمأنسته. اَطؤیی، خوشأنٚ خورومٚ سرزیمینَ چأکودٚد ایتأ صأرأیی مأنستَن.»
Currently Selected:
زکریأ ۷: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org