زکریأ ۱۴
۱۴
خوداوندٚ پأدیشأیی بٚنأ بوستن
1 خوداوندٚ روج نیزدیک ایسٚه! او روجٚ میأن، خوداوند قومأنَ اورشلیمٚ جنگستنٚ رِه جمَ کونِه. اوشأن شهرَ گیرده، خأنه‌یأنَ چأپؤ کونٚده، زنأکأنَ تجأوز کونٚده و خوشأنٚ میأن غنیمتَ سأم کونٚده. 2 نیصفٚ او جِمئیتٚ اسیری رِه بٚرده و اویتأ نیصفٚه شهرٚ خرأبه‌یأنٚ میأن مأنٚده.
3 بأزون خوداوند، پیشترأنٚ مأنستَن، شِه کی او قومأنٚ اَمرأ جنگ بوکونٚه. 4 او روجٚ میأن، اون زیتون کوه سٚر ایسِه کی، اورشلیمٚ شرقٚ ور نٚهأ و زیتون کوه دو نیم بِه و ایتأ پیله درّه جٚه شرق تأ غرب چأکوده بِه، چونکی او کوه نیصف شومأل ور و اویتأ نیصف جونوبٚ ور رأ شِه. 5 شومأن جٚه او درّه میأن جیویزیدی و فأرٚسیدی کوه او ور. هطؤیه، جیویزیدی، هوطؤ کی شیمی پیله‌بابایأن خٚیلی پیشترأنٚ رِه یوهودأ پأدیشأ عزیا زمأتٚ میأن زلزله جَا جیویز بٚدأده. می خودا، یهوه اَیِه و تومأمٚ موقدسأن اونٚ اَمرأ ایسٚد.
6 او روجٚ میأن نه آفتأب نٚهأ و نه سرمأ و نه اَیأز، 7 ولی همٚتأ جیگأ روشن ایسٚه! او روج، ایتأ مخصوصٚ روج ایسٚه و فقد خوداوند اونٚ فأرٚسِئن زمأتَ دأنِه. دِه همیشکٚ مأنستَن شب و روج نیبه، بلکی هوا شبٚ وخت روجٚ مأنستَن روشن ایسٚه. 8 زمستأن و تأوستأنٚ میأن اورشلیمٚ جَا او آبأن کی حیأت فأدِه رأ دکفِه؛ اونٚ ایتأ نیصف شِه مدیترأنه دریأ ور و اویتأ نیصفه شِه بٚمٚرده دریأ ور.
9 او روجٚ میأن، خوداوند، دونیأ اَسٚر تأ اوسٚرَ پأدیشأ بِه و آدمأن فقد اونَ پرستٚش کونٚده و اونَ خوداوند دأنٚده. 10 تومأمٚ سرزیمین جبع یوهودأ شومألی سأمأن سٚر جَا تأ رمونجونوبٚ سأمأن سٚر ایتأ پیله درندشتٚ صأرأیی بِه، ولی اورشلیم ایتأ بولندٚ جیگأ میأن مأنِه و اونٚ زیمین بنیامینٚ دروأزه جَا تأ قدیمی دروأزه جیگأ و جٚه اویَه تأ زأویه دروأزه و حنن‌ئیلٚ بورجٚ جَا تأ پأدیشأ چرخشتأنٚ جأجیگأ بِه. 11 اورشلیمٚ میأن آدمأن امنیت دورون سأکین بٚده و دِه هیوخت اوشأنَ جٚه بین شؤئؤنٚ خطر تهدید نوکونِه.
12 خوداوند اَ بلأیأنَ تومأمٚ او قومأنٚ سٚر اَوٚره کی اورشلیمٚ اَمرأ بٚجنگستٚده: اوشأنٚ جأن زٚنده زٚنده پؤخِه، اوشأنٚ چومأن خو کأسه میأن جٚه بین شِه و زوأن اوشأنٚ دٚهٚنٚ میأن خوشکَ بِه. 13 خوداوند اوشأنَ ایجور گیج و پریشأنَ کونِه کی کس‌کسٚ جأن دکفٚده. 14 تومأمٚ یوهودأ آدمأن اورشلیمٚ میأن جنگده و تومأمٚ همسأده قومأنٚ مأل و مینأل، جٚه طلأ ونوقره بیگیفته تأ اَشأنٚ رختأنَ چأپؤ کونٚده. 15 اَسبأن، قأطرأن، شوتورأن، اولأغأن و تومأمٚ البأقی حیوأنأنٚ سٚر کی دوشمنٚ اردوگأ میأن ایسأده هه بلأ اَیِه.
16 بأزون اوشأنی کی جٚه اَ بلأیأن کی کوشِه جیویز بٚدأده، هرتأ سألٚ میأن اَیٚده اورشلیمٚ میأن کی دونیأ پأدیشأ، یهوه صبایوتَ پرستٚش بوکونٚد و خیمه‌یأنٚ عَیدَ جشن بیگیرٚد. 17 اگه ایتأ قومأن او پأدیشأ ینی یهوه صبایوتٚ پرستِئنٚ رِه نأیٚه اورشلیم، خوشکی‌سأل میأن دکفِه. 18 اگه مصرٚ آدمأن نأیٚد جشنٚ میأن، خوداوند هو بلأیَ اوشأنٚ سٚر اَوٚره کی او قومأنٚ سٚر اَوٚره کی نأمؤده. 19 هنٚ وأسی، اگه مصر و البأقی قومأن نأیٚد، همٚتأن تِنبیه بٚده.
20 او روجٚ میأن حتّا اسبأنٚ زنگوله رویٚم بینیویشته بِه: «اَشأن خوداوندٚ موقدسٚ مأل و مینأل ایسٚد.» تومأمٚ خوداوندٚ خأنه ظرفأن کی خوردنی پٚچئن رِه ایسٚد او ظرفأنٚ مأنستَن کی مذبح ورجأ نٚهأ، موقدس ایسٚد. 21 رأس‌رأسِی هرتأ ظرف کی اورشلیم و یوهودأ میأن بیأفته بٚبه موقدس و فقد یهوه صبایوتٚ شین بِه. تومأمٚ اوشأنی کی پرستِئنٚ رِه اَیٚده خوشأنٚ قوربأنیأنٚ گوشتٚ پٚچئن رِه او ظرفٚ جَا ایستفأده کونٚده. او روجٚ میأن یهوه صبایوتٚ خأنه دورون، دِه تأجیرأنٚ جَا هیذره پأمأله نٚمأنِه.
Currently Selected:
زکریأ ۱۴: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org