متا ۱۴
۱۴
هیرودیسٚ پأدیشأ عذأب ویجدأن گیفتن
1 او وخت کی هیرودیس، جلیلٚ حأکیم، عیسا دروأره بشتأوسته، 2 خو موشأویرأنَ بوگفته: «شک نأرٚم، اَن هو یوحنا ایسه کی تعمید دٚئی کی زٚنده بوسته، و هنٚ وأسی ایسه کی تأنه اَجور موجیزه‌یأن انجأم بٚده.» 3 چونکی هیرودیس، هیرودیا وأسی، کی اونی برأر فیلیپُسٚ زن بو، یوحنایَ بیگیفته و زندأنٚ دورون زینجیلٚ اَمرأ دٚوٚستٚه بو، 4 جٚه اَ خأطر کی یوحنا هیرودیسَ گفتی: «شریعتٚ ولأنه کی تی برأر زنٚ اَمرأ عروسی بوکونی.» 5 هیرودیسٚم خأستی یوحنایَ بوکوشٚه، ولی مردومٚ شورش کودن جَا ترسِئی، چونکی اونَ پیغمبر دأنستیدی.
6 ولی هیرودیسٚ تولدٚ رِه، هیرودیا دؤختر ایجور رقص بوکوده کی هیرودیسَ خٚیلی خوشألَ کوده، 7 اوطؤ کی اونٚ رِه قسم بوخورده کی هر چی بٚخأیٚه، اونَ فأدٚه. 8 هیرودیا دؤخترم خو مأرٚ اَنتیریکٚ اَمرأ، بوگفته: «یوحنا کی تعمید دِهه سٚرَ، ایتأ موجمأ دورون، هَیه مٚرَه فأدن.»
9 پأدیشأ خو گبٚ جَا پٚشیمأنَ بوسته، ولی چونکی خو میهمأنأنٚ ورجأ قسم بوخورده بو، دستور بٚدأ اونٚ خأسته‌یَ انجأم بٚدٚد.
10 بأزین زندأنٚ دورون، یوحنا سٚرَ وأوِده، 11 ایتأ موجمأ دورون بأوٚردٚد و او کؤرَ فأدأده، دؤخترئکم اونَ ببرده خو مأرٚ ورجأ.
12 بأزون یوحنا شأگردأن بأمؤده و اونٚ جأنَ ببردٚد، بیگیلَ کودٚد. بأزین بوشؤده عیسا ورجأ، موضو‌یَ اونٚ رِه وأگویا بوکودٚد.
پنج هیزأر نفرَ غذأ دٚئن
13 او وخت کی عیسا اَ موضو‌یَ بٚفأمٚسته، ایتأ لوتکأ بینیشت و بوشؤ دورٚ جیگأ کی تنأ بٚبه. ولی مردوم کی بٚفأمٚستد عیسا کؤرأ شؤئؤندره، خٚیلی شهرأنٚ جَا پأ برأنده بوشؤده او طرف. 14 او وخت کی عیسا لوتکأ جَا بیجیر بأمؤ، ایتأ پیله جِمئیتَ بیدِه، و اونٚ دیل اوشأنٚ رِه بوسؤخته و او مریضأنَ کی جِمئیت میأن ایسأ بود، شفأ بٚدأ.
15 غروب دٚمٚ رِه، شأگردأن اونٚ ورجأ بأمؤده و بوگفتٚده: «اَ پٚرتٚ جیگأ میأن، خوردنٚ رِه هیچی نشأ یأفتٚن. هوأیٚم تأریکَ بوستأندره. پس مردومَ بوگو بٚشٚد اَ دؤرٚوٚرٚ دیهأتأن و خوشأنی رِه غذأ بیأفٚد.»
16 ولی عیسا بٚفرمأسته: «لأزیم نییٚه بٚشٚد. خودتأن اَشأنَ غذأ فأدید.»
17 جوأب بٚدأده: «اَمأن جغرز پنج‌تأ نأن و دوتأ مائی، هیچی نأریم!»
18 عیسا بٚفرمأسته: «اوشأنَ بأوٚرید می ورجأ!»
19 بأزین مردومَ بوگفته کی سبزه‌یأنٚ رو بینیشینٚد. بأزون پنج‌تأ نأن و دوتأ مأئی‌یَ اوسأد و آسمأنٚ ور فأندرست، برکت بٚدأ. بأزین هو چنتأ نأنَ نیصفَ کوده و خو شأگردأنَ فأدأ کی، فأدٚد مردومَ. 20 همه بوخوردٚد و سِئرَ بوستٚد و شأگردأن نأنٚ خورده‌یأنٚ جَا، دوأزده‌تأ پورَ بوسته بالٚکأ اوسأدٚد. 21 اوشأنی کی او روج، غذأ فأگیفتد، جغرز زنأکأن و زأکأن، حدودٚ پنج هیزأرتأ مردأی بود.
عیسا دریأچه سٚر رأ شِه
22 اونٚ پٚسی دفأتن، عیسا، ایصرأرٚ اَمرأ، خو شأگردأنٚ جَا بٚخأسته کی لوتکأ بینیشینٚد و بٚشٚد دریأچه او طرف، و خودش مردومٚ وئأشته کی بٚشد. 23 بأزون، تنأیی بوشؤ کوه دورون کی دوعأ بوکونٚه. شب دکفته و اون هنو اویَه تنأ بو. 24 هه زمأتٚ دورون، شأگردأن خوشکی جَا خٚیلی دورَ بوسته بود، دریأچه موجأنٚ میأن دکفتد، چونکی توندٚ بأد اَمؤیی و اَشأن موجأنٚ اَمرأ دٚکٚش فأکش کودأندوبود.
25 ولی نیزدیکٚ سه‌یٚ نیصفه شب، عیسا هوطؤ کی آبٚ سٚر دٚوأرٚستأندوبو، اوشأنَ نیزدیکَ بوسته. 26 اَشأن او وخت کی اونَ بیدِده کی آب سٚرٚ رأ شؤئؤندره، زهله بوکودٚد و ترسٚ جَا، ایجگٚره فأکٚشِئده کی «اَن روح ایسه». 27 ولی عیسا دفأتن اَشأنَ دؤخأده، بوگفته: «قوی بیبید! نوأترسِئنید! منم!»
28 پطرس جوأب بٚدأ: «آقأ جأن، اگه خودتی، بوگو کی منم آب سٚر رأ بٚشٚم و تی ورجأ بأیٚم.»
29 عیسا بٚفرمأسته: «خٚیلی خُب، بیأ!»
پطرس لوتکأ جَا بیرون بوشؤ و آب سٚر رأ دکفته، بوشؤ عیسا ور. 30 ولی او وخت کی دؤرٚوٚرَ فأندرست و بأدَ بیدِه، زهله بوکود و آبٚ دورون بیجیر بوشؤ. ایجگره فأکٚشه: «آقأ جأن، مٚرَه نیجأت بٚدٚن!»
31 عیسا فوری خو دٚسَ رأستَ کود و اونَ بیگیفت و بٚفرمأسته: «اَی کم ایمأن، چٚره شک بوکودی؟» 32 او وخت کی لوتکأ دورون بینیشتٚد، بأد بئیسأ. 33 بأزین اوشأنی کی لوتکأ دورون ایسأ بود، اونَ پرستٚش بوکودٚد، قأقَ بوستٚده و بوگفتٚده: «رأس‌رأسِی کی تو خودا پٚسری.»
34 او وخت کی دریأچه اوطرف فأرٚسِئده، جنیسارتٚ سأحیلٚ دورون لوتکأ جَا بیجیر بأمؤده. 35 هطؤ کی مردوم عیسا‌یَ بشنأختٚد، اونٚ اَمؤنٚ خٚوٚرَ همه جأ پٚخشَ کودٚد، پور زمأت نوبوسته کی مردوم خوشأنٚ مریضأنَ بأوٚردٚد کی شفأ بیأفٚد. 36 اوشأن اونَ مینّت کودیدی کی نأخوشأنَ وئأله کی، اونٚ لیوأسٚ پٚره‌یَ دٚس بٚزٚنٚد؛ و هر کی اونَ دٚس زِئی، شفأ یأفتی.
Currently Selected:
متا ۱۴: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org