لوقا ۹
۹
عیسا دوأزده‌تأ شأگردٚ مأموریت
1 ایتأ روج، عیسا خو دوأزده‌تأ شأگردَ دؤخأد و اوشأنَ قودرت و ایختیأر فأدأ کی پٚلیدٚ روحأنَ آزأریأنٚ جَا بیرونٚ کونٚد و مریضأنَ شفأ بٚدٚد. 2 بأزون، اوشأنَ اوسه کوده کی خودا پأدیشأیی فأرٚسِئنَ مردومٚ رِه وأگویا بوکونٚد و مریضأنَ شفأ بٚدٚد.
3 قبل اَنکی رأ دکفد، عیسا اوشأنَ بٚفرمأسته: «اَ سٚفرٚ میأن هیچی شیمی اَمرأ نٚبٚرید، نه دٚسٚ چؤ، نه بوغچه، نه خوردنی، نه پول و نه ایضأفی لیوأس. 4 هرتأ خأنه میأنی کی بوشؤئید، تأ او زمأت کی اویَه ایسأیید، هو خأنه میأن بئیسید. 5 اگه هرتأ شهرٚ آدمأن شیمی گبأنَ نشتأوستٚد، او شهر بیرون شؤئؤنٚ زمأت، حتّا او شهرٚ خأکم شیمی پأیأنٚ جَا فلأکأنید کی ایتأ شهأدت اوشأنی ضد بٚبه.»
6 بأزین شأگردأن اَ شهر او شهر و اَ دیهأت او دیهأت گردٚستأندوبود و اینجیلٚ خٚوٚرَ، مردومَ فأرسأنِندوبود و نأخوشأنَ شفأ دِئندوبود.
یوحنا مرگ
7 او وخت کی هیرودیس، جلیلٚ فرمأندأر، عیسا موجیزه‌یأنٚ خٚوٚرَ بشتأوسته، بٚتٚرسه و قأقٚ بوسته چونکی بعضیأن عیسا جَا گفتأندوبود کی اون هو یوحنایه کی تعمید دٚئی کی زٚنده بوسته. 8 بعضیأنم گفتأندوبود کی اون هو ایلیا ایسه کی دووأره بأمؤ یا کی ایتأ جٚه قبلی پیغمبرأنٚ کی زٚنده بوسته.
9 امّا هیرودیس گفتی: «من یوحنا سٚرَ خودم وأوِم! پس اَن دِه کیسه کی اَ جوروأجور مأجیرأیأن اونی جَا ایشتأوٚم؟» و اون حقٚ سعی زِئی کی عیسایَ بیدینه.
پنج هیزأرتأ مردأکٚ غذأ دٚئن
10 ایپچه کی بوبوسته، روسولأن وأگردٚستٚد و عیسایَ جٚه اونچی کی انجأم بٚدأ بود، وأخٚوٚرٚ کودٚد. بأزون عیسا اَشأنٚ اَمرأ بی اَنکی مردوم اَشأنَ بیدینٚد، بوشؤ بیت صیدا شهر. 11 امّا خٚیلی جٚه مردوم اونی کؤیَه ایسأنٚ جَا وأخبدأرٚ بوستٚد و اونی دونبألسر رأ دکفتد. عیسایٚم اوشأنَ دیمٚ خوشٚ اَمرأ قوبیل بوکوده و ایوأردِه خودا پأدیشأیی‌یَ اوشأنَ بأمؤخته و نأخوشأنَ شفأ بٚدأ.
12 غروب دٚم رِه، عیسا دوأزده‌تأ شأگرد اونی ورجأ بأمؤده و بوگفتد: «مردومَ اوسه کون بٚشٚد اَ دؤرٚوٚر دیهأت و مزرعه‌یأنٚ میأن کی خوردنی و ایتأ سٚرپنأ بیأفٚد چونکی اَ بیأبأنٚ میأن ایچی خوردنٚ رِه نٚنَه.»
13 عیسا جوأب بٚدأ: «شومأن خودتأن اَشأنَ خوردنی فأدید!»
شأگردأن مأتٚ بوستٚد و بوگفتد: «چوطؤ؟ اَمأن حتّا خودمأنٚ رِه جغرز پنج‌تأ نأن و دونه مائی ایچی نأریم! شأیدٚم خأیی بیشیم تومأمٚ اَ جِمئیت رِه خوردنی بیهینیم؟» 14 فقد مردأکأن او جِمئیت میأن پنج هیزأر نفر بود.
بأزون، عیسا بٚفرمأسته: «مردومَ بیگید پنجأه نفر پنجأه نفر زیمین سٚر بینیشینٚد.» 15 شأگردأن همٚتأنَ بینیشأنِئدٚد.
16 عیسا هو پنج تأ نأن و دونه مأئی‌یَ اوسأد و آسمأنٚ ور فأندرسته، برکت بٚدأ. بأزون نأنأنَ تکس‌تکسٚ کوده و شأگردأنَ فأدأ کی مردومٚ میأن سأم بوکوند. 17 همٚتأن بوخوردٚد و سِئرٚ بوستٚد و شأگردأن جٚه نأنٚ خورده‌یأن دوأزده‌تأ زیبیل جمَ کودٚد و اوسأدٚد.
پطرسٚ ایعتقاد، عیسا دروأره
18 ایتأ روج، عیسا تنأیی دوعأ کودأندوبو، اونی شأگردأن اونی ورجأ بأمؤده و اون، اوشأنی جَا وأوٚرسِه: «مردوم فیکر کونٚد کی من کیسٚم؟»
19 جوأب بٚدأده: «بعضیأن گده کی یوحنا ایسی کی تعمید دٚئی؛ ای عیده گده ایلیا و یا ایتأ جٚه قدیمی پِیغمبرأن ایسی کی زٚنده بوسته!»
20 بأزون اوشأنی جَا وأوٚرسِه: «شومأن چی؟ شومأن مٚرَه کی دأنید؟»
پطرس جوأب بٚدأ: «تو خودا مسیح ایسی!»
عیسا خو مٚردنٚ جٚه پیشتر گه
21 امّا عیسا اوشأنَ تأکید بوکوده کی اَ موضو‌یَ هیکسٚ رِه نٚگد. 22 بأزین، اوشأنَ بٚفرمأسته: «لأزیم ایسه اینسأنٚ پٚسر خٚیلی عذأب بٚکٚشه و رهبرأن و پیله کأهینأن و دینٚ عألیمأن اونَ محکوم بوکوده، کوشٚده، امّا اون سیومی روج رِه زٚنده به!»
23 بأزون، همٚتأنَ بٚفرمأسته: «اگه هر کی جٚه شومأن بٚخأیٚه می جَا ایطأعت بوکونه وأستی خودشٚ خأسته‌یأنَ بٚنه کنأر و هر روج خو صلیبَ خو چأن بٚنه و می دونبألسر بأیٚه.» 24 هرکی بٚخأیٚه خو جأنَ نیجأت بٚدأ، اونَ جٚه دٚس دِهه؛ امّا هر کی خو جأنَ می وأسی جٚه دٚس بٚدأ، اونَ نیجأت دِهه. 25 چی فأیده دأره کی اینسأن تومأمٚ دونیأیَ بٚدأره، امّا خو جأنَ جٚه دٚس بٚده یا کی بأطیلَ کونه؟
26 «و اگه اینفر می جَا و می گبأنٚ جَا شرم بٚدأره، اینسأنٚ پٚسر او وخت کی خو جلال و پئرٚ جلالٚ میأن موقدسٚ فٚرٚشته‌یأنٚ اَمرأ وأگرده، اونی جَا شرم اوسأنه. 27 امّا اَنٚ قوبیل بٚدأرید اَیَه ایتأ عیده ایسأده تأ خودا پأدیشأیی‌یَ نیدینٚد، نیمیرٚده.»
شأگردأن مسیح جلالَ دینده
28 اَ گبأنٚ هشت روج بوستنٚ پٚسی، عیسا، پطرس و یعقوب و یوحنایَ اوسأده و ایتأ کوه جؤر بوشؤ کی دوعأ بوکونه. 29 دوعأ وخت، ایوأرکی عیسا دیم سوسو بٚزِه و اونی لیوأس، سیفیدی جَا چومَ گیفتی. 30 نأخٚوٚرکی، دوتأ مردأی ینی موسا و ایلیا ظأهیرٚ بوستٚد و عیسا اَمرأ شورو بوکودٚد گب زِئن. 31 اوشأنی ظأهیر شوکو جَا پور بو. اوشأن، عیسا جٚه اَ دونیأ شؤئؤنٚ وأسی بوگو بشتأو کودأندوبود، کأری کی قرأر بو اورشلیمٚ میأن ایتفأق دکفه.
32 امّا هو وخت رِه، پطرس و اوشأنی کی اونی اَمرأ ایسأ بود، خأب بٚسٚرَ شؤ. او وخت کی خأبٚ جَا ویریشتٚد، عیسا و او دوتأ مردأکٚ نور و جلالٚ جَا غرقٚ بوسته بیدِ‌ده. 33 هو وخت کی موسا و ایلیا جٚه اویَه شؤئؤندوبود، پطرس کی هُلَ کوده بو و نأنستی چی گوفتأندٚره، عیسایَ بوگفته: «اوستأد، چی خُبه کی اَمأن اَیَه ایسأییم! وئأل سه‌تأ سایبأن چأکونیم، ایتأ تِرِه، ایتأ موسا رِه، ایتأیٚم ایلیا رِه.»
34 هنو پطرسٚ گبأن تومأنٚ نوبوسته بو، ایتأ اَبر کی نورٚ جَا شبق زِئی بیرون بأمؤ و او وخت کی اوشأنٚ رو سأیه تأوٚدأ، شأگردأنٚ ترسَ گیفته. 35 بأزون اَبرٚ جَا ایتأ صدا بأمؤ کی: «اَن می پٚسرٚ کی اونَ اینتخأب بوکودم؛ اونی گبأنَ بشتأوید!»
36 او وخت کی صدا تومأنٚ بوسته، بٚفأمٚستد کی عیسا تنأیه. اوشأن خٚیلی زمأتٚ رِه اَ مأجیرأیَ کسی رِه نوگفتٚد.
ایتأ غشی پٚسرِیکٚ شفأ گیفتن
37 ای روج بعد، او وخت کی جٚه تپّه جؤر بیجیر اَمؤندوبود، ایتأ پیله جِمئیت اَمرأ رودٚررو بوبوستٚد. 38 نأخٚوٚرکی ایتأ مردأی جِمئیت میأن ایجگره بٚزِه: «اوستأد، ایلتیمأس کونم می پٚسر کی می ایدأنه زأکَ لوطف بوکونی، 39 چونکی ایتأ پٚلیدٚ روح مودأم اونی دورون شِه و اونَ وأدأرِه کی ایجگره بٚزٚنه. اَ پٚلیدٚ روح اونی جأنَ پرکأنه، جوری کی اونی دٚهٚن کخ کونه. اون همیشٚک می پٚسرَ فوتورکه و خٚیلی سخت اونَ وِلٚ کونه. 40 تی شأگردأنٚ جَا بخأستٚم کی اَ روحَ می پٚسرٚ جَا فٚرأنٚد امّا نٚتأنٚستٚد.»
41 عیسا بٚفرمأسته: «اَی بی‌ایمأن و نأفرمأنٚ مردوم! اَ کی وأستی شیمی اَمرأ بئیسم و شیمی کردکأرأنَ تحمول بوکونم؟ تی پٚسرَ می ورجأ بأوٚر!»
42 هو زمأت کی او پٚسرِیکٚ اَوردأندوبود، پٚلیدٚ روح اونَ قأیم بٚپٚرکأنه فوکوبأنه زیمینٚ سٚر. پٚسری پرکنأش زِئی و اونی دٚهٚن کخ کودی. امّا عیسا پٚلیدٚ روحٚ سٚر، ایجگره بٚزِه و رِیکَ شفأ بٚدأ و اونی پئرَ بیسپأرده. 43 مردوم همّه خودا قودرت جَا قأقٚ بوسته بود.
عیسا ایوأردِه خو مٚردنَ جٚه قبل اعلام کونه
هطؤ کی همه قأقأنٚ مأنستَن عیسا عجأیبٚ کأرأنٚ جَا تعریف کودأندوبود، اون خو شأگردأنَ بٚفرمأسته: 44 «اونچی‌یَ کی گم، خُب بشتأوید، اینسأنٚ پٚسرَ مردومٚ دٚس تسلیم کونٚده.» 45 امّا شأگردأن اونی منظورٚ نفأمأستٚد، چونکی اوشأن فیکرأن کورٚ بوسته و ترسئید جٚه اَ مأجیرأ ایچی وأوٚرسید.
کی همٚتأنٚ جَا پیله تٚرَه؟
46 بأزین، عیسا شأگردأن میأن ایختلأف دکفته کی جٚه اَشأنٚ میأن کویتأ پیله‌تر ایسه! 47 عیسا کی بٚفأمٚسته اوشأنی فیکرأنٚ میأن چی دٚره، ایتأ زأکَ خو ورجأ دؤخأد 48 و اوشأنَ بٚفرمأسته: «هرکی می وأسی اَ زأکَ قوبیل بوکونه، مٚرَه قوبیل بوکوده و هر کی مٚرَه قوبیل بوکونه، اونی کی مٚرَه اوسه کوده‌یَ، قوبیل بوکوده. چونکی شیمی میأن اونی پیله‌تر ایسه کی کوجه‌دأنه بٚبه.»
عیسا ایسمٚ زوأنٚ سٚر اَوٚردٚن
49 یوحنا، اونَ بوگفته: «اوستأد، ایتأ مردأکَ بیدِییم کی تی نأم اَمرأ پٚلیدٚ روحأنَ مردومٚ جَا بیرونٚ کودی امّا اَمأن اونَ بوگفتیم: اَ کأرَ نوکونه چونکی جٚه اَمی دسته شین نوبو.»
50 عیسا بوگفته: «اونی مأنع نیبید، چونکی کسی کی شیمی ضد نٚبه، شیمی اَمرأ ایسه.»
عیسا بوشؤ اورشلیم ور
51 هو وخت کی عیسا وأگردٚستن آسمأنٚ ور فأرٚسئندوبود، قأیم تصمیم بیگیفته و بوشؤ اورشلیم ور. 52 اون چن نفرَ پیشتر اوسه کوده ایتأ او دیهأتأنٚ جَا کی سأمریأن اویَه نیشته بود، ایتأ جأجیگأ اوشأنٚ ایسأنٚ رِه آمأدَه کونٚد. 53 امّا او دیهأتٚ آدمأن، اوشأنَ قوبیل نوکودٚد چونکی دأنستید شؤئندرٚد اورشلیم. (سأمریأن و یوهودیأن، ایتأ قدیمی دوشمنی کس‌کسٚ اَمرأ دأشتید.)
54 او وخت کی اوشأنی کی اوسه کوده بو وأگردٚستٚد و اَ خٚوٚرَ بأوٚردٚد، یعقوب و یوحنا عیسایَ بوگفتد: «اوستأد، آیا خأیی خودا جَا بخأییم کی آسمأنٚ جَا ایتأ آتٚش اوسه کونه و اوشأنَ جٚه بین ببره، هوطؤ کی ایلیا بوکود؟» 55 امّا عیسا اوشأنَ شمأتٚت بوکود.#۹:۵۵ بعضی نیویشته‌یأن اَ جومله‌یَ ایضأفه کونٚده «و بوگفته شومأن نأنید جٚه کویتأ روح ایسید چونکی اینسأنٚ پٚسر نأمؤ کی مردومٚ جأنَ فأگیره بلکی نیجأت بٚده.». 56 اونی وأسی جٚه اویَه بوشؤده ایتأ دِه دیهأتٚ میأن.
عیسا جَا ایطأعت کودنٚ تأوأنَ دٚئن
57 رأ میأن، اینفر عیسایَ بوگفته: «هرجأ بیشی، تی دونبألسر اَیٚم.»
58 امّا عیسا اونَ بوگفته: «روباهأن خوشأنٚ رِه لأنه دأرٚد و پرنده‌یأن هم، فک بٚنأ دأرٚد؛ امّا اینسأنٚ پٚسر، #۹:۵۸ «اینسأنٚ پٚسر» ایتأ لقب ایسه کی عیسا خؤرَه بٚکأر بردی.جأیی نأرِه کی حتّا خو سٚرَ اویَه بٚنه.»
59 ایوأرٚم اون اینفرَ دعوت بوکوده کی اونی دونبألسر بأیٚه. اون بوگفته: «آقأ جأن، مٚرَه وئأل اوّل وأگردم بٚخأنه و می پئرَ بیگیلَ کونم.» 60 عیسا اونَ بوگفته: «وئأل بمرده‌یأن، خوشأنی مورده‌یأنَ بیگیلَ کونٚد. تی وظیفه اَنٚ کی بأیی و خودا پأدیشأیی خوروم خٚوٚرَ همٚتأ جیگأ وأگویا بوکونی.»
61 اینفر دِه عیسایَ بوگفته: «خوداوندا، من حأضیرٚم تی دونبألسر بأیٚم. امّا وئأل اوّل بشم می خأنوأرٚ اَمرأ خوداحافظی بوکونم!»
62 عیسا اونَ بٚفرمأسته: «کسی کی شوخم زِئنٚ سٚر گیفتنٚ پٚسی، وأگرده خو سٚرٚ پوشته فأندٚره، خودا پأدیشأیی میأن خیدمت کودنٚ رِه لیأقت نأرِه!»
Currently Selected:
لوقا ۹: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran