لوقا ۵
۵
عیسا اوّلی شأگردأن
1 ایتأ روج عیسا جنیسارتٚ روخأنٚ ورجأ ایسأ بو و آدمأن جٚه هر سمتی اونی ورجأ هوجوم بأوٚردٚد کی خودا کلامٚ بشتأوٚد. 2 بأزون، عیسا دونه خألی لوتکأیَ روخأنٚ سأحیلٚ ورجأ بیدِه کی مألیأن اوشأنی جَا بیرون بأمؤده و خوشأنی مأشکأنَ پأکَ کودٚد. 3 پس ایتأ اَ لوتکأیأنٚ دورونی بینیشته و شمعونٚ کی او لوتکأ صأب بویَ بٚفرمأسته کی ایپچه جٚه سأحیلٚ دورَ بو کی اونٚ دورونی بینیشینه، جٚه اویَه مردومَ بأموجه.
4 او وخت کی اونی گبأن تومأنٚ بوسته، شمعونٚ بٚفرمأسته: «اَسه لوتکأیَ ببر دریأ جولفٚ جیگأ و شیمی مأشکأنَ آبٚ میأن تأوٚدید کی کلّی مائی بیگیرید!»
5 شمعون اونٚ جوأبٚ بٚدأ و بوگفته: «اوستأد، دیشب خٚیلی حقٚ سعی بٚزِئیم، امّا ایچی نیگیفتیم، امّا اَسه تی فرمأنٚ اَمرأ، ایوأردِه مأشکأنَ تأوٚدم!»
6 اَیدٚفأ اَنقد مائی بیگیفتٚد کی نیزدیک بو مأشکأن پأرَه بد! 7 اونٚ وأسی خو همکأرأنَ ایتأ لوتکأ دِه جأ بٚخأسته کی اونَ یاور بٚبٚد. اَندر نوگذشته بو کی دونه لوتکأ مائی جَا پورَ بوسته، اوجوری کی نیزدیک بو غرقَ بد!
8 او وخت کی شمعونٚ پطرس وأخبدأر بوبوسته و بٚفأمٚسته کی چی موجیزه‌یی ایتفأق دکفته، عیسا جولو چأر زانو بٚزِه و بوگفته: «اَی می سٚروٚر، می جَا دورٚ بو، چونکی من خٚیلی گونأکأرٚم و نتأنٚم تی ورجأ بئیسٚم.» 9 اون و اونی همکأرأن او میقدأر مائی گیفتنٚ وأسی خٚیلی بترسئید. 10 اونی همکأرأن، یعقوب و یوحنا، زبدیٚ پٚسرأنم هو حألٚ دأشتید. عیسا پطرسٚ بٚفرمأسته: «نوأترسئن! بأزون، مردومَ خودا رِه بٚدأم تأوٚدی!»
11 او وخت کی فأرٚسِیید خوشکی، فوری هرچی دأشتٚد، وِلَ کودٚد و عیسا دونبألسر رأ دکفتد.
عیسا ایتأ جوذأمی‌یَ شفأ دِهه
12 ایتأ روج، عیسا ایتأ شهرأنٚ میأن ایسأبو کی ایتأ جوذأمی اونٚ بیدِه و اونی پأ جیر زیمین رو بٚکفته و بوگفته: «اَی می سٚروٚر، اگه تو بٚخأیی، تأنی مٚرَه شفأ بٚدی و پأکَ کونی.»
13 عیسا خو دٚس رأستَ کوده و اونی رو بٚنأ و بٚفرمأسته: «پس چی کی خأیم؛ خُبٚ بو!» هو وخت، اونی جوذأم جٚه بین بوشؤ!
14 عیسا اونٚ بٚفرمأسته: «اَ مأجیرأیَ هیکسٚ اَمرأ وأگویا نوأکودٚن، بلکی بوشو کأهینٚ ورجأ کی تٚرَه موعأینه بوکونه. هو قوربأنی کی موسا جوذأمیأنٚ رِه کی خُبٚ بٚدأ موشخص بوکوده، خودتٚ اَمرأ ببر کی ثأبیت بٚبه شفأ بیأفتی.»
15 عیسا کأرأن، روج به روج ویشتر مردومٚ زوأنأنٚ رو چرخٚستی و همٚتأن دسته دسته اَمؤییدی کی اونَ پیغأمَ بشتأوٚد و خوشأنی بیمأریأنٚ جَا شفأ بیأفٚد.
16 امّا عیسا دوعأ کودنٚ وأسی ویشترٚ وختأن دورٚ جأجیگأ و جٚه شهر بیرون شؤئی.
چولأقٚ مردأکٚ شفأ گیفتن
17 ایتأ روج، عیسا ایتأ خأنه میأن موشغولٚ مردومٚ بأمؤختٚن بو. ایتأ عیده جٚه کأهینأن و فریسیأن جٚه اورشلیم و جلیل و یوهودیه شهرأن اویَه ایسأبید. او وضعیتٚ دورونی عیسا، خودا قودرتٚ اَمرأ مریضأنَ شفأ دٚیی.
18 هو میأنی، چن نفر بأمؤده و ایتأ چولأقٚ مردأکٚ ایتأ دوشک رو خوشأنٚ اَمرأ بأوٚردٚد. اوشأن حقٚ سعی بٚزِد کی خوشأنٚ جٚه هو جِمئیتی کی خأنه میأن ایسأبید، بأوٚرٚد عیسا ورجأ. 19 امّا چونکی اویَه پور جٚه جِمئیت بو اَ کأرَ نٚتأنٚستٚد انجأم بٚدٚد، پوشتٚ‌بأمٚ جؤر بوشؤئید و بعضی جٚه سٚخفٚ سوفألأنَ اوسأدٚد و او چولأقَ اونی دوشکٚ اَمرأ اوسه کودٚد بیجیر و جِمئیتٚ میأن، عیسا جولو بنأیید.
20 او وخت کی عیسا اوشأنی ایمأنَ بیدِه، او چولأقٚ مردأکٚ بٚفرمأسته: «اَی مردأی، تی گونأیأن بٚبخشه بوبوسته!»
21 فریسیأن و کأهینأن کی اویَه ایسأبید، خوشأنی اَمرأ فیکر بوکودٚد: «چی کوفری! اَ مردأی خؤرَه کی دأنه؟ جٚه غیرٚ خودا کی تأنه اینسأنٚ گونأیأنَ بٚبخشه؟»
22 عیسا فوری اوشأنی فیکرأنٚ جَا وأخبدأرٚ بوسته و بٚفرمأسته: «چٚره شیمی دیلٚ میأن اَجور فیکر کونید؟ 23 کویتأ رأحتتر ایسه؟ اَنکی بٚگم تی گونأیأن بٚبخشه بوبوسته یا کی بٚگم ویریز و رأ بوشو؟ 24 پس اَسه شٚمٚره ثأبیت کونم کی اینسأنٚ پٚسر#۵:۲۴ «اینسأنٚ پٚسر» ایتأ لقب ایسه کی عیسا خؤرَه ایستفأده کودی. اَ دونیأ دورون، قودرت دأره گونأیأنٚ بٚبخشه.» بأزون وأگردسته چولأقٚ مردأکٚ ور و بوگفته: «ویریز و تی جأیَ جمَ کون و بوشو بٚخأنه!»
25 او مردأی همٚتأنٚ چومأنٚ جولو، فوری جٚه خو جأ سٚر ویریشته، خو رختخأبٚ اوسأده و بأزین هوطؤ کی خودایَ شوکر کودی، بوشؤ بٚخأنه. 26 آدمأن همٚتأن قأقَ بوستٚد. اوشأن ترسی کی ایحترأمٚ اَمرأ بو خودایَ شوکر بوکودٚد و بوگفتٚده: «اَ ایمرو، اَمأن ای سری عجیبٚ غریبٚ مأجیرأیأنٚ شأهید بیم!»
ایتأ بأج فأگیر عیسا شأگرد بِه
27 بأزون، او وخت کی عیسا شهرٚ جَا خأرجٚ بوسته، ایتأ بأج فأگیرَ بیدِه کی خو محلٚ کأرٚ جأ نیشته بو. اونی ایسم، لاوی بو. عیسا اونٚ بٚفرمأسته: «می دونبألسر بیأ و می جَا ایطأعت بوکون!»
28 هو وخت، لاوی همه چی‌یَ وِلَ کوده و عیسا دونبألسر رأ دکفته.
29 دونبألتر، لاوی خو خأنه میأن ایتأ پیله میهمأنی عیسا وأسی رأ تأوٚدأ. چنتأ جٚه او بأج فأگیرٚ همکأرأن و البأقی میهمأنأنٚم دعوت بید.
30 امّا فریسیأن و کأهینأنی کی اوشأنی اَمرأ بید، عیسا شأگردأنٚ ورجأ بوشؤده، شورو بوکودٚد گله و شیکأیت کودن و بوگفتٚده: «چٚره شومأن اَ پٚستٚ آدمأنٚ#۵:۳۰ یونأنی: نوزول خورأن و گونأکأرأنٚ اَمرأ. اَمرأ خوردأندرید و وأخوردأندرید؟»
31 عیسا اوشأنی جوأب دٚئنٚ وأسی بوگفته: «مریضأن، طٚبیب نیأز دأرٚد، نه سألیمأن! 32 من بأمؤم کی گونأکأرأنٚ جَا بخأیٚم کی توبه بوکونٚد، نه اوشأنی کی خوشأنٚ عأدیل دأنیدی!»
ایتأ سؤال دروأر‌ه‌یٚ روزه
33 ایوأر عیسایَ بوگفتد: «یوحنا شأگردأن ویشترٚ وختأن روزه گیرده و دوعأ کونٚده. فریسیأنٚ شأگردأنٚم هطؤ. امّا تی شأگردأن، همیشٚک بوخور وأخورٚ جَا موشغولده؟»
34 عیسا اوشأنی جوأب دئنٚ وأسی، اوشأنی جَا وأوٚرسِه: «آیا ایتأ عروسی میهمأنی میأن تأ او وخت کی زأمأ اویَه ایسأ تأنید میهمأنأنٚ وأدأرید روزه بٚدأرٚد؟ 35 امّا او زمأتی فأرٚسِه کی زأمأیَ اوشأنٚ جَا فأگیرده، هو زمأتٚ میأن روزه گیرده.»
36 بأزون، عیسا ایتأ مٚثٚل اوشأنی رِه بأوٚرده و بوگفته: «هیکس ایتأ تأزه لیوأسَ، تکٚس تکٚس نوکونه کی اونی تیکه پأرچه‌یَ ایتأ کُئنه لیوأسٚ سٚر پینیک بٚزٚنه، چونکی هم هو تأزه لیوأس جٚه بین شِه و هم هو کُئنه لیوأسٚ سولأخ، تأزه وصله جَا خرأبتٚرَ بِه. 37 هطؤیٚم هیکس تأزه شرأبَ، کُئنه موشکٚ میأن دونکونه، چونکی تأزه شرأب، کُئنه موشکأنٚ پأرَه کونه، بأزون هم شرأب فیوِه و هم موشکأن جٚه بین شٚد. 38 تأزه شرأبٚ وأستی تأزه موشکٚ میأن دوکودن. 39 امّا کُئنه شرأبٚ سرأکشئنٚ پٚسی، هیکس میلی نأرِه کی تأزه شرأبٚ سرأکشٚه، چونکی گه کُئنه شرأب بِیتره.»
Currently Selected:
لوقا ۵: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org