لوقا ۱۱
۱۱
عیسا، دوعأ کودنَ خو شأگردأنَ آموجه
1 ایتأ روج، عیسا دوعأ کودنٚ رِه موشغول بو. او وخت کی اونی دوعأ تومأنٚ بوسته، ایتأ جٚه اونی شأگردأن اونَ بوگفته: «خوداوندا، هطؤ کی یوحنا خو شأگردأنَ دوعأ کودنَ بأمؤخته، تویٚم اَمٚرَه بأموج.»
2 عیسا اوشأنَ بوگفته کی اَطؤ دوعأ بوکوند:
«اَی پئر، تی نأم موقدس بٚبه.
تی پأدیشأیی بأیٚه.
3 اَمی روجٚ نأنَ هر روج اَمٚرَه فأدن.
4 اَمی گونأیأنَ بٚبٚخش، هطؤ کی اَمأن هم اوشأنی‌یَ کی اَمٚرَه بٚدی کونٚده، بٚخشیمی.
و ولأن وسوسه‌یأن میأن اسیرَ بیم.»
5 بأزین عیسا دوعأ کودنٚ وأسی خو آمؤختٚنَ ایدأمه بٚدأ و بٚفرمأسته: «فرض بوکونید ایتأ ریفِق دأرید کی نیصفٚ شب اونی خأنه دٚرٚ زٚنید و گیدی اَی ریفِق، سه‌تأ گردٚ نأن مٚرَه قرضٚ دئن، 6 چونکی ایتأ جٚه می ریفِقأن هسأ جٚه سٚفر بأمؤ می ورجأ و خوردنٚ رِه ایچی نأرٚم کی اونَ فأدٚم. 7 اون جٚه خو خأنه میأن جوأب دِهه کی خو زأکأنٚ اَمرأ خوفته و نتأنه ویریزه کی شٚمٚره نأن فأده.
8 «شٚمٚره گم کی حتّا اگه رِیفأقتٚ وأسییٚم خو جأ سٚر وینریزه و شٚمٚره نأن فأندِه، امّا اگه در زِئنَ درأزه بدید، ویریزه و اونچی‌یَ کی بٚخأیید، شٚمٚره فأده، نوکونه کی اونی آبرو بشه.
9 «پس شٚمٚره گم، بٚخأیید کی شٚمٚره فأدأ بٚبه؛ وأموجید کی بیأفید؛ بوکؤبید کی در شیمی ور وأزَ به. 10 چونکی هرکی بٚخأیٚه، به دٚس اَوٚره و هرکی وأموجه، اونَ یأفه و هرکی بوکؤبه، در اونی رو وأزَ به.»
11 «شومأن پئرأنٚ جَا کویتأ، اگه اونی زأی مائی بٚخأیٚه اونَ لأنتی فأده؟ 12 یا کی مورغأنه بٚخأیٚه، اونَ عقرٚب فأده؟ ایمکأن نأرِه!»
13 «پس اگه کی شومأن، گونأکأرٚ آدمأن، دأنید کی وأستی خوروم چیأنَ شیمی زأکأنَ فأدید، چنقذر ویشتر شیمی آسمأنی پئر اوشأنی‌یَ کی اونی جَا بخأیٚد، روح‌القدسَ بخشه.»
عیسایَ بُهتأن زِئن
14 ایتأ روج عیسا ایتأ پٚلیدٚ روحَ ایتأ لالٚ مردأکٚ جَا بیرونٚ کود و اونی زوأن وأزَ بوست. اوشأنی کی اَ مأجیرأیَ بیدِده، خٚیلی قأقٚ بوستد و هیجأن بأمؤد. 15 امّا ای عیده جٚه اوشأن بوگفتد: «اون پٚلیدٚ روحأنَ شیطان #۱۱:۱۵ یونأنی: بعلزبول.ایقتدأر اَمرأ، کی پٚلیدٚ روحأنٚ پیله کس ایسه بیرونٚ کونه.» 16 ایتأ عیده دِه اونی جَا بٚخأستٚد کی ایتأ نیشأنه آسمأنٚ جَا اوشأنَ نیشأن بٚدأ کی خو ایقتدأرَ ایثبأت بوکونه.
17 عیسا اوشأنی فیکر جَا وأخبدأرٚ بوسته و بٚفرمأسته: «هر تأ مملکت کی اونی میأن خأنه جنگ بٚبه، اونٚ جٚه بین شؤئؤن حتمی ایسه و هرتأ خأنه هم کی اونی میأن دوشمٚنيأن وأسی کس‌کسٚ جَا سیوأ بٚبٚد، جٚه هم فوگورده. 18 شومأن گیدی شیطان مٚرَه قودرت فأدأ کی پٚلیدٚ روحأنَ بیرون تأوٚدم. امّا اگه شیطان خو ضد سیوأ بٚبه، خودشٚ اَمرأ جنگ کونه، آخرپٚسی اونی حوکومت چوطؤ تأنه بٚپأ بئیسه؟ 19 و اگه می قودرت شیطانٚ جَا بٚبه، شیمی شأگردأنٚ تکلیف چی وأ بٚبه، چونکی اوشأنٚم پٚلیدٚ روحأنَ بیرونٚ کونٚد؟ جٚه اَ خأطر، اَشأن شٚمٚره اَ گبٚ وأسی کی بٚزِئید، محکوم کونٚده! 20 امّا اگه من خودا قودرتٚ اَمرأ پٚلیدٚ روحأنَ بیرون تأوٚدم، پس بدأنید کی خودا پأدیشأیی شیمی میأن بأمؤ. 21 چونکی او وخت کی اینفر شیطانٚ مأنستَن، نیرومٚندٚ آدم کی سلاح دأره، خو قصرٚ جَا موحأفیظت کونه، اونی مأل و مینأل در اَمأن مأنه 22 کی اینفر جٚه اونی جَا پور زور و قوّتتر اونَ فوتورکه و اونی جَا پیروزٚ به و اونی سلاحَ فأگیره و اونی مأل مینألَ غأرٚت کونه.
23 «هرکی می اَمرأ نٚبه، می ضد ایسه و هرکی می اَمرأ کأر نوکونه، می ضد کأر کودأندٚره.»
24 «او وخت کی ایتأ پٚلیدٚ روح اینفرَ نِهِه شِه، خوشک و بی آبٚ صأرأیأن میأن شِه کی ایسترأحت بوکونه. امّا چونکی خوروم جأجیگأ نیأفه، خو اَمرأ گه "وأگردم اونی میأن کی اونی جَا بیرون بأمؤ بوم". 25 پس وأگرده و دینه کی خو قبلی خأنه جأرو بوبوسته و مورتّبه. 26 بأزون هفتأ دِه روح خودشٚ جَا پٚلیدترَ یأفه و او آدمٚ میأن شٚده و اویَه زٚندیگی کونٚده. اَطؤیی، او آدم وضع جٚه قبل بدتٚرٚ به.»
27 اَ گبأن هنو عیسا زوأنٚ رو چٚرخٚستٚندوبو کی ایتأ زنأی او جِمئیت میأن بولندٚ صدا اَمرأ بوگفته: «خوشبحألٚ او مأری کی تٚرَه بودونیأ بأوٚرده و شیر بٚدأ!»
28 عیسا اونی جوأب دٚئنٚ وأسی بٚفرمأسته: «امّا خوشبختتر اونی ایسه کی خودا کلامَ ایشتأوه و اونَ عمل کونه!»
مردومٚ بی‌ایمأنی عیسا دورٚه میأن
29 او وخت کی جِمئیت زیأدٚ بوستی، عیسا بٚفرمأسته: «اَ نتأجٚ مردوم، چندر شرورٚده! دأیم می جَا خأیده ایتأ نیشأنه اوشأنَ نیشأن بدم. امّا تنأ نیشأنه‌یی کی اوشأنَ فأدٚم، یونسٚ نیشأنه ایسه. 30 اونچی کی اونی رِه ایتفأق دکفته، نینوأ مردومٚ رِه ایتأ نیشأنه بو کی اونَ خودا اوسه کوده. هطؤیٚم اونچی کی اینسأنٚ پٚسر رِه ایتفأق دکفه، اَ نتأجٚ رِه ایتأ نیشأنه ایسه کی مٚرَه خودا اوسه کوده. 31 قیضأوتٚ روجٚ میأن، سبا ملکه ویریزه و اَ دورٚه زمأتٚ آدمأنَ محکومٚ کونه چونکی اون کلّی مرأرتٚ اَمرأ ایتأ طول درأزٚ رأیَ بوشؤ کی سولیمأنٚ دأنأیی گبأنَ بشتأوه. امّا اینفر جٚه سولیمأن دأنأتٚر اَیَه ایسأ، امّا چی کم ایسٚد اوشأنی کی اونی گبأنَ ایشتأوٚد. 32 قیضأوتٚ روج میأن، نینوأ مردوم، اَ نتأجٚ ضد ویریزٚد، اونَ محکوم کونٚد، چونکی اوشأن یونسٚ موعیظه ایشتأوٚستٚنٚ اَمرأ توبه بوکودٚد و اَسه اینفر پیله‌تر جٚه یونس اَیَه ایسأ ولی حأضیر نیئید توبه بوکونید.
صدأقتٚ اَمرأ دین دأشتٚن
33 «هیکس ایتأ چرأغَ روشنٚ نوکونه کی اونَ جیگأ بٚده بلکی اونَ ایتأ چرأغ پأیه رو نِهِه تأ هر کی بودورون اَیِه اونی نورَ بیدینه. 34 تی چوم ایتأ چرأغی ایسه کی تی جأنَ روشنٚ کونه. اگه تی چوم سألیم بٚبه، تومأمٚ تی جأن هم روشنأیی جَا پورَ به. امّا اگه تی چوم سألیم نٚبه، تومأمٚ تی جأن تأریکی اَمرأ پورَ به. 35 پس وأخبدأر بیبید، نوکونه کی تأریکی نورٚ عوض، شیمی جأنَ صأب بٚبه! 36 اگه شیمی بأطین سوسو بٚزِه بوبوسته بی، هیذره تأریکی اونی میأن نٚمأنه، بأزون تومأمٚ شیمی جأن نورأنی به، اَطؤیی کی ایتأ پور نورٚ چرأغ شٚمٚره دتأوٚه.»
عیسا، دینی پیله کسأنٚ جَا اینتقأد کونه
37 او وخت کی عیسا گبأن تومأنٚ بوسته، ایتأ جٚه فريسيأن اونَ غذأ خوردنٚ وأسی دعوت بوکوده. عیسا بوشؤ اونی خأنه و اونی سٚفره سٚر بینیشت. 38 امّا او فریسی او وخت کی بیدِه کی عیسا خو دٚسأنَ قبل اَنکی غذأ بوخوره نوشؤسته، قأقٚ بوسته!
39 خوداوند اونَ بٚفرمأسته: «شومأن فریسیأن کأسه بوشقابٚ بیرونَ اَندر تیمیزٚ کونید کی برق بٚزٚنه، قأفیل جٚه اَنکی اونی دورونی پور جٚه حرص زِئنٚ کثأفت و نأجورٚ کردکأرأن ایسه. 40 اَی بی‌عقلأن، او خودایی کی ظأهیرَ چأکوده، بأطینٚم چأنکود؟ 41 پس فِقِرأن یاور دئن وأسی شیمی بأطینَ پأکٚ کونید، بأزون همه چی شِمِره پأکٚ به.
42 «وای بحألٚ شومأن ای فریسیأن! شومأن حتّا شیمی نعناع و سُدابٚ مأصولٚ و هرچی دِه جوروأجور سبزی ده یکَ پیشکش فأدید، امّا عیدألتَ نیدینید و خودا محبتٚ جَا غأفیل ایسید. شومأن وأستی ده یک فأدید، ولی عیدألت و محبتَ جٚه خأطر نٚبٚرید.
43 «وای بحألٚ شومأن ای فریسیأن! چونکی دوس دأرید کنیسه‌یأنٚ میأن بِیترینٚ جأجیگأیأن بینیشینید و هو وختأنی کی کوچه بأزأرٚ میأن دٚوأرٚستأندرید مردوم شیمی ور فٚچٚم رأستأبو بوکوند. 44 چی پیله عذأبی شیمی رأفأ ایسأ! شومأن هچین او قبرأنٚ مأنستَن ایسید کی صأرأ وأشٚ کله میأن جوخوفته دأرٚده، مردوم جٚه شیمی ورجأ دٚوأرٚده بی اَنکی بدأنٚد چندر فأسید ایسید.»
45 ایتأ جٚه کأهینأن کی اویَه ایسأ بو، عیسایَ بوگفته: «اوستأد، تی اَ گبأنٚ اَمرأ، اَمٚرَه هم توهین بوکودی!»
46 عیسا بٚفرمأسته: «و شومأن اَی کأهینأن وای شیمی رو، چونکی خٚیلی سینگینٚ تکلیفأن مردومٚ چأن رو نیهید امّا هیوخت حأضیر نیئید حتّا ایتأ اَنگوشت اوشأنٚ یاور دٚئنٚ رِه تکأن بدید. 47 وای بر شومأن، چونکی شومأن او پیغمبرأنی رِه کی شیمی پئرأن دٚسٚ اَمرأ بوکوشته بوبوستٚد، مقبٚره چأکونید. 48 بأزین اَطؤیی شهأدت دیهید کی شیمی پئرأنٚ کأرأنَ قوبیل دأرید. پیغمبرأنَ اوشأن بوکوشتٚد و اوشأنی مقبره‌یأنَ شومأن چأکونید.
49 «اونی وأسی خودا خو دأنأیی اَمرأ شِمِره فٚرمأیه: پیغمبرأن و روسولأنَ شیمی ورجأ اوسه کودم، امّا شومأن ای عیده جٚه اوشأنَ بوکوشتید و بعضیتأنٚم دِه آزأر فأرسأنید. 50 پس تومأمٚ او پیغمبرأن خون کی جٚه دونیأ خلقتٚ اوّل تأ هسأ فووُسته، اَ نتأجٚ گردنٚ سٚر نٚهأ، 51 جٚه هأبیلٚ خون بیگیفته تأ زکریأ خون کی معبدٚ دورون مذبح و موقدسٚ جیگأ بین بوکوشته بوبوسته. اَطویه، اَ نتأج وأستی همٚتأ اَشأنٚ رِه جوأب پس بٚدد. 52 وای بر شومأن اَی دینٚ عألیمأن، چونکی معرفتٚ کیلیدَ مردوم دٚسٚ جَا بیرونَ کودید. نه خودتأن پأدیشأیی دورونی شیدی و نه وئألید البأقیأن بودورون بٚشٚد.»
53 او وخت کی عیسا او میهمأنی جَا بیرون بأمؤ، فریسیأن و کأهینأن کی اونی گبأنٚ جَا اوشأنَ غیظٚ گیفته بو، سخت اونی اَمرأ موخألفت بوکودٚد و حقٚ سعی بٚزِده خوشأنی سوألانٚ اَمرأ اونی سٚر فیشأر بأوٚرٚد. 54 اوشأن، اونی پٚسی قصد بوکودٚد کی اونی گبأنٚ اَمرأ اونَ گریفتأرَ کونٚد و دأم میأن تأوٚدٚد.
Currently Selected:
لوقا ۱۱: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran