روسولأنٚ کأرأن ۲
۲
روح‌القدسٚ اَمؤن
1 هو وخت کی پنتیکأست روج فأرٚسِه، همٚتأن کس‌کسٚ اَمرأ ایتأ جأ جمَ بوستٚد. 2 ایوأرکی جٚه آسمأن ایتأ صدا، توندٚ بأدٚ صدا مأنستَن بأمؤ و هو خأنه کی اونٚ میأن جمَ بوسته‌بود پورَ کوده. 3 بأزون ایچی آتشٚ شوأله‌یأنٚ مأنستَن خؤرَه نیشأن بٚدأ سیوأسیوأ بوبوسته و اَشأنٚ هرتأنٚ سٚر رو بینیشته. 4 او وخت همٚتأن روح‌القدسٚ جَا پورَ بوستٚد و اوّلی وأر بو کی اوشأن زوأنأنی‌یَ گب بٚزِده کی اوشأنٚ رِه شنأس نوبو، چونکی اَ قودرتَ خودا روح اَشأنَ بٚبخشه بو.
5 او روجأن، یوهودیأنی کی دین دأشتید جٚه تومأمٚ سرزمینأن عَیدٚ مرأسیمٚ رِه بأمؤ بود اورشلیم. 6 پس او وخت کی او خأنه جَا صدا بشتأوسته بوبوسته، ایتأ دسته دفأتن بأمؤده کی بیدینٚد چی بوبوسته. او وخت کی بشتأوستٚد عیسا شأگردأن اوشأنی زوأنٚ اَمرأ گب زئندرد، قأقَ بوستٚد!
7 اوشأن قأقَ بوسته، کس‌کسَ گفتیدی: «اَن چوطؤ ایمکأن دأره؟ اَشأن جلیل شین ایسٚد، 8 ولی اَمی مأری زوأنأنٚ اَمرأ گب زئندرد، هو سرزمینأنٚ زوأن کی اَمأن اویَه بودونیأ بأمؤییم! 9 اَمأن کی جٚه پأرتأن، مأدأن، ایلامیأن، بین‌النهرینٚ آدمأن، یوهودیه، کپدوکیه، پونتوس، آسیا، 10 فیریجیه و پمفلیه، مصر، لیبی قیروأنی زوأنٚ سأمأن، 11 کریت و عربستأن ایسیم، و حتّا اوشأنی کی رومٚ جَا بأمؤده چی یوهودی و چی اوشأنی کی یوهودی بوبوستده، همٚتأن ایشتأوستندریم کی اَشأن اَمی زوأنٚ اَمرأ خودا عجأیب غرأیب کأرأنٚ جَا گب زئندرد!»
12 همٚتأن قأقَ بوسته کس‌کسٚ جَا وأورسِئید: «اَن دِه چوطؤ چی ایسه؟»
13 ای عیدّیٚم رخشنَ گیفتٚد، گفتیدی: «اَشأن مست ایسٚد!»
پطرس روسولٚ موعیظه کودن
14 او وخت پطرس او یأزده‌تأ روسولٚ اَمرأ جٚه خو جأ سٚر ویریشته و ایتأ بولندٚ صدا اَمرأ اَشأنَ بوگفته: «اَی اورشلیمٚ آدمأن، اَی شومأنی کی اَ شهرٚ میأن ایسأیید کی زیأرت بوکونید، بشتأوید! 15 اوطؤیی کی شومأن فیکر کونید نییٚه، اَشأن مست نییٚد. چونکی اَسه سأعت نه صُب ایسه و شرابخوری و مستی زمأت نییٚه! 16 اونچی کی ایمرو صُب دِئندٚرید، یوئیلٚ پیغمبر اَطؤ پیشگویی بوکوده بو:
17 «"خودا فٚرمأیه: آخری روجأنٚ میأن، می روحَ همٚتأ آدمأنٚ رو فوکونم. شیمی دوخترأن و پٚسرأن نوبوّت کونٚده، شیمی جوأنأن رویأ و شیمی پیرأن خأبأن دینٚده. 18 او روجأنٚ میأن می روحَ حتّا غولأمأنٚ و کنیزأنٚ رویٚم فوکونم و اَشأن نوبوّت کونٚده. 19 بوجؤر، آسمأنٚ میأن، عجأیبٚ چیأن، و بیجیر زیمینٚ سٚر جٚه خون و آتش و بخأر، نیشأنه‌یانی آشیکأرَ کونم. 20 پیشتر جٚه اَنکی خوداوندٚ پیله‌دأنه و پورجلالٚ روج فأرٚسِه، آفتأب تأریکَ به و مأه خونٚ مأنستَن سورخَ به 21 ولی هرکی خوداوندٚ نأمَ دؤخأنه نیجأت یأفه."#۲:۲۱ یوئیل ۲۸:۲-۳۲.
22 «هسأ، اَی ایسرأییلی مردأکأن مٚرَه بشتأوید! هوطؤ کی خودتأنم دأنیدی، خودا عیسای ناصری اَمرأ عجأیبٚ موجیزه‌یأن نیشأن بٚدأ کی همه کسَ ثأبیت بوکونه کی عیسا جٚه اونی ور بأمؤ. 23 جٚه ایوأردِه، خودا او ایرأده و نقشه مأنستَن کی جٚه پیشتر بٚنأ بو، شٚمٚره وئأشته کی عیسایَ او بی‌دینٚ غریبه‌یأنٚ دٚسٚ اَمرأ صلیبٚ سٚر بٚبٚرید و بوکوشید. 24 ولی خودا اونَ ایوأردِه زٚنده کوده و مٚردنٚ قودرتٚ جَا آزأدَ کوده، چونکی مٚردن نتأنستی اَطؤچی آدمَ خو پٚنجه میأن اسیر بٚدأره.
25 «چونکی داوودٚ پیغمبر فٚرمأیه: "خوداوندَ دأیم می دیمٚ ور بیدِم. اون می ورجأ ایسأ و هیچی نتأنه مٚرَه بٚپٚرکأنه. 26 پس می دیل خوشألی و می زوأن ذوق کونه؛ می جأنٚم اومیدٚ میأن زٚندیگی کونه. 27 چونکی تو می جأنَ مٚردنٚ پٚنجه میأن سرأ نٚدی و ولأنی تی قودوس، قبرٚ دورون بوپوخه. 28 تو زٚندیگی رأیَ مٚرَه نیشأن دیهی. تی ایسأن مٚرَه خوشألی جَا لبألب پورَ کونه."#۲:۲۸ مزمور ۸:۱۶-۱۱.
29 «جأنٚ دیلٚ برأرأن، ایپچه فیکر بوکونید! اَ گبأنَ اَمی پیله بأبأ داوود خؤرَه نوگفته چونکی اون بٚمٚرده، بیگیلَ بوسته و اونی قبر هنو هَیه اَمی میأن نٚهأ. 30 ولی چونکی پیغمبر بو، دأنستی کی خودا قول بٚدأ و قسم بوخورده کی جٚه اونی نتأج، مسیحَ اونی سلطنتٚ تختٚ رو بینیشأنه. 31 داوود دورٚ آینده‌یَ فأندرستی و مسیحٚ زٚنده بوستنَ دٚئی و گفتی کی خودا اونی جأنَ مٚردنٚ پنجه‌یأنٚ میأن سرأ نٚده و ولأنه اونی جأن قبرٚ میأن بوپوخه. 32 داوود رأس‌رأسِی دروأره‌یٚ عیسا پیشگویی کودی و امّا همٚتأن اَمی چومأنٚ اَمرأ بیدِییم کی خودا عیسایَ زٚنده کوده.
33 «اون اَسه آسمأنٚ میأن، پئر ورجأ او جأجیگأ کی گولأز دأره میأن بینیشته و او روح‌القدسَ کی قرأر بو پئرٚ جَا فأگیره‌یَ فأگیفته و اونَ خو شأگردأنَ فأدأ، کی ایمرو شومأن اونی نتیجه‌یَ دینیدی و ایشتأویدی.
34 «چونکی داوود هیوخت آسمأنَ بوجؤر نوشؤ. ولی، بوگفته: "خوداوند می خوداوندَ بوگفته: می رأست دٚسٚ ور بینیش 35 کی تی دوشمنأنَ تی پأ جیر تأوٚدم."#۲:۳۵ مزمور ۱:۱۱۰.
36 «اَنٚ وأسی، من ایمرو وأضیح و آشیکأر شومأ همٚتأ می ایسرأییلی قومَ گفتن دٚرٚم کی هه عیسا کی شومأن اونَ صلیبٚ سٚر بوکوشتید، خودا اونَ، خوداوند و مسیح اینتخأب بوکوده!»#۲:۳۶ منظور جٚه «مسیح»، پأدیشأ و هونی کی وعده بٚدأ بوبوسته بو ایسرأییلَ نیجأت دِهه ایسه.
37 پطرسٚ گبأن مردومٚ دیلٚ سٚر اَثر بٚنأ. بأزین، اونَ و البأقی روسولأنَ بوگفتٚده: «برأرأن، اَسه چی وأستی بوکونیم؟»
38 پطرس جوأب بٚدأ: «شومأن هرتأ وأستی شیمی گونأیأنٚ جَا دٚس فأکشید، و خودا ور وأگردید و عیسای مسیحٚ نأم اَمرأ تعمید بیگیرید کی خودا شیمی گونأیأنَ بٚبخشه. او وخت خودا شٚمٚره‌یٚم اَ پیشکشی، ینی روح‌القدسَ بخشه. 39 چونکی مسیح شٚمٚره کی جٚه اَمی خوداوند، خودا ور دعوت بوبوستید و هطؤیٚم شیمی زأکأنَ و هطؤ اوشأنی کی دورٚ جأجیگأیأن ایسأده، وعده بٚدأ کی روح‌القدسَ اَشأنَ فأدٚه.»
40 بأزون پطرس موفٚصل دروأره عیسا گب بٚزِه و تومأمٚ اوشأنی کی ایشتأوستندوبودَ تِشویق بوکود کی خوشأنَ او دؤره زمأتٚ شرورٚ آدمأنٚ گونأیأنٚ جَا جیویزأنٚد. 41 اوشأنی جَا کی اونی پیغأمَ قوبیل بوکوده بود، سه هیزأر نفرَ فأرٚسِیید کی تعمید بیگیفتٚد و اَشأنٚ جمَ میأن بأمؤده. 42 اَشأن خوشأنَ او آموجه‌یأنی رِه بٚنأده کی روسولأن دأییدی، و البأقی ایماندأرأنٚ اَمرأ دوستی و موشأرکت کودیدی، و کس‌کسٚ اَمرأ خوردنی خوردید، خوداوندٚ شأمٚ رسمَ انجأم دٚئید، و دال‌بدال کس‌کسٚ اَمرأ دوعأ کودید. مردوم دسته دسته عیسایَ ایمأن اَوٚردیدی.
مردوم دسته دسته عیسایَ ایمأن اَوٚرٚده
43 اَنٚم بٚگم کی، روسولأن خٚیلی موجیزه‌یأن انجأم بدأبود، ایتأ ترس خودا ایحترأمٚ وأسی همٚتأنٚ دیلٚ میأن دکفته بو.
44 اَطؤیی بو کی، تومأمٚ ایمأندأرأن کس‌کسٚ اَمرأ ایسأ بود و هر چی‌یَ کی دأشتید، کس‌کسٚ اَمرأ سأم کودید. 45 اَشأن خوشأنَ مأل و مینألٚم فوروختیدی و فِقِرأنٚ میأن سأم کودید؛ 46 و هر روج دال‌بدال کس‌کسٚ اَمرأ معبدٚ میأن عیبأدت کودید، خأنه‌یأنٚ میأن خوداوندٚ شأمٚ وأسی جمَ بوستیدی، و خوشألی و شوکر کودنٚ اَمرأ هر چی‌یَ کی دأشتٚد کس‌کسٚ اَمرأ خوردیدی، 47 و خودایَ شوکر کودیدی. شهر آدمأنٚم اَشأنَ حورمت نأئیدی و خودا هر روج چن نفرَ نیجأت دٚئی و اَشأنٚ جمَ میأن ایضأفه کودی.
Currently Selected:
روسولأنٚ کأرأن ۲: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran