روسولأنٚ کأرأن ۳
۳
ایتأ مأربأوٚرده چولأق رأ شِه
1 ایتأ روج ظهر پٚسی پطرس و یوحنا هر روجٚ مأنستَن شؤئؤندوبود معبد میأن کی سأعتٚ سه دوعأ مرأسیمٚ دورون شرکٚت بوکوند. 2 او وخت کی معبدٚ نیزدیکی فأرٚسِده، ایتأ مأربأوٚرده چولأقٚ مردأکَ بیدِد. هر روج اونَ اَوٚردیدی و ایتأ جٚه معبدٚ دروأزه‌یأنٚ ورجأ کی «زیبا» نأم دأشتی نأئیدی تأ اوشأنی کی معبدٚ میأن شؤئیدی جَا گدأیی بوکونه. 3 او وخت کی پطرس و یوحنا خأستیدی معبدٚ بودورون بٚشٚد، او مردأی اَشأنی جَا پول بٚخأسته.
4 اَشأن اونَ فأندرستٚد. بأزون پطرس بوگفته: «اَمٚرَه فأندر!»
5 چولأقٚ گدأ اَنٚ وأسی کی فیکر کودی ایچی اَشأنٚ جَا فأگیره، ذوقٚ اَمرأ اَشأنَ فأندرسته.
6 پطرس بوگفته: «من نوقره یا طلأ نأرٚم کی تٚرَه فأدٚم! ولی اونچی‌یَ کی دأرم، تٚرَه فأدٚم! عیسای مسیحٚ ناصری نأمٚ اَمرأ تٚرَه دستور دٚهٚم کی ویریزی و رأ بیشی!»
7 بأزون اونی دٚسَ بیگیفته و جٚه زیمینٚ سٚر رأستَ کوده. هو زمأت میأن اونی پأیأن و پأ قوزک، سأق و سألیم بوبوسته و قوّت بیگیفته، 8 جوری کی خو جأ سٚر وأز بوکود، ایپچه بٚپأ بئیسأ و رأ دکفته! او وخت کی بیجیر بوجؤر وأز وأز کودأندوبو و خودایَ شوکر کودی، پطرس و یوحنا اَمرأ بوشؤ معبدٚ دورون.
9 اوشأنی کی اویَه ایسأبود، اونَ بیدِده کی رأ شؤئؤندره و خودایَ شوکر کونه، 10 و بٚفأمٚستد کی اون هو گدأ ایسه کی فلنگستی و هر روج معبدٚ «زیبا دروأزه» ورجأ نیشتی، خٚیلی قأقَ بوستٚد! 11 پس همٚتأن سولیمانٚ ایوأنٚ ور هوجوم ببردٚد و اونَ بیدِده کی پطرس و یوحنا ورجأ ایسأبو و اوشأنی جَا سیوأ نوبوستی. او وخت ایحترأمٚ اَمرأ بئیسأده و قأقَ بوسته اَ عجیبٚ ایتفأقَ فأندرستٚد.
پطرس معبدٚ میأن موعیظه کونه
12 پطرس جٚه اَ وخت ایستفأده کونه و او دسته آدمأنَ کی اویَه جمَ بوسته بود بوگفته: «اَی ایسرأییلی مردأکأن، چٚره اَندر قأقَ بوستیدی؟ چٚره اَطؤیی اَمٚرَه فأندرستأندرید؟ مگه گومأن کونیدی کی اَمی قودرت و دین دأشتنٚ اَمرأ اَ آدمَ شفأ بٚدأییم؟ 13 اَمی پیله بأبأیأنٚ خودا کی ایبرأهیم، ایسحأق و یعقوبٚ خودا بو، اَ موجیزه اَمرأ، خو خیدمتگوزأر عیسایَ سٚربولندَ کوده. می منظور هو عیسا ایسه کی شومأن اونَ تسلیم بوکودید و پیلاتُس خأستی اونَ آزأدَ کونه، ولی شومأن پیلاتُسٚ ورجأ اونَ رٚدَ کودید. 14 هطؤیه، شومأن نخأستید کی اون آزأدَ بٚه، بلکی او پأک و موقدسٚ مردأکَ رٚدَ کودید، و تأکید دأشتید اونی عوض ایتأ قأتیل آزأدَ بٚه. 15 شومأن اونی‌یَ کی زٚندیگی جٚه اون سرگیره‌یَ بوکوشتید، ولی خودا اونَ زٚنده کوده. من و یوحنا اَ ماجیرأیَ شأهید ایسیم چونکی اونی پٚسی کی اونَ بوکوشتید، اَمأن اونَ زٚنده بیدِییم!»
16 «شومأن خودتأن دأنیدی کی اَ فِقِرٚ مردأی پیشتر فلنگستی. ولی اَسه، عیسا نأم اونَ شفأ بٚدأ، ینی عیسا نأمَ ایمأن دأشتٚن، اونَ کأمیلٚ شفأیَ، بأعیث بوبوسته.»
17 «اَی جأنٚ دیلٚ برأرأن، اَنٚم بٚگم کی دأنٚم شومأن و شیمی قومٚ پیله کسأنٚ کردکأر، جٚه نأدأنی بو. 18 جٚه او ور، خودا دٚسم اَ کأرٚ دورون دوبو، چونکی تومأمٚ پیغمبرأنٚ پیشگویی موطأبٚق، مسیح وأستی اَمی گونأیأنٚ آمؤرزئنٚ رِه صلیبٚ سٚر خو جأنَ فٚدأ بوکوده بی. 19 پس، توبه بوکونید، شیمی گونأیأنٚ جَا دٚس فأکشید و خودا ور وأگردید کی شیمی گونأیأن پأکَ بٚه و جٚه خودا ور، خورومی و آرأمٚشٚ زمأت فأرٚسِه. 20 و عیسایَ، کی رأس‌رأسِی شیمی مسیح ایسه، ایوأردِه اوسه کونٚه. 21 هوطؤیی کی خودا جٚه قدیمٚ زمأتأنٚ خو موقدسٚ پیغمبرأنٚ زٚوأنٚ اَمرأ بٚفرمأسته بو، اون وأستی آسمأن میأن بئیسه، تأ او زمأت کی خودا همه چی‌یَ زٚنده کونه و هوطؤیی اوّل مأنستَن وأگردأنِه.» 22 موسایٚم بٚفرمأسته: «"شیمی خوداوندْ خودا، جٚه شیمی برأرأنٚ میأن، ایتأ پیغمبر می مأنستَن شٚمٚره اوسه کونه. تومأمٚ اونی گبأنَ وأستی خُب بشتأوید؛ 23 هر کی اونی گبأنَ نشتأوٚه، قومٚ میأن جٚه بین شِه."»
24 «سموئیل و تومأمٚ پیغمبرأن کی اونی پٚسی بأمؤده، جٚه پیشتر ایمرو مأجیرأیَ پیشگویی بوکودٚد. 25 شومأن هو پیغمبرأنٚ زأکأنید و خودا شیمی پیله بأبأیأنٚ مأنستَن شٚمٚره وعده بٚدأ کی تومأمٚ زیمینٚ سٚر آدمأنَ ایبرأهیمٚ نتأجٚ اَمرأ برکت بٚدأ. اَن هو وعده ایسه کی خودا ایبرأهیمَ فأدَه. 26 اَی ایسرأییلٚ نتأج، اَنٚ وأسی خودا خو خیدمتگوزأرَ همه کسٚ جَا پیشتر شیمی ورجأ اوسه کوده کی شٚمٚره جٚه شیمی رأیأن کی گونأ اَمرأ پور بو وأگردأنِه و اونی اَمرأ شٚمٚره برکت فأده.»
Currently Selected:
روسولأنٚ کأرأن ۳: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran