ማርቆሳ ምሽራቹዋ 9

የሱሳ ማላይ ላመቴዳዋ ኦድያ ታርክያ

(ማቶሳ 17:1-13፤ ሉቃሳ 9:28-36)

1የሱስ ኡንቱንታ፥ “ታን ህንተንቶ ቱሙዋ ጋይ፤ አማሬዳ አሳቱ ጾሳ ካዉተይ ዎልቃና ይያዋ በኤናን ሀይቀናዋንቱ ሀዋን ደኢኖ” ያጌዳ።

2የሱስ ኡሱፑን ጋላሳፐ ጉይያን፥ ባረናና ጰጽሮሳ፥ ያቆባነ ዮሃንሳ አኪደ፥ ኡንቱንቱ ጻላላ ዎልቃማ ደርያ ቦላ ከሴዳ፤ ኡንቱንቱ ስንን ላመቴዳ፤#2 ጰጽ. 1:17-18 3አ ማዩካ ጶሌዳ፤ ሳኣን ማዩዋ ሜጭያ ኦንነ ጌሻናዉ ዳንዳየናዋ ኬና ዳሪ ቦጼዳ። 4ሄ ሄዙ የሱሳ ካልያዋንቱ፥ ኤላስነ ሙሴ የሱሳና ሃሳይያዋንታ በኤድኖ።

5ጰጽሮስ የሱሳ፥ “ታማርስያዎ፥ ኑን ሀዋን ደእያዌ ኑዉ ሎአ፤ ኑን ሄዙ ዳሳቱዋ እቱዋ ነዉ፥ እቱዋ ሙሴዉ፥ ቃይ እቱዋ ኤላሳዉ ኬጻና” ያጌዳ። 6እ ዋጋነንቶነ ኤርቤና፤ አያዉ ጎፐ፥ እካ የኮንቱካ ዳሪ ያዬድኖ።

7ሄዋፐ ጉይያን፥ ሻሪ ዪደ ኡንቱንታ ካምና ሻርያፐ፥ “ሀዌ ታን ሲቅያ ታ ናኣ፤ እ ግያዋ ስስተ” ግያ ቃላይ ዬዳ። 8ኤለካ ኡንቱንቱ ዩሽ አ ጼልያ ዎደ፥ የሱሳፐ አትን፥ ሀራ ኦናነ ባረንቱ ማታን በእበይክኖ።

9ኡንቱንቱ ደርያፐ ዎሽን፥ የሱስ ኡንቱንታ፥ “ታን፥ አሳ ናአይ፥ ሀይቁዋፐ ደንዳና ጋካናዉ፥ ህንተ በኤዳባ ኦስነ ኦዶፕተ” ያጊደ አዛዜዳ።

10እ አዛዜዳዋ ኡንቱንቱ፥ “ ‘ኤኖ’ ጊደ፥ ሀ ሀይቁዋፐ ደንድያዋ ግያዌ ዋግያዌ” ያጊደ፥ ባረንቱ ግዶን ሃሳየቴድኖ።

11ኡንቱንቱ የሱሳ፥ “ህግያ ታማርስያዋንቱ አያዉ፥ ‘ኤላስ ካሰቲደ ያናዉ በሴ’ ጊኖ?” ያጊደ ኦቼድኖ።

12እ ዛሪደ ያጌዳ፤ “ቱማካ፥ ኤላስ ካሰት ዪደ፥ ኡባባ ጊግሴ፤ ያትና፥ አያዉ ጾሳ ማጻፋይ፥ ‘አሳ ናአይ ዳሪ ዋየታናነ እጸታና’ ያጊ? 13ሽን ታን ህንተንቶ ኦዳይ፤ ኤላስ ዬዳ፤ ቃይ አባይ ጾሳ ማጻፋን ጻፈቴዳዋዳንካ፥ አሳይ አ ባረ ኮዬዳባ ኦዳ” ያጌዳ።

የሱስ ኢታ አያናይ ኦይቄዳ ናኣ ፓዳ

(ማቶሳ 17:14-21፤ ሉቃሳ 9:37-43)

14የሱስ፥ ጰጽሮስ፥ ያቆብነ ዮሃንስ የኮ የሱሳ ካልያዋንቱኮ ስሚደ ይያ ዎደ፥ ጮራ አሳይ ሄ ካልያዋንቱ ዩሹዋን ኤቄዳዋነ ህግያ ታማርስያ አማሬዳ አሳቱ ኡንቱንቱና ፓሉመትያዋንታ በኤድኖ። 15ሄ ጮራ አሳይ የሱሳ በኤዳ ዎደ ማላለት ዳጋሚደ፥ ኤለካ አኮ ዎጽ ዪደ፥ አ ሳሮቴዳ። 16የሱስ ባረና ካልያዋንታ “ኡንቱንቱና አያ ፓሉመቲቴ?” ያጊደ ኦቼዳ።

17ሄ ጮራ አሳ ግዶፐ እት ብታኒ ዛሪደ፥ “ታማርስያዎ፥ ታ ናኣ ቦላን ሃሳያ ድግያ ኢታ አያናይ ደእያ ድራዉ፥ አ ኔኮ አካደ ያድ። 18ሀ ኢታ አያናይ አ ኦይቂያ ዎደ ኡባን፥ አ ኦሌ፤ አ ዶናናካ ሆሙ ፓሮቴ፤ ቃይ አቻ ጋርጭሴ፤ ቦላካ ዞልሴ። አፐ ሀ ኢታ አያና ከሳና ማላ፥ ኔና ካልያዋንቶ ኦዳድ፥ ሽን ከሳናዉ ዳንዳይበይክኖ” ያጌዳ።

19የሱስ ዛሪደ ኡንቱንታ፥ “አማነና ሀ ዎድያ አሳዉ! ታን ህንተንቱና አዉደ ጋካናዉ ደአኔ? ቃይ ህንተንቱባ አዉደ ጋካናዉ ዳንዳያኔ? ናኣ ታኮ ሃ አክ ዪተ” ያጌዳ። 20ኡንቱንቱ ናኣ አኮ አሄድኖ፤ ሄ ኢታ አያናይ የሱሳ በኢዴ ኤለካ ናኣ ኮኮርሲ አጌዳ፤ ናአይ ሳኣን ኩንዲደ፥ ዶናና ሆሙ ጎፑ ጊሽን ጎንዶረቴዳ። 21የሱስ ሄ ናኣ አዉዋ፥ “ሀዌ ነ ናኣ ኦይቆደፐ ዎይሳ ዎደ ግዳኔ?” ያጊደ ኦቼዳ።

ናኣ አቡ፥ “እ ናአተን ደእያ ዎድያፐ ዶሜዳ። 22አ ዎናዉ ዳሮ ዎደ ታማንነ ሃን ኦሌዳ፤ ሽን ኔን ዳንዳዮፐ፥ ኑዉ ቃረታደ ኑና ማዳርኪ” ያጌዳ።

23የሱስ አ፥ “ኔን ዳንዳዮፐ ጋይ? አማንያ አሳዉ ኡባባይ ዳንዳየቴ” ያጌዳ።

24ኤለካ ናኣ አቡ ባረ ኮሻ ቁ ኦደ፥ “ታን አማናይ፤ ሽን ጉጃ አማናናዳን፥ ታና ማዳርኪ” ያጌዳ።

25የሱስ አሳይ ዳር ዳር ብያዋ በኢደ፥ ኢታ አያና፥ “ናኣ ቱለነ ዱደ ኦዳ አያናዉ፥ ሀ ናኣፐ ከሳ ጋደ ኔና ታ አዛዛይ፤ ቃይ ዛረደ አን ገሎፓ” ያጌዳ።

26ሄ ኢታ አያናይ ዋሲደ፥ ናኣ ዳርስ ኮኮርሲደ፥ አፐ ከሴዳ። ናአይ ሀይቄዳዋ ማላትና፥ ዳሮ አሳይ፥ “ናአይ ሀይቄዳ” ያጌዳ። 27ሽን የሱስ ናኣ ኩሽያ ኦይቂደ ደንና፥ ናአይ ደንድ ኤቄዳ።

28የሱስ ሶይ ገሌዳዋፐ ጉይያን፥ አ ካልያዋንቱ የሱሳ ዱማ፥ “ኑን ሄ ኢታ አያና ከሳናዉ አያዉ ዳንዳይበይኮ?” ያጊደ ኦቼድኖ።

29የሱስ ዛሪደ፥ “ሄዋ ማላይ ዎሳፐነ ጾማፐ አትን፥ ሀራባን ከሳናዉ ዳንዳየና” ያጌዳ።

የሱስ ባረና ጋካና መቱዋባነ ሀይቁዋባ ላኤንዋ ኦዴዳ

(ማቶሳ 17:22-23፤ ሉቃሳ 9:43-45)

30ኡንቱንቱ ሄዋፐ ደንዲደ፥ ጋሊላና አደ ቤድኖ፤ የሱስ ባረ ደኢያሳ ኦንነ ኤራና ማላ ኮይቤና። 31አያዉ ጎፐ፥ እ ባረና ካልያዋንታ “ታና፥ አሳ ናኣ፥ አሳይ አሳዉ አደ እማናነ ዎና፤ ታን ቃይ ሄዙ ጋላሳፐ ጉይያን፥ ሀይቁዋፐ ደንዳና” ያጊደ ታማርሴ።

32ሽን ኡንቱንቶ እ ግያዌ ገልቤና፤ ቃይ አ ኦቻናዉካ ያዬድኖ።

ኡባፐ አያዌ ኦኔ?

(ማቶሳ 18:1-5፤ ሉቃሳ 9:46-48)

33ኡንቱንቱ ቅፍርናሆማ ግያ ካታማ ቤድኖ፤ ሶይ ገሌዳዋፐ ጉይያን፥ የሱስ ኡንቱንታ፥ “ኦግያን አያ ፓሉመቲቴ?” ያጊደ ኦቼዳ። 34ሽን ኡንቱንቱ ቢደ ኦግያን፥ “ኑ ግዶን ኑ ኡባፐ አያዌ ኦኔ?” ያጊደ ፓሉመቴዳ ድራዉ፥ ጮኡ ጌድኖ። 35የሱስ ኡቲደ፥ ታማነ ላኡ ባረና ካልያዋንታ ጼሲደ ኡንቱንታ፥ “ኦንነ ስንዉ አና ኮዮፐ፥ ኡባፐ ጉየ አደ፥ ሄ ኡባዉ ቆማ ግዳናዉ በሴ” ያጌዳ።

36እት ጉ ናኣ ኦይቂደ፥ ኡንቱንቱ ግዶን ኤሴዳ፤ ሄ ጉ ናኣ እድሚደ ኡንቱንታ፥ 37“ሀዋንቱ ማላ ጉ ናናፐ እቱዋ ታ ሱንን ሞክያ ኦንነ ታና ሞኬ፤ ቃይ ታና ሞክያ ኦንነ ታና ኪቴዳዋ ሞክያዋፐ አትን፥ ታ ጻላላ ሞከና” ያጌዳ።

የሱስ፥ “ኑባ ኤቀተና ኡራይ ኑ ባጋ” ያጌዳ

(ሉቃሳ 9:49-50)

38ዮሃንስ አ፥ “ታማርስያዎ፥ እት አሳይ ነ ሱንን ኢታ አያናቱዋ ከስያዋ ኑን በኢደ፥ ኑ ባጋ ግደና ድራዉ፥ አ ድጌዶ” ያጌዳ።

39ሽን የሱስ ያጌዳ፤ “ኦንነ ታ ሱንን ማላታ ኦደ፥ ኤለካ ታ ቦላ ኢታባ ሃሳያናዉ ዳንዳይያዌ ባይና ድራዉ ድጎፕተ፤ 40አያዉ ጎፐ፥ ኑባ ኤቀተና ኡራይ ኑ ባጋ። 41ታን ህንተንቶ ቱሙዋ ኦዳይ፤ ህንተ ታዋንታ ክርስቶሳዋንታ ግድያ ድራዉ፥ ኦንነ ህንተንቶ ታ ሱንን ቡልያ ሃ ኡሻናዉ እሞፐካ፥ ባረ ጋትያ አካናዋ።

ናጋራ ጋሱዋ

(ማቶሳ 18:6-9፤ ሉቃሳ 17:1-2)

42“ታና አማንያ ሀ ጉቱዋፐ እቱዋ ባለያ ኦናነ፥ ጋጭያ ዎጋ ዎጻ አ ቆያን ቃቺደ፥ አባን አ ኦልያዌ አዉ ሎአ። 43-44ነ ኩሺ ኔና ባለፐ፥ ቃንጻ ኦላ፤ ኔን ላኡ ኩሽያና#9:43-44 ሀራ ጌሻ ማጻፋ ብለቱ፥ ጉጹኒ ሙለ ሀይቀናሳነ ቃይ ሙለካ ቶኤና ጋናምያ ታማን፥ ያጌ። 9:45፣ 47 ጼልተ። ቃይ ኡባካ ቶኤና ጋናምያ ታማን ገልያዋፐ፥ ዱጻ ኩሽያና ደኡዋ ገልያዌ ነዉ ሎአ። 45-46ነ ገዲ ኔና ባለፐ፥ ቃንጻ ኦላ፤ ኔን ላኡ ገድያና ኡባካ ቶኤና ጋናምያ ታማን የገትያዋፐ፥ ዶማ ግዳደ ደኡዋ ገልያዌ ነዉ ሎአ። 47-48ነ አይፊ ኔና ባለፐ፥ ዎጫ ኦላ፤ ኔን ላኡ አይፍያና ኡባካ ቶኤና ጋናምያ ታማን የገትያዋፐ፥ እት አይፍያና ጾሳ ካዉተ ገልያዌ ነዉ ሎአ።

49“ቁማን ማጽንያ የግያዋዳን፥ ታማይ አሳ ኡባ ቦላ የገታና። 50ማጽኒ ሎአ፤ ሽን እ ማልአና ዮፐ፥ ዛሪደ አ ዎት ማልኤንቴ? ህንተንቱን ማጽኒ ደኦ፤#9:50 ህንተንቱን ማጽኒ ደኦ፦ ሀዋ ጉሳይ የሱሳን አማንያዋንቱ ባረንቱ አማኑዋፐ ደንዶ ጋሱዋን ኡንቱንቱ ቦላ መቱ ጋክንቶካ እቱ እቱዋና ሳሮተን ደአናዉ በሴ። ያቲደ እቱ እቱዋና ሳሮተን ደእተ” ያጌዳ።

Currently Selected:

ማርቆሳ ምሽራቹዋ 9: DFBE

Highlight

Copy