ማርቆሳ ምሽራቹዋ 10
10
ማቻቶ የዳናዉ በሰና
(ማቶሳ 19:1-2፤ ሉቃሳ 16:18)
1የሱስ ሄዋፐ ደንዲደ፥ ዮርዳኖሳ ሻፋፐ ሄፍን ባጋና ይሁዳ ጋድያ ቤዳ። ጮራ አሳይ ሽረቲደ አኮ ሺቅና፥ ካሰ እ ኦያዋዳንካ ሄ አሳ ታማርሱዋ ዶሜዳ።
2እት እት ፓርሳዋቱ ፓጫናዉ የሱሳኮ ዪደ፥ “እት አሳይ ባረ ማቻቶ የዳናዉ ኑዉ ህጊ አዛዚ?” ያጊደ አ ኦቼድኖ።
3እ ዛሪደ፥ “ሙሴ ህንተንታ ዋግ አዛዜዴ?” ያጌዳ።
4ኡንቱንቱ፥ “ሙሴ፥ ‘እት አሳይ ባረ ማቻቶ ፓራማ እሚደ የዶ’ ጌዳ” ያጌድኖ።#ዛረ. 24:1-4፤ ማቶሳ 5:13
5የሱስ ዛሪደ ኡንቱንታ፥ “ህንተንቱ ኦድና ስሰናዋንታ ግድያ ድራዉ፥ ሙሴ ሀ አዛዙዋ ህንተንቶ ጻፌዳ። 6ሽን ጾሳይ ኮይሮ መያ ዎደ፥ አቱማ አሳነ ማጫ አሳ ኦደ፥ ኡንቱንታ መዳ።#ዶመ 1:27፤ 5:2 7ሄዋ ድራዉ፥ እት አሳይ ባረ አባነ ባረ ዳዮ አጊደ፥ ባረ ማቻትና እቱዋ ግዴ፤ 8ኡንቱንቱ ላአቱ እት አሾ ግዲኖ፤ ሄዋ ድራዉ፥ ኡንቱንቱ እት አሳ ግድያዋፐ አትን፥ ላኡ አሳ ግድክኖ።#ዶመ 2:24 9ሄዋ ድራዉ፥ ጾሳይ እትፐ ጋዳዋ አሳይ ሻኮፖ” ያጌዳ።
10ኡንቱንቱ ሶይ ስሜዳ ዎደ፥ የሱሳ ካልያዋንቱ ሀ የዉዋባ የሱሳ ዛር ኦቼድኖ። 11የሱስ ኡንቱንታ፥ “ባረ ማቻቶ የዲደ፥ ሀራሮ አክያ ኡራይ ኦንነ እዝና ዎሹሜ። 12ቃይ ማጫዉናካ ባረ አስናፐ ከሳደ ሀራ አስና ገሎፐ ዎሹማዉ” ያጌዳ።
የሱስ ጉ ናና አንጄዳ
(ማቶሳ 19:13-15፤ ሉቃሳ 18:15-17)
13የሱስ ጉ ናና ቦቻና ማላ፥ እት እት አሳይ ናና አኮ አሄዳ፤ ሽን የሱሳ ካልያዋንቱ ሄ አሳ ሴሬድኖ። 14የሱስ ሄዋ በኢደ፥ ባረና ካልያዋንታ ሀንቀቴዳ፤ ኡንቱንታ፥ “ጉ ናናይ ታኮ ይያዋንታ ድጎፕተ፤ አያዉ ጎፐ፥ ጾሳ ካዉተይ ሀዋንቱ ማላሳ። 15ታን ህንተንቶ ቱሙዋ ጋይ፤ ጾሳ ካዉተ ጉ ናኣዳን አከና ኡራይ ኦንነ ሄ ካዉተ ኡባካ ገለና” ያጌዳ። 16ጉ ናና እድሚደ፥ ባረ ኩሽያ ኡንቱንቱ ቦላ ሁጲያን ሁጲያን ዎደ፥ ኡንቱንታ አንጄዳ።
ሚሻ ሲቁሳይ አህያ መቱዋ
(ማቶሳ 19:16-30፤ ሉቃሳ 18:18-30)
17የሱስ ባናዉ ከሴዳ ዎደ፥ እት ብታኒ ዎጺደ ይ አ ስንን ጉልባቲደ፥ “ሎኦ ታማርስያዎ፥ መና ደኡዋ ላታናዉ ታን አያ ኦ?” ያጊደ አ ኦቼዳ።
18የሱስ፥ “አያዉ ታና ሎኦ ጋይ? ጾሳ ጻላላፐ አትን፥ ሀራ ሎኡ ኦንነ ባዋ። 19ጾሳ አዛዙዋ፥ ‘ዎፓ፤ ዎሹሞፓ፤ ዉኦፓ፤ ዎርዱዋ ማርካቶፓ፤ ጭሞፓ፤ ነ አባነ ነ ዳዮ ቦንቻ’ ያግያዋ ኤራሳ” ያጌዳ።#ከሳ 20:12-16፤ ዛረ. 5:16-20
20ብታኒ የሱሳ፥ “ታማርስያዎ፥ ታን ሄዋ ኡባ ናአተፐ ዶማደ ሀእ ጋካናዉካ ናጋይ” ያጌዳ።
21የሱስ ብታንያ ዶሴዳ፤ አ ጫድ ጼሊደ፥ “ነዉ እትባይ ፓጬዳ፤ ባደ ነዉ ደእያባ ኡባ ዛልኣደ፥ ሄ ሚሻ ህዬሳዉ እማ፤ ኔን ሳሉዋን ዱረታና። ያቶዋፐ ጉይያን ያደ ታና ካላ” ያጌዳ። 22ሽን ብታኒ ሄዋ ስሲደ፥ እ ዳሮ ዱረ ግድያ ድራዉ፥ ባረ ሶምእያ ምሲደ፥ ናሸተናን አጊደ ቤዳ።
23የሱስ ባረና ካልያዋንታ ዩሽ አ ጼሊደ፥ “ዳሮ ዱረ አሳይ ጾሳ ካዉተ ገላናዉ ዋን መታንዴሻ!” ያጌዳ።
24አ ካልያዋንቱ አ ሃሳያ ስሲደ ማላለቴድኖ፤ ሽን የሱስ ቃይካ ኡንቱንታ፥ “ናቶ፥ ጾሳ ካዉተ ገላናዉ ዎት መታንዴሻ!#10:24 ዎት መታንዴሻ፦ ሀዋ እት እት ብለይ ባረዉ ደእያባን አማነትያ አሳ ያጌ። 25ዱረ አሳይ ጾሳ ካዉተ ገላናዋፐ፥ ጋሉ ማርፕያ ጾእያና አናዌ ማታቴ” ያጌዳ።
26የሱሳ ካልያዋንቱ ማላለቲደ፥ “ያትና፥ ኦኔ አታናዉ ዳንዳይያዌ?” ያጊደ እቱ እቱዋ ኦቼድኖ።
27የሱስ ኡንቱንታ ጫድ ጼሊደ፥ “ሀዌ ጾሳዉ ዳንዳየትያዋፐ አትን፥ አሳዉ ዳንዳየተና፤ አያዉ ጎፐ፥ ጾሳዉ ኡባባይካ ዳንዳየቴ” ያጌዳ።
28ጰጽሮስ የሱሳ፥ “በአ፤ ኑን ኑባ ኡባ አጊደ፥ ኔና ካሌዶ” ያጌዳ።
29የሱስ፥ “ታን ህንተንቶ ቱሙዋ ጋይ፤ ታ ድራዉነ ዎንጋላ ምሽራቹዋ ድራዉ፥ ጎልያ ዎይ እሻቱዋ ዎይ ምቻቱዋ፥ ዎይ አዉዋ ዎይ አቶ ዎይ ማቻቶ፥ ዎይ ናና ዎይ ጋድያ አጌዳ አሳይ ኦንነ፥ 30ሀእ ሀ ዎድያን ጼቱ ዳኩዋፐ ዳርያ ጎለቱዋ፥ እሻቱዋ፥ ምቻቱዋ፥ አቶ፥ ናና፥ ጋድያ፥ ቃይ መቱዋካ አካናዋ። ስንፐ ያና ዎድያንካ መና ደኡዋ አካናዋ። 31ሽን ጮራቱ ሀእ ስንን ደእያዋንቱ ጉየ አና፤ ቃይ ጮራቱ ሀእ ጉየን ደእያዋንቱ ስንዉ አና” ያጌዳ።
የሱስ ባረና ጋካና መቱዋባነ ሀይቁዋባ ሄዘንዋ ኦዴዳ
(ማቶሳ 20:17-19፤ ሉቃሳ 18:31-34)
32ኡንቱንቱ የሩሳላመ ቢደ፥ ኦግያን ደኢኖ፤ የሱስ ባረና ካልያዋንቱፐ ስንና ሀመቴ። ኡንቱንቱ ማላለቴድኖ፤ አ ካልያዋንቱ ያዬድኖ። ዛሪደ ታማነ ላኡ ባረና ካልያዋንታ ጋጻ ከሲደ፥ ባረና ጋካናባ ዱማዪደ ኡንቱንቶ ሀዋዳን ያጊደ ኦዴዳ፤ 33“በእተ፤ ኑን የሩሳላመ ሀእ ከሶይተ፤ ያን ታና፥ አሳ ናኣ፥ ቄሳቱዋ ካፓቶነ ሙሴ ህግያ ታማርስያዋንቶ አደ እማና። ኡንቱንቱ ታ ቦላን ሀይቁዋ ፕርዳ ፕርዳና፤ ቃይ አይሁዳ ግደና አሳዉካ ታና አደ እማና። 34ሄ አይሁዳ ግደና አሳይ ታ ቦላ ቅሊጫናነ ጩቻና፤ ታና ልሱዋን ሾጫናነ ዎና፤ ታን ቃይ ሄዙ ጋላሳፐ ጉይያን፥ ሀይቁዋፐ ደንዳና።”
ያቆብነ ዮሃንስ ዎሴዳ ዎሳ
(ማቶሳ 20:20-28)
35ዛብድዮሳ ናናይ ያቆብነ ዮሃንስ የሱሳኮ ዪደ፥ “ታማርስያዎ፥ ኑን ኔና ዎስያባ ኡባባ ኑዉ ኦርኪ” ያጌድኖ።
36የሱስ ኡንቱንታ፥ “ታን ህንተንቶ አያ ኦ?” ያጌዳ።
37ኡንቱንቱ አ፥ “ነ ቦንቾ ካዉተን ኔን ኡትያ ዎደ፥ ኑፐ እቱዋ ኔፐ ኡሸቻ ባጋና ቃይ እቱዋ ሀድርሳ ባጋና ኡትሳርኪ” ያጌድኖ።
38ሽን የሱስ ኡንቱንታ፥ “ህንተንቱ አያ ዎሳናዉ በስንቶካ ኤርክታ፤ ታን ኡሻናዉ በስያ መቱዋ ጹኣ ኡሻናዉ ዳንዳዪቴ? ቃይ ታን ጻማቀታናዉ በስያ ጽንቃታ#10:38 ጽንቃታ፦ ሀዋ ጉሳይ የሱሳ ጋኬዳ መቱዋ ጹኣ ጉሳ። ጻማቀታናዉ ዳንዳዪቴ?” ያጌዳ።
39ሄዋፐ ጉየ ኡንቱንቱ ዛሪደ፥ “ኤ ዳንዳዬቶ” ያጌድኖ።
የሱስ ቃይ፥ “ታን ኡሻናዉ በስያ መቱዋ ጹኣ ህንተ ኡሻና፤ ታን ጻማቀታናዉ በስያ ጽንቃታካ ህንተ ጻማቀታና። 40ሽን ታፐ ኡሸቻ ባጋናነ ሀድርሳ ባጋና ኡታናዋንታ ዶርያዌ ታና ግድከ፤ ሽን ሄ ሳአይ ጾሳይ እማናዉ ጊግስ ዎዳዋንቱሳ” ያጌዳ።
41የኮ ታሙ የሱሳ ካልያዋንቱ ሄዋ ስሴዳ ዎደ፥ ያቆባነ ዮሃንሳ ሀንቀቴድኖ። 42የሱስ ኡንቱንታ ኡባ ባረኮ ጼሲደ፥ ሀዋዳን ያጌዳ፤ “ ‘አይሁዳ ግደናዋንታ ሞድያዋንታ’ ጊደ ቆፕያዋንቱነ ሄዋንታ ካለያ አሳቱ ባረንቱ አሳ ሞድያዋ ኤሪታ። 43ሽን ህንተ ግዶን ሄዋ ማላ ግደና፤ ህንተ ግዶን ዎጋታና ኮይያ ኦንነ ህንተንቶ ቆማ ግዳናዉ በሴ። 44ቃይ ህንተ ግዶን ኡባፐ ቦላ ግዳና ኮይያ ኦንነ ህንተ ኡባዉ አይለ ግዳናዉ በሴ። 45አያዉ ጎፐ፥ ሀራይ አቶ ታን፥ አሳ ናአይካ፥ አሳዉ ኦናዉነ ጮራቱዋ ዎዛናዉ ዬዳዋፐ አትን፥ አሳይ ታዉ ኦና ማላ ያበይከ” ያጌዳ።
የሱስ ቆቃ ባርጻሞሳ አይፍያ ፓዳ
(ማቶሳ 20:29-34፤ ሉቃሳ 18:35-43)
46ኡንቱንቱ እያርኮ ግያ ካታማ ቤድኖ፤ የሱስ ባረና ካልያዋንቱናነ ጮራ አሳና እያርኮፐ ከስሽን፥ ጽሞሳ ናአይ ቆቃይ፥ ባርጻሞሳ ግያዌ፥ ኦግያ ዶናን ዎሲደ ኡቴዳ። 47ባርጻሞስ ናዝሬትያ የሱሳ ግዴዳዋ ስሲደ፥ ባረ ኮሻ ቁ ኦደ፥ “ዳዊተ ናኣ#10:47 ዳዊተ ናኣ፦ አይሁደ አሳቱ ጾሳን ኦከቶዌ ዳዊተ ዘረፐ የለታናዋ ያጊደ ቆፕያ ድራዉ፥ ጾሳን ኦከቶዌ “ዳዊተ ናኣ” ያገት ጼሰቴ። የሱሳ፥ ታና ማራርኪ!” ያጉሳ ዶሜዳ።
48ጮራ አሳይ አ፥ “ሀይዛ!” ጊደ ሀንቀቴዳ።
ሽን፥ እ ባረ ኮሻ ካሰዋፐካ ዳርስ ቁ ኦደ፥ “ዳዊተ ናአዉ፥ ታና ማራርኪ!” ያጌዳ።
49የሱስ ኦግያን ኤቂደ፥ “አ ሃ ጼስተ” ያጌዳ።
ኡንቱንቱ ቆቃ፥ “አይነ ባዋ፤ ደንዳ ኤቃ፤ ኔና ጼሴ” ያጊደ ጼሴድኖ። 50ቆቃይ ባረ ማዩዋ ኦል አጊደ፥ ጉፕ ደንድ ኤቂደ፥ የሱሳኮ ቤዳ።
51የሱስ አ፥ “ታን ነዉ አያ ኦናዉ ኮያይ?” ያጌዳ።
ቆቃይ፥ “ታማርስያዎ፥ ታን ጼላናዋ ኮያይ” ያጌዳ።
52የሱስ አ፥ “ባ፤ ነ አማኑ ኔና ፓዳ” ያጌዳ። ኤለካ አ አይፊ ጼል አግና፥ ኦግያን የሱሳ ካል አጌዳ።
Currently Selected:
ማርቆሳ ምሽራቹዋ 10: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
