ማርቆሳ ምሽራቹዋ 13
13
የሱስ ጌሻ ጎሊ ኮለታናዋ ካሰቲደ ኦዴዳ
(ማቶሳ 24:1-2፤ ሉቃሳ 21:5-6)
1የሱስ ጌሻ ጎልያፐ ከስሽን፥ አ ካልያዋንቱፐ እቱ አ፥ “ታማርስያዎ፥ ሀዌ አይበ ሎኦ ሹቻተንቶነ ቃይ አይበ ሎኦ ሹቻ ጎላቱዋ በአይ!” ያጌዳ።
2የሱስ ዛሪደ፥ “ሀ ዎልቃማ ሹቻ ጎላቱዋ በአይ? ሀ ጎላቱዋን ደእያ እት ሹቻይነ አተናን ኡባይ ኮለታና” ያጌዳ።
ጎዳይ ያናፐ ካሰቲደ ጋካና የደርሱዋነ ዋይያ
(ማቶሳ 24:3-14፤ ሉቃሳ 21:7-19)
3የሱስ ጌሻ ጎልያፐ ህን ባጋና ደብረ ዛይተ ደርያ ቦላን ኡቴዳ ዎደ፥ ጰጽሮስ፥ ያቆብ፥ ዮሃንስነ እንድራስ ባረንቱ ጻላላ አኮ ዪደ አ፥ 4“ሄዌ አዉደ ሀናነንቶ፥ ኑዉ ኦዳርኪ፤ ቃይ ሄዌ ኡባይ ፖለታና ዎድያ ኤርስያ ማላቱ አያ ግዳኔ?” ያጊደ ኦቼድኖ።
5የሱስ ቃይ ኡንቱንቶ ሀዋዳን ያጊደ፥ ኦዱዋ ዶሜዳ፤ ህንተንታ ኦንነ ባለና ማላ ናገትተ። 6ጮራ አሳቱ ታ ሱንን፥ “ታን ክርስቶሳ” ያጊደ ያናዋ፤ ጮራ አሳ ባለና። 7ማታን ደእያ ኦላ ኮሻነ ሃኩዋን ደእያ ኦላ ኦዱዋ ህንተ ስስያ ዎደ፥ ህርጎፕተ፤ ሄዋ ማላባይ ሀናናዉ በሴ፤ ሽን ዉርሰይ ብራ። 8አያዉ ጎፐ፥ እት ጋደ አሳይ ሀራ ጋደ አሳና ኦለታና፤ ቃይ እት ካዉተይ ሀራ ካዉተና ኦለታና፤ ቢታ ቃይ ኡባ ሳን ደአና፤ ኮሻይካ ደአና፤ ሽን ሄዌ ኮይሮ የሉዋ ኦይ ማላ።
9ሽን ህንተ ህንተንቱ ሁጰዉ ናገትተ፤ አያዉ ጎፐ፥ አሳይ ህንተንታ ኦይቂደ፥ ፕርዳ ጎለዉ አደ እማና፤ ቃይ ባረ አይሁዳ ዎሳ ጎለቱዋንካ ህንተንታ ልሱዋን ሾጫና፤ ጋድያ ሞድያዋንቱ ስንንነ ካታቱዋ ስንን ታ ድራዉ ህንተ ማርካታናዉ ኤቃና። 10ምሽራቹዋ ቃላይ ኮይሮና አሳዉ ኡባዉ ኦደት ድጋናዉ በሴ። 11ኡንቱንቱ ህንተንታ ፕርዳ ጎለ አህያ ዎደነ አደ እምያ ዎደ፥ ዎት ሃሳያንተንቶ ኮይሮና ህርጎፕተ፤ ሄ ሳትያን ጾሳይ ህንተንቶ እምያባ ሃሳይተ። አያዉ ጎፐ፥ ጌሻ አያናይ ሃሳያናፐ አትን፥ ሃሳይያዋንቱ ህንተንታ ግድክታ።
12እሻይ ባረ እሻ፥ አዉ ባረ ናኣ ዎሳና፤ ቃይ ናናይ ባረንቱ አዎቱዋ ቦላንነ ባረንቱ አየቱዋ ቦላ ደንዲደ፥ ኡንቱንታ ዎሳና። 13አሳይ ኡባይ ህንተንታ ታ ሱን ድራዉ እጻና፤ ሽን ዉርሰይ ጋካናዉ ገንጭያዌ አታና።
የሩሳላመ ጋካና ዎልቃማ ኢታ መቱዋ
(ማቶሳ 24:15-28፤ ሉቃሳ 21:20-24)
14ሽን ናብያ ዳኔል ኦዴዳ ባሻ ቱናተይ ኤቃናዉ በሰናሳን ኤቂሽን ህንተ በእያ ዎደ፥ ሄዌ ዋግያዌንቶ፥ ናባብያዌ አኬኮ፤ ይሁዳ ጋድያን ሄ ዎደ ደእያዋንቱ ደርያኮ በትኖ።#ዳኔላ 9:27፤ 11:31፤ 12:11 15ጎልያ ሁጲያን ደእያ ኡራይካ እትባ አካናዉ ዱገ ዎደ፥ ባረ ሶይ ገሎፖ። 16ጋደን ደእያዌካ ባረ ማዩዋ አካናዉ ጉየ ስሞፖ። 17ሄ ዎደ ሻሃራ ማጫዋንቶነ ንያ ማጫዋንቶ አዬሮ። 18ሽን ሀዌ ኡባይ ሀንያ ዎዲ ባልጉዋ ግደና ማላ፥ ጾሳ ዎስተ፤ 19አያዉ ጎፐ፥ ጾሳይ ሳኣ ኮይሮ መዳዋፐ ዶሚደ፥ ሀእ ጋካናዉ፥ ኡባካ ደእቤና መቱ፥ ቃይ ሀዋፐ ስንዉካ ኡባ ደኤና መቱ አሳ ቦላ ሄ ዎደ ደአና።#ዳኔላ 12:1፤ ሳፃ 7:14 20ጎዳይ ሄ ጋላሳቱዋ ፓይዱዋ ጉያዌ ባዌንቶ፥ አሳ ግዴዳ ኦንነ አተና፤ ሽን እ ባረ ዶሬዳ አሳቱዋ ድራዉ፥ ሄ ጋላሳቱዋ ፓይዱዋ ጉዳ።
21ሄ ዎደ ኦንነ ህንተንታ፥ “በእተ፤ ክርስቶስ ሀዋን ደኤ” ዎይ፥ “በእተ፤ ክርስቶስ፥ ሄዋን ደኤ” ያጎፐ፥ ሄዋ አማኖፕተ። 22አያዉ ጎፐ፥ ዎርዳንቻ ክርስቶሳቱነ ዎርዶ ናባቱ ደንዲደ ባረንቶ ዳንዳየቶፐ፥ ሀራይ አቶ ጾሳይ ዶሬዳዋንታካ ባለናዉ ማላታነ ማላልስያባ በሳና። 23ሽን ህንተ ናገትተ፤ ታን ህንተንቶ ኡባባ ካሰታደ ኦዳድ።
ክርስቶሳ ላኤን ዩሳ
(ማቶሳ 24:29-31፤ ሉቃሳ 21:25-28)
24ሽን ሄ ዎደ ሄ ዋይያፐ ጉይያን፥
አዋይ ማና፤
አገናይ ፖእያዋ አጋና፤#ኢሳ. 13:10፤ ህዝ. 32:7፤ ኢዩ. 2:10፣ 31፤ 3:15፤ ሳፃ 6:12
25ጾልንታቱ ሳሉዋፐ ኩንዳና።
ቃይ ሳሉዋን ደእያ ዎልቃቱካ ቃጸታና።#ኢሳ. 34:4፤ ኢዩ. 2:10፤ ሳፃ 6:13
26ሄ ዎደ ታን፥ አሳ ናአይ፥ ዎልቃማ ዎልቃናነ ቦንቹዋና ሻርያ ግዶና ዪሽን፥ ኡንቱንቱ በአና።#ዳኔላ 7:13፤ ሳፃ 1:7 27ሄ ዎደ ታን ኪታንቻቱዋ ሳኣ ኦይዱ ባጋ ኪታና፤ ሳኣ ጋጻፐ ሳሉዋ ጋጻ ጋካናዉ፥ ጾሳይ ዶሬዳ አሳ ሺሻና።
ዎድያ ዉርሰይ ጋኬዳዋ ማላታ በስያ ባላስያ ምቶ
(ማቶሳ 24:32-35፤ ሉቃሳ 21:29-33)
28ሌምሱዋ ባላሳቶ ግያ ምትፐ ታማርተ፤ ባላሳታ አጭያ ዎደነ እዝ ሀይይ ሀይትያ ዎደ፥ ቦኒ ማቴዳዋ ህንተ ኤሪታ። 29ሀዋዳንካ ህንተ ሄ ኡባባይ ሀንያዋ በእያ ዎደ፥ እ#13:29 እ፦ የሱሳ ጉሳ። ማታቲደ ፐንግያ ሺቄዳዋ#13:29 ማታቲደ ፐንግያ ሺቄዳዋ፦ ጉሳይ፥ የሱሳ ዩሳይ ማቴዳ ጉሳ። ኤርተ። 30ታን ህንተንቶ ቱሙዋ ኦዳይ፤ ሀ ኡባባይ ሀናና ጋካናዉ፥ ሀ ዎድያ የለታይ ሀይቂድገና። 31ሳሉነ ሳአይ አና፤ ሽን ታ ቃላይ ኡባካ አና።
ዉርሰ ጋላሳነ ሳትያ ኦንነ ኤረና
(ማቶሳ 24:36-44)
32ሽን ሄ ጋላሳነ ሄ ሳትያ አዉዋ ጻላላፐ አትን፥ ሀራይ አቶ ሳሉዋን ደእያ ኪታንቻቱዋ ግድና፥ ዎይ ታና ናኣ ግድናካ ኦንነ ኤርያባይ ባዋ። 33ሄ ዎዲ አዉደ ግዳነንቶ፥ ህንተ ኤረና ድራዉ፥ ናገትተ፤ ምንተ፤ ጾሳ ዎስተ። 34ታ ዩሳይ ባረ ጎልያ አጊደ፥ ኦግያ ብያ ብታንያ ማላ፤ ብታኒ ባረ ቆማቶ ሁጲያን ሁጲያን ኦሱዋ እሚደ፥ ኡንቱንታ ባረ ኦሶ ካፖ ኦዳ፤ ቃይ ካርያ ናግያዌካ ምንሲደ ናጋና ማላ አዛዜዳ።
35ሄዋ ድራዉ፥ ምንተ፤ አያዉ ጎፐ፥ ጎልያዉ ኦማርሳ ግድና፥ ዎይ ቃማ ብላሄ ግድና፥ ዎይ ኩቱ ዋስያ ዎደ ግድና፥ ዎይ ጉራ ዎንቱማን ግድና አዉደ ያነንቶ፥ ህንተ ኤርክታ። 36ህንተንቱ አኬከናን እ ዮፐ፥ ህንተንታ ገምእሼዳዋንታ ደመና ማላ ምንተ። 37ታን ህንተንቶ ኦድያዋ አሳ ኡባዉ ኦዳይ፤ ምንተ።
Currently Selected:
ማርቆሳ ምሽራቹዋ 13: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
