ማቶሳ ምሽራቹዋ 27
27
የሱስ ጵላጾሳ ስን ፕርዳዉ ሺቄዳ
(ማር. 15:1፤ ሉቃሳ 23:1-3፤ ዮሃ. 18:28-32)
1ዎንታ ጉራን ቄሳቱዋ ካፓቱ ኡባቱነ ጋድያ ጭማቱ የሱሳ ዎናዉ ማቀቴድኖ፤ 2ኡንቱንቱ የሱሳ ቃች አፊደ፥ ጋድያ አይስያ ጵላጾሳዉ አ እሜድኖ።
3የሱሳ ሄ ዎደ ኦይዳ ይሁዳይ ጵላጾስ የሱሳ ቦላ ፕርዴዳዋ በኢደ፥ “አዬሮ! ኦይናን አጋርክታ!” ያጊደ፥ ሄ ማንእያን ሀታሙ ብራ ቄሳቱዋ ካፓቶነ ጋድያ ጭማቶ ጉየ ዛሪደ፥ 4“ታን ጌሻ አሳ ኦይደ ናጋራ ኦድ” ያጌዳ።
ሽን ኡንቱንቱ አ፥ “ሄዌ ኑዉ አያ መቴ? ሄዌ ነ ሸነ” ያጌድኖ።
5ይሁዳይ ብራ ጌሻ ጎልያን ኦል አጌዳ፤ ኡንቱንቱ ማታፐ ቢደ፥ ሱለት ሀይቄዳ።
6ቄሳቱዋ ካፓቱ ብራ አኪደ፥ “ሀ ብራይ ሱ ሚሻ ግድሽን፥ ኑን ጌሻ ጎልያ ሚሻና ጋያዌ ዎጋ ግደና” ያጌድኖ። 7ሄዋፐ ጉየ እትፐ ዞረቲደ፥ እማ አሳዉ ሞጎ ጋድያ ኦናዉ ኡርቃፐ ሚሻ መያዋንቱ ጋድያ ሻሜድኖ። 8ሄዋ ድራዉ፥ ሄ ጋዲ ሀቼ ጋካናዉካ፥ ሱ ጋድያ ጌተቲደ ጼሰቴ።
9ናብያ ኤርማስ፥ “ኡንቱንቱ አዉ እማናዉ ቆፔዳ ሀታሙ ሹቻ ብራ አኪደ፥ 10ጎዳይ ታና አዛዞዋዳን፥ ኡርቃፐ ሚሻ መያዋንቱ ጋድያ ሻማናዉ እሜድኖ” ጌተቶዌ ሄ ዎደ ፖለቴዳ ጌዳ።#ዛካ. 11:12-13
ጵላጾስ የሱሳ ኡባባ ኦቼዳ
(ማር. 15:2-5፤ ሉቃሳ 23:3-5፤ ዮሃ. 18:33-38)
11የሱስ ጋድያ አይስያዋ ስን ሺቅና፥ ጋድያ አይስያዌ አ፥ “ኔን አይሁዳቱዋ ካቴ?” ያጊደ ኦቼዳ።
የሱስ አ፥ “ኔንካ ጋደኣ” ያጌዳ።
12ቄሳቱዋ ካፓቱነ ጋድያ ጭማቱ አ ሞትና፥ ኡንቱንቶ አይነ ዛሩዋ እምቤና። 13ሄ ዎደ፥ ጵላጾስ የሱሳ፥ “ሀዋንቱ ኔና ሞትያባ ኡባ ስስኪ?” ያጌዳ።
14የሱስ ሀራይ አቶ፥ እት ቃላካ ዛረናን እጽና፥ ጋድያ አይስያዋንቱ ዳሪ ማላለቴዳ።
የሱስ ሀይቆ ፕርደቴዳ
(ማር. 15:6-15፤ ሉቃሳ 23:13-25፤ ዮሃ. 18:39-40፤ 19:1-16)
15ጋድያ አይስያዌ ፓስጋ ቦንችያ ጋላሳን፥ አሳይ ኮይያ እት ኡራ ቃሹዋፐ ብልያ ዎጋይ ደኤ። 16ሄ ዎደ እት ባርባና ጌተትያ የሱስ ዳሮ ኤረቴዳ ኢታ ብታኒ ቃሾ ጎለን ደኤ። 17ሄዋ ድራዉ፥ ጮራ አሳይ እትሳ ሺቄዳሳን ጵላጾስ፥ “ታን ህንተንቶ ባርባና ግያ የሱሳ ብሎ፥ ዎይ ክርስቶሳ ጌተትያ የሱሳ ብሎ?” ያጊደ አሳ ኦቼዳ። 18አያዉ ጎፐ፥ ኡንቱንቱ ቃናቲደ የሱሳ ኦዳዋ እ ኤሬ።
19ጵላጾስ ፕርዳ ጎለን ኡት ደእሽን፥ አ ማቻታ አዉ፥ “ሄ ጽሎ ብታንያ አይነ ኦፓ፤ አያዉ ጎፐ፥ ታን ሀቼ ቃማ አኩሙዋን አባን ዳሮ መቶታድ” ያጋደ ኪታዱ።
20ሽን ቄሳቱዋ ካፓቱነ ጋድያ ጭማቱ ጵላጾስ ባርባና ብሊደ፥ የሱሳ ዎናዳን፥ ሺቄዳ አሳይ አ ዎሳና ማላ፥ አሳ ጭሜድኖ።
21ጵላጾስ ዛሪደ ኡንቱንታ፥ “ታን ኡንቱንቱ ላአቱዋፐ ህንተዉ ኦና ብላናዳን ኮዪቴ?” ያግና ኡንቱንቱ፥ “ባርባና ብላናዳን ኮዬቶ” ያጌድኖ።
22ጵላጾስ፥ “ያትና፥ ክርስቶሳ ጌተትያ የሱሳ ዎቶ?” ያጊደ ኡንቱንታ ኦችና ኡባይ፥ “ማስቃልያ ቦላ ምስማርያን ሸቲደ ካቀቶ” ያጌድኖ።
23ጵላጾስ አሳ፥ “አያዉ? አይ ኢታባ ኦዴ?” ያጌዳ።
ሽን አሳይ ካሰዋፐካ ባረንቱ ኮሻ ቁ ኦደ፥ “ማስቃልያ ቦላ ምስማርያን ሸቲደ እ ካቀቶ” ያጌድኖ።
24ዋላሳይ ደንዳናዋፐ አትን፥ አይነ ሀነናዋ ጵላጾስ በኢደ፥ ሃ አኪደ፥ “ሀ ብታኒ ሀይቂያዋን ታን ገልከ፤ ሄዋ ህንተንቱ ኤርተ” ያጊደ ሺቄዳ አሳ ስንን ባረ ኩሽያ ሜጨቴዳ።#ዛረ. 21:6-9
25ሺቄዳ አሳይ ኡባይ ዛሪደ፥ “አ ሱ ጎሚ ኑናነ ኑ ናና ጋኮ” ያጌዳ።
26ሄዋፐ ጉይያን፥ ጵላጾስ ባርባና ኡንቱንቶ ብሌዳ፤ ልሱዋን የሱሳ ሾጪደ፥ ማስቃልያ ቦላ ምስማርያን ሺደ ካቃናዉ ኡንቱንቶ አደ እሜዳ።
ዎታዳራቱ የሱሳ ቦላ ቅሊጬድኖ
(ማር. 15:16-20፤ ዮሃ. 19:2-3)
27ሄዋፐ ጉይያን፥ ጵላጾሳ ዎታዳራቱ የሱሳ ጋድያ አይስያዋ ቤሩዋ አፍና፥ ዎታዳራቱ ኡባይ አ ምይያን ዩይ አደ ኤቄድኖ። 28አ ማዩዋ ቃር አኪደ፥ ዞኦ ማዩዋ አ ማይዜድኖ። 29ቃይ አጉን ካላቻ ጊግሲደ፥ አ ሁጲያን ዎድኖ፤ አ ኡሸቻ ኩሽያን ማቃ ጻምኣ ኦይደ፥ አ ስንን ጉልባቲደ፥ “አይሁዳቱዋ ካተዉ፥ ሳሮ ደአይ!” ያጊደ፥ አ ቦላ ቅሊጬድኖ። 30አ ቦላ ጩቼድኖ፤ ሄ ማቃ ጻምኣ አኪደ፥ አ ሁጲያ ሾጬድኖ። 31ኡንቱንቱ አ ቦላ ቅሊጬዳዋፐ ጉይያን፥ ዞኦ ማዩዋ አፐ ቃር አኪደ፥ አ ማዩዋ አ ማይዜድኖ፤ ቃይ ማስቃልያ ቦላ ምስማርያን ሺደ አ ካቃናዉ አፌድኖ።
የሱስ ካቀቴዳ
(ማር. 15:21-32፤ ሉቃሳ 23:25-43፤ ዮሃ. 19:17-27)
32ኡንቱንቱ ካረ ከሲደ፥ እት ስሞና ጌተትያ ቀሬና ጋደ አሳ ደሚደ፥ የሱሳ ማስቃልያ ዎልቃን ቶሴድኖ። 33ጎልጎታ ጌተትያሳ ጋኬድኖ። “ጎልጎታ” ያገትያዌ “ሁጲያሳ” ግያዋ። 34ሄዋን ኡንቱንቱ ጫሜዳ ዎይንያ ኤሳ የሱሳዉ ኡሻናዉ እሜድኖ፤ እ ሄዋ ጋንጽ ጼሊደ፥ ኡሸናን እጼዳ።#ማዝ. 69:21
35ኡንቱንቱ ማስቃልያ ቦላ ምስማርያን ሺደ አ ካቆዋፐ ጉይያን፥ አ ማዩዋ ሻኪደ፥ ሳማ የጊደ አኬድኖ።#ማዝ. 22:18 36ሄዋፐ ጉይያን፥ አ ናጋናዉ ሄዋን ኡት አጌድኖ። 37ቃይ፥ “ሀዌ አይሁዳቱ ካትያ የሱሳ” ያጊደ ሞቱ ጻፈቶዋ አ ሁጰ ባጋና ዎድኖ። 38የሱሳና ሄ ዎደ ላኡ ካይሳቱዋ እቱዋ አፐ ኡሸቻ ባጋና፥ ቃይ እቱዋ አፐ ሀድርሳ ባጋና፥ ማስቃልያ ቦላ ምስማርያን ሺደ ካቄድኖ።
39ኦግያና አያ አሳይ የሱሳ ካደ፥ ባረንቱ ሁጲያ ቃደ ቦሬድኖ።#ማዝ. 22:7፤ 109:25 40“ጌሻ ጎልያ ኮላደ ሄዙ ጋላሳ ግዶን ኬጽያዎ፥ ነ ሁጲያ አሻ፤ ኔን ጾሳ ናኣ ግዶፐ፥ አነ ማስቃልያ ቦላፐ ዎ” ያጌድኖ።#ማቶሳ 26:61፤ ዮሃ. 2:19
41ሄዋዳንካ፥ ቄሳቱዋ ካፓቱ ህግያ ታማርስያዋንቱናነ ጭማቱዋና እትፐ የሱሳ ቦላ ቅሊጪደ፥ ሀዋዳን ያጌድኖ፤ 42“ሀራንታ አሼዳ፤ ሽን ባረና አሻናዉ ዳንዳየና። እ እስራኤልያ ካትያ፤ አነ ማስቃልያ ቦላፐ ሀእ ዎ፤ ኑንካ ቃይ አን አማናና። 43ጾሳን እ አማነቴ፤ ጾሳይ አ አሻናዉ ኮዮፐ አነ አሾ፤ አያዉ ጎፐ፥ እ ባረና፥ ‘ታን ጾሳ ናኣ’ ጌ” ያጌድኖ።#ዛረ. 22:8
44ቃይ ሀራይ አቶ፥ አናና ማስቃልያ ቦላ ምስማርያን ሸቲደ ካቀቴዳ ካይሳቱካ ሄዋዳን ጊደ፥ አ ቦላ ቅሊጬድኖ።
የሱስ ሀይቄዳ
(ማር. 15:33-41፤ ሉቃሳ 23:44-49፤ ዮሃ. 19:28-30)
45ኡሱፑን ሳትያፐ ዶሚደ፥ ኡዱፑ ሳትያ ጋካናዉ፥ ቢታይ ኡባይ ሜዳ። 46ኡዱፑ ሳተ ግድያ ሄራን የሱስ ባረ ቃላ ቁ ኦደ፥ “ኤሎሄ፥ ኤሎሄ፥ ላማ ሳባቅታኒ?” ያጌዳ። ሄዋ ጉሳይ፥ “ታ ጾሳዉ፥ ታ ጾሳዉ፥ ታና አያዉ ጮኡ ጋድ?” ጉሳ።#ማዝ. 22:1
47ሄዋን ኤቄዳ አሳፐ እቱ ሄዋ ስሲደ፥ “ሀ ብታኒ ኤላሳ ጼሴ” ያጌዳ። 48ሄ ማንእያን ኡንቱንቱፐ እቱ ዎጺደ፥ እስፖንጅያ አኪደ፥ ጫላ ዎይንያ ኤሳ ግዶ የጊደ፥ ሄዋ ማቃ ጻምኣ ጼራን ዎደ፥ ኡሻናዉ አ ዶናኮ ሺሼዳ።#ማዝ. 69:21 49ሽን የኮንቱ፥ “አነ ደአሻ፥ ኤላስ አ አሻናዉ ያናዌንቶ በአና” ያጌድኖ። 50የሱስ ላኤንዋ ባረ ቃላ ቁ ኦ ዋሲደ፥ ሀይቂ አጌዳ።
51አኬክተ፤ ጌሻ ጎልያን ካቀቴዳ ጋርዱ ቆሞፐ ዱገ ጋካናዉ፥ ላኡ ከሲደ፥ ፖሸት ዎዳ፤ ሳአይ ቃጼዳ። ቃይ ዛላይካ ጳልቀቴዳ፤#ከሳ 26:31-33 52ጮራ ዱፉ ዶየቴዳ። ጾሳ አሳፐ ጮራቱ ሀይቄዳዋንቱ፥ ሀይቁዋፐ ደንዴድኖ። 53ኡንቱንቱ ዱፉዋፐ ከሲደ፥ የሱስ ሀይቁዋፐ ደንዶዋፐ ጉይያን፥ ጌሻ ካታማ ቤድኖ፤ ሄዋን ኡንቱንታ ጮራ አሳይ በኤዳ።
54ጼቱዋ ካፑነ አናና የሱሳ ናግያ ዎታዳራቱ ሳአይ ቃጽያዋነ ሄዋን ሀኔዳዋ ኡባ በኤዳ ዎደ ዳሮ ያዬድኖ፤ ያሻ ጋሱዋን፥ “ቱሙ ሀዌ ጾሳ ናኣ” ያጌድኖ።
55ሄዋን ጮራ ማጫዋንቱ፥ ጋሊላፐ ዶሚደ፥ የሱሳ ማዲደ ካልያዋንቱ፥ ሃኩዋን ኤቂደ ጼሊኖ። 56ኡንቱንቱ ግዶን ማግዳላ ጌተትያ ካታማፐ ዬዳ ማይራማ፥ ያቆባነ ዮሴፎ ዳያ ማይራማነ ዛብድዮሳ ናና ዳያ ደኢኖ።
የሱስ ሞገቴዳ
(ማር. 15:42-47፤ ሉቃሳ 23:50-56፤ ዮሃ. 19:38-42)
57ሳአይ ኦማርስያ ዎደ፥ ዮሴፎ ጌተትያ እት ዱረ ብታኒ፥ አርማትያሳ ካታማ ብታኒ ዬዳ፤ እ ባረ ሁጰዉካ የሱሳ ካልያዋ። 58ዮሴፎ ጵላጾሳኮ ቢደ፥ የሱሳ አሃ አካናዉ ዎሴዳ፤ ጵላጾስ ዮሴፎ እመታና ማላ አዛዜዳ። 59የሱሳ አሃ አኪደ፥ ጌሻ ሞጉዋ ማዩዋን 60ጻጺደ ባረዉ ሞገታናዉ ሹቻ ዎጬዳ ኦራ ጎንጎሉዋ ግዶን አ አሃ ዎዳ፤ ቃይ ሄ ጎንጎሉዋ ዶናን ዎጋ ሹቻ ጎንዶርስ ዎደ፥ ባሽ ቤዳ። 61ማግዳላ ካታማፐ ዬዳ ማይራማነ የኮ ማይራማ ሄዋን ጎንጎሉዋኮ ስሚደ ኡቴድኖ።
62ሳምባታዉ ጊገትያ ጋላሳፐ ዎንተ ጋላስ፥ ቄሳቱዋ ካፓቱነ ፓርሳዋቱ ጵላጾሳና ጋከቲደ፥ ሀዋዳን ያጌድኖ፤ 63“ጎዳዉ፥ ሄ ዎርዱ ፓጻ ደእያ ዎደ፥ ‘ታን ሄዙ ጋላሳፐ ጉይያን፥ ሀይቁዋፐ ደንዳና’ ያጎዋ ኑን ሀሳዬዶ።#ማቶሳ 16:21፤ 17:23፤ 20:19፤ ማር. 8:31፤ 9:31፤ 10:33-34፤ ሉቃሳ 9:22፤ 18:31-33 64ሄዋ ድራዉ፥ አ ሞጌዳ ጎንጎሉዋ ሄዙ ጋላሳ ጋካናዉ፥ ሎይ ናጋና ማላ አዛዛርኪ፤ ሄዌ ዮፐ አ ካልያዋንቱ ቢደ፥ አ አሃ ዉኢደ አሳዉ፥ ‘ሀይቁዋፐ ደንዴዳ’ ያጋናዋንታ፤ ላኤንያ ባላይ ካሰ ባላፐ ኡባ ያ ኢታና” ያጌድኖ።
65ጵላጾስ ኡንቱንታ፥ “ህንተንቶ ናግያዋንቱ ደኢኖ፤ ቢደ ህንተንቶ ዳንዳየትያ ኬና ናግሽተ” ያጌዳ።
66ሄዋፐ ጉየ ኡንቱንቱ ቢደ፥ ሹቻ ቦላ ማታፋ አታሚደ፥ ቃይ ናግያዋ ያን ዎደ፥ የሱሳ ሞጌዳ ጎንጎሉዋ ናግሴድኖ።
Currently Selected:
ማቶሳ ምሽራቹዋ 27: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
