ማቶሳ ምሽራቹዋ 26
26
የሱሳ ቦላ ማቀቴድኖ
(ማር. 14:1-2፤ ሉቃሳ 22:1-2፤ ዮሃ. 11:45-53)
1የሱስ ሀ ትምርትያ ኡባ ዉርሴዳ ዎደ፥ ባረና ካልያዋንታ፥ 2“ላኡ ጋላሳፐ ጉይያን፥ ፓስጋ ባላ ቦንችያ ጋላሳ ግድያዋ ኤሪታ። ሄ ጋላስ ታና፥ አሳ ናኣ፥ አሳይ ማስቃልያ ቦላ ምስማርያን ሺደ ካቃናዉ አደ እማና” ያጌዳ።#ከሳ 12:1-27
3ሄ ዎደ ቄሳቱዋ ካፓቱነ ጋድያ ጭማቱ ቃያፋ ጌተትያ ቄሳቱዋ ኡባቱዋ ካፑዋ ዎጋ ጎልያን ሺቂደ፥ 4አሳይ ኤረናን የሱሳ ኦይቂደ፥ ዎናዉ ማቀቴድኖ። 5ሽን ኡንቱንቱ፥ “አሳይ ዋላሳ ከሰና ማላ፥ ፓስጋ ቦንችያ ጋላስ ሄዋ ኦኮ” ያጌድኖ።
እት ማጫ ምሽራታ የሱሳ ሽቱዋ ጫጫፋዱ
(ማር. 14:3-9፤ ዮሃ. 12:1-8)
6የሱስ ቢታንያ ካታማን ኦሉዋ ሀርግያ ስሞና ሶይን ደእሽን፥ 7እት ምሽራታ አልባስጽሮሳ ጌተትያ ሹቻፐ ኦሰቴዳ አልባስጽሮሳ ባሬታ ኩሜዳ ዳሪ አልኦ ሽቱዋ አካደ ዬዳዉና ቁማ እ ሚና፥ ሄ ሽቱዋ የሱሳ ሁጲያን ጫጫፋዱ። 8ሽን የሱሳ ካልያዋንቱ ሄዋ በኢደ፥ “ሀ ሽቱዋ ጮ ባይዙሳይ አያሴ? 9አያዉ ጎፐ፥ ሀ ሽቱዋ አልኦ ጋትያን ዛልኢደ፥ ሚሻ ህዬሳዉ እማናዉ ዳንዳየቴ” ያጌድኖ።
10የሱስ ኡንቱንቱ ግያዋ ኤሪደ፥ ኡንቱንታ ሀዋዳን ያጌዳ፤ “ሀ ምሽራቶ አያዉ ዋይሲቴ? እዛ ታዉ ሎኦባ ኦዱ። 11ህዬሳቱ ኡባ ዎደ ህንተናና ደኢኖ፤ ሽን ታን ህንተናና ኡባ ዎደ ደእከ፤#ዛረ. 15:11 12እዛ ሀ ሽቱዋ ታ ቦላ ትግያዌ ታና ሞጋናዉ ጊግሳናሳ። 13ታን ህንተንቶ ቱሙዋ ኦዳይ፤ ሳኣ ኡባን ሀ ዎንጋላ ምሽራቹዋ ኦድያሳን ሀቃንነ፥ አሳይ እዞ ዎዛና አና ማላ፥ እዛ ኦዳዌ ኦደታናዋ” ያጌዳ።
ይሁዳይ የሱሳ አደ እማናዉ የዉዋን ጊጌዳ
(ማር. 14:10-11፤ ሉቃሳ 22:3-6)
14ሄ ዎደ ታማነ ላኡ የሱሳ ካልያዋንቱፐ እቱ ይሁዳ አስቆሮቱ ያገትያዌ ቄሳቱዋ ካፓቱዋኮ 15ቢደ፥ “ታን ህንተንቶ የሱሳ ኦይፐ፥ ታዉ አያ እማንቴ?” ያግና ኡንቱንቱ አዉ ሀታሙ ብራ ቆፒደ እሜድኖ።#ዛካ. 11:12 16ሄዋፐ ጉይያን፥ ይሁዳይ የሱሳ አ እማናዉ እንጀትያ ዎድያ ዎቼ።
የሱስ አይሁዳቱ ፓስጋ ካዉዋ ባረና ካልያዋንቱና ሜዳ
(ማር. 14:12-21፤ ሉቃሳ 22:7-14፣ 21-23፤ ዮሃ. 13:21-30)
17ባላ ዳቡዋ ምያ ጋላሳ ቦንችያ ኮይሮ ጋላስ፥ የሱሳ ካልያዋንቱ አኮ ዪደ፥ “ፓስጋ ቦንችያ ጋላስ ኔን ማና ቁማ ሀቃን ጊግሳኔ?” ያጌድኖ።
18ሄዋፐ ጉየ የሱስ ኡንቱንታ፥ “ካታማ ቢደ፥ እት ብታንያ፥ ‘ታማርስያዌ ኔና፥ “ታዉ ዎዲ ጋኬዳ፤ ታን ታና ካልያዋንቱና ፓስጋ ቦንችያ ጋላሳ ነ ሶይን አና” ጌዳ’ ጊተ” ያጌዳ።
19አ ካልያዋንቱ የሱስ ባረንታ አዛዞዋዳን ኦደ፥ ፓስጋ ቦንችያ ጋላስ ማና ቁማ ጊግሴድኖ።
20ሳአይ ኦማርሴዳ ዎደ፥ የሱስ ታማነ ላኡ አ ካልያዋንቱና ቁማ ማናዉ ኡቴዳ። 21ኡንቱንቱ ሚሽን፥ የሱስ ኡንቱንታ፥ “ታን ህንተንቶ ቱሙዋ ኦዳይ፤ ህንተፐ እት ኡራይ ታና አደ እማናዋ” ያጌዳ።
22ኡንቱንቱ ዳሪ ዳጋሚደ፥ ሁጲያን ሁጲያን፥ “ጎዳዉ፥ ቱሙ ታኔሻ?” ጉሳ ዶሜድኖ።
23የሱስ ዛሪደ፥ “ባረ ኩሽያ ታናና እትፐ ዎጪትያፐ የዲደ ቱሽያዌ ታና አ እማና።#ማዝ. 41:9 24ታን፥ አሳ ናአይ፥ ጾሳ ማጻፋይ ሀይቃና ጌዳዋዳን ሀይቃና፤ ሽን ታና፥ አሳ ናኣ፥ አ እምያ ኡራዉ አየሮ፤ ሄ ኡራይ የለተናን አቴደንቶ አዉ ሎአ ሽን” ያጌዳ።
25አ አ እምያ ይሁዳይ ዛሪደ፥ “ታማርስያዎ፥ ኔን ግያዌ ታኔ?” ያጌዳ።
የሱስ ዛሪደ አ፥ “ኔን ነ ሁጲያን ጋዳ” ያጌዳ።
ጎዳ ካዉዋ አክያ ዎጋ
(ማር. 14:22-26፤ ሉቃሳ 22:15-20፤ 1 ቆሮ. 11:23-25)
26ኡንቱንቱ ሚሽን፥ የሱስ ዳቡዋ አኪደ፥ ጾሳ ጋላቴዳ፤ ሄ ዳቡዋ መንሬደ፥ ባረና ካልያዋንቶ እሚደ፥ “ሄይተ፤ ሚተ፤ ሀዌ ታ አሹዋ” ያጌዳ።
27ጹኣ አኪደ፥ ጾሳ ጋላቴዳ። ኡንቱንቶ እሚደ፥ “ኡባይ ሀዋፐ ኡሽተ፤ 28አያዉ ጎፐ፥ ሀዌ ዳሮ አሳ ናጋራይ አቶ ጌተታና ድራዉ ጉክያ ታ ሱ፤ ታ ሱይ ኦራ ጫቁዋ።#ከሳ 24:8፤ ኤር. 31:31-34 29ሽን ታን ህንተንቶ ኦዳይ፤ ታን ታ አቡ ካዉተን ኦራ ዎይንያ ኤሳ ህንተንቱና ኡሻና ጋላሳይ ጋካናዉ፥ ላኤንዋ ሀ ዎይንያ ኤሳ ኡባካ ኡሽከ” ያጌዳ።
30ማዝሙርያ የጾዋፐ ጉይያን፥ ደብረ ዛይተ ጌተትያ ደርያ ቤድኖ።
የሱስ ጰጽሮስ ካዳናዋ ካሰቲደ ኦዴዳ
(ማር. 14:27-31፤ ሉቃሳ 22:31-34፤ ዮሃ. 13:36-38)
31የሱስ ሄ ዎደ ኡንቱንታ፥ “ሀቼ ቃማ ህንተንቱ ኡባይ ታና አጊደ ክቻና፤ አያዉ ጎፐ፥ ጾሳ ማጻፋይ፥
“ ‘ጾሳይ ዶርሳ ሄምያዋ ዎናዋ፤
ሄዋፐ ጉይያን ዶርሳ ዉዲ ላለታናዋ’
ያጌ።#ዛካ. 13:7 32ሽን ታን ሀይቁዋፐ ደንዶዋፐ ጉይያን፥ ህንተፐ ካሰታደ ጋሊላ ባና” ያጌዳ።
33ጰጽሮስ ዛሪደ፥ “ኡንቱንቱ ኡባቱ ኔና አጊደ ክቻናዋንታ፤ ታን ኔና ኡባካ የጋደ ክችከ” ያጌዳ።
34የሱስ ጰጽሮሳ፥ “ታን ነዉ ቱሙዋ ኦዳይ፤ ሀቼ ቃማ ኩቱ ዋሳናፐ ካሰ፥ ኔን ታና ሄዙ ካላ ካዳናሳ” ያጌዳ።
35ጰጽሮስ ዛሪደ፥ “ታን ሀራይ አቶ፥ ኔናና እትፐ ሀይቂንቶካ፥ ኔና ኡባካ ካድከ” ያጌዳ። ቃይ የሱሳ ካልያዋንቱ ኡባቱካ ሄዋዳን ጌድኖ።
የሱስ ጌተሰማንያን ዎሴዳ
(ማር. 14:32-42፤ ሉቃሳ 22:39-46)
36የሱስ ሄ ዎደ ባረና ካልያዋንቱና ጌተሰማንያ ጌተትያሳ ቢደ ኡንቱንታ፥ “ታን ህን ባደ ጾሳ ዎስሽን፥ ህንተንቱ ሀዋን ኡትሽተ” ያጌዳ። 37ሄዋፐ ጉየ ጰጽሮሳነ ዛብድዮሳ ናና ላኡዋ ባረናና አፊደ፥ ዳሮ ካዩዋነ ኡጋ ዶሜዳ። 38ቃይ ኡንቱንታ፥ “ታን ሀይቃና ጋካናዉካ ካዮታይ፤ ሀዋን ቤጎቲደ፥ ታናና ናግተ” ያጌዳ።
39ላፋ ስንኮ ሺቂደ፥ ሳኣን ጉፋኒደ፥ “ታ አቦ፥ ዳንዳየትያዋ ግዶፐ፥ ሀ ጹኣ ታፐ ድጋ፤ ሽን ኔን ኮይያዋዳን ሀኖፐ አትን፥ ታን ኮይያዋዳን ሀኖፖ” ያጊደ ጾሳ ዎሴዳ።
40የሱስ ባረና ካልያዋንቱኮ ስሚደ ዬዳ፤ ገምእሾዋንታ ደሚደ ጰጽሮሳ፥ “ህንተንቱ እት ሳተንቶነካ ገምእሸናን ታናና ናጋናዉ ዳንዳይበይክቴ? 41ፓጭያን ህንተንቱ ገለና ማላ፥ ምንተነ ጾሳ ዎስተ፤ አያናይ ጊግ ኡቴዳ፤ ሽን አሳተ ኤሻይ ዳቡራንቻ” ያጌዳ።
42የሱስ ቃይ ላኤንዋ ቢደ፥ “ታ አቦ፥ ታን ሀ ዎልቃማ መቱዋ አከናን ደእሽን ጹኣ ደንናዉ ዳንዳየተናዋ ግዶፐ፥ ኔን ግያዌ ሀኖ” ያጊደ ጾሳ ዎሴዳ። 43ቃይካ ስም ዪደ፥ አ ካልያዋንቱ አይፍያ ገምእሹ ጎዝ ዎዳ ድራዉ፥ ገምእሾዋንታ ደሜዳ።
44ቃይካ ኡንቱንታ የግ ቢደ፥ ሄዘንዋ ካሰ ቃላ ዛሪደ፥ ጾሳ ዎሴዳ። 45ሄዋፐ ጉይያን፥ ባረና ካልያዋንቶ ዪደ፥ “ሀእ ጋካናዉካ ገምእሺቴነ ሸምፒቴ? በእተ፥ ታና፥ አሳ ናኣ፥ ናጋራንቻ አሳቶ አደ እምያ ዎዲ ጋኬዳ። 46ደንድና ቦይተ፤ በእተ፥ ታና አ እምያዌ ሀዌኩ ጋኬዳ” ያጌዳ።
የሱስ ባረ ሞርከቱዋን ኦይቀቴዳ
(ማር. 14:43-50፤ ሉቃሳ 22:47-53፤ ዮሃ. 18:3-12)
47የሱስ ሄዋ ብሮ ሃሳይሽን፥ ታማነ ላኡ አ ካልያዋንቱፐ እቱ፥ ይሁዳይ፥ ጋክ ዎዳ፤ ቃይ ቄሳቱዋ ካፓቱነ ጋድያ ጭማቱ ኪትና፥ ማሻነ ጻምኣ ኦይቄዳ ጮራ አሳይ አናና እትፐ ዬዳ። 48የሱሳ አ እምያዌ ሄ ጮራ አሳ፥ “ታን የርያዌ አ፤ አ ኦይቂተ” ያጊደ ማላ ኦድ ዎዳ።
49ኤለካ የሱሳኮ ሺቂደ፥ “ታማርስያዎ፥ ሳሮ ደአይ” ያጊደ አ የር አኬዳ።
50የሱስ ይሁዳ፥ “ታ ላገዉ፥ ኔን ኦናባ ኦ አጋ” ያጌዳ።
ሄዋፐ ጉይያን፥ ሄ ጮራ አሳይ ሺቂደ፥ የሱሳ ሎይ ኦይቄዳ። 51የሱሳና ደእያዋንቱፐ እቱ ባረ ማሻ ከሲደ ቄሳቱዋ ኡባቱዋ ካፑዋ ቆማ ሀይ ቃንጽ ኦሌዳ። 52የሱስ ሄ ዎደ አ ሀዋዳን ያጌዳ፤ “ነ ማሻ አኬዳሳን ዛራደ ዎ፤ አያዉ ጎፐ፥ ማሻ ደንያ ኡባይ ማሻን ሀይቃና። 53ታ አቡ ዳሮ ሻአ ኪታንቻቱዋ እት ኩን የዲደ፥ ታና ማዳና ማላ፥ ታን አ ዎሳናዉ ዳንዳይያዋ ኤርኪ? 54ያትና፥ ጾሳ ቃላይ ሀዋዳን ሀናናዉ በሴ ያጌዳዌ ዋኒደ ፖለታናዉ ዳንዳዪ?” ያጌዳ።
55ሄዋፐ ጉይያን፥ የሱስ ሄዋን ሺቄዳ ጮራ አሳ ሀዋዳን ያጌዳ፤ “ታና ካይሶ ከሲደ፥ ካይሱዋ ኦይቂያዋዳን ኦይቃናዉ ማሻነ ጻምኣ ኦይቂደ ዬድቴ? ታን ጌሻ ጎልያን ታማርሳደ፥ ጋላሳን ጋላሳን ህንተንቱና ኦያ ዎደ ታና ኦይቂበይክታ፤ 56ሽን ሀዌ ኡባይ ሀኔዳዌ ናባቱ ጾሳ ቃላን ጻፌዳዌ ፖለታናሳ” ያጌዳ።
የሱሳ ካልያዋንቱ ሄ ዎደ ኡባቱ አ የግ ቤድኖ።
የሱስ ፕርዳ ሻንጎ አዳ
(ማር. 14:53-65፤ ሉቃሳ 22:54-55፣ 63-71፤ ዮሃ. 18:13-14፣ 19-24)
57የሱሳ ኦይቄዳዋንቱ ቄሳቱዋ ኡባቱዋ ካፑዋ ቃያፋኮ፥ ህግያ ታማርስያዋንቱነ ጭማቱ ሺቄዳሳ አኪደ ቤድኖ። 58ሽን ጰጽሮስ ቄሳቱዋ ኡባቱዋ ካፑዋ ድርሳ ግዶ ጋካናዉ፥ ሃኩዋን አ ካሌዳ፤ የዉዋ ዉርሰ በአናዉ ድርሳ ግዶ ገሊደ፥ ናግያዋንቱና ኡት አጌዳ።
59ቄሳቱዋ ካፓቱነ ሺቄዳ አሳይ ኡባይ የሱሳ ዎናዉ አ ቦላ ዎርዱዋ ማርካ ደማናዉ ኮዬድኖ። 60ሽን ሀራይ አቶ ጮራ አሳይ ዪደ፥ አ ቦላ ዎርዱዋን ማርካትናካ አፐ አይነ ደምበይክኖ። ጉየፐ ላአቱ ዪደ፥ 61“ሀ ብታኒ፥ ‘ታን ጾሳ ጌሻ ጎልያ ኮላደ፥ ሄዙ ጋላሳን ዛራደ ኬጻናዉ ዳንዳያይ’ ጌዳ” ያጌድኖ።
62ቄሳቱዋ ኡባቱዋ ካፑ ደንድ ኤቂደ የሱሳ፥ “ሀዋንቱ ኔና ሞትያ ሞቶ ነዉ ዛርያባይ ባዌ?” ያጌዳ። 63ሽን የሱስ ጮኡ ጌዳ፤ ቃይካ ቄሳቱዋ ኡባቱዋ ካፑ አ፥ “ታን ኔና ደኡዋ ጾሳ ሱንን ጫላይ፤ ኔን ጾሳ ናኣ ክርስቶሳ ግዶፐ ኑዉ ኦዳ” ያጌዳ።
64የሱስ ዛሪደ፥ “ኔን ነ ሁጰዉካ ጋዳ፤ ሽን ታን ህንተንቶ ኦዳይ፤ ሀዋፐ ስንን፥ ህንተንቱ ታና፥ አሳ ናኣ፥ ዎልቃማ ጾሳፐ ኡሸቻ ባጋና ኡቴዳዋነ ሳሉዋ ሻርያና ዪሽን በአና” ያጌዳ።#ዳኔላ 7:13
65ሄዋፐ ጉይያን፥ ቄሳቱዋ ኡባቱዋ ካፑ ባረ ማዩዋ ፔ ኦሊደ፥ “ሀዌ ቦሬዳ፤ ኑና ሀዋፐ ስንን አያዉ ሀራ ማርካ ኮሺ? እ ሀእ ቦርያዋ ህንተንቱ ስሴድታ። 66ህንተንቱ ቆፋይ አዬ?” ያጌዳ።
ኡንቱንቱ፥ “አዉ ሀይቁ በሴ” ያጊደ ዛሬድኖ።#ዎጋ 24:16
67ሄዋፐ ጉይያን፥ ኡንቱንቱ አ ዴሙዋን ጩቺደ፥ አ ደቼድኖ፤ ሀራንቱ ቃይ አ ባቂደ፥#ኢሳ. 50:6 68“ክርስቶሳ! ኔን ኔና ናበ ጋሳሽን፥ ኔና ሾጬዳዌ ኦነንቶ አነ ኑዉ ኦዳ!” ያጌድኖ።
ጰጽሮስ የሱሳ ካዴዳ
(ማር. 14:66-72፤ ሉቃሳ 22:56-62፤ ዮሃ. 18:15-18፣ 25-27)
69ጰጽሮስ ጎልያፐ ካረና ድርሳ ግዶን ኡት ደእሽን፥ እት ቆማታ አኮ ያደ፥ “ኔንካ ጋሊላ የሱሳና እትፐ ደኣ” ያጋዱ።
70ሽን እ ኡንቱንቱ ኡባ ስንን ሄ ቆማቶ፥ “ኔን ግያዌ አየንቶ ታን ኤርከ” ያጊደ ካዴዳ።
71ቃይ ቢደ ድርሳ ፐንግያኮ ከስሽን፥ ሀራ ቆማታ አ በኣደ፥ ሄዋን ደእያ አሳቶ፥ “ሀ ብታኒ ናዝሬትያ የሱሳና ደኤ” ያጋዱ።
72ጰጽሮስ ላኤንዋ ጫቂደ፥ “ታን ሄዋ ብታንያ ኤርከ” ያጌዳ።
73ላፋ ጋምእሽን፥ ሄዋን ኤቄዳ አሳይ ጰጽሮሳኮ ዪደ፥ “ኔንካ ቱማ ኡንቱንቱና እትፐ ደኣ፤ አያዉ ጎፐ፥ ኔን ሃሳይያ ሃሳያይካ ኔና ኤርሴ” ያጌድኖ።
74ሄዋፐ ጉይያን ጰጽሮስ፥ “ታን ሄዋ ብታንያ ኤርከ!” ያጊደ፥ ባረና ሸቃነ ጫቁዋ ዶሜዳ።
ሄ ዎደ ኤለካ ኩቱ ዋስ አጌዳ። 75ጰጽሮስ ባረና የሱስ፥ “ኔን ኩቱ ዋሳናፐ ካሰ ሄዙ ካላ ታና ካዳናሳ” ጌዳዋ ሀሳዪደ፥ ካረ ከሲደ፥ ሴለት ዬኬዳ።
Currently Selected:
ማቶሳ ምሽራቹዋ 26: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
