ማቶሳ ምሽራቹዋ 24

የሱስ ጌሻ ጎሊ ኮለታናዋ ካሰቲደ ኦዴዳ

(ማር. 13:1-2፤ ሉቃሳ 21:5-6)

1የሱስ ጌሻ ጎልያፐ ከሲደ ብያ ዎደ፥ ጌሻ ጎልያ ድርሳ ግዶን ደእያ ጎልያ በሳናዉ አ ካልያዋንቱ አኮ ዬድኖ። 2የሱስ ዛሪደ ኡንቱንታ፥ “ሄዋ ኡባ በኢቴ? ታን ህንተንቶ ቱሙዋ ኦዳይ፤ ሀ ጎለቱዋን ደእያ እት ሹቻይነ አተናን ኡባይ ኮለታና” ያጌዳ።

ዎድያ ዉርሰባ

(ማር. 13:3-13፤ ሉቃሳ 21:7-19)

3የሱስ ደብረ ዛይተ ጌተትያ ደርያ ቦላን ኡት ደእሽን፥ አ ካልያዋንቱ ባረንቱ ጻላላ አኮ ዪደ አ፥ “ሄዌ አዉደ ሀናነንቶ፥ ኑዉ ኦዳርኪ፤ ቃይ ነ ዩሳዉነ ዎድያ ዉርሰዉ ማላይ አያ ግዳኔ?” ያጌድኖ።

4የሱስ ዛሪደ፥ ኡንቱንታ ሀዋዳን ያጌዳ፤ “ህንተንታ ኦንነ ባለና ማላ ናገትተ። 5አያዉ ጎፐ፥ ዳሮ አሳይ ታ ሱንን፥ ‘ታን ክርስቶሳ’ ያጊደ ያና፤ ያቲደ ዳሮ አሳ ባለና። 6ማታን ደእያ ኦላ ዋሱዋነ ሃኩዋን ደእያ ኦላ ኦዱዋ ስሳናዉ ህንተንቱ ደኢታ፤ ሄዋ ማላባይ ሀናናዉ በስያ ድራዉ፥ ናገትተ፤ ህርጎፕተ፤ ሽን ዉርሰይ ብራ። 7አያዉ ጎፐ፥ እት ጋድያ አሳይ ሀራ ጋድያ አሳና ኦለታና፤ ቃይ እት ካዉተይ ሀራ ካዉተና ኦለታና፤ ኮሻይነ ቢታ ቃይ ኡባ ሳን ደአናዋ። 8ሄዌ ኡባይካ ኮይሮ ኦይ ማላ።

9“አሳይ ሄ ዎደ ህንተንታ ዋይሳናነ ዎናዋ፤ ታ ሱን ድራዉ፥ ጋደ ኡባይ ህንተንታ እጻናዋ።#ማቶሳ 10:22 10ሄ ዎደ ጮራ አሳይ አማኑዋ አጋናዋንታ፤ ባረንቱ ግዶን እቱ እቱዋ አደ እማናነ እቱ እቱዋ እጻናዋ። 11ቃይ ዎርዶ ናባቱ ጮራቱ ደንዲደ፥ ዳሮ አሳ ጭማናዋንታ። 12ማካላይ ዳርያ ድራዉ፥ ጮራ አሳ ሲቁ እርጻናዋ። 13ሽን ዉርሰይ ጋካናዉ ገንጭያ ኡራይ አታናዋ። 14አሳዉ ኡባዉ ማርካ ግዳና ማላ፥ ካዉተ ዎንጋላ ምሽራቹ ሳኣ ኡባን ኦደታናዋ፤ ሄዋፐ ጉይያን፥ ዉርሰይ ጋካናዋ።”

ባሻ ቱናተ

(ማር. 13:14-23፤ ሉቃሳ 21:20-24)

15“ሄዋ ድራዉ፥ ናብያ ዳኔል ኦዴዳ ባሻ ቱናተይ ጌሻ ሳን ኤቄዳዋ ህንተንቱ በአና፤ ሄዌ ዋግያዌንቶ፥ ናባብያዌ አኬኮ።#ዳኔላ 9:27፤ 11:31፤ 12:11

16“ይሁዳ ጋድያን ሄ ዎደ ደእያዋንቱ ደርያኮ ከስኖ። 17ጎልያ ሁጲያን ደእያ ኡራይካ ባረ ሶይን ደእያዋ አካናዉ ዎፖ። 18ጋደን ደእያዌ ባረ ማዩዋ አካናዉ ጉየ ስሞፖ። 19ሄ ዎደ ሻሃራ ማጫዋንቶነ ንያ ማጫዋንቶ አየሮ። 20ባልጉዋን ዎይ ሳምባታን ህንተንቱ በተና ማላ፥ ጾሳ ዎስተ፤ 21አያዉ ጎፐ፥ አላሚ መቶደፐ ሀቼ ጋካናዉ ደእቤናባይነ ቃይ ሀዋፐ ስንዉካ ኡባ ደኤና ኢታ ዋዪ ሄ ዎደ ደአናዋ።#ዳኔላ 12:11፤ ሳፃ 7:14 22ጾሳይ ሄ ጋላሳቱዋ ፓይዱዋ ጉያዌ ባዌንቶ፥ አሳ ግዴዳ ኦንነ አተና፤ ሽን እ ባረ ዶሬዳ አሳቱዋ ድራዉ፥ ሄ ጋላሳቱዋ ፓይዱዋ ጉናዋ።

23“ሄ ዎደ ኦንነ ህንተንታ፥ ‘በእተ። ክርስቶስ ሀዋን ደኤ’ ዎይ፥ ‘ሄዋን ደኤ’ ያጎፐ አዋ አማኖፕተ። 24አያዉ ጎፐ፥ ዎርዶ ክርስቶሳቱነ ዎርዶ ናባቱ ደንዳና፤ ያቲደ ባረንቶ ዳንዳየቶፐ፥ ሀራይ አቶ ጾሳይ ዶሬዳዋንታካ ባለናዉ ዎልቃማ ማላታነ ማላልስያባ በሳናዋ። 25በእተ፥ ታን ህንተዉ ሄዋ ካሰታደ ኦዳድ።

26“ሄዋ ድራዉ፥ አሳይ ህንተንታ፥ ‘በእተ፥ ክርስቶስ ባዙዋን ደኤ’ ጎፐ፥ ያ ቦፕተ፤ ዎይ ህንተንታ፥ ‘በእተ፥ ቆልኦን ደኤ’ ግንቶካ፥ ኡንቱንቱባ አማኖፕተ። 27አያዉ ጎፐ፥ ዋልቃንይ አዋይፊ ዶልያ ባጋፐ ዋልቃሚደ፥ አዋይፊ ዉልያ ባጋ ጋካናዉ ጶልቁ ግያዋዳን፥ ታ ዩሳይ፥ አሳ ናኣ ዩሳይ፥ ሄዋዳን ሀናናዋ።

28“ባኩታይ ደኢያሳ ሾርቲ ሺቃና።”

አሳ ናአይ፥ ክርስቶስ ላኤንዋ ያና

(ማር. 13:24-27፤ ሉቃሳ 21:25-28)

29“ሄ ዎደ ዋይያፐ ጉይያን፥

ኤለካ አዋይ ማና፤

አገናይ ፖእያዋ አጋናዋ፤

ጾልንታቱ ሳሉዋፐ ኩንዳናዋንታ፤

ቃይ ሳሉዋን ደእያ ዎልቃቱካ ቃጸታናዋንታ።#ኢሳ. 13:10፤ 34:4፤ ህዝ. 32:7፤ ኢዩ. 2:10፣ 31፤ 3:15፤ ሳፃ 6:12-13

30ሄ ዎደ ታ ማላይ፥ አሳ ናኣ ማላይ፥ ሳሉዋን ቤታናዋ፤ ሳኣን ሄ ዎደ ደእያ አሳ ዛሪ ኡባይ ዬካናዋንታ። ቃይ ታን፥ አሳ ናአይ፥ ዎልቃናነ ዎልቃማ ቦንቹዋና ሳሉዋፐ ሻርያ ግዶና ዪሽን፥ ኡንቱንቱ በአና።#ዳኔላ 7:13፤ ዛካ. 12:10-14፤ ሳፃ 1:7 31እ ባረ ኪታንቻቱዋ ዎልቃማ ማላካታና ኪታና፤ ኪታንቻቱ አላመዉ ሀ ጋጻፐ ያ ጋጻ ጋካናዉ፥ ቃይ ሳኣን ኦይዱ ባጋፐ አዉ ዶረቴዳ አሳ ሺሻናዋ።

ጎዳይ ያና ጋላሳ ማላታ

(ማር. 13:28-31፤ ሉቃሳ 21:29-33)

32“ሌምሱዋ ባላሳቶ ጌተትያ ምትፐ አኬክተ፤ ባላሳታ አጭያ ዎደነ እዝ ሀይይ ቆለትያ ዎደ፥ ቦኒ ማቴዳዋ ህንተንቱ ኤራንታ። 33ሄዋዳንካ፥ ህንተንቱ ሄ ኡባባ በእያ ዎደ፥ እ ማቲደ ፐንግያ ሺቄዳዋ ኤርተ። 34ታን ህንተንቶ ቱሙዋ ኦዳይ፤ ሀ ኡባባይ ሀናና ጋካናዉ፥ ሀ ዎድያ አሳይ ሀይቂድገና። 35ሳሉነ ሳአይ አና፤ ሽን ታ ቃላይ ኡባካ አና።

ጎዳይ ያና ጋላሳ ኦንነ ኤረና

(ማር. 13:32-37፤ ሉቃሳ 17:26-30፣ 34-36)

36“ሽን ሄ ጋላሳነ ሄ ሳትያ አዉዋ ጻላላፐ አትን፥ ሀራይ አቶ ሳሉዋን ደእያ ኪታንቻቱዋ ግድና፥ ዎይ ታና ናኣ ግድናካ ኦንነ ኤርያዌ ባዋ። 37ታ ዩሳይ፥ አሳ ናኣ ዩሳይ፥ ኖሄ ዎደ ሀኖዋ ማላ ግዳናዋ።#ዶመ 6:5-8 38አያዉ ጎፐ፥ ባሻ ሃ ዩሳፐ ካሰ ዎደ፥ ኖሄ ማርካብያን ገሌዳ ጋላሳይ ጋካናዉ፥ አሳይ ሜነ ኡሼነ፤ ቃይ አቱማ አሳይ አኬነ ማጫ አሳይ አስና ገሌ። 39ባሻ ሃይ ዪደ፥ ኡንቱንታ ኡባ አፋና ጋካናዉ፥ ኡንቱንቱ አኬክበይክኖ፤ ታን፥ አሳ ናአይ፥ ይያ ዎዲ፥ ሄዋ ማላ ግዳናዋ።#ዶመ 7:6-24

40“ሄ ዎደ ላኡ አሳቱ ጋደን ኦያዋንቱፐ እቱዋ አፋና፤ እቱ አታናዋ። 41ላኡ ማጫዋንቱ ዎጻን ጋጭያዋንቱፐ እትኖ አፋና፤ እትና አታና።

42“ስም ህንተ ጎዳይ አይ ጋላስ ያናዌንቶ ህንተንቱ ኤረና ድራዉ፥ ናግ ኡትተ። 43ሽን ካይሱ ቃማፐ ዎይሳ ዎድያን ያነንቶ ጎልያ ጎዳይ ኤሬደንቶ፥ ባረ ጎሊ ቦከተና ማላ፥ ቤጎቲደ ናግ ኡታናዋ ኤርተ። 44ሄዋ ድራዉ፥ ህንተንቱካ ጊግ ኡትተ፤ አያዉ ጎፐ፥ ታን፥ አሳ ናአይ፥ ህንተንቱ ቆፐና ሳትያን ያና።

ኢታነ ሎኦ ቆማ ሌምሱዋ

(ሉቃሳ 12:41-48)

45“ያትና፥ ባረ ሶይ አሳዉ ቁማ ኮሽያ ዎድያን እማና ማላ፥ አ ጎዳይ ሱንዳ አማነቴዳ ዎዛናማ ቆማይ ኦኔ? 46እ ሄዋዳን ኦሽን፥ አ ጎዳይ ዪደ ደምያ ቆማይ አንጀቴዳዋ። 47ታን ህንተንቶ ቱሙዋ ኦዳይ፤ ጎዳይ ሄ ቆማ ባረዋ ኡባ ቦላ ሱንና። 48ሽን ቆማይ ኢታ ግዶፐ፥ ‘ታ ጎዳይ ጋምኢደ ያናዋ’ ያጊደ ባረ ዎዛናን ቆፒደ፥ 49ባረ ላገ ቆማቱዋ ዋ ዶሞፐ፥ ማትያዋንቱና ሞፐነ ኡሾፐ፥ 50ሄ ቆማ ጎዳይ እ ቆፕቤና ጋላሳንነ እ ኤርቤና ሳትያን ያና። 51ሄዋፐ ጉይያን አ ቃንጸሬደ፥#24:51 አ ቃንጸሬደ፦ ጉሳይ ከስ ካረ ኦላናዋ ግያዋ። ሎአ ማላትያ ኢታ አሳቱ ደእያ ሳን ዎና፤ ሄዋን እ ዬካናነ አቻ ቃና።

Currently Selected:

ማቶሳ ምሽራቹዋ 24: DFBE

Highlight

Copy