ማቶሳ ምሽራቹዋ 23

ሙሴ ህግያ ታማርስያዋንቱነ ፓርሳዋቱዋ ኢታተ

(ማር. 12:38-39፤ ሉቃሳ 11:43-46፤ 20:45-46)

1ሄዋፐ ጉይያን፥ የሱስ ሺቄዳ አሳዉነ ባረና ካልያዋንቶ ሀዋዳን ያጊደ ሃሳዬዳ፤ 2“ህግያ ታማርስያዋንቱነ ፓርሳዋቱ ሙሴ ህግያ ታማርስያ ማታና ደኢኖ። 3ሄዋ ድራዉ፥ ህንተንቱ ኦና ማላ፥ ኡንቱንቱ ህንተንታ አዛዝያ ኡባባ ኦተነ ቃይ ናግተ፤ ሽን ኡንቱንቱ ኦያዋዳን ኦፕተ፤ አያዉ ጎፐ፥ ኡንቱንቱ ባረንቱ ኦድያዋ ኦክኖ። 4ቶካናዉ ዴጽያ ቶኩዋ ኡንቱንቱ ቃቺደ፥ አሳ ቶሲኖ፤ ሽን ባረንቱ ሁጲያን ሀራይ አቶ፥ ሄ ቶኩዋ ብራያን ቦቻናዉካ ኮይክኖ።

5“ሽን ኡንቱንቱ ባረንቱ ኦሱዋ ኡባ አሳይ በአናዳን ኦኖ፤ አያዉ ጎፐ፥ ባረንቱ ሶምእያንነ ባረንቱ ኩሽያ ቀስያን ቃችያ ጽቅስያና ደእያ ክታፋ አሲኖነ ባረንቱ ማዩዋ ማጫራካ አዱሲኖ።#ማቶሳ 6:1፤ ፓይ. 15:37-41፤ ዛረ. 6:8 6አሳይ ባረንታ ሾቢደ አፎሳን ቦንቾ ኡቱዋ ዶሲኖ፤ ቃይ አይሁዳ ዎሳ ጎለቱዋንካ ዳሮ ሎእያ ኦይድያ ዶሲኖ። 7አሳይ ገዋን ባረንታ ቦንቺደ ሳሮታና ማላነ ‘ታማርስያዎ’ ጊደ ባረንታ ጼሳናዳን ኮዪኖ።

8“ሽን ህንተንታ ታማርስያዌ እቱዋ ጻላላ ግዴዳ ድራዉነ ህንተንቱ ኡባይ እሻቱዋ ግዴዳ ድራዉ፥ እቱ እቱዋ፥ ‘ታማርስያዎ’ ጊደ ጼሶፕተ። 9ሀ ሳኣን ኦናነ ‘አዉዋ’ ጊደ ጼሶፕተ፤ አያዉ ጎፐ፥ ህንተንቶ ሳሉዋን ደእያ እት አዉ ደኤ። 10እቱ እቱዋ፥ ‘ታማርስያዎ’ ጊደካ ጼሶፕተ፤ አያዉ ጎፐ፥ ህንተንቶ እት ጎዳይ፥ ክርስቶሳ ጻላላይ ደኤ። 11ህንተንቱ ግዶን ኡባፐ ዳርያዌ ህንተንቶ ቆማ ግዳናዉ በሴ። 12ባረና ዳርስያዌ ኦንነ ቶሸታና፤ ቃይ ባረና ቶችያዌ ኦንነ ቁ ጋና።

ህግያ ታማርስያዋንቱነ ፓርሳዋቱ ቦረቴድኖ

(ማር. 12:40፤ ሉቃሳ 11:39-42፣ 44፣ 52፤ 20:47)

13“ሎአ ማላትያ ኢታቶ፥ ህግያ ታማርስያዋንቶነ ፓርሳዋቶ፥ አሳዉ ሳሉዋ ካዉተ ህንተንቱ ጎርድያ ድራዉ፥ ህንተንቶ አየሮ፤ አያዉ ጎፐ፥ ህንተንቱ ሁጰዉነ ገልክታ፤ ቃይ ገላናዉ ኮይያዋንታካ ገልስክታ።

14“ሎአ ማላትያ ኢታቶ፥ ህግያ ታማርስያዋንቶነ ፓርሳዋቶ አምኤቱዋ ጎልያ ህንተንቱ ቦንቂደ፥ ህንተንቶ ሎአ ማላታናዉ ጾሳ ዎሳ አዱሲታ፤ ሄዋ ድራዉ፥ ህንተንቶ አየሮ፤ ኡባፐ አያ ፕርዳ ህንተንቱ አካና።

15“ሎአ ማላትያ ኢታቶ፥ ህግያ ታማርስያዋንቶነ ፓርሳዋቶ ህንተንቱ እት ኡራ አማንናዉ አባንነ ሳኣን ዩይያ ድራዉነ ቃይ ህንተንቱ አ አማንያ ዎደ፥ ሄ ኡራ ህንተንቱዋፐ ላኡ ኩሽያ ኢቴዳ ጋናመዉ ናኣ ኦያ ድራዉ፥ ህንተንቶ አየሮ።

16“ ‘ኦንነ ጌሻ ጎልያን ጫቆፐ፥ አይነ ባዋ፤ ሽን ጌሻ ጎልያን ደእያ ዎርቃን ጫቆፐ፥ ሄ ጫቁ አ ጋኬ’ ግያ ህንተንቶ ቆቅ ኡቲደ አሳ ካለያዋንቶ፥ ህንተንቶ አየሮ። 17ሀ ኤያቱ፥ ሀ ቆቃቱ፥ ዎርቃይ አዬ? ዎርቃ ጌሻ ኦያ ጌሻ ጎሊ አ? 18ቃይ ህንተንቱ፥ ‘ኦንነ ያርሹዋ ያርሽያባን ጫቆፐ፥ አይኔካ ባዋ፤ ሽን ኦንነ አ ቦላ ደእያ ያርሹዋን ጫቆፐ፥ ሄ ጫቁ አ ጋኬ’ ያጊደ ታማርሲታ። 19ሀ ኤያቱ፥ ሀ ቆቃቱ፥ ያርሹ አዬ? ዎይ ያርሹዋ ጌሻ ኦያ አ ያርሽያባይ አ? 20ሄዋ ድራዉ፥ ያርሹዋ ያርሽያባን ጫቂያ ኡራይ ሄ ያርሽያዋንካ ጫቄ፤ ቃይ አ ቦላ ደእያ ኡባባንካ ጫቄ። 21ጌሻ ጎልያን ጫቂያ ኡራይ፥ ሄ ጌሻ ጎልያንነ አ ግዶን ደእያ ጾሳን ጫቄ። 22ሳሉዋን ጫቂያ ኡራይ፥ ጾሳ ካዉተ ኦይድያንነ ሄ ኦይድያን ኡትያዋን ጫቄ።#ኢሳ. 66:1፤ ማቶሳ 5:34

23“ሎአ ማላትያ ኢታቶ፥ ህግያ ታማርስያዋንቶነ ፓርሳዋቶ፥ ህንተንቶ አየሮ። አያዉ ጎፐ፥ ካረ አኑጋፐ፥ ሽላርያፐነ ኦካሽያፐ አስራታ ህንተንቱ እሚታ፤ ሽን ህግያን ደእያ ዳሪ ኮሽያዋንታ አጊታ፤ ሄዋንቱ ፕርዳ፥ ማሮተነ ጽሎተ። ሀራንታካ አገናን፥ ህንተንቱ ኦናዉ በስያ የዋቱ ሀዋንታ። 24ህንተንቶ ቆቅ ኡቲደ፥ አሳ ካለያዋንቶ፥ ህንተንቱ ኡሻፐ ኡዱንጽያ ጋጪደ፥ ጋሉዋ ምቲታ።

25“ሎአ ማላትያ ኢታቶ፥ ህግያ ታማርስያዋንቶነ ፓርሳዋቶ፥ ህንተንቶ አየሮ። አያዉ ጎፐ፥ ህንተንቱ ሻታነ ከርያ ቦላ ባጋ ጌሺታ፤ ሽን አ ግዱዋን ቦንቂያንነ ኡዘተን ኩንድታ። 26ሀ ቆቃ ፓርሳዌዉ፥ ሻታነ ከርያ ጋርሳ ካሰታደ ጌሻ ድጋ፤ ሄዋፐ ጉይያን፥ ቦላ ባጋይካ ጌሻ ግዳናዋ።

27“ሎአ ማላትያ ኢታቶ፥ ህግያ ታማርስያዋንቶነ ፓርሳዋቶ፥ ህንተንቶ አየሮ። አያዉ ጎፐ፥ ካረ ባጋና ቦሽንቻን ኦከቲደ፥ ሎኦ ኡቲደ፥ ቃይ ጋርሳ ባጋና ሀይቄዳ አሳ መቀይነ ዎቄዳባይ ኡባባይ ኩሜዳ ዱፎቱዋ ማላቲታ። 28ሄዋዳንካ፥ ቃይ ቦላ ባጋና አሳ ኡባዉ ጽሉዋ ማላቲታ፤ ሽን ህንተንቶ ጋርሳ ባጋና ሎአ ማላትያ ኢታተይነ ማካላይ ኩም ኡቴዳ።

29“ሎአ ማላትያ ኢታቶ፥ ህግያ ታማርስያዋንቶነ ፓርሳዋቶ፥ ህንተንቶ አየሮ። አያዉ ጎፐ፥ ናባቱዋ ዱፉዋ ቦላ ጎልያ ኬጺታ፤ ቃይ ጽላቱዋ ዱፉዋካ ሎይታ። 30ቃይ ህንተንቱ፥ ‘ኑን በን ኑ አዎቱዋ ዎደ ደኤዳዋንታ ግድንቶ፥ ኡንቱንቱና እትፐ ናባቱዋ ዎኮ ሽን’ ያጊታ። 31ሄዋ ግዶፐ፥ ናባቱዋ ዎዳዋንቱ ናና ህንተንቱ ግዴዳዋ ህንተንቱ ሁጲያን ማርካቲታ። 32ስም ህንተንቱ አዎቱ ዶሜዳዋ ፖልክቴ!

33“ሀ ሾሻቶ፥ ሾሻ ናናዉ፥ ጋናምያ ፕርዳፐ ዋኒደ አታንቴ? 34ሄዋ ድራዉ፥ በይተ፥ ታን ናባቱዋ አ ኤራንቻቱዋነ ህግያ ታማርስያዋንታ ህንተኮ ኪታና። ኡንቱንቱፐ እቱዋ እቱዋ ህንተንቱ ዎናነ ማስቃልያ ቦላ ምስማርያን ሺደ ካቃንታ፤ ቃይ እቱዋ እቱዋ ህንተንቱ ዎሳ ጎለቱን ልሱዋን ሾጫንታነ ካታማፐ ካታማ የደርሳንታ። 35ሄዋ ድራዉ፥ ጽሉዋ አቤላ ዎደፐ ዶሚደ፥ ጌሻ ጎልያፐነ ያርሽያ ሳፐ ግዱዋን ህንተንቱ ዎዳ ባራክያ ናኣ ዛካራሳ ዎድያ ጋካናዉ፥ ሀይቄዳ ጽላቱዋ ኡባቱዋ ሱ ድራዉ፥ ህንተንቱ ሙረታንታ።#ዶመ 4:8፤ 2 ኦዱዋ 24:20-21 36ታን ህንተንቶ ቱሙዋ ኦዳይ፤ ሀ ኡባባይ ሀ ዎድያ አሳ ቦላ ጋካናዋ።

የሩሳላመዉ ኦደቴዳ ምኖ ኦዱዋ

(ሉቃሳ 13:34-35)

37“የሩሳላመ ካታማ አሳዉ፥ የሩሳላመ ካታማ አሳዉ፥ ናባቱዋ ህንተንቱ ዎታ፤ ጾሳይ ህንተንቱኮ ኪቴዳዋንታካ ሹቻን ጫዲታ፤ ኩታታ ባረ ማራቱዋ ባረ ቀፍያን ሀጵያዋዳን፥ ታን ህንተንቱ አሳ እትሳ ሺሻናዉ አፑ ካላ ኮያድታ! ሽን ታና ድጌድታ። 38በእተ፥ ህንተንቱ ጎሊ ኡባካ ኦና ግዳናዋ።#ኤር. 22:5 39አያዉ ጎፐ፥ ታን ህንተንቶ ኦዳይ፤ ህንተንቱ፥ ‘ጎዳ ሱንን ይያዌ አንጀቴዳዋ ጋና ጋካናዉ፥ ላኤንዋ ታና በእክታ’ ጋይ” ያጌዳ።#ማዝ. 118:26

Currently Selected:

ማቶሳ ምሽራቹዋ 23: DFBE

Highlight

Copy