Jean 16

1Ma haha i gaɗa kinè, skwa da slafadama kinè sak ɓai! 2Ta da dzar kinè auda te gihi njèngè ma Zhiklè tengaʼa. Patsaʼa a di a shkè, aman ndo staɗ staɗ tèlèba man a keɗe kinè, a hérè te ndav na, a ngu skwi man ambaha Zhiklè. 3Skwi ar haha ta da giaʼa, te man ta sun Bab ga ɓai, a ta senyè ɓai, cèw ba. 4Aman ma haha i gaɗa kinè; te deɓaʼa man a da gai, a haka kinè a gèɗ, a gu ara man i gaɗa kinè. I gaɗa kinè ma haha te va nasa ɓai, te man nga nza a nda kinè.

Mizlinè Mèzhèɓ Zhiklè nkezlaʼa

5Aman antanta i dè a sam nengaʼa man a zlindekayè, ko ndo staɗ te ndev kinè a dzhaɗyè azɓai: Ka dè ma? 6Ndav kinè a kuɗai, a géɗ man i gaɗa kinè ma haha. 7Aman i gaɗa kinè skwi nzuraʼa a vava: Dara man i dè ga! Man i dè ga azɓai, ar nengaʼa man a nzaka kinè a deɓa a shkè a sam kinè azɓai. Aman i dè, i da zlindkoɗi a sam kinè. 8A nengaʼa a shkè, a ngreda ta mali ta a ndohi herkeda, a ngi-zuraʼa, a kita. 9Mali ta sa, aman ta da ciyè a ndav ɓai. 10Ngi-zuraʼa sa, aman i dè a sam Bab ga, a kin rkayè azɓai. 11Kita sa, aman ta ga na kita a géɗ a madzagai. 12Njèkèdi ma ga man i woy a i gaɗa kinè a zhè a vata. Aman antanta kin slaha kin cè di ɓai. 13Aman nengaʼa, Mèzhèɓ nzuraʼa nda shkè ma, a ngreda kinè ma nzuraʼa tèlèba. Aman nengaʼa a gèɗè ma te gèɗ na azɓai. Aman ma man a tsenaʼa, a gèɗèʼa; a ngreda kinè skwi man a di a shkè. 14Nengaʼa a da nzalyè, a skwi tèlèba a da cè a sam ga, a da ngreda kinè. 15Skwi tèlèba man Bab ga a ngotso, skwi ga. Gar haha i gaɗa, a cè te skwi ga, a da ngreda kinè.

Nlèyè a da ngwèdè na a mwuffe

16A nʼnzi kètè, kin da rkayè azɓai; te deɓa kètè kin da rkayè. 17Te va golahi nengaʼa ngiɗè ta goɗ a va ta: Ma mè, man a gaɗa nga: A nʼnzi kètè, kin da rkayè azɓai. Te deɓa kètè, kin da rkayè, a i dè a sam Bab ga? 18A ta gaɗa: Naha mè, man a gaɗa: A nʼnzi kètè? Nga sun ma man a gèɗè ɓai. 19Yèsu a suna, ta woy a ta jhèɗèʼa, a ngaɗa ta: Kin verslè a gèɗ man i gaɗa kinè: A nʼnzi kètè, kin da rkayè azɓai. Te deɓa kètè, kin da rkayè, dè? 20A vava, a vava, i gaɗa kinè, kin da kuɗai, kin da gi wobau. Aman ndohi herkeda ta da wuffè. Kin da lèyè; aman nlèyè kinè a da ngwèdè na a mwuffè. 21Ngwoz man a yi kra, a si matakwan a gèɗèʼa, te man pats nyi kra na ma. Aman te deɓaʼa man a ye kra ma, a hér matakwan na asaɓai, aman a wuffè a géɗ kra man a yokoɗai. 22Kinè ba, antanta kin lèyè te ndav kinè. Aman nga da ngècè va zaʼa, a ndav kinè a da wuffè, ndo ngiɗè a da cè mwuffè auda te ndav kinè azɓai. 23A pats nasa kin da jhèɗè ma ngiɗè a sam ga azɓai. A vava, a vava, i gaɗa kinè: Skwi ko mèmè kin jhèɗè te ri Bab ga, a da va kinè a nzlembaɗ ga. 24Ha nshkè na ma a mpatsna, kin dzhaɗa skwi a nzlembaɗ ga ɓai. Vo-dzhoɗo, a kin ngècèʼa, a mwuffè kinè a gi jèlèlèʼa.

Yèsu a ngul herkeda

25Ma haha i gaɗa kinè ara ngèlègèɗ-ma. Patsa a di a shkè, aman i gaɗa kinè a ngèlègèɗ-ma azɓai, aman i ngréɗè ma a géɗ Bab ga auda tsaraya tèlèba. 26A pats nasa kin tsi ri a Zhiklè a nzlembaɗ ga, a i da gaɗa kinè: i tsi ri a Bab ga a géɗ kinè — asakaɓai. 27Aman Bab ga a ri na a woy kinè, a géɗ man kin woy iyè, a kin co a ndav kinè, i shkè te Bi Zhiklè. 28I shkè a sam Bab ga, a i shkèhi a herkeda. Anai i jèkeda herkeda zaʼa, a i dè a sam Bab ga.

29A golahi Yèsu ta gaɗa na: Na haha, antanta ka pa a ma asaɓai, ka goɗ a ngèlègèɗ-ma asaɓai. 30Antanta nga suna, ka sun skwi tèlèba, ko ndo ngiɗè a ndzhad ka ɓai. Gar haha nga co a ndav nga, ka shkè te Bi Zhiklè. 31Yèsu a ngaɗa ta: Antanta kin co a ndav kinè dè? 32Na haha patsa a di a shkè, ani a zhè ma, aman ta venda kinè gèɗ staɗ staɗ tèlèba, a kin jèkyè a géɗ ga. Aman iyè a géɗ ga ka ɓai. Nga a Bab ga. 33Na haha i gaɗa kinè a kin gumi te iye. Tʼherkeda matakwan a ga kinè. Aman va-gsa ndav kinè, i ngul herkeda.

Currently Selected:

Jean 16: MOF89

Highlight

Copy