Jean 14

Yèsu, civèâ a sam Bab Zhiklè

1Kin gu zlau te ndav kinè ɓai! Vo-co Zhiklè a ndav kinè, va-ciyè a ndav kinè ba! 2Te gi Bab ga, sam a zhè kumba. Man az arsa ɓai, ar i gaɗa kinè. I woy a i dè a i tila kinè sam a hai. 3Aman i da tila kinè sam a hai, a di i shkè a deɓa, a i hil kinè a sam ga. Aman a sam man iyè a pa, kinè ba a pa. 4Kin sun sam man i dè a pa, a kin sun civèɗ.

5Thomas a ngaɗa na: Bai, nga sun sam man ka dè a pa ɓai, a nga slaha nga shin civèɗ dè? 6A Yèsu a ngaɗa na: Iyè civèɗ, a ma nzuraʼa, a nshèffê; ndo ngiɗè a shkè a sam Bab ga azɓai, sèi a bezkaɗ a iyè. 7Aman kin senyè, kin sun Bab ga ba. A hinè antanta kin sun nengaʼa, a kin rka nengaʼa ma.

8Philippe a ngaɗa na: Bai, ngra nga Bab-Zhiklè, te deɓaʼa dèʼa. 9Yèsu a ngaɗa na: Nʼnzi ga a sam kinè kumba, a ka senyè ɓi dè, Philippe? Ndo man a rkayè, a rka Bab ga ma, a ka gad kè: Ngra nga Bab nga? 10Ka co a ndav ngaya ɓi dè? I te Bab ga, Bab ga te iyè? Ma man i gaɗa kinè, i goɗ te gèɗ ga ka ɓai. Skwi man i gau, Bab ga man a zhè te ndav ga, a ngau. 11Vo-co ma ga, man i gaɗa: Iyè te Bab ga, Bab ga te iyè. Man ɓai, vo-co ma ga a géɗ skwi man i gau.

12A vava, a vava, i gaɗa kinè: Ndo man a ciyè a ndav na, a gi skwi lèmèlèmè ara ga, a fena ba. Aman iyè, i dè a sam Bab ga. 13A skwi ko mèmè kin jhèɗè a nzlembaɗ ga, i giaʼa, a ta slébèrdè Bab ga te kra na. 14Aman kin jhèɗè skwi te ri ga a nzlembaɗ ga, i woya man i giaʼa.

Mèzhèb Zhiklè nkezlaʼa

15Aman kin woy iyè a ndav kinè, va-fu gèɗ a ma nkwèr ga, 16A i woy a i tsi ri a Bab ga, a va kinè ndo nʼnzaka kinè a deɓa, man a nzi a sam kinè a mèdèp, 17Mèzhèɓ nzuraʼa, man herkeda a slaha a ncè ɓai, te man a rka bai, a sun bai. Aman kinè, kin sun nengaʼa, te man nengaʼa a nzi a sam kinè, a zhè te ndav kinè.

18I jèkè kinè ara wud diki ka ɓai. I da shkè a sam kinè. 19Te deɓa kètè, herkeda a di a rkayè azɓai. Aman kinè, kin da rkayè. A géɗ man i nzi a nshèffè, kinè ba kin nzi a nshèffè. 20A pats nasa kin da suna, i te Bab ga, a kinè te iyè, a iyè te kinè. 21Ndo man a ngots a ma nkwèr ga a fi gèɗèʼa, nengaʼa ndo man a woy iyè a ndav na. Ndo man a woy iyè a ndav na, Bab ga ba a woy nengaʼa a ndav na, a i woyaʼa a ndav ga, a i da ngreda na va ga.

22A Judas, Judas Iscariot ka ɓai, a ngaɗa na: Bai, aman ka woy a ka ngreda nga va ngaya, a ka ngreda ta ndohi herkeda azɓai, èhèmè? 23A Yèsu a mʼmbeɗa na a ma: Ndo man a woy iyè a ndav na, a fi gèɗ a ma ga. Bab ga a da woyaʼa a ndav na. A nga da shkè a sam na, a nga da nzi a sam na. 24Ndo man a woy iyè a ndav na ɓai, a fi gèɗ a ma ga azɓai. Ma man kin tsenaʼa, ma ga ka ɓai, aman ma Bab ga man a zlindekayè.

25Ma haha i gaɗa kinè, man i zhè a sam kinè dai. 26Ndo nʼnza kinè a deɓa, Mèzhèb Zhiklè nkezlaʼa, man Bab ga a da zlündkodai a nzlembaɗ ga, nengaʼa a da senda kinè skwi tèlèba. Ma man i gaɗa kinè, a da hodko kinè tèlèba a gèɗ. 27I jèka kinè gumi ga. Gumi ga i va kinè. I va kinè, ara man herkeda a va kinè ka ɓai. Kin gu zlau te ndav kinè ɓai, kin gudzu ɓai! 28Kin tsenaʼa, ara man i gaɗa kinè: I dè; aman i shkè a deɓa a sam kinè. Aman kin woy iyè a ndav kinè, kin wuf-fè, aman i dè a sam Bab ga, te man Bab ga a fenyè. 29A i gaɗa kinè te ma haha antanta ma, aman nʼnga di ɓai, aman a da gai, kin da cè a ndav. 30Anai i gèɗè ma kumba a sam kinè azɓai. Bi herkeda a da shkè, a ngècè skwi a sam ga azɓai. 31Aman ndohi herkeda da suna, i woy Bab ga a ndav ga, a i gi ara ma nkwèr Bab ga. Va-slambaɗa, ngo-dokoya!

Currently Selected:

Jean 14: MOF89

Highlight

Copy