Jean 13

Yèsu a mpana ta sak a golahi nengaʼa

1Ga ngolala Pâque, Yèsu a suna, tiɗè sam man a nengaʼa a mshkè ma, a da jèkeda herkeda haha, a ndè a sam Bab na. A woy ndohi na, man ta zhè tʼherkeda, a ndav na, a woy ta, ha a ndeva skwi tèlèba. 2A sam skwi nʼndi dakwaɗ, bi madzagai a nfa na a ma Judas Iscariot, kra Simon, aman a ga na ri a gèɗ a Yèsu. 3Yèsu a suna, Bab na a mva na skwi tèlèba a rai, a suna, a shkè te Zhiklè, a ndè a sam Zhiklè, 4a nslambaɗa a sam skwi nʼndai, a nsuɗa na dawar auda a va, a mʼmanda maslaka mizlinè a ma, 5a mɓedza iyam a kokwai, a hüno man a pènè sak golahi nengaʼa, a ntokwola ta a maslaka mizlinè man a manda a ma. 6A Yèsu a mshkè a sam Simon Pierre, a Pierre a ngaɗa na: Bai, ka mpènè sak ga dè? 7A Yèsu a mʼmbeɗa na a ma: Skwi man i gia, ka sun di ɓai. Ka da shinè te deɓaʼa. 8A Pierre a ngaɗa na: Ka panay sak ga bi fèt! Yèsu a ngaɗa na: Aman i pana ka azɓai, nga humdè va a ka azɓai. 9A Simon Pierre a ngaɗa na: Bai, anai ka panay sak genè ɓai, aman ri ga a gèɗ ga tèlèba! 10A Yèsu a ngaɗa na: Ndo man mpana va na ma, sèi a pènè sak mènè. Kinè, kin pana, aman kin tèlè ka ɓai. 11Yèsu a sun ndo nʼnga na ri a gèɗ. Gar haha a ngaɗa: Kinè, kin pana, aman tèlè ka ɓai.

12Aman a mpana sak ta ma, a mfeda maslaka na a va, a nʼnzahai a tsagi tengaʼa zaʼa, a ngaɗa ta: Kin sun skwi man i ga kinè dè? 13Kin bahayè ‘ndo njèngè ma’, a ‘Bai’, a kin goɗ amba. I nengaʼa. 14Aman iyè, bi kinè a ndo njèngè ma kinè, i pana sak kinè, sèi kin gi lèmèlèmè te ndev kinè, ngiɗè a pènè sak a ngiɗè, ngiɗè a ngiɗè. 15Skwi man i ngreda kinè, i va kinè, aman kin gia lèmèlèmè ara man i gu a sam kinè. 16A vava, a vava, i gaɗa kinè: ʼBèlè a fena bab na azɓai. Ndo sak a fena ndo nzlindèʼa azɓai. 17Aman kin sun ar haha, mwuffè a sam kinè, aman kin giaʼa! 18I goɗ a géɗ kinè tèlèba ka bai. I sun tengahi man i par ta. Aman a gi ara ma te ɗèlèwèr Zhiklè man a gaɗa: Ndo man a ndi movar ga, a da ngwodyè. 19I gaɗa kinè ma haha antanta, aman nʼnga di ɓai. Aman a da gai, kin cè a ndav kinè, i zhè. 20A vava, a vava, i gaɗa kinè: Ndo man a cè ndo man i zlündo, a ciyè. A ndo man a ciyè, a cè nengaʼa man a zlindekayè.

Yèsu a hodko ma a géɗ ngi ri a gèɗ nengaʼa

(Mt. 26,20-25; Marc 14,17-21; Luc 22,21-23)

21Aman Yèsu a goɗ ma haha, ndav nengaʼa a mʼmbèɗè, a nʼngreda, a ngaɗa: A vava, a vava: Staɗ te ndev kinè a da gay ri a gèɗ. 22A golahi nengaʼa ta pu di a va ta, a ta gu zlau: Yèsu a goɗ ma haha a géɗ ngè? 23Aman staɗ te va golahi a zhè a sam skwi nʼndai, a dingèdè va a Yèsu, nengaʼa man Yèsu a woyaʼa a ndav na. 24A Simon Pierre a ngaɗa na: Dzhoɗo! A goɗ a géɗ ngè? 25A nengaʼa man a dungoɗ va a Yèsu a ngaɗa na: Bai, nengaʼa wa? 26A Yèsu a ngaɗa na: Nengaʼa man i gaha lak a movar, a i va na. A ngaha lak a movar, a mva na Judas, kra Simon Iscariot. 27Nengaʼa a mco, a Sadan a ndo a ndav na. A Yèsu a ngaɗa na: Skwi man ka giaʼa, gu tsam tsam! 28Ndohi man a sam skwi nʼndai, ta sun ɓai, aman a ngaɗa na ar haha. 29Ngiɗèhi ta huro: gozhèm te ri Judas, Yèsu a woya man a shum skwi ngolala tengaʼa, a va ta skwi a ndohi ntawassàʼa. 30Aman Judas a nco movar, tsam tsam a nde na. Vaɗ ma.

Ma nkwèr mɓuaʼa

31Aman a nʼndo auda ma, Yèsu a ngaɗa: Antanta kra-ndo nʼnzalaʼa, a nʼnjèlè Zhiklè a gudoko na va a di te nengaʼa. 32Aman Zhiklè nʼnzala te nengaʼa, Zhi-klè ba a da njèl Yèsu a ri na ndul ndul. 33Wudahi ga! I nzi a sam kinè kètè dai. Te deɓaʼa kin da hassyè, aman ara man i gaɗa ta ndohi Juif, i gaɗa kinè lèmèlèmè. A sam man i dè a pa, kin slaha kin dè a pa azɓai. 34I va kinè ma nkwèr mɓuaʼa: Va-woy va kinè, ngiɗè da woy ngiɗè, lèmèlèmè ara man i woy kinè a ndav ga. Aman kinè ha, va-woy va kinè, ngiɗè da woy ngiɗè, ngiɗè da woy ngiɗè a ndav na. 35Aman kin gi ar haha, ndohi tèlèba ta suna, kinè golahi ga, te man ngiɗè a woy ngiɗè, ngiɗè a woy ngiɗè.

Yèsu a ngreda, ara man Pierre a da cèkelma a géɗ nengaʼa

(Mt. 26,31-35; Marc 14,27-31; Luc 22,31-34)

36Simon Pierre a ngaɗa na: Bai, ka dè ma? A Yèsu a mʼmbeɗa na a ma: A sam man i dè a pa, ka slaha ka dzadzarkayè antanta azɓai. Aman te deɓaʼa ka da dzadzarkayè. 37A Pierre a ngaɗa na: Bai, i slaha a i dzadzarka antanta azɓai èhè-mè? Ar i vi nshèffê ga a géɗ ngaya! 38A Yèsu a mʼmbeɗa na a ma: Ka vi nshèffè ngaya a géɗ ga dè? A vava, a vava, i gaɗa ka: Ga ngarah a tsi daʼai, ka cèkèlma a géɗ ga sak makar.

Currently Selected:

Jean 13: MOF89

Highlight

Copy