Genèse 37

Joseph a kramamhi na

1Jacob a nʼnza a kokwar Canaan, man bab na a nza a pa ara mbrok. 2Na haha ma verzi Jacob: Aman mvi Joseph 17, a war tambakhi a nda kramamhi na. Joseph gola dai, a nda wudahi Bilha a Silpa, ngwozi bab na. Skwi man ambaɓai, man ta gau, Joseph a da ngreda na bab na. 3A Israel a woy Joseph holholaʼa, a fena wudahi nengaʼa ngiɗè, te man kra babgai. A mva na maslaka nshüɗkè nshüɗkè. 4Aman kramamhi nengaʼa ta rka, bab tengaʼa a woy Joseph a fena kramamhi na, ta gu shèwa a vna, ta gaɗa na ma nhènèkèa azɓai.

5Pats ngiɗè, nshunè a nkeɗa Joseph, a ngra ta kramamhi na. 6A ngaɗa ta: Va-tsenaʼa, nshunè a nkeɗyè! 7Nga tèlèba nga zhè te dak, nga kala dau. A nkèl dau ga a nzlatsa, a nʼnza, nkèl dau kinè ta tèu-da man a ga, a ta zhüdko gèɗ ara man ta gurɓahai a sam nkèl dau ga. 8A kramamhi nengaʼa ta gaɗa na: Ka woy a ka gi bi a géɗ nga ɗè, a ka woy a ka kwor nga ɗè! A ta gu shèwa holholaʼa a géɗ nshunè nengaʼa man a ngra ta. 9A nshun ngiɗè a nkeɗaʼa, a ngaɗa ta kramamhi na zaʼa: Na haha, nshunè a nkeɗyè zaʼa: Pats a kia a bantihi 11, ta gudko gèɗ, ara man ta gurɓahai a sam ga. 10A nengaʼa a ngra na bab na a kramamhi na. A bab na a nga na ndzoan. Nshunè man a nkeɗ ka a haha nkèkèkè? Nga a mam ngaya a kramamhi ngaya, nga da kèlèhi a deɓ sak ngaya ɗè? 11A kramamhi nengaʼa ta gu srak a géɗ nengaʼa. Aman bab na a ngheda maʼa te ndav na.

Kramamhi na ta preda Joseph a ma

12A kramamhi na to do, a ta wèr skwi bab ta te Sichem. 13A Israel a ngaɗa na Joseph: Ka suna, kramamhi ngaya ta wèr skwi te Sichem. Washkè, i woy a i zlinde ka a sam ta. A mʼmbeɗa na a ma: I anai! 14A ngaɗa na: Do, a ka da rka, kramamhi ngaya ta nza genè ɗè? A skwi tèlè ta zhè genè cè? A ka mendokoy ma tengaʼa. A nzlündo te kokwar Hébron, a ndè Sichem. 15A ndo ngiɗè a nʼngotso, ara man a hèsh skwi te dak. A ndo matsa a ndzhodo: Ka woy mè? 16A mʼmbeɗa na a ma: I woy kramamhi ga. Ngray sam man ta wèr skwi a pa! 17A ndo matsa a ngaɗa: Ta jèkeda sam nta, a i tsena ara man ta gaɗa: Nga dè a kokwar Dothan. A Joseph a ndo a verzi kramamhi na, a nʼngats ta te Dothan. 18Aman ta rka dra, ta vhè ma a géɗèʼa, ga a ndikè a sam ta, a ta woya aman ta keɗaʼa. 19A ta goɗ a va ta: Na haha ndo nshunè a shkè! 20Yowa, ngo-kuɗokoya, a ngo-vokoy nckondo a vèvèɗ, a nga da gaɗa, skwi dak a nʼndedama. Te deɓaʼa nga da rka skwi nshun nenga dai. 21A Ruben a ntsenaʼa, a woy a mbelaʼa te ri tengaʼa, a ngaɗa: Dara ngo-keɗokoy ɓai! 22A Ruben a ngaɗa ta: Kin gudko na Pombaz auda bai! Va-kalda a vèvèɗ haha, tʼhèshèkèɗ! Aman kin zeda nshèffè na ɓai! A woya a mbelda te ri tengaʼa, aman a nda a deɓa a sam bab na. 23Aman Joseph a ndika a sam kramamhi na ma, ta suɗama na maslaka nshüɗkè nshüɗkè auda a va, 24a ta gso, a ta kalda a vèvèɗ iyam. Iyam a te pa ɓai.

25A ta nzahai a ta ndau skwi nʼndai. Aman ta ngul dai, ta rka ndohi gani Ismael a ta shkè a zlugumihi te kokwar Galaad, a votok a burdi a kuɗ wof a deɓ zlugumihai, a ta dè a kokwar Egypte. 26A Juda a ngaɗa ta kramamhi na: Mʼmba te pa mè, aman a nga keɗe kramam nga, a nga ngheda mʼmetsi na! 27Vo-washkè, ngo-prokoy a ma a sam ndohi Ismael, a nga zeda nshèffè na ɓai. Nengaʼa kramam nga, zluèɗ va nga staɗgenè. A kramamhi nengaʼa ta co ma nengaʼa. 28Aman ndohi gani Madian ta beza a pa, ta cko Joseph auda te vèvèɗ. A ta preda Joseph a ma a sam ndohi Ismael, te di gurso 20, a ta da Joseph a kokwar Egypte. 29Aman Ruben a mshkè a deɓa a sam vèvèɗ iyam, a nʼngatsa Joseph te pa bai. A nkuratseda maslaka nengaʼa aussa a va. 30A mshkè a deɓa a sam kramamhi na, a ngaɗa: Kramam nga azɓai! Ani i da gi kè?

31A ta co maslaka Joseph, ta keɗa mazawal, a ta kalda maslaka Joseph a va Pombaz. 32A ta zlinda maslaka nshüɗkè nshüɗkè a deɓa a sam bab ta, a ta gaɗa: Skwi haha nga ngotskoɗai. Wora, maslaka kra ngaya ka ɓi ɗè? 33Aman a rkaʼa, a ngaɗa: Maslaka kra ga a vava. Skwi dak a nʼndedama. A vava, skwi a nʼndeda Joseph a ma! 34A Jacob a nkuratsa maslaka nengaʼa, a nkalda maslaka sam kuɗa a va, a nkuɗi kra na nʼnzi a zhè. 35A wudahi nengaʼa tèlèba, a dalahi na tèlèba, ta shkè a ta bidèʼa. Aman nengaʼa a nca bai, a ngaɗa: Azɓai, i da kuɗi kra ga, ha i metsi ga a vaʼa. Aranta bab nengaʼa a kuɗiaʼa. 36Aman ndohi Madian ta preda Joseph a ma te kokwar Egypte, a sam Potiphar, ntokotasl bai, tsuvom ndohi mɓer gèɗ bai.

Currently Selected:

Genèse 37: MOF89

Highlight

Copy