Genèse 27

Isaac pshè na ma Jacob

1Isaac nhala ma, a rka di zura ɓai, a mbaha na Esau, tsuvom na, a ngaɗa na: Kra ga! A nengaʼa a mʼmbeɗa na a ma: Iyè anai! 2A ngaɗa na: Na haha, i hala ma, i sun pats man i da metsi ga ɓai. 3Co lèkèɗ ngaya, do dak, a ka keɗkay zluèɗ! 4A ka tèsha mbelembela, a njénahayè, a ka ckoy a gai, a i ndiaʼa, a i pshè ka ma, ga i metsi ga. 5Rebecca a mpu va, a ntsena ma man Isaac a gaɗa na Esau. Aman Esau a ndo dak, a nda keɗa zluèɗ a bab na.

6A Rebecca a ngaɗa na Jacob, kra na: Na haha i tsena ara man bab ngaya a ngaɗa na Esau, kramam ngaya: 7Keɗay zluèɗ, tèshèy mbelembela, a i ndiaʼa, a i pshè ka ma a sam di Ndo nzi pèc pècèk, ga i metsi ga. 8Anai kra ga, tsena ma ga, gu ara man i gaɗa ka. 9Do a va rèwè skwai, hulkoy wud ɓoki cèw hudbassahiaʼa. I woy a i tèshè na bab ngaya, aman a jénaha. 10A ka da na bab ngaya, aman a ndiaʼa, a pshè ka ma, ga a metsi na. 11A Jacob a ngaɗa na Rebecca, mam na: Na haha Esau, kramam ga, gwots a va; iyè gwots az a va ga ɓai. 12Aman gar bab ga a da taraha yè, kè? A i da ndi ga a sam na a ndo nʼngwèdè ndo, a i da ngècè mpshè ma ka ɓai, i da ngècè ma mphomdaʼa. 13A mam nengaʼa a ngaɗa na: Ma mphomdaʼa a gèɗ ga, a géɗ ngaya ka ɓai! Gu ara man i gaɗa ka genè. Hulkoɗi genè! 14A nengaʼa a mdo, a nhulkoɗi wud ɓoki, a mva na mam na. A mam na a ntaʼa, a ntèshèʼa, ara man a jénaha bab na. 15A Rebecca a nco maslaka ngolala Esau, tsuvom na, te gi na, a mva na a va Jacob, ntabaw na. 16A bkwi ɓok a mpaɗa na a rai, a daʼai nengaʼa ba, man gwots az a pa ɓai. 17A mva na lak a zluèɗ ntèshèʼa a ri a Jacob.

18A nengaʼa a mdo a sam bab na, a ngaɗa: Bab ga! A nengaʼa a mʼmbeɗa na a ma: Iyè anai! Kra ga, ka wa? 19A Jacob a ngaɗa na bab na: I Esau, tsuvom ngaya. I gokoɗai ara man ka gaɗayè. Slambaɗa, a ka nza a verzai, a ka ndau zluèɗ dak ga, a ka pshèy ma a pa. 20A Isaac a ngaɗa na kra na: Kra ga, ka ngotsko tsam-tsam langa ɗè? A mʼmbeɗa na a ma: Ndo nzi pèc pècèk, Zhiklè ngaya, a mvayè. 21A Isaac a ngaɗa na Jacob: Herdekay va, kra ga, aman a i taraha ka dai. Ka Esau, kra ga ɗè? 22A Jacob a nherda na va a Isaac, a nengaʼa a ntaraha a rai, a ngaɗa: Daʼai Jacob, aman ri Esau. 23A sun nɗèlè ɓai, te man rai, gwots a pa, ara ri Esau, kramam na. Gar haha a mpshè na ma. 24A ngaɗa na: A vava ka Esau, kra ga, ɗè? Jacob a mʼmbeɗa na a ma: Halau, i nengaʼa. 25Isaac a ngaɗa na: Gar haha ckoy lak a i ndi zluèɗ dak kra ga, a i pshè ka ma. A ncko na lak, a ndiaʼa. A mva na barassa, a nsiaʼa.

26A Isaac, bab na, a ngaɗa na: Wash-kè, kra ga, kelaway ri a daʼai! 27A nengaʼa a mdo, a nkelawa na ri a daʼai. A maslaka kra na a nzhkèha, a mpshè na ma: Na haha, va kra ga a zhkèhayè, ara man a shkè te dak, man Ndo nzi pèc pècèk a mpshè na ma.

28Bi Zhiklè da va ka minmèn te zhiklè, da pa ka mandai, skwi nʼndai a skwi nsai a vata. 29Ndohi herkeda da ga a ɓèl ngaya; ndohi kokwarhai da gurɓahi a sam ngaya; gu bai a géɗ kramamhi ngaya, a wudahi mam ngaya da gurɓahai a sam ngaya. Ndo man a phomde ka, da phomda. Ndo man a pshè ka ma, da ngots mpshè ma!

30Aman Isaac a mpshè na ma Jacob klèng ma, Jacob a nslambaɗa auda a sam bab na ma, a nasa nasa Esau a mshkè ngwi te dak. 31A nengaʼa ba a ntèshè na zluèɗ, a nɗaʼa a sam bab na. A ngaɗa na bab na: Bab ga, slambaɗa, nza a verzai, ndau zluèɗ dak kra ngaya, a i ngècè mpshè ma a sam ngaya. 32A Isaac, bab na, a ngaɗa na: Ka wa? A mʼmbeɗa na a ma: I Esau, kra ngaya, tsuvom ngaya. 33A Isaac a ngudzu a vata, a ngaɗa: Kos nengaʼa man a ɓor zluèɗ a nckoyè, wa? I ndau antanta, ga ka shkè a haha, a i pshè na ma. A mpshè ma a nzi a géɗ nengaʼa. 34Aman Esau a ntsena ma bab na, a gi wobau, a kuɗi a vata, a ngaɗa na bab na: Pshèy ma iyè ba, bab ga! 35A Isaak a ngaɗa na: kramam ngaya a mwuckaɗa metsar, a nceda mpshè ma ngaya a ma. 36Esau ngaɗa na: Nzlembaɗ nengaʼa Jacob a vava#Ndo nʼngwèdè ndo.. Aman nengaʼa a nʼngwo-dyè sak cèw ma. A ncèmay nʼndi-gi ga, antanta a ncèmay mpshè ma zaʼa. A ngaɗa: Njèkè mpshèma ngaya di man a ga ga azɓi ɗè? 37A Isaac a mʼmbeɗa na a ma, a ngaɗa na Esau: Na haha, i geda nengaʼa a bi a géɗ ngaya, a i ge ta kramamhi nengaʼa tèlèba a ɓèlèlihi na, a i gaɗa na: da ngots nda skwi nʼndai a skwi nsai a vata. I gi a sam ngaya za mè, kra ga? 38A Esau a ngaɗa na bab na: Bab ga, mpshè ma ngaya, na staɗgenè ɗè? Pshèy ma a iyè ba, bab ga! A Esau a hinè a nkuɗi a vata.

39A Isaac, bab na, a mʼmbeɗa na a ma: Na haha gi ngaya a ngècè mandai, nda skwi nʼndai a skwi nsai, a vata azɓai, a minmèn a gi a dak ngaya azɓai. 40Ka ndi skwi tsakwal ngaya, a ka gi ɓèl kramam ngaya. Aman a ɗa gi ar haha: Ka da gi wuɗi a va, a ka da kalda wof nengaʼa nkelawa te daʼai ngaya.

41A Esau a gi shèwa a Jacob, a géɗ mpshè ma man bab na a mpshè na ma a vna. Esau a ngoɗ te géɗ na: Ndul ndul ma, ta da kuɗi bab ga. Te deɓaʼa i woy a i keɗa Jacob, kramam ga. 42Aman ta ngra na ma Esau, tsuvom na, a Rebecca, a nzlündo ndo, da bahka na Jacob, ntabawaʼa, a ngaɗa na: Na haha Esau, kramam ngaya, a woya a nkeɗe ka, te di skwi man ka ga na. 43Gar haha tsena ma ga, kra ga: slambaɗa, a ka hu a sam Laban, kramam ga, te Charan, 44nza a sam na kètè, a ndav kramam ngaya a pkwe na dai, 45a kramam ngaya a gi ndav a géɗ ngaya asaɓai, a skwi man ka ga na a pce na a géɗ. Te deɓaʼa i da zlindè ndo a i baha ka a deɓa. Kin cèw kin zi kinè a pats staɗ a sam ga èhèmè?

46A Rebecca a ngaɗa na Isaac: I ngeza te ri dalahi Heth. Aman Jacob a da cè ngwoz a sam tengaʼa, dem Heth, dem kokwar haha, dara man nshèffè ga da ze na.

Currently Selected:

Genèse 27: MOF89

Highlight

Copy