Genèse 26

Isaac te Guérar

1Mi mbiaʼa a ngu a kokwar, a fena mi te va man Abraham a di dai. A Isaac a ndo a kokwar Guèrar, a sam bi Abimélec, bi Philistie. 2A Ndo nzi pèc pècèk a ngudoko na va a dai, a ngaɗa na: Ko do a kokwar Egypte ɓai, nza te kokwar man i da ngra ka. 3Nza a kokwar haha a mbrok, i woy a i zhè a nda ka, a i pshè ka ma. Aman i woy a i va ka herkeɗa haha tèlèba, i woy a i va ka a ndohi verzi ngaya, a i gi ara man i mbaɗa na a Abraham, bab ngaya. 4I woy a i ga ndohi verzi ngaya kumba, ara bantihi te giɗfèk, a i va ta herkeda haha tèlèba a ndohi verzi ngaya, a ndohi herkeda tèlèba ta da ngècè mpshè ma a nzlembaɗ ngaya, 5a géɗ man Abraham a nfu gèɗ a ma ga, a ngu skwi tèlèba ara man i jhèɗèʼa te ma nkwèr ga, te ma bi ga, te ma kita ga. 6A Isaac a nʼnza a Guérar.

7Aman ndohi kokwar sa ta dzhoɗo a géɗ ngwoz nengaʼa, a ngaɗa: Demam ga! A gi zlau man a gaɗa ta, nengaʼa ngwoz ga. A nhur te ndav, ndohi kokwar sa ta da kéɗèʼa a géɗ Rebecca, a géɗ man nengaʼa mbikaɓai. 8Aman a nʼnza a pa nʼnzi a zhè, a Abimélec, bi ndohi Philistie a mpu di auda a nvakavar, a nrka Isaac ta shimèɗ va a Rebecca, ngwoz na. 9A Abimélec a mbaha na Isaac, a ngaɗa na: Nengaʼa ngwoz ngaya, a ka gaɗa demam ga èhè-mè? A Isaac a mʼmbeɗa na a ma: I hur i da ngècè mʼmetsai a géɗ nengaʼa. 10A Abimélec a ngaɗa: Ka ga nga a haha mè! Ka suna, tsam-tsam ndohi kokwar haha ta slaha ta kala na a va ngwoz ngaya, a ka fa nga mali a gèɗ, kè! 11A Abimélec a mfa ta ma a gèɗ a ndohi kokwar nengaʼa tèlèba: Ndo man nda lama na ngwozai, man ɓai géɗ va bakiaʼa, ta da kéɗèʼa.

12A Isaac a ngu dau te kokwar sa, a nʼngots skwi a ndiv ɓai. Aman Ndo nzi pèc pècèk a mpshè na ma. 13Isaac a nʼnga a ndo mèshèlè a ma ma, ha a nʼnde na a ndo mbiaʼa a vata. 14Rèwè tambakihi na a zhè, rèwè zlèhai, a ndohi mizlinè kumba. A ndohi Philistie ta gu srak a géɗ nengaʼa.

Thal iyam te ndev Guérar a Beer-Shéba

15A thal iyam tèlèba, man ɓèlèlihi bab na ta rau, te va man Abraham a zhè dai, ndohi Philistie ta vshèʼa a herkeda. 16A Abimélec a ngaɗa na Isaac: Do ngaya, ka mbiaʼa, ka fen nga. 17A Isaac a ndo na, a ngu gi na a dal Guérar, a nʼnza a pa. 18A Isaac a nrau thal iyam zaʼa, man ɓèlèlihi Abraham, bab na, ta rau te va nasa, man Abraham a zhè dai, a ndohi Philistie ta vshèʼa, te deɓ mʼmetsi Abraham. A mva ta nzlembaɗ lèmèlèmè ara man Abraham a mva ta. 19Aman ɓèlèlihi Isaac ta tsaka thal, ta ngots iyam a loloyko va auda. 20A ndohi mɓer skwi te Guérar ta bozl va a ndohi mɓer skwi Isaac, a ta gaɗa: Iyam nga! A mbaha na thal sa Esek#Ara ngèɗè, Ngi ma. , a géɗ man ta gu ma a géɗèʼa. 21Te deɓaʼa a nrau thal ngiɗè, a ta bozl va a géɗèʼa zaʼa. A mbaha na Sitna#Ara ngèɗè, Mbèzl va. . 22Te deɓaʼa a nslambaɗa, a nrau thal ngiɗè zaʼa; a géɗ nengaʼa ta ga ma ɓai. A géɗ nengaʼa a mbaha na Rehoboth#Ara ngèɗè, Sam mpraʼa. , a ngaɗa: Antanta Ndo nzi pèc pècèk a mva nga sam mpraʼa, a nga grè a ma ma te kokwar.

23Te pa a ndo a Beer-Shéba. 24A Ndo nzi pèc pècèk a ngudoko na va a dai a vaɗ sa, a ngaɗa: Iyè Zhiklè Abraham, bab ngaya. Ka gu zlau ɓai, i zhè a sam ngaya. I woy a i pshè ka ma a ndohi verzi ngaya ta mènè a vata, a géɗ Abraham, ɓèl ga. 25A nengaʼa a nrom sam mvi skwi a Zhiklè a pa, a ntsa na ri a Ndo nzi pèc pècèk. A Isaac a ngu gi na a pa, a ɓèlèlihi na ta rau thal iyam a pa.

Nderzlè-ma a Abimélec

26Pats ngiɗè Abimélec te Guérar a mshkè a sam na, a nda Ahuzath, mandai na, a Picol, bi-sojè na. 27A Isaac a ngaɗa ta: Anai kin gi shèwa a nga, a kin dzam nga auda a sam kinè. Kin shkè a sam ga èhèmè? 28Ta gaɗa na: Anai nga rka a vava, Ndo nzi pèc pècèk a zhè a nda ka. Gar haha nga huro, dara nga dérzlè ma nga a ka a mʼmbèɗè, a nga derzla ma nga a ka, 29a ka da ga nga matakwan azɓai, lèmèlèmè ara nga, nga ga ka matakwan azɓai, nga va ka civèɗ a gumai. Ka ndo man Ndo nzi pèc pècèk a pshè na ma. 30A Isaac a ntila ta skwi nʼndai, a ta ndau, a ta sau. 31Te mangoslèmaʼa a prèk, ta mboɗ mʼmbèɗè. A Isaac a mpre ta, a ta kezla gèɗ a gumai. 32A pats nasa ɓèlèlihi Isaac ta shkè a ta gaɗa na a géɗ thal man ta rau, a ta gaɗa: Nga ngots iyam! 33A mbaha na Shiba#Ara ngèɗè, Mbèdè. . A géɗ nengaʼa, nzlembaɗ samaʼa Beer-Shéba, ha patsna.

34Aman mvi Esau 40, a nco Judith, dem Beéri, ndo Heth, a Basmath, dem Elon, ndo Heth, a ngwozi na. 35A géɗ ta cèw ba, ndav a ndza ta nda Isaac a Rebecca kumba.

Currently Selected:

Genèse 26: MOF89

Highlight

Copy