Genèse 19

Zhìklè a gedassa Sodome a Gomorrhe

1A golahi Zhiklè cèw ta ndikè Sodome a pats dakwaɗ, a Lot a nʼnza a ntamagi kokwar Sodome. Aman a nrka ta, a nslambaɗa, a nhaka ta ma, a nkalahi a deɓ sak tengaʼa. 2A ngaɗa: Bihi ga, vo-washkè a gi ɓèl kinè, a kin mènè a sam ga a vaɗ, a kin pana sak kinè. A prèk te gai kin dè dè kinè a ma ma. A ta gada na: Aʼai, nga mènè auda a dala. 3A Lot a ntitka ta a gèd, a to do a gi na. A nengaʼa a ntila ta skwi nʼndai, a nta movar man skwi nshégèrè a te di bai, a ta ndau. 4Ga ta mènèhai, ndohi Sodome, golahi a ngurhi tèlèba, ta tèuda gi nengaʼa a pa. 5A ta baha na Lot, a ta gaɗa na: Ndohi man ta shkè a sam ngaya, ta tema? Helka ta auda a sam nga, a nga mènè a ndav ta!

6A Lot a ndo auda a dalmagai, a mpizlèda gi a pa, a ngaɗa: 7I tsa kinè rai, a kramamhi ga, kin gu skwi ambaɓia ɓai! 8Na haha, dalahi ga cèw ta zhè, ta sun baki di ɓai, i pa kinè tengaʼa; va-gau a tengaʼa ara man kin woyaʼa. Sèi ndohi ncèw sa, kin ga ta skwa ɓai! Ta shkèda hwaɗ gi ga. 9Aman ta boho: Kazla ngay auda a haha! A ta gada: Ka ndo mbrok a haha, a ka woy a ngi a ndo kita nga ɗè? Nga woy a nga ga ka skwi ambaɓia holholaʼa, a fena man a tengaʼa. A ta kala na va, a ta woy a ta kuratsa ntamagai. 10A ndohi te gai ta tor rai, a ta ceda Lot a gai, a ta ɓara ntamagai. 11A ndohi a ntamagai, ta nde ta a mandazlihai, golahi a ngurhi, a ta tètèr ntamagai, a ta rka ɓai.

12A ndohi ncèw sa ta gada na Lot: Te kokwar haha ndohi ngaya ngiɗè ta zhi dè? Wudahi ngaya a dalahi ngaya, a tsim tengaʼa ko wawa te kokwar haha man ngwoli ngaya, hel ta auda te kokwar haha! 13Aman a vava nga da gédèshè kokwar haha, te man labar ma nengaʼa ndo a sam Ndo nzi pèc pècèk. Ndo nzi pèc pècèk a nzlindeka nga, a nga da gédèshèʼa. 14A Lot a ndo a ta goɗ a ntsim dalahi nengaʼa, man ta woy dalahi Lot, a ngaɗa: Va-slambaɗa, va jèkeda sam haha! Aman Ndo nzi pèc pècèk a woya a ngedassa kokwar haha! Aman ntsim dalahi na ta hur ara ma walai.

15A prèk te gai, golahi Zhiklè ta vosso Lot, a ta gada: Slambaɗa, co ngwoz ngaya a dalahi ngaya cèw man ta zhè a haha, kita kokwar haha da hel kinè a ma bai! 16Aman a ngu ndudoh dai, ngurhi ta gso riaʼa, a ngwoz na, a dalahi na cèw, a ta ngazl ta, a ta jèke ta a dal kokwar, te man ta si Ndo nzi pèc pècèk te va. 17Aman ta hel ta auda ma, ta gada ta: Va-mbelda nshèffè kinè! Kin da paka di a deɓa a civèɗ bai, kin zlatsahi a civèɗ a dala ambali bai! Va-hu a deɓ za, man bai kin da zi kinè! 18Aman Lot a ngaɗa na: Ndo nzi pèc pècèk, az arsa ɓai! 19Ɓèl ngaya a nʼngots pombai a sam di ngaya, a ka ta-kahayè, a ka mbelay nshèffè ga. Aman i slaha a i hi a deb za azbai. I gi zlau, skwa a da gayè te pa, a i metsi ga. 20Na haha, kokwar nkèshèa ngiɗè a zhè ndul ndul, a i hi a pa. Vay civèɗ a i hi a pa. Kokwar nkèshèa ka bi dè? A i mbel nshèffè ga a pa. 21A nengaʼa a mʼmbeɗa na a ma: Anai i va ka civèɗ ar haha ba. I woy a i gedassa kokwar man ka goɗ a haha bai. 22Yau, yau, mbel ngaya a pa! Ha ka ndi-kè a pa, i slaha man i gi skwi di azbai. Gar haha ta baha na kokwar sa Tsoar#nkèshèa.. 23A pats a nhulko gèd ma a Lot a ndikè a Tsoar. 24A Ndo nzi pèc pècèk a mwusheda vogwa a skwi mvècè vogwa a gèd Sodome a Gomorrhe, ara iyam man a shkè te zhiklè, 25a ngedassa kokwar a dal kokwar a ndohi kokwar a skwi man a gèɗ herkeda te pa. 26A ngwoz Lot a mpeda di a deɓa, a nʼnde na a blèm.

27Te mangoslèmaʼa a prèk, Abraham a nslambaɗa, a ndo a sam man ta zlatsa a pa a Ndo nzi pèc pècèk, 28a mpu di a civèɗ Sodome a Gomorrhe, a dal Sodome. A nrka vodzok te pa, ara vodzok gezla. 29Aman Bi Zhiklè a ngedassa kokwar haha a vara, a nhur Abraham, a mda Lot auda a sam ngedassaʼa; aman sam nʼnzi Lot, a ngedassaʼa te pa. 30Lot a njèkeda kokwar Tsoar, a nʼnza a deɓ za a nda dalahi nengaʼa cèw. A gi zlau aman a nzi a kokwar Tsoar. A ta nza a bodom te za, a nda dalahi nengaʼa.

Verzi Moab a Ammon

31Tsuvomaʼa a ngaɗa na mbegédèʼa: Bab nga nhala ma, ndo ngiɗè azbai tʼherkeɗa, aman nga mènè a vna, ara man ta gi a gèɗ herkeda. 32Washkè, nga va na barassa a bab nga, a nga mènè a vna, aman verzi bab nga a zi azbai. 33A vad sa ta va na barassa a bab ta. A tsuvomaʼa a ndo a mʼmana a vna, bab na a nsenaha bai, ko man ta mana a vna, ko man a nslambaɗ na auda a sam na, a nsenaha bai. 34A prèk tsuvomaʼa a ngaɗa na mbegéɗèʼa: Na haha nga mana a bab ga adatsa. A patsna a vad nga da va na barassa zaʼa, te deɓaʼa ka, kin dè mènè a vna, a verzi bab nga a zi azɓai. 35A vaɗ sa ta va na barassa a bab ta a sia zaʼa. Mbegéɗèʼa a nslambaɗa, a nda mana a bab na. Bab na a nsenaha bai, ko man ta mana a vna, ko man a nslambaɗ na auda a sam na, a nsenaha bai. 36A dalahi Lot ta ngots kra a hwaɗ a sam bab ta. 37Tsuvomaʼa a nyu kra, a mbaha na Moab (te bab ga). Nengaʼa bab ndohi Moab, ha patsna. 38Mbegéɗèʼa ba a nyu kra, a mbaha na Ben-Ammi. Nengaʼa bab ndohi Ammon, ha patsna.

Currently Selected:

Genèse 19: MOF89

Highlight

Copy